વામન પુરાણ · અધ્યાય 59

ઇતિ શ્રીવામનપુરાણે અષ્ટપઞ્ચાશો ઽધ્યાયઃ
પુલસ્ત્ય ઉવાચ ।
કશ્ચિદાસીદ્ દ્વિજદ્રોગ્ધા પિશુનઃ ક્ષત્રિયાધમઃ ।
પરપીડારુચિઃ ક્ષુદ્રઃ સ્વભાવાદપિ નિર્ઘૃણઃ

પર્યાસિતાઃ દા તેન પિતૃદેવદ્વિજાતયઃ ।
સ ત્વાયુષિ પરિક્ષિણે જજ્ઞે ઘોરો નિશાચરઃ

તેનૈવ કર્મદોષેમ સ્વેન પાપકૃતાં વરઃ ।
ક્રુરૈશ્ચક્રે તતો વૃત્તિં રાક્ષસત્વાદ્ વિશેષતઃ

તસ્ય પાપરતસ્યૈવં જગ્મુર્વર્ષશતાનિ તુ ।
તેનૈવ કર્મદોષેણ નાન્યાં વૃત્તિમરોચયત્

યં યં પશ્યતિ સત્ત્વં સ તં તમાદાય રાક્ષસઃ ।
ચખાદ રૌદ્રકર્માસૌ બાહુગોચરમાગતમ્

એવં તસ્યાતિદુષ્ટસ્ય કુર્વતઃ પ્રાણિનાં વધમ્ ।
જગામ ચ મહાન્ કાલઃ પરિણામં તથા વયઃ

સ કદાચિત્ તપસ્યન્તં દદર્શ સતરિતસ્તટે ।
મહાભાગમૂર્ધ્વભુજં યથાવત્સંયતેન્દ્રિયમ્

અનયા રક્ષયા બ્રહ્મન્ કૃતરક્ષં તપોનિધિમ્ ।
યોગાચાર્યં શુચિં દક્ષં વાસુદેવપરાયણમ્

વિષ્ણુઃ પ્રાચ્યાં સ્તિતશ્ચક્રી વિષણુર્દક્ષિણતો ગદી ।
પ્રતીચ્યાં શાર્ઙ્ગધૃગ્વિષ્ણુર્વિષ્ણુઃ ખડ્ગી મમોત્તરે

હૃષીકેશો વિકોણેષુ તચ્છિદ્રેષુ જનાર્દનઃ ।
ક્રોડરૂપી હરિર્ભૂમૌ નારસિંહો ઽમ્બરે મમ

શ્રુરાન્તમમલં ચક્રં ભ્રમત્યેતત્ સુદર્શનમ્ ।
અસ્યાંશુમાલા દુષ્પ્રેક્ષ્યા હન્તું પ્રેતનિશાચરાન્

ગદા ચેયં સહસ્રાર્ચિરુદ્વમન્ પાવકો યથા ।
રક્ષોભૂતપિશાચાનાં ડાકિનીનાં ચ શાતની

શાર્ઙ્ગં વિસ્ફૂર્જિતં ચૈવ વાસુદેવસ્ય મદ્રિપૂન્ ।
તિર્યઙ્મનુષ્યકૂષ્માણ્ડપ્રેતાદીન્ હન્ત્વશેષતઃ

ખડ્ગધારાજ્વલજ્જ્યોત્સ્નાનિર્ધૂતા યે મમાહિતાઃ ।
તે યાન્તુ સૌમ્યતાં સદ્યો ગરુડેનેવ પન્નગાઃ

યે કૂષ્માણ્ડાસ્તથા યક્ષા દૈત્યા યે ચ નિશાચરાઃ ।
પ્રેતા વિનાયકાઃ ક્રૂરા મનુષ્યા જૃમ્ભકાઃ ખગાઃ

