વામનપુરાણ, સરોમાહાત્મ્ય · અધ્યાય 7

ઇતિ શ્રીવામનપુરાણે સરોમાહાત્મ્યે ષષ્ઠો ઽધ્યાયઃ
લોમહર્ષણ ઉવાચ ।
એવં સ્તુતો ઽથ ભગવાન્ વાસુદેવ ઉવાચ તામ્ ।
અદૃશ્યઃ સર્વભૂતાનાં તસ્યાઃ સંદર્શને સ્થિતઃ

શ્રીભગવાનુવાચ
મનોરથાંસ્ત્વમદિતે યાનિચ્છસ્યભિવાઞ્છિતાન્ ।
તાંસ્ત્વં પ્રાપ્યસિ ધર્મજ્ઞે મત્પ્રસાદાન્ન સંશયઃ

શૃણુ ત્વં ચ મહાભાગે વરો યસ્તે હૃતિ સ્થિતઃ ।
મદ્દર્શનં હિ વિફલં ન કદાચિદ્ ભવિષ્યતિ

યશ્ચેહ ત્વદ્વને સ્થિત્વા ત્રિરાત્રં વૈ કરિષ્યતિ ।
સર્વે કામાઃ સમૃધ્યન્તે મનસા યાનિહેચ્છતિ

દૂરસ્થો ઽપિ વનં યસ્તુ અદિત્યાઃ સ્મરતે નરઃ ।
સો ઽપિ યાતિ પરં સ્થાનં કિં પુનર્નિવસન્ નરઃ

યશ્ચેહ બ્રાહ્મણાન્ પઞ્ચ ત્રીન્ વા દ્વાવેકમેવ વા ।
ભોજયેચ્છ્રદ્ધયા યુક્તાઃ સ યાતિ પરમાં ગતિમ્

અદિતિરુવાચ
યદિ દેવ પ્રસન્નસ્ત્વં ભક્ત્યા મે ભક્તવત્સલ ।
ત્રૈલોક્યાધિપતિઃ પુત્રસ્તદસ્તુ મમ વાસવઃ

હૃતં રાજ્યં હૃતશ્ચાસ્ય યજ્ઞભાગ ઇહાસુરૈઃ ।
ત્વયિ પ્રસન્ને પરદ તત્ પ્રાપ્નોતુ સુતો મમ

હૃતં રાજ્યં ન દુઃખાય મમ પુત્રસ્ય કેશવ ।
પ્રપન્નદાયવિભ્રંશો બાધાં મે કુરુતે હૃતિ

શ્રીભગવાનુવાચ
કૃતઃ પ્રસાદો હિ મયા તવ દેવિ યથેપ્સિતમ્ ।
સ્વાંશેન ચૈવ તે ગર્ભે સંભવિષ્યામિ કશ્યપાત્

તવ ગર્ભે સમુદ્ભૂતસ્તતસ્તે યે ત્વરાતયઃ ।
તાનહં ચ હનિષ્યામિ નિવૃત્તા ભવ નન્દિનિ

અદિતિરુવાચ
પ્રસીદ દેવદેવેશ નમસ્તે વિશ્વભાવન ।
નાહં ત્વામુદરે વોઢુમીશ શક્ષ્યામિ કેશવ ।
યસ્મિન્ પ્રતિષ્ઠિતં સર્વં વિશ્વયોનિસ્ત્વમીશ્વરઃ

અહં ત્વાં ચ વહિષ્યામિ આત્માનં ચૈવ નન્દિનિ ।
ન ચ પીડાં કરિષ્યામિ સ્વસ્તિ તે ઽસ્તુ વ્રજામ્યહમ્

ઇત્યુક્ત્વાન્તર્હિતે દેવે ઽદિતિર્ગર્ભં સમાદધે ।
ગર્ભસ્થિતે તતઃ ખૃષ્ણે ચચાલ સરલા ક્ષિતિઃ ।
ચકમ્પિરે મહાશૈલા જગ્મુઃ ક્ષોભં મહાબ્ધયઃ

યતો યતો ઽદિતિર્યાતિ દદાતિ પદમુત્તમમ્ ।
તતસ્તતઃ ક્ષિતિઃ ખેદાન્નનામ દ્વિજપુઙ્ગવાઃ

દૈત્યાનામપિ સર્વેષાં ગર્ભસ્થે મધુસૂદને ।
બભૂવ તેજસો હાનિર્યથોક્તં પરમેષ્ઠિના