વરાહ પુરાણ · અધ્યાય 31

મહાતપા ઉવાચ ।
મનોર્નામ મનુત્વં ચ યદેતત્ પઠ્યતે કિલ ।
પ્રયોજનવશાદ્ વિષ્ણુરસાવેવ તુ મૂર્ત્તિમાન્

યોઽસૌ નારાયણો દેવઃ પરાત્ પરતરો નૃપ ।
તસ્ય ચિન્તા સમુત્પન્ના સૃષ્ટિં પ્રતિ નરોત્તમ

સૃષ્ટા ચેયં મયા સૃષ્ટિઃ પાલનીયા મયૈવ હ ।
કર્મકાણ્ડં ત્વમૂર્ત્તેન કર્તું નૈવેહ શક્યતે ।
તસ્માન્મૂર્ત્તિં સૃજામ્યેકાં યયા પાલ્યમિદં જગત્

એવં ચિન્તયતસ્તસ્ય સત્યાભિધ્યાયિનો નૃપ ।
પ્રાક્સૃષ્ટિજાતં રાજન્ વૈ મૂર્ત્તિમત્ તત્પુરો બભૌ

પુરોભૂતે તતસ્તસ્મિન્ દેવો નારાયણઃ સ્વયમ્ ।
પ્રવિશન્તં દદર્શાથ ત્રૈલોક્યં તસ્ય દેહતઃ

તતઃ સસ્માર ભગવાન્ વરદાનં પુરાતનમ્ ।
વાગાદીનાં તતસ્તુષ્ટઃ પ્રાદાત્ તસ્ય પુનર્વરમ્

સર્વજ્ઞઃ સર્વકર્તા ત્વં સર્વલોકનમસ્કૃતઃ ।
ત્રૈલોક્યવિશનાચ્ચ ત્વં ભવ વિષ્ણુઃ સનાતનઃ

દેવાનાં સર્વદા કાર્યં કર્ત્તવ્યં બ્રહ્મણસ્તથા ।
સર્વજ્ઞત્વં ચ ભવતુ તવ દેવ ન સંશયઃ

એવમુક્ત્વા તતો દેવઃ પ્રકૃતિસ્થો બભૂવ હ ।
વિષ્ણુરપ્યધુના પૂર્વાં બુદ્ધિં સસ્માર ચ પ્રભુઃ

તદા સંચિન્ત્ય ભગવાન્ યોગનિદ્રાં મહાતપાઃ ।
તસ્યાં સંસ્થાપ્ય ભગવાનિન્દ્રિયાર્થોદ્ભવાઃ પ્રજાઃ ।
ધ્યાત્વા પરેણ રૂપેણ તતઃ સુષ્વાપ વૈ પ્રભુઃ

તસ્ય સુપ્તસ્ય જઠરાન્મહત્પદ્મં વિવિઃસૃતમ્ ।
સપ્તદ્વીપવતી પૃથ્વી સસમુદ્રા સકાનના

તસ્ય રૂપસ્ય વિસ્તારં પાતાલં નાલસંસ્થિતમ્ ।
કર્ણિકાયાં તથા મેરુસ્તન્મધ્યે બ્રહ્મણો ભવઃ

એવં દૃષ્ટ્વા પરં તસ્ય શરીરસ્ય તુ સંભવમ્ ।
મુમુચે તચ્છરીરસ્થો વાયુર્વાયું સમં સૃજત્

અવિદ્યાવિજયં ચેમં શઙ્ખરૂપેણ ધારય ।
અજ્ઞાનચ્છેદનાર્થાય ખઙ્ગં તેઽસ્તુ સદા કરે

કાલચક્રમિમં ઘોરં ચક્રં ત્વં ધારયાચ્યુત ।
અધર્મગજઘાતાર્થં ગદાં ધારય કેશવ

માલેયં ભૂતમાતા તે કણ્ઠે તિષ્ઠતુ સર્વદા ।
શ્રીવત્સકૌસ્તુભૌ ચેમૌ ચન્દ્રાદિત્યચ્છલેન હ

મારુતસ્તે ગતિર્વીર ગરુત્માન્ સ ચ કીર્ત્તિતઃ ।
ત્રૈલોક્યગામિની દેવી લક્ષ્મીસ્તેઽસ્તુ સદાશ્રયે ।
દ્વાદશી ચ તિથિસ્તેઽસ્તુ કામરૂપી ચ જાયતે

ઘૃતાશનો ભવેદ્યસ્તુ દ્વાદશ્યાં ત્વલ્પરાયણઃ ।
સ સ્વર્ગવાસી ભવતુ પુમાન્ સ્ત્રી વા વિશેષતઃ

એષ વિષ્ણુસ્તવાખ્યાતો મૂર્તયો દેવદાનવાન્ ।
હન્તિ પાતિ શરીરાણિ સૃજત્યન્યાનિ ચાત્મનઃ

યુગે યુગે સર્વગોઽયં વેદાન્તે પુરુષો હ્યસૌ ।
ન હીનબુદ્ધ્યા વક્તવ્યો મનુષ્યોઽયં કદાચન

ય એવં શ્રૃણુયાત્ સર્ગં વૈષ્ણવં પાપનાશનમ્ ।
સ કીર્તિમિહ સંપ્રાપ્ય સ્વર્ગલોકે મહીયતે

॥ ઇતિ શ્રીવરાહપુરાણે ભગવચ્છાસ્ત્રે એકત્રિંશોઽધ્યાયઃ