સિંહાદયો યે પશવો દન્દશૂકાશ્ચ પન્નગાઃ ।
સર્વે ભવન્તુ મે સૌમ્યા વિષ્ણુચક્રરવાહતાઃ

ચિત્તવૃત્તિહરા યે ચ યે જનાઃ સ્મૃતીહારકાઃ ।
બલૌજસાં ચ હર્તારશ્છાયાવિધ્વંસકાશ્ચ યે

યે ચોપભોગહર્તારો યે ચ લક્ષણનાશકાઃ ।
કૂષ્માણ્ડાસ્તે પ્રણશ્યન્તુ વિષ્ણુચક્રરવાહતાઃ

બુદ્ધિસ્વાસ્થ્યં મનઃસ્વાસ્થ્યં સ્વાસ્થમૈન્દ્રિયકં તથા ।
મમાસ્તુ દેવદેવસ્ય વાસુદેવસ્ય કીર્તનાત્

પૃષ્ઠે પુરસ્તાદથ દક્ષિણોત્તરે વિકોણતશ્ચાસ્તુ નજાર્દનો હરિઃ ।
તમીડ્યમીશાનમનન્તમચ્યુતં જનાર્દનં પ્રણિપતિતો ન સીદતિ

યથા પરં બ્રહ્મ હરિસ્તથા પરં જગત્સ્વરૂપશ્ચ સ એવ કેશવઃ ।
ઋતેન તેનાચ્યુતનામકીર્તનાત્પ્રણાશમેતુ ત્રિવિધં મમાસુભમ્

ઇત્યસાવાત્મરક્ષાર્થં કૃત્વા વૈ વિષ્ણુપઞ્જરમ્ ।
સંસ્થિતો ઽસાવપિ બલી રાક્ષસઃ સમુપાદ્રવત્

તતો દ્વિજનિયુક્તાયાં રક્ષાયાં રજનીચરઃ ।
નિર્ધૂતવેગઃ સહસા તસ્થૌ માસચતુષ્ટયમ્

યાવદ્ દ્વિજસ્ય દેવર્ષે સમાપ્તિર્વૈ સમાધિતઃ ।
જાતે જપ્યાવસાને ઽસૌ ત દદર્શ નિશાચરમ્

દીનં હતબાલોત્સાહં કાન્દિશીકં હતૌજસમ્ ।
તં દૃષ્ટ્વા કૃપયાવિષ્ટઃ સમાશ્વાસ્ય નિશાચરમ્

પપ્રચ્છાગમને હેતું સ ચાચષ્ટ યથાતથમ્ ।
સ્વભાવમાત્મનો દ્રષ્ટું રક્ષયા તેજસઃ ક્ષિતિમ્

કથયિત્વા ચ તદ્રક્ષઃ કારણં વિવિધં તતઃ ।
પ્રસીદેત્યબ્રવીદ્ વિપ્રં નિર્વિણ્ણાઃ સ્વેન કર્મણા

બહૂનિ પાપાનિ મોક્ષમિચ્છામિ ત્વત્પ્રસાદતઃ ।
કૃતાઃ સ્ત્રિયો મયા બહ્વ્યો વિધવાઃ પુત્રવર્જિતાઃ ।
અનાગસાં ચ સત્ત્વાનામલ્પકાનાં ક્ષયઃ કૃતઃ

તસ્માત્ પાપાદહં મોક્ષમિચ્છમિ ત્વત્પ્રસાદતઃ ।
પાપપ્રશમનાયાલં કુરુ મે ધર્મદેશનમ્

પાપસ્યાસ્ય ક્ષયરમુપદેશં પ્રયચ્છ મે ।
તસ્ય તદ્ વચનં શ્રુત્વા રાક્ષસસ્ય દ્વિજોત્તમઃ

વચનં પ્રાહ ધર્માત્મા હેતુમચ્ચ સુભાષિતમ્ ।
કથં ક્રૂરસ્વભાવસ્ય સતસ્તવ નિશાચર ।
સહસૈવ સમાયાતા જિજ્ઞાસા ધર્મવર્ત્મનિ

રાક્ષસ ઉવાચ ।
ત્વાં વૈ સમાગતો ઽસ્મ્યદ્ય ક્ષિપ્તો ઽહં રક્ષયા બલાત્ ।
તવ સંસર્ગતો બ્રહ્મન્ જાતો નિર્વેદ ઉત્તમઃ

