વરાહ પુરાણ · અધ્યાય 48

દુર્વાસા ઉવાચ ।
તદ્વદ્ ભાદ્રપદે માસિ શુક્લપક્ષે તુ દ્વાદશીમ્ ।
સંકલ્પ્ય વિધિના દેવમર્ચ્ચયેત્ પરમેશ્વરમ્

નમોઽસ્તુ કલ્કિને પાદૌ હૃષીકેશાય વૈ કટિમ્ ।
મ્લેચ્છવિધ્વંસનાયેતિ જગન્મૂર્ત્તે તથોદરમ્

શિતિકણ્ઠાય કણ્ઠં તુ ખડ્ગપાણેતિ વૈ ભુજૌ ।
ચતુર્ભુજાયેતિ હસ્તૌ વિશ્વમૂર્ત્તે તથા શિરઃ

એવમભ્યર્ચ્ય મેધાવી પ્રાગ્વત્ તસ્યાગ્રતો ઘટમ્ ।
વિન્યસેત્ કલ્કિનં દેવં સૌવર્ણં તત્ર કારયેત્

સિતવસ્ત્રયુગચ્છન્નં ગન્ધપુષ્પોપશોભિતમ્ ।
કૃત્વા પ્રભાતે વિપ્રાય પ્રદેયં શાસ્ત્રવિત્તમે ।
એવં કૃતે ભવેદ્ યસ્તુ તન્નિબોધ મહામુને

પૂર્વં રાજા વિશાલોઽભૂત્ કાશ્યાં પુર્યાં મહાબલઃ ।
ગોત્રજૈર્હૃતરાજ્યોઽસૌ ગન્ધમાદનમાવિશત્

તસ્ય દ્રોણ્યાં મહારાજ બદરીં પ્રાપ્ય શોભનામ્ ।
હૃતરાજ્યો વિશેષેણ ગતશ્રીકો નરોત્તમઃ

કદાચિદાગતૌ તત્ર પુરાણાવૃષિસત્તમૌ ।
નરનારાયણૌ દેવૌ સર્વદેવનમસ્કૃતૌ

તૌ દૃષ્ટ્વા તત્ર રાજાનં પૂર્વાગતમરિંદમૌ ।
ધ્યાયન્તં પરમં બ્રહ્મ વિષ્ણ્વાખ્યં પરમં પદમ્

તૌ પ્રીતાવૂચતુસ્તં તુ રાજાનં ક્ષીણકલ્મષમ્ ।
વરં વૃણીષ્વ રાજેન્દ્ર વરદૌ સ્વસ્તવાગતૌ

રાજોવાચ ।
ભવન્તૌ કૌ ન જાનામિ કસ્ય ગૃહ્ણામ્યહં વરમ્ ।
આરાધયામિ યત્ તસ્માદ્ વરમિચ્છામિ શોભનમ્

એવમુક્તૌ તુ તૌ રાજ્ઞા કમારાધયસે પ્રભો ।
કં વા વરં વૃણુષ્વ ત્વં કથયસ્વ કુતૂહલાત્

એવમુક્તસ્તતો રાજા વિષ્ણુમારાધયામ્યહમ્ ।
કથયિત્વા સ્થિતસ્તૂષ્ણીં તતસ્તાવૂચતુઃ પુનઃ

રાજન્ તસ્યૈવ દેવસ્ય પ્રસાદાદાવયોર્વરઃ ।
દાતવ્યસ્તે વરં બ્રૂહિ કસ્તે મનસિ વર્ત્તતે

રાજોવાચ ।
યથા યજ્ઞેશ્વરં દેવં યજ્ઞૈર્વિવિધદક્ષિણૈઃ ।
યષ્ટું સમર્થતા મે સ્યાત્ તથા મે દદતં વરમ્

નર ઉવાચ ।
સ્વયં નારાયણો દેવો લોકમાર્ગપ્રદર્શકઃ ।
મયા સહ તપઃ કુર્યાદ્ બદર્યાં લોકભાવનઃ

અયં મત્સ્યોઽભવત્ પૂર્વં પુનઃ કૂર્મ્મસ્વરૂપવાન્ ।
વરાહશ્ચાભવદ્ દેવો નરસિંહસ્તતોઽભવત્

વામનસ્તુ તતો જાતો જામદગ્ન્યો મહાબલઃ ।
પુનર્દાશરથિર્ભૂત્વા વાસુદેવઃ પુનર્બભૌ

બુદ્ધો ભૂત્વા જનં હ્યેષ મોહયામાસ પાર્થિવ ।
સપત્નાન્ દસ્યવો મ્લેચ્છાન્ પુનર્હત્વા મહીમિમામ્ ।
પ્રકૃતિસ્થાં ચકારાયં સ એષ ભગવાન્ હરિઃ

પૂજ્યતે મત્સ્યરૂપેણ સર્વજ્ઞત્વમભીપ્સુભિઃ ।
સ્વવંશોદ્ધરણાર્થાય કૂર્મરૂપી તુ પૂજ્યતે

ભવોદધિનિમગ્નેન વારાહઃ પૂજ્યતે હરિઃ ।
નારસિંહેણ રૂપેણ તદ્વત્ પાપભયાન્નરૈઃ

વામનં મોહનાશાય વિત્તાર્થે જગદગ્નિજમ્ ।
ક્રૂરશત્રુવિનાશાય યજેદ્ દાશરથિં બુધઃ

બલકૃષ્ણૌ યજેદ્ ધીમાન્ પુત્રકામો ન સંશયઃ ।
રૂપકામો યજેદ્ બુદ્ધં કલ્કિનં શત્રુઘાતને

એવમુક્ત્વા નરસ્તસ્ય ઇમામેવાબ્રવીન્મુનિઃ ।
દ્વાદશીં કૃતવાન્ સોઽપિ ચક્રવર્તી બભૂવ હ ।
તસ્યૈવ નામ્ના બદરી વિશાલાખ્યાઽભવન્મુને

ઇહ જન્મનિ રાજાઽસૌ રાજ્યં કૃત્વા ઇયાદ્ વનમ્ ।
યજ્ઞૈશ્ચ વિવિધૈરિષ્ટ્વા પરં નિર્વાણમાપ્તવાન્

॥ ઇતિ શ્રીવરાહપુરાણે ભગવચ્છાસ્ત્રે અષ્ટચત્વારિંશોઽધ્યાયઃ