વરાહ પુરાણ · અધ્યાય 90

શ્રીવરાહ ઉવાચ ।
શ્રૃણુ ચાન્યં વરારોહે તસ્યા દેવ્યા મહાવિધિમ્ ।
યા સા ત્રિશક્તિરુદ્દિષ્ટા શિવેન પરમેષ્ઠિના

તત્ર સૃષ્ટિઃ પુરા પ્રોક્તા શ્વેતવર્ણા સ્વરૂપિણી ।
એકાક્ષરેતિ વિખ્યાતા સર્વાક્ષરમયી શુભા

વાગીશેતિ સમાખ્યાતા ક્વચિદ્ દેવી સરસ્વતી ।
સૈવ વિદ્યેશ્વરી દેવી સૈવ ક્વાપ્યમિતાક્ષરા ।
સૈવ જ્ઞાનવિધિઃ ક્વાપિ સૈવ દેવી વિભાવરી

યાનિ સૌમ્યાનિ નામાનિ યાનિ જ્ઞાનોદ્ભવાનિ ચ ।
તાનિ તસ્યા વિશાલાક્ષિ દ્રષ્ટવ્યાનિ વરાનને

યા વૈષ્ણવી વિશાલાક્ષી રક્તવર્ણા સુરૂપિણી ।
અપરા સા સમાખ્યાતા રૌદ્રી ચૈવ પરાપરા

એતાસ્ત્રયોઽપિ સિદ્ધ્યન્તે યો રુદ્રં વેત્તિ તત્ત્વતઃ ।
સર્વગેયં વરારોહે એકૈવ ત્રિવિધા સ્મૃતા

એષા સૃષ્ટિર્વરારોહે કથિતા તે પુરાતની ।
તયા સર્વમિદં વ્યાપ્તં જગત્ સ્થાવરજઙ્ગમમ્

યા સાઽઽદૌ વર્દ્ધિતા સૃષ્ટિર્બ્રહ્મણોઽવ્યક્તજન્મનઃ ।
તયા તુલ્યાં સ્તુતિં ચક્રે તસ્યા દેવ્યાઃ પિતામહઃ

બ્રહ્મોવાચ ।
જયસ્વ સત્યસંભૂતે ધ્રુવે દેવિ વરાક્ષરે ।
સર્વગે સર્વજનનિ સર્વભૂતમહેશ્વરિ

સર્વજ્ઞે ત્વં વરારોહે સર્વસિદ્ધિપ્રદાયિની ।
સિદ્ધિબુદ્ધિકરી દેવિ પ્રસૂતિઃ પરમેશ્વરિ

ત્વં સ્વાહા ત્વં સ્વધા દેવિ ત્વમુત્પત્તિર્વરાનને ।
ત્વમોઙ્કારસ્થિતા દેવિ વેદોત્પત્તિસ્ત્વમેવ ચ

દેવાનાં દાનવાનાં ચ યક્ષગન્ધર્વરક્ષસામ્ ।
પશૂનાં વીરુધાં ચાપિ ત્વમુત્પત્તિર્વરાનને

વિદ્યા વિદ્યેશ્વરી સિદ્ધા પ્રસિદ્ધા ત્વં સુરેશ્વરિ ।
સર્વજ્ઞા ત્વં વરારોહે સર્વસિદ્ધિપ્રદાયિની

સર્વગા ગતસંદેહા સર્વશત્રુનિબર્હિણી ।
સર્વવિદ્યેશ્વરી દેવી નમસ્તે સ્વસ્તિકારિણિ

ઋતુસ્નાતાં સ્ત્રિયં ગચ્છેદ્ યસ્ત્વાં સ્તુત્વા વરાનને ।
તસ્યાવશ્યં ભવેત્ સૃષ્ટિસ્ત્વત્પ્રસાદાત્ પ્રજેશ્વરિ ।
સ્વરૂપા વિજયા ભદ્રા સર્વશત્રુપ્રમોહિનિ

॥ ઇતિ શ્રીવરાહપુરાણે ભગવચ્છાસ્ત્રે નવતિતમોઽધ્યાયઃ