કા સા રક્ષા ન તાં વેદ્મિ વેદ્મિ નાસ્યાઃ પરાયણમ્ ।
યસ્યાઃ સંસર્ગસાસાદ્ય નિર્વેદં પ્રાપિતં પરમ્

ત્વં કૃપાં કુરુ ધર્મજ્ઞ મય્યનુક્રોશમાવહ ।
યથા પાપાપનોદો મે ભવત્યાર્ય તથા કુરુ

પુલસ્ત્ય ઉવાચ। ।
ઇત્યેવમુક્તઃ સ મુનિસ્તદા વૈ તેન રક્ષસા ।
પ્રત્યુવાચ મહાભાગો વિમૃશ્ય સુચિરં મુનિઃ

ઋષિરુવાચ। ।
યન્મમાહોપદેશાર્થં નિર્વિણ્ણાઃ સ્વેન કર્મણા ।
યુક્તમેતદ્ધિ પાપાનાં નિવૃત્તિરુપકારિકા

કરિષ્યે યાતુધાનાનાં નત્વહં ધર્મદેશનમ્ ।
તાન્ સંપૃચ્છ દ્વિજાન્ સૌમ્ય યે વૈ પ્રવચને રતાઃ

એવમુક્ત્વા યયૌ વિપ્રશ્ચિન્તામાપ સ રાક્ષસઃ ।
કથં પાપાપનોદઃ સ્યાદિતિ ચિન્તાકુલેન્દ્રિયઃ

ન ચખાદ સ સત્ત્વાનિ ક્ષુધા સંબાધિતો ઽપિ સન્ ।
ષષ્ઠે ષષ્ઠે તદા કાલે જન્તુમેકમભક્ષયત્

સ કદાચિત્ક્ષુધાવિષ્ટઃ પર્યટન્ વિપુલે વને ।
દદર્શાથ ફલાહારમાગતં બ્રહ્મચારિણમ્ ॥ 59.40 ॥
ગૃહીતો રક્ષસા તેન સ તદા મુનિદારકઃ ।
નિરાશો જીવિતે પ્રાહ સામપૂર્વં નિશાચરમ્

બ્રાહ્મણ ઉવાચ ।
ભો ભદ્ર બ્રૂહિ યત્ કાર્યં ગૃહીતો યેન હેતુના ।
તદનુબ્રૂહિ ભદ્રં તે અયમસ્મ્યનુશાધિ મામ્

રાક્ષસ ઉવાચ ।
ષષ્ઠે કાલે ત્વમાહારઃ ક્ષુધિતસ્ય સમાગતઃ ।
નિઃશ્રીકસ્યાતિપાપસ્ય નિર્ઘૃણસ્ય દ્વિજદ્રુહઃ

બ્રાહ્મણ ઉવાચ ।
યદ્યવશ્યં ત્વયા ચાહં ભક્ષિતવ્યો નિશાચર ।
આયાસ્યામિ તવાદ્યૈવ નિવેદ્ય ગુરવે ફલમ્

ગુર્વર્થમેતદાગત્ય યત્ફલગ્રહણં કૃતમ્ ।
મમાત્ર નિષ્ઠા પ્રાપ્તસ્ય ફલાનિ વિનિવેદિતુમ્

સ ત્વં મુહૂર્તમાત્રં મામત્રૈવં પ્રતિપાલય ।
નિવેદ્ય ગુરવે યાવદિહાગચ્છામ્યહં ફલમ્

રાક્ષસ ઉવાચ। ।
ષષ્ઠે કાલે ન મે બ્રહ્મન્ કશ્ચિદ્ ગ્રહણમાગતઃ ।
પ્રતિમુચ્યેત દેવો ઽપિ ઇતિ મે પાપાજીવિકા

એક એવાત્ર મોક્ષસ્ય તવ હેતુઃ શૃણુષ્વ તત્ ।
મુઞ્ચામ્યહમસંદિગ્ધં યદિ તત્કુરુતે ભવાન્

બ્રાહ્મણ ઉવાચ ।
ગુરોર્યન્ન વિરોધાય યન્ન ધર્મોપરોધકમ્ ।
તત્કરિષ્યામ્યહં રક્ષો યન્ન વ્રતહરં મમ

