વરાહ પુરાણ · અધ્યાય 36

મહાતપા ઉવાચ ।
આદિત્રેતાસુ રાજાનો મણિજા યે પ્રકીર્ત્તિતાઃ ।
કથયિષ્યામિ તાન્ રાજન્ યત્ર જાતોઽપિ પાર્થિવ

યોઽસૌ સુપ્રભનામાસીત્ સ ત્વં રાજન્ કૃતે યુગે ।
જાતોઽસિ નામ્ના વિખ્યાતઃ પ્રજાપાલેતિ શોભનઃ

શેષાસ્ત્રેતાયુગે રાજન્ ભવિષ્યન્તિ મહાબલાઃ ।
યો દીપ્તતેજા મણિજઃ સ શન્તેતિ પ્રકીર્તિતઃ

સુરશ્મિર્ભવિતા રાજા શશકર્ણો મહાબલઃ ।
શુભદર્શનઃ પાઞ્ચાલો ભવિષ્યતિ નરાધિપઃ

સુશાન્તિરઙ્ગવંશે વૈ સુન્દરોઽપ્યઙ્ગ ઇત્યુત ।
સુન્દશ્ચ મુચુકુન્દોઽભૂત્સુદ્યુમ્નસ્તુર એવ ચ

સુમનાઃ સોમદત્તસ્તુ શુભઃ સંવરણોઽભવત્ ।
સુશીલો વસુદાનસ્તુ સુખદો સુપતિર્ભવત્

શમ્ભુઃ સેનાપતિરભૂત્ સુકાન્તો દશરથઃ સ્મૃતઃ ।
સોમોઽભૂજ્જનકો રાજા એતે ત્રેતાયુગે નૃપ

સર્વે ભૂમિમિમાં રાજન્ ભુક્ત્વા તે વસુધાધિપાઃ ।
ઇષ્ટ્વા ચ વિવિધૈર્યજ્ઞૈર્દિવં પ્રાપ્સ્યન્ત્યસંશયમ્

શ્રીવરાહ ઉવાચ ।
એવં શ્રુત્વા સ રાજર્ષિર્બ્રહ્મવિદ્યાઽમૃતં પ્રભુઃ ।
આખ્યાનં પરમં પ્રીતસ્તપશ્ચર્તુમિયાદ્ વનમ્

ઋષિરધ્યાત્મયોગેન વિહાયેદં કલેવરમ્ ।
બ્રહ્મભૂતોઽભવદ્ધાત્રિ હરૌ લયમવાપ ચ

વૃન્દાવનં ચ રાજાઽસૌ તપોઽર્થં ગતવાન્ પ્રભુઃ ।
તત્ર ગોવિન્દનામાનં હરિં સ્તોતુમથારભત્

રાજોવાચ ।
નમામિ દેવં જગતાં ચ મૂર્ત્તિં
ગોપેન્દ્રમિન્દ્રાનુજમપ્રમેયમ્ ।
સંસારચક્રક્રમણૈકદક્ષં
ક્ષિતીધરં દેવવરં નમામિ

ભવોદધૌ દુઃખશતોર્મ્મિભીમે
જરાવર્ત્તે કૃષ્ણપાતાલમૂલે ।
તદન્તમેકો દધતે સુખં મે
નમોઽસ્તુ તે ગોપતિરપ્રમેય

વ્યાધ્યાદિયુક્તઃ પુરુષૈર્ગ્રહૈશ્ચ
સઙ્ઘટ્ટમાનં પુનરેવ દેવ ।
નમોઽસ્તુ તે યુદ્ધરતે મહાત્મા
જનાર્દનો ગોપતિરુગ્રબાહુઃ

ત્વમુત્તમઃ સર્વવિદાં સુરેશ
ત્વયા તતં વિશ્વમિદં સમસ્તમ્ ।
ગોપેન્દ્ર માં પાહિ મહાનુભાવ
ભવાદ્ભીતં તિગ્મરથાઙ્ગપાણે

પરોઽસિ દેવ પ્રવરઃ સુરાણાં
પુંસઃ સ્વરૂપોઽસિ શશિપ્રકાશઃ ।
હુતાશવક્ત્રાચ્યુત તીવ્રભાવ
ગોપેન્દ્ર માં પાહિ ભવે પતન્તમ્

સંસારચક્રક્રમણાન્યનેકા -
ન્યાવિર્ભવન્ત્યચ્યુત દેહિનાં યત્ ।
ત્વન્માયયા મોહિતાનાં સુરેશ
કસ્તે માયાં તરતે દ્વન્દ્વધામા

અગોત્રમસ્પર્શમરૂપગન્ધ -
મનામનિર્દેશમજં વરેણ્યમ્ ।
ગોપેન્દ્ર ત્વાં યદ્યુપાસન્તિ ધીરા -
સ્તે મુક્તિભાજો ભવબન્ધમુક્તાઃ

શબ્દાતિગં વ્યોમરૂપં વિમૂર્ત્તિં
વિકર્મ્મિણાં શુભભાવં વરેણ્યમ્ ।
ચક્રાબ્જપાણિં તુ તથોપચારા-
દુક્તં પુરાણે સતતં નમામિ

ત્રિવિક્રમં ક્રાન્તજગત્ત્રયં ચ
ચતુર્મૂર્ત્તિં વિશ્વગતાં ક્ષિતીશમ્ ।
શમ્ભું વિભું ભૂતપતિં સુરેશં
નમામ્યહં વિષ્ણુમનન્તમૂર્ત્તિમ્

ત્વં દેવ સર્વાણિ ચરાચરાણિ
સૃજસ્યથો સંહરસે ત્વમેવ ।
માં મુક્તિકામં નય દેવ શીઘ્રં
યસ્મિન્ ગતા યોગિનો નાપયાન્તિ

જયસ્વ ગોવિન્દ મહાનુભાવ
જયસ્વ વિષ્ણો જય પદ્મનાભ ।
જયસ્વ સર્વજ્ઞ જયાપ્રમેય
જયસ્વ વિશ્વેશ્વર વિશ્વમૂર્ત્તે

શ્રીવરાહ ઉવાચ ।
એવં સ્તુત્વા તદા રાજા નિધાય સ્વં કલેવરમ્ ।
પરમાત્મનિ ગોવિન્દે લયમાગાચ્ચ શાશ્વતે

॥ ઇતિ શ્રીવરાહપુરાણે ભગવચ્છાસ્ત્રે ષટ્ત્રિંશોઽધ્યાયઃ