વરાહ પુરાણ · અધ્યાય 35

મહાતપા ઉવાચ ।
બ્રહ્મણો માનસઃ પુત્રઃ અત્રિર્નામ મહાતપાઃ ।
તસ્ય પુત્રોઽભવત્સોમો દક્ષજામાતૃતાં ગતઃ

સપ્તવિંશતિ યાઃ કન્યા દાક્ષાયણ્યઃ પ્રકીર્ત્તિતાઃ ।
સોમપત્ન્યોઽતિમન્તવ્યાસ્તાસાં શ્રેષ્ઠા તુ રોહિણિ

તામેવ રમતે સોમો નેતરા ઇતિ શુશ્રુમઃ ।
ઇતરાઃ પ્રોચુરાગત્ય દક્ષસ્યાસમતાં શશેઃ

દક્ષોઽપ્યસકૃદાગત્ય તમુવાચ સ નાકરોત્ ।
સમતાં સોઽપિ તં દક્ષઃ શશાપાન્તર્હિતો ભવ

એવં શપ્તસ્તુ દક્ષેણ સોમો દેહં ત્યજેદથ ।
ઉવાચ સોમો દક્ષં તુ ભવાનેવં ભવિષ્યતિ ।
અનેકજો વિહાયેમં બ્રહ્મદેહં સનાતનમ્

એવમુક્ત્વા ક્ષયં સોમ અગમદ્ દક્ષશાપતઃ ।
દેવા મનુષ્યાઃ પશવો નષ્ટે સોમે સવીરુધઃ

ક્ષીણાભવંસ્તદા સર્વા ઓષધ્યશ્ચ વિશેષતઃ ।
ક્ષયં ગચ્છદ્ભિરત્યર્થમોષધીભિઃ સુરર્ષભાઃ

મૂલેષુ વીરુધાં સોમઃ સ્થિત ઇત્યૂચુરાતુરાઃ ।
તેષાં ચિન્તાઽભવત્ તીવ્રા વિષ્ણું ચ શરણં યયુઃ

ભગવાનાહ તાન્ સર્વાન્ બ્રૂત કિં ક્રિયતે મયા ।
તે ચોચુર્દેવ દક્ષેણ શપ્તઃ સોમો વિનાશિતઃ

તાનુવાચ તદા દેવો મથ્યતાં કલશોદધિઃ ।
ઓષધ્યઃ સર્વતો દેવાઃ પ્રક્ષિપ્યાશુ સુસંયતૈઃ

એવમુક્ત્વા તતો દેવાન્ દધ્યૌ રુદ્રં હરિઃ સ્વયમ્ ।
બ્રહ્માણં ચ તથા દધ્યૌ વાસુકિં નેત્રકારણાત્

તે સર્વે તત્ર સહિતા મમન્થુર્વરુણાલયમ્ ।
તસ્મિંસ્તુ મથિતે જાતઃ પુનઃ સોમો મહીપતે

યોઽસૌ ક્ષેત્રજ્ઞસંજ્ઞો વૈ દેહેઽસ્મિન્ પુરુષઃ પરઃ ।
સ એવ સોમો મન્તવ્યો દેહિનાં જીવસંજ્ઞિતઃ ।
પરેચ્છયા સ મૂર્ત્તિં તુ પૃથક્ સૌમ્યાં પ્રપેદિવાન્

તમેવ દેવમનુજાઃ ષોડશેમાશ્ચ દેવતાઃ ।
ઉપજીવન્તિ વૃક્ષાશ્ચ તથૈવોષધયઃ પ્રભુમ્

રુદ્રસ્તમેવ સકલં દધાર શિરસા તદા ।
તદાત્મિકા ભવન્ત્યાપો વિશ્વમૂર્તિરસૌ સ્મૃતઃ

તસ્ય બ્રહ્મા દદૌ પ્રીતઃ પૌર્ણમાસીં તિથિં પ્રભુઃ ।
તસ્યામુપોષયેદ્ રાજંસ્તમર્થં પ્રતિપાદયેત્

યવાન્નહારશ્ચ ભવેત્ તસ્ય જ્ઞાનં પ્રયચ્છતિ ।
કાન્તિં પુષ્ટિં ચ રાજેન્દ્ર ધનં ધાન્યં ચ કેવલમ્

॥ ઇતિ શ્રીવરાહપુરાણે ભગવચ્છાસ્ત્રે પઞ્ચત્રિંશોઽધ્યાયઃ