રાક્ષસ ઉવાચ ।
મયા નિસર્ગતો બ્રહ્મન્ જાતિદોષાદ્ વિશેષતઃ ।
નિર્વિવેકેન ચિત્તેન પાપકર્મ સદા કૃતમ્

આબાલ્યાન્મમ પાપેષુ ન ધર્મેષુ રતં મનઃ ।
તત્પાપાસંક્ષયાન્મોક્ષં પ્રાપ્નુયાં યેન તદ્ વદ

યાનિ પાપાનિ કર્માણિ બાલત્વાચ્ચરિતાનિ ચ ।
દુષ્ટાં યોનિમિમાં પ્રાપ્ય તન્મુક્તિં કથય દ્વિજ

યદ્યેતદ્ દ્વિજપુત્ર ત્વં સમાખ્યાસ્યસ્યશેષતઃ ।
તતઃ ક્ષુધાર્તાન્મત્તસ્ત્વં નિયતં મોક્ષમાપ્સ્યસિ

ન ચેત્ તત્પાપશીલો ઽહમત્યર્થં ક્ષુત્પિપાસિતઃ ।
ષષ્ઠે કાલે નૃશંસાત્મા ભક્ષયિષ્યામિ નિર્ઘૃણઃ

પુલસ્ત્ય ઉવાચ ।
એવમુક્તો મુનિસુતસ્તેન ઘોરેમ રક્ષસા ।
ચિન્તામવાપ મહતીમશક્તસ્તદુદીરણે

સ વિમૃશ્ય ચિરં વિપ્રઃ શરણં જાતવેદસમ્ ।
જગામ જ્ઞાનદાનાય સંશયં પરમં ગતઃ

યદિ શુશ્રુષિતો વહ્નિર્ગુરુશુશ્રૂષણાદનુ ।
વ્રતાનિ વા સુચીર્ણાનિ સપ્તાર્ચિઃ પાતુ માં તતઃ

ન માતરં ન પિતરં ગૌરવેણ યથા ગુરુમ્ ।
સર્વદૈવાવગચ્છામિ તથા માં પાતુ પાવકઃ

યથા ગુરું ન મનસા કર્મણા વચસાપિ વા ।
અવજાનામ્યહં તેન પાતુ સત્યેન પાવકઃ

ઇત્યેવં મનસા સત્યાન્ કુર્વતઃ શપથાન્ પુનઃ ।
સપ્તર્ચિષા સમાદિષ્ટા પ્રાદુરાસીત્ સરસ્વતી

સા પ્રોવાચ દ્વિજસુતં રાક્ષસગ્રહણાકુલમ્ ।
મા ભૈર્દ્વિજસુતાહં ત્વાં મોક્ષયિષ્યામિ સંકટાત્

યદસ્ય રક્ષસઃ શ્રેયો જિહ્વાગ્રે સંસ્થિતા તવ ।
તત્ સર્વં કથયિષ્યામિ તતો મોક્ષમવાપ્સ્યસિ

અદૃશ્યા રક્ષસા તેન પ્રોક્ત્વેત્થં સા સરસ્વતી ।
અદર્શાનં ગતા સો ઽપિ દ્વિજઃ પ્રાહ નિશાચરમ્

બ્રાહ્મણ ઉવાચ ।
શ્રુયતાં તવ યચ્છ્રેયસ્તથાન્યેષાં ચ પાપિનામ્ ।
સમસ્તપાપશુદ્ધ્યર્થં પુણ્યોપચયદં ચ યત્

પ્રાતરુત્થાય જપ્તવ્યં મધ્યાહ્ને ઽહ્નક્ષયે ઽપિ વા ।
અસંશયં સદા જપ્યો જપતાં પુષ્ટિશાન્તિદઃ

ઓં હરિં કુષ્ણં હૃષીકેશં વાસુદેવં જનાર્દનમ્ ।
પ્રણતો ઽસ્મિ જગન્નાથં સ મે પાપં વ્યપોહતુ

