વલ્લાલચરિત · અધ્યાય 2.24

ઇત્યાન્દભટ્ટપ્રોક્તે શરણદત્તીયે વલ્લાલચરિતે જાતીનાં પાતનોન્નયનાદિનામ ત્રયોવિંશો ઽધ્યાયઃ ।
[[112]]
અથ ચતુર્વિંશો ઽધ્યાયઃ
પુરા શ્રીરાજવલ્લાલો વસન્ ગૌડે પુરોત્તમે ।
અર્હતામનુરૂપાણામુપાચક્રે પૃથુપ્રથઃ

કારયિત્વા મઠં સૌમ્યં ન્યસ્તચિત્રશિલાતલમ્ ।
પક્વેષ્ટકામયં દિવ્યં શયનાસનસંયુતમ્

સુભૌમં ચિત્રશાલાઢ્યમ્ દૃઢસ્તમ્ભમ્ મનોહરમ્ ।
ન્યસ્તગ્રન્થાધારભૂતપ્રત્યગ્રનાગદન્તકમ્

નાનાપુષ્પફલાલોલરમ્યારામવિભૂષિતમ્ ।
અત્યચ્છસ્વાદુપાનીય-સમ્પન્નસલિલાશયમ્

દ્વારવાતાયનોપેતં નાનોપસ્કરસંયુતમ્ ।
સુધોપલિપ્તમ્ શ્વેતાભમ્ સદન્નાદિપ્રપૂરિતમ્

વ્યાખ્યાનધ્યાનહોમાદિપઠનસ્થલશોભિતમ્ ।
યતીનાં પથિકાનાઞ્ચ વાસવેશ્મસમન્વિતમ્

ગુહ્યાપચરકૈર્યુક્તં પ્રદ્યુમ્નેશ્વરસન્નિધૌ ।
યોગિનઃ શ્રીસિંહગિરેર્વિધિનાસૌ ન્યવેદયત્

કૌપીનેન્ધનવસ્ત્રાદિવસ્તૂનાં પ્રાપ્તયે તથા ।
પ્રદદૌ વિપુલાં ભૂમિં રાજા શ્રદ્ધાસમન્વિતઃ

તતઃ સર્વ્વગુણોત્કર્ષશુદ્ધબુદ્ધિર્નૃપોત્તમઃ ।
તામ્રપટ્ટે કારયિત્વા શાસનં પરશાસનઃ

સુવર્ણમુક્તિકસ્યાન્તર્ગ્રામં કાસારકં દદૌ ।
વર્ષવૃદ્ધૌ મહારાજો ગૌતમાનન્તશર્મ્મણે

ઉપકૃપ્તભક્ષ્યભોજ્યસર્વ્વધાન્યસમન્વિતમ્ ।
દાસદાસીસમાયુક્તં સર્વ્વોપસ્કરસંયુતમ્

સુધાવલિપ્તં સુદૃઢં કપાટાર્ગલયન્ત્રિતમ્ ।
શુભપ્રવેશનિષ્કાશં જાલાદિપરિશોભિતમ્

એવંવિધં કારયિત્વા બહુશો ભવનં નૃપઃ ।
દાક્ષિણાત્યાન્ તતસ્તેષુ વાસયામાસ ભૂસુરાન્

સ્વર્ણદાનં રૌપ્યદાનં ગોદાનઞ્ચ ધરાપતિઃ ।
દાનઞ્ચ વિવિધઞ્ચક્રે નિત્યનૈમિત્તિકાદિકમ્

નાનોપભોગાનુપભુઞ્જતઃ સત્પાત્રેષુ દાનં દદતશ્ચ નિત્યમ્ ।
જગામ કાલઃ સુખતઃ સમાનો ભૂતો ન કશ્ચિદ્ભવિતાસ્તિ ચાસ્ય

[[114]]
ન યેન ભુક્તાઃ સુખદાઃ સુભોગાઃ દાનં ન દત્તં ધનિનાર્હતાઞ્ચ ।
અવાપ્યતે તેન કઠોરઘોર દુઃસહ્યદુઃખમધિકં પરત્ર