વલ્લાલચરિત · અધ્યાય 2.5

ઇત્યાનન્દભટ્ટપ્રોક્તે વલ્લાલચરિતે દયિતાપ્રસાધનં નામ ચતુર્થો ઽધ્યાયઃ ।
[[032]]
અથ પઞ્ચમો ઽધ્યાયઃ
ઉત્થાયાહર્મ્મુખે રાજા ક્રોધમાહારયન્ ભૃશમ્ ।
ઘાતુકાનાદિશદ્ધન્તુમુપાંશુ તનયં પ્રિયમ્

શ્રુત્વા સ્વસ્ય બધાદેશં તપસ્વી લક્ષ્મણમસ્તતઃ ।
વ્યાકુલો મન્ત્રયામાસ કાન્તયા સહ નિર્જ્જને

રજન્યાં ગાહમાનાયામામન્ત્ર્ય રહસિ પ્રિયામ્ ।
ગુપ્તાં તરણિમારુહ્ય પલાયત મહાભયાત્

પ્રભાતાયાં વિભાવર્ય્યાં જ્ઞાત્વા તસ્ય પલાયનમ્ ।
દુર્ગાવાડીં યયૌ રાજા ચિન્તાજૃમ્ભવિલોચનઃ

પ્રવિશન્ મન્દિરં તત્ર ભિત્તિકાયાં મહીપતિઃ ।
સ્વસ્નુષાલિખિતં શ્લોકં દૃષ્ટ્વેમમપઠત્ સ્વયમ્

પતત્યવિરતં વારિ નૃત્યન્તિ શિખિનો મુદા ।
અદ્ય કાન્તઃ કૃતાન્તો વા દુઃખસ્યાન્તં કરિષ્યતિ

શ્લોકમેતં વાચયિત્વા વલ્લાલો ધરણીપતિઃ ।
પુત્રસ્નેહચલચ્ચિત્તઃ કૈવર્ત્તાનાજુહાવ હ

તાન્ પ્રાપ્તાનબ્રવીદ્રાજા હંહો નૌકર્મ્મજીવિનઃ ।
મત્પ્રિયં યદિ કર્ત્તવ્યં શ્રયતાં વચનં મમ

ઇતો ઽપક્રાન્તસ્તનયો લક્ષ્મણઃ ક્રોધલક્ષણઃ ।
યુષ્મભ્યમીપ્સિતં દદ્યામન્વિષ્યાનયતાઞ્જસા

નાવિકા ઊચુઃ:
ભૂધરે કન્દરે દુર્ગે કાન્તારે સલિલેશ્વરે ।
પાતાલે વાનયિષ્યામસ્તિષ્ઠન્તમપિ માચિરાત્

ઇત્યુક્ત્વા ચાભિવાદ્યાથ રાજાનં નાવિકા મુદા ।
આનેતું લક્ષ્મણં જગ્મુઃ કૃત્વા કોલાહલં ભૃશમ્

અરિત્રાણાં દ્વિસપ્તત્યા વાહયન્તસ્તરીં દ્રુતમ્ ।
આનિન્યુર્લક્ષ્મણં દ્વાભ્યામહોભ્યાં જાલજીવિનઃ

તતસ્તેભ્યો દદૌ રાજા સન્તોષવિમલાનનઃ ।
ધનરત્નવસ્ત્રભારાન્ હાલિક્યઞ્ચોપજીવનમ્