વરાહ પુરાણ · અધ્યાય 29

મહાતપા ઉવાચ ।
શ્રૃણુ રાજન્નવહિતઃ પ્રજાપાલ કથામિમામ્ ।
યદા દિશઃ સમુત્પન્નાઃ શ્રોત્રેભ્યઃ પૃથિવીપતે

બ્રહ્મણઃ સૃજતઃ સૃષ્ટિમાદિસર્ગે સમુત્થિતે ।
ચિન્તાભૂન્મહતી કો મે પ્રજાઃ સૃષ્ટા ધરિષ્યતિ

એવં ચિન્તયતસ્તસ્ય અવકાશં પ્રજાસ્વિહ ।
પ્રાદુર્બભૂવુઃ શ્રોત્રેભ્યઃ દશ કન્યા મહાપ્રભાઃ

પૂર્વા ચ દક્ષિણા ચૈવ પ્રતીચી ચોત્તરા તથા ।
ઊર્ધ્વાઽધરા ચ ષણ્મુખ્યાઃ કન્યા હ્યાસંસ્તદા નૃપ

અન્યાશ્ચતસ્ત્રસ્તેષાં તુ કન્યાઃ પરમશોભનાઃ ।
રૂપસ્વિન્યો મહાભાગા ગામ્ભીર્યેણ સમન્વિતાઃ

તા ઊચુઃ પ્રણયાદ્ દેવં પ્રજાપતિમકલ્મષમ્ ।
અવકાશં તુ નો દેહિ દેવદેવ પ્રજાપતે

યત્ર તિષ્ઠામહે સર્વા ભર્તૃભિઃ સહિતાઃ સુખમ્ ।
પતયશ્ચ મહાભાગા દેહિ નોઽવ્યક્તસંભવ

બ્રહ્મોવાચ ।
બ્રહ્માણ્ડમેતત્ સુશ્રોણ્યઃ શતકોટિપ્રવિસ્તરમ્ ।
તસ્યાન્તે સ્વેચ્છયા ભદ્રા ઉષ્યતાં મા વિલમ્બત

ભર્તૄંશ્ચ વઃ પ્રયચ્છામિ સૃષ્ટ્વા રૂપસ્વિનોઽનઘાઃ ।
યથેષ્ટં ગમ્યતાં દેશો યસ્યા યો રોચતેઽધુના

એવમુક્તાશ્ચ તાઃ સર્વા યથેષ્ટં પ્રયયુસ્તદા ।
બ્રહ્માપિ સસૃજે તૂર્ણં લોકપાલાન્ મહાબલાન્

સૃષ્ટ્વા તુ લોકપાલાંસ્તુ તાઃ કન્યાઃ પુનરાહ્વયત્ ।
વિવાહં કારયામાસ બ્રહ્મા લોકપિતામહઃ

એકામિન્દ્રાય સ પ્રાદાદગ્નયેઽન્યાં યમાય ચ ।
નિરૃતાય ચ દેવાય વરુણાય મહાત્મને

વાયવે ધનદેશાય ઈશાનાય ચ સુવ્રત ।
ઊર્દ્ધ્વાં સ્વયમધિષ્ઠાય શેષાયાધો વ્યવસ્થિતામ્

એવં દત્ત્વા પુનર્બ્રહ્મા તિથિં પ્રાદાદ્ દિશાં પુનઃ ।
દશમીં ભર્તૃનામ્નસ્તુ દધ્યન્નં ભોજનં પ્રભુઃ

તતઃ પ્રભૃતિ તા દેવ્યઃ સેન્દ્રાદ્યાઃ પરિકીર્તિતાઃ ।
દશમી ચ તિથિસ્તાસામતીવ દયિતાભવત્

તસ્યાં દધ્યાશનો યસ્તુ સુવ્રતી ભવતે નરઃ ।
તસ્ય પાપક્ષયં તાસ્તુ કુર્વન્ત્યહરહર્નૃપ

યશ્ચૈતચ્છૃણુયાજ્જન્મ દિશાં નિયતમાનસઃ ।
સ પ્રતિષ્ઠામવાપ્નોતિ બ્રહ્મલોકે ન સંશયઃ

॥ ઇતિ શ્રીવરાહપુરાણે ભગવચ્છાસ્ત્રે એકોનત્રિંશોઽધ્યાયઃ