વૈશેષિકસૂત્ર · અધ્યાય 3.1

પ્રસિદ્ધા ઇન્દ્રિયાર્થાઃ

ઇન્દ્રિયાર્થપ્રસિદ્ધિર્ ઇન્દ્રિયાર્થેભ્યો ઽર્થાન્તરત્વે હેતુઃ

સો ઽનપદેશઃ

કારણાજ્ઞાનાત્

કાર્યાજ્ઞાનાત્

અજ્ઞાનાચ્ ચ

અન્ય એવ હેતુર્ ઇત્ય્ અનપદેશઃ

સંયોગિ સમવાય્ય્ એકાર્થસમવાયિ વિરોધિ ચ, કાર્યં કાર્યાન્તરસ્ય, કારણં કારણાન્તરસ્ય, વિરોધ્ય્ અભૂતં ભૂતસ્ય, ભૂતમ્ અભૂતસ્ય, અભૂતમ્ અભૂતસ્ય, ભૂતં ભૂતસ્ય

પ્રસિદ્ધપૂર્વકત્વાદ્ અપદેશસ્ય

અપ્રસિદ્ધો ઽનપદેશઃ

અસન્ સન્દિગ્ધશ્ ચાનપદેશઃ

વિષાણી તસ્માદ્ અશ્વો વિષાણી તસ્માદ્ ગૌર્ ઇતિ ