વરાહ પુરાણ · અધ્યાય 30

મહાતપા ઉવાચ ।
શ્રૃણુ ચાન્યાં વસુપતેરુત્પત્તિં પાપનાશિનીમ્ ।
યથા વાયુઃ શરીરસ્થો ધનદઃ સંબભૂવ હ

આદ્યં શરીરં યત્ તસ્મિન્ વાયુરન્તઃ સ્થિતોઽભવત્ ।
પ્રયોજનાન્મૂર્ત્તિમત્ત્વમાદિષ્ટં ક્ષેત્રદેવતા

તત્ર મૂર્ત્તસ્ય વાયોસ્તુ ઉત્પત્તિઃ કીર્ત્ત્યયે મયા ।
તાં શ્રૃણુષ્વ મહાભાગ કથ્યમાનાં મયાનઘ

બ્રહ્મણઃ સૃષ્ટિકામસ્ય મુખાદ્ વાયુર્વિનિર્યયૌ ।
પ્રચણ્ડશર્કરાવર્ષી તં બ્રહ્મા પ્રત્યષેધયત્ ।
મૂર્ત્તો ભવસ્વ શાન્તશ્ચ તત્રોક્તો મૂર્ત્તિમાન્ ભવત્

સર્વેષાં ચૈવ દેવાનાં યદ્ વિત્તં ફલમેવ ચ ।
તત્સર્વં પાહિ યેનોક્તં તસ્માદ્ ધનપતિર્ભવત્

તસ્ય બ્રહ્મા દદૌ તુષ્ટસ્તિથિમેકાદશીં પ્રભુઃ ।
તસ્યામનગ્નિપક્વાશી યો ભવેન્નિયતઃ શુચિઃ

તસ્યાશુ ધનદો દેવસ્તુષ્ટઃ સર્વં પ્રયચ્છતિ ।
એષા ધનપતેર્મૂર્તિઃ સર્વકિલ્બિષનાશિની

ય એતાં શ્રૃણુયાદ્ ભક્ત્યા પુરુષઃ પઠતેઽપિ વા ।
સર્વકામમવાપ્નોતિ સ્વર્ગલોકં ચ ગચ્છતિ

॥ ઇતિ શ્રીવરાહપુરાણે ભગવચ્છાસ્ત્રે ત્રિંશોઽધ્યાયઃ