ચરાચરસુરું નાથં ગોવિન્દં શેષશાયિનમ્ ।
પ્રણતો ઽસ્મિ પરં દેવં સ મે પાપં વ્યપોહતુ

શઙ્ખિનં ચક્રિણં શાર્ઙ્ગધારિણં સ્રગ્ધરં પરમ્ ।
પ્રણતો ઽસ્મિ પતિં લક્ષ્મ્યાઃ સ મે પાપં વ્યપોહતુ

દામોદરમુદારાક્ષં પુણ્ડરીકાક્ષમચ્યુતમ્ ।
પ્રણતો ઽસ્મિ સ્તુતં સ્તુત્યૈઃ સ મે પાપં વ્યપોહતુ

નારાયણં નરં શૌરિં માધવં મધુસૂદનમ્ ।
પ્રણતો ઽસ્મિ ધરાધારં સ મે પાપં વ્યપોહતુ

કેશવં ચન્દ્રસૂર્યાક્ષં કંસકેશિનિષૂદનમ્ ।
પ્રણતો ઽસ્મિ મહાબાહું સ મે પાપં વ્યપોહતુ

શ્રીવત્સવક્ષસં શ્રીશં શ્રીધરં શ્રીનિકેતનમ્ ।
પ્રણતો ઽસ્મિ શ્રિયઃ કાન્તં સ મે પાપં વ્યપોહતુ

યમીશં સર્વભૂતાનાં ધ્યાયન્તિ યતયો ઽક્ષરમ્ ।
વાસુદેવમનિર્દેશ્યં તમસ્મિ શરણં ગતઃ

સમસ્તાલમ્બનેભ્યો યં વ્યાવૃત્ત્ય મનસો ગતિમ્ ।
ધ્યાયન્તિ વાસુદેવાખ્યં તમસ્મિ શરણં ગતઃ

સર્વગં સર્વભૂતં ચ સર્વસ્યાધારમીશ્વરમ્ ।
વાસુદેવં પરં બ્રહ્મ તમસ્મિ શરણં ગતઃ

પરમાત્માનમવ્યક્તં યં પ્રયાન્તિ સુમેધસઃ ।
કર્મક્ષયે ઽક્ષયં દેવં તમસ્મિ શરણં ગતઃ

પુણ્યપાપવિનિર્મુક્તા યં પ્રવિશ્ય પુનર્ભવમ્ ।
ન યોગિનઃ પ્રાપ્નુવન્તિ તમસ્મિ શરણં ગતઃ

બ્રહ્મ ભૂત્વા જગત્ સર્વં સદેવાસુરમાનુષમ્ ।
યઃ સૃજત્યચ્યુતો દેવસ્તમસ્મિ શરણં ગતઃ

બ્રહ્મત્વે યસ્ય વક્ત્રેભ્યશ્ચતુર્વેદમયં વપુઃ ।
પ્રભુઃ પુરાતનો જજ્ઞે તમસ્મિ શરણં ગતઃ

બ્રહ્મરૂપધરં દેવં જગદ્યોનિ જનાર્દનમ્ ।
સ્રષ્ટૃત્વે સંસ્થિતં સૃષ્ટૌ પ્રણતો ઽસ્મિ સનાતનમ્

સ્રષ્ટા ભૂત્વા સ્થિતો યોગી સ્થિતાવસુરસૂદનઃ ।
તમાદિપુરુષં વિષ્ણું પ્રમતો ઽસ્મિ જનાર્દનમ્

ધૃતા મહી હતા દૈત્યાઃ પરિત્રાતાસ્તથા સુરાઃ ।
યેન તં વિષ્ણુમાદ્યેશં પ્રણતો ઽસ્મિ જનાર્દનમ્

યજ્ઞૈર્યજન્તિ યં વિપ્રા યજ્ઞેશં યજ્ઞભાવનમ્ ।
તં યજ્ઞપુરુષં વિષ્ણું પ્રણતો ઽસ્મિ સનાતનમ્

પાતાલવીથીભૂતાનુ તથા લોકાન્ નિહન્તિ યઃ ।
તમન્તપુરુષં રુદ્રં પ્રણતો ઽસ્મિ સનાતનમ્

સંભક્ષયિત્વા સકલં યથાસૃષ્ટમિદં જગત્ ।
યો વૈ નૃત્યતિ રુદ્રાત્મા પ્રણતો ઽસ્મિ જનાર્દનમ્

