વરાહ પુરાણ · અધ્યાય 15

શ્રીવરાહ ઉવાચ ।
એતચ્છ્રુત્વા તદા ધાત્રિ પિતૃતન્ત્રં મહામુનિઃ ।
સંસ્મારિતો જન્મશતં માર્કણ્ડેયેન ધીમતા

ધરણ્યુવાચ ।
ભગવન્ ગૌરમુખઃ કોઽસૌ અન્યજન્મનિ કઃ સ્મૃતઃ ।
કથં ચ સ્મૃતવાન્ સ્મૃત્વા કિં ચકાર ચ સત્તમઃ

શ્રીવરાહ ઉવાચ ।
ભૃગુરાસીત્ સ્વયં સાક્ષાદન્યસ્મિન્ બ્રહ્મ જન્મનિ ।
તદન્વયાત્મજસ્ત્વેષ માર્કણ્ડેયો મહામુનિઃ

પુત્રૈસ્તુ બોધિતા યૂયં સુગતિં પ્રાપ્સ્યથેતિ યત્ ।
પ્રાગુક્તં બ્રહ્મણા તેન માર્કણ્ડેયેન બોધિતઃ

સસ્માર સર્વજન્માનિ સ્મૃત્વા ચૈવ તુ યત્કૃતમ્ ।
તચ્છૃણુષ્વ વરારોહે કથયામિ સમાસતઃ

એવં શ્રાદ્ધવિધાનેન દ્વાદશાબ્દં તતઃ પિતૄન્ ।
ઇષ્ટ્વા પશ્ચાદ્ધરેઃ સ્તોત્રં સ મુનિસ્તૂપચક્રમે

પ્રભાસં નામ યત્તીર્થં ત્રિષુ લોકેષુ વિશ્રુતમ્ ।
તત્ર દૈત્યાન્તકં દેવં સ્તોતું ગૌરમુખઃ સ્થિતઃ

ગૌરમુખ ઉવાચ ।
સ્તોષ્યે મહેન્દ્રં રિપુદર્પહં શિવં
નારાયણં બ્રહ્મવિદાં પ્રતિષ્ઠિતમ્ ।
આદિત્યચન્દ્રાશ્વિયુગસ્થમાદ્યં
પુરાતનં દૈત્યહરં સદા હરિમ્

ચકાર માત્સ્યં વપુરાત્મનો યઃ
પુરાકૃતં વેદવિનાશકાલે ।
મહામહીધૃગ્વપુરગ્રપુચ્છ -
છટાહવાર્ચ્ચિઃ સુરશત્રુહાદ્યઃ

તથાબ્ધિમન્થાનકૃતે ગિરીન્દ્રં
દધાર યઃ કૌર્મ્મવપુઃ પુરાણમ્ ।
હિતેચ્છયા યઃ પુરુષઃ પુરાણઃ
પ્રપાતુ માં દૈત્યહરઃ સુરેશઃ

મહાવરાહઃ સતતં પૃથિવ્યાસ્
તલાત્તલં પ્રાવિશદ્ યો મહાત્મા ।
યજ્ઞાઙ્ગસંજ્ઞઃ સુરસિદ્ધવન્દ્યઃ
સ પાતુ માં દૈત્યહરઃ પુરાણઃ

નૃસિંહરૂપી ચ ભવત્યજસ્ત્રં
યુગે યુગે યોગિવરોગ્રભીમઃ ।
કરાલવક્ત્રઃ કનકાગ્રવર્ચા
રત્નાશયોઽસ્માનસુરાન્તકોઽવ્યાત્

બલેર્મખધ્વંસકૃતે મહાત્મા
સ્વાં ગૂઢતાં યોગવપુઃસ્વરૂપઃ ।
સ દણ્ડકાષ્ઠાઽજિનલક્ષણઃ પુનઃ
ક્ષિતિં ચ પદા ક્રાન્તવાન્ યઃ સ પાતુ

ત્રિઃસપ્તકૃત્વો જગતીં જિગાય
જિત્વા દદૌ કશ્યપાય પ્રચણ્ડઃ ।
સ જામદગ્ન્યોઽભિજનસ્ય ગોપ્તા
હિરણ્યગર્ભોઽસુરહા પ્રપાતુ

ચતુઃપ્રકારં ચ વપુર્ય આદ્યં
હૈરણ્યગર્ભપ્રતિમાનલક્ષ્યમ્ ।
રામાદિરૂપૈર્બહુરૂપભેદ-
શ્ચકાર સોઽસ્માનસુરાન્તકોઽવ્યાત્

ચાણૂરકંસાસુરદર્પભીતે-
ર્ભીતામરાણામભયાય દેવઃ ।
યુગે યુગે વાસુદેવો બભૂવ
કલ્પે ભવત્યદ્ભુતરૂપકારી ।
યુગે યુગે કલ્કિનામ્ના મહાત્મા
વર્ણસ્થિતિં કર્ત્તુમનેકમૂર્ત્તિઃ

સનાતનો બ્રહ્મમયઃ પુરાણો
ન યસ્ય રૂપં સુરસિદ્ધદૈત્યાઃ ।
પશ્યન્તિ વિજ્ઞાનગતિં વિહાય
અથોપ્યનેકાનિ સમર્ચ્વયન્તિ ।
મત્સ્યાદિરૂપાણિ ચરાણિ સોઽવ્યાત્

નમો નમસ્તે પુરુષોત્તમાય
પુનશ્ચ ભૂયોઽપિ નમો નમસ્તે ।
નમઃ પુરસ્તાદથ પૃષ્ઠતસ્તે
નયસ્વ માં મુક્તિપદં નમસ્તે

એવં નમસ્યતસ્તસ્ય મહર્ષેર્ભાવિતાત્મનઃ ।
પ્રત્યક્ષતાં ગતો દેવઃ સ્વયં ચક્રગદાધરઃ

તં દૃષ્ટ્વા તસ્ય વિજ્ઞાનં નિસ્તરઙ્ગં સ્વદેહતઃ ।
ઉત્તસ્થૌ સોઽપિ તં લબ્ધ્વા તસ્મિન્ બ્રહ્મણિ શાશ્વતે ।
લયં જગામ દેવાત્મા ત્વપુનર્ભવસંજ્ઞિતે

॥ ઇતિ શ્રીવરાહપુરાણે ભગવચ્છાસ્ત્રે પઞ્ચદશોઽધ્યાયઃ