વરાહ પુરાણ · અધ્યાય 47

દુર્વાસા ઉવાચ ।
શ્રાવણસ્ય તુ માસસ્ય શુક્લપક્ષે તુ દ્વાદશી ।
અર્ચયેત્ પરમં દેવં ગન્ધપુષ્પૈર્જનાર્નમ્

દામોદરાય પાદૌ તુ હૃષીકેશાય વૈ કટિમ્ ।
સનાતનેતિ જઠરમુરઃ શ્રીવત્સધારિણે

ચક્રપાણયેતિ ભુજૌ કણ્ઠં ચ હરયે તથા ।
મુઞ્જકેશાય ચ શિરો ભદ્રાયેતિ શિખાં તથા

એવં સંપૂજ્ય સંસ્થાપ્ય કુમ્ભં પૂર્વવદેવ તુ ।
વિન્યસ્ય વસ્ત્રયુગ્મં તુ તસ્યોપરિ તતો ન્યસેત્

કાઞ્ચનં દેવદેવં તુ દામોદરસનામકમ્ ।
તમભ્યર્ચ્ય વિધાનેન ગન્ધપુષ્પાદિભિઃ ક્રમાત્

પ્રાગ્વત્ તં બ્રાહ્મણે દદ્યાદ્ વેદવેદાઙ્ગપારગે ।
એવં નિયમયુક્તસ્ય પ્રભાવં તચ્છૃણુષ્વ મે

એષ તે વિધિરુદ્દિષ્ટઃ શ્રાવણે માસિ વૈ વિભો ।
એતસ્યાશ્ચ પ્રભાવં યત્ શ્રૃણુ પાપપ્રણાશનમ્

પુરા કૃતયુગે રાજા નૃગો નામ મહાબલઃ ।
બભ્રામ સ વનં ઘોરં મૃગયાસક્તમાનસઃ

સ કદાચિત્ તુરઙ્ગેણ હૃતો દૂરં મહદ્વનમ્ ।
વ્યાઘ્રસિંહગજાકીર્ણં દસ્યુસર્પનિષેવિતમ્

એકાકી તત્ર રાજા તુ અશ્વં મુચ્ય તરોરધઃ ।
સ્વયં કુશમથાસ્તીર્ય સુપ્તો દુઃખસમન્વિતઃ

તાવત્ તત્રૈવ લુબ્ધાનાં સહસ્ત્રાણિ ચતુર્દશ ।
આગતાનિ મૃગાન્ હન્તું રાત્રૌ રાજ્ઞઃ સમન્તતઃ

તત્રાપશ્યન્ત તે સુપ્તં હેમરત્નવિભૂષિતમ્ ।
નૃગં રાજાનમત્યુગ્રં શ્રિયા પરમયા યુતમ્

તે ગત્વા ત્વરિતં વ્યાધાઃ સ્વભર્ત્રે સંન્યવેદયન્ ।
સોઽપિ રત્નસુવર્ણાર્થં રાજાનં હન્તુમુદ્યતઃ

તુરગસ્ય ચ હેતોસ્તુ નિસ્ત્રિંશા વનચારિણઃ ।
રાજાનં સુપ્તમાસાદ્ય નિગૃહીતું પ્રચક્રમુઃ

તાવદ્ રાજ્ઞઃ શરીરાત્ તુ શ્વેતાભરણભૂષિતા ।
નારી કાચિત્ સમુત્તસ્થૌ સ્ત્રક્ચન્દનવિભૂષિતા ।
ઉત્થાય ચક્રમાદાય તે મ્લેચ્છા વિનિપાતિતાઃ

દસ્યૂન્ નિહત્ય સા દેવી તસ્ય રાજ્ઞસ્તનું પુનઃ ।
પ્રવિશન્ત્યાશુ રાજાઽપિ પ્રતિબુદ્ધોઽથ દૃષ્ટવાન્ ।
મ્લેચ્છાંસ્તુ નિહતાન્ દૃષ્ટ્વા સા સ્વમૂર્ત્તિલયં ગતા

અશ્વમારુહ્ય સ પુનર્વામદેવાશ્રમં યયૌ ।
તત્રાપૃચ્છદ્ ઋષિં ભક્ત્યા કા સ્ત્રી કે તે નિપાતિતાઃ ।
એતત્ કાર્યમૃષે મહ્યં કથયસ્વ પ્રસીદ મે

વામદેવ ઉવાચ ।
ત્વમાસીચ્છૂદ્રજાતીય અન્યજન્મનિ પાર્થિવ ।
તત્ર ત્વયા બ્રાહ્મણસ્ય પ્રેષણં કુર્વતા શ્રુતા ।
શ્રાવણસ્ય તુ માસસ્ય શુક્લપક્ષે તુ દ્વાદશી

સવિધાનાત્ ત્વયા રાજન્ ભક્ત્યા વૈ સમુપોષિતા ।
ઉપોષિતાયાં તસ્યાં તુ રાજ્યં લબ્ધં ત્વયાઽનઘ

સર્વાપત્સુ ચ સા દેવી ભવન્તં પરિરક્ષતિ ।
યયા વિનિહતાઃ ક્રૂરા મ્લેચ્છાઃ પાપસમન્વિતાઃ ।
ભવાંશ્ચ રક્ષિતો રાજન્ શ્રાવણદ્વાદશી તુ સા

એકૈવ પાતિ ચાપત્સુ રાજ્યમેકૈવ યચ્છતિ ।
કિં પુનર્દ્વાદશૈતાસ્તુ યેનૈન્દ્રં ન દદુઃ પદમ્

॥ ઇતિ શ્રીવરાહપુરાણે ભગવચ્છાસ્ત્રે સપ્તચત્વારિંશોઽધ્યાયઃ