સુરાસુરાઃ પિતૃગણાઃ યક્ષગન્ધર્વરાક્ષસાઃ ।
સંભૂતા યસ્ય દેવસ્ય સર્વગં તં નમામ્યહમ્

સમસ્તદેવાઃ સકલા મનુષ્યાણાં ચ જાતયઃ ।
યસ્યાંશભૂતા દેવસ્ય સર્વગં તં નતો ઽસ્મયહમ્

વૃક્ષગુલ્માદયો યસ્ય તથા પશુમૃગાદયઃ ।
એકાંશભૂતા દેવસ્ય સર્વગં તં નમામ્યહમ્

યસ્માન્નાન્યત્ પરં કિઞ્ચિદ્ યસ્મિન્ સર્વં મહાત્મનિ ।
યઃ સર્વમધ્યગો ઽનન્તઃ સર્વગં તં નમામ્યહમ્

યથા સર્વેષુ ભૂતેષુ ગૂઢો ઽગ્નિરિવ દારુષુ ।
વિષ્ણુરેવં તથા પાપં મમાશેષં પ્રણશ્યતુ

યથા વિષ્ણુમયં સર્વં બ્રહ્મદિ સચરાચરમ્ ।
યચ્ચ જ્ઞાનપરિચ્છેદ્યં પાપં નશ્યતુ મે તથા

શુભશુભાનિ કર્માણિ રજઃસત્ત્વતમાંસિ ચ ।
અનેકજન્મકર્મોત્થં પાપં નશ્યતુ મે તથા

યન્નિશાયાં ચ યત્પ્રાતર્યન્મધ્યાહ્નાપરાહ્ણયોઃ ।
સંધ્યયોશ્ચ કૃતં પાપં કર્મણા મનસા ગિરા

યત્ તિષ્ઠતા યદ્ વ્રજતા યચ્ચ શય્યાગતેન મે ।
કૃતં યદશુભં કર્મ કાયેન મનસા ગિરા

અજ્ઞાનતો જ્ઞાનતો વા મદાચ્ચલિતમાનસૈઃ ।
તત્ ક્ષિપ્રં વિલયં યાતુ વાસુદેવસ્ય કીર્તનાત્

પરદારપરદ્રવ્યવાઞ્છાદ્રોહોદ્ભવં ચ યત્ ।
પરપીડોદ્ભવાં નિન્દાં કુર્વતા યન્મહાત્મનામ્

યચ્ચ ભોજ્યે તથા પેયે ભક્ષ્યે ચોષ્યે વિલેહને ।
તદ્ યાતુ વિલયં તોયે યથા લવણભાજનમ્

યદ્ બાલ્યે યચ્ચ કૌમારે યત્ પાપં યૌવને મમ ।
વયઃપરિણતૌ યચ્ચ યચ્ચ જન્માતરે કૃતમ્

તન્નારાયણ ગોવિન્દ હરિકૃષ્ણેશ કીર્તનાત્ ।
પ્રયાતુ વિલયં તોયે યથા લવણભાજનમ્

વિષ્ણવે વાસુદેવાય હરયે કેશવાય ચ ।
જનાર્દનાય કૃષ્ણાય નમો ભૂયો નમો નમઃ

ભવિષ્યન્નરકઘ્નાય નમઃ કંસવિઘાતિને ।
અરિષ્ટકેશિચણૂરદેવારિક્ષયિણે નમઃ

કો ઽન્યો બલેર્વઞ્ચયિતા ત્વામૃતે વૈ ભવિષ્યતિ ।
કો ઽન્યો નાશયતિ બલાદ્ દર્પં હૈહયભૂપતેઃ

કઃ કરિષ્યત્યથાન્યો વૈ સાગરે સેતુબન્ધનમ્ ।
વધિષ્યતિ દશગ્રીવં કઃ સામાત્યપુરઃસરમ્

કસ્ત્વામૃતે ઽન્યો નન્દસ્ય ગોકુલે રતિમેષ્યતિ ।
પ્રલમ્બપૂતનાદીનાં ત્વામૃતે મધુસૂદન ।
નિહન્તાપ્યથબા શાસ્તા દેવદેવ ભવિષ્યતિ

જપન્નેવં નરઃ પુણ્યં વૈષ્ણવં ધર્મમુત્તમમ્ ।
ઇષ્ટાનિષ્ટપ્રસંગેભ્યો જ્ઞાનતો ઽજ્ઞાનતો ઽપિ વા

કૃતં તેન તુ યત્ પાપં સપ્તજન્માન્તરાણિ વૈ ।
મહાપાતકસંજ્ઞં વા તથા ચૈવોપપાતકમ્

જજ્ઞાદીનિ ચ પુણ્યાનિ જપહોમવ્રતાનિ ચ ।
નાશયેદ્ યોગિનાં સર્વમામપાત્રમિવામ્ભસિ

નરઃ સંવત્સરં પૂર્ણં તિલપાત્રાણિ ષોડશ ।
અહન્યહનિ યો દદ્યાત્ પઠત્યેતચ્ચ તત્સમમ્

અવિલુપ્તબ્રહ્મચર્યં સંપ્રાપ્ય સ્મરણં હરેઃ ।
વિષ્ણુલોકમવાપ્નોતિ સત્યમેતન્મયોદિતમ્

યથૈતત્ સ્તયમુક્તં મે ન હ્યલ્પમપિ મે મૃષા ।
રાક્ષસસ્ત્રસ્તસર્વાઙ્ગં તથા મામેષ મુઞ્ચતુ

પુલસ્ત્ય ઉવાચ ।
એવમુચ્ચારિતે તેન મુક્તો વિપ્રસ્તુ રક્ષસા ।
અકામેન દ્વિજો ભૂયસ્તમાહ રજનીચરમ્

બ્રહ્મણ ઉવાચ ।
એતદ્ ભદ્ર મયા ખ્યાતં તવ પાતકનાશનમ્ ।
વિષ્ણોઃ સારસ્વતં સ્તોત્રં યજ્જગાદ સરસ્વતી

હુતાશનેન પ્રહિતા મમ જિહ્વાગ્રસંસ્થિતા ।
જગાદૈનં સ્તવં વિષ્ણોઃ સર્વેષાં ચોપશાન્તિદમ્

અનેનૈવ જગન્નાથં ત્વમારાધય કેસવમ્ ।
તતઃ શાપાપનોદં તુ સ્તુતે લપ્સ્યસિ કેશવે

અહર્નિશં હૃષીકેશં સ્તવેનાનેન રાક્ષસ ।
સ્તુહિ ભક્તિં દૃઢાં કૃત્વા તતઃ પાપાદ્ વિમોક્ષ્યસે

સ્તુતો હિ સર્વપાપાનિ નાશયિષ્યત્યસંશયમ્ ।
સ્તુતો હિ ભક્ત્યા નૄણાં વૈ સર્વપાપહરો હરિઃ

પુલસ્ત્ય ઉવાચ ।
તતઃ પ્રણમ્ય તં વિપ્રં પ્રસાદ્ય સ નિશાચરઃ ।
તદૈવ તપસે શ્રીમાન્ શાલગ્રામમગાદ્ વશી

અહર્નિશં સ એવૈનં જપન્ સારસ્વતં સ્તવમ્ ।
દેવક્રિયારતિર્ભૂત્વા તપસ્તેપે નિશાચરઃ

સમારાધ્ય જગન્નાથં સ તત્ર પુરષોત્તમમ્ ।
સર્વપાપવિનિર્મુક્તો વિષ્ણુલોકમવાપ્તવાન્

એતત્ તે કથિતં બ્રહ્મન્ વિષ્ણોઃ સારસ્વતં સ્તવમ્ ।
વિપ્રવક્ત્રસ્થયા સમ્યક્સરસ્વત્યા સમીરિતમ્

ય એતત્ પરમં સ્તોત્રં વાસુદેવસ્ય માનવઃ ।
પઠષ્યતિ સ સર્વેભ્યઃ પાપેભ્યો મોક્ષમાપ્સ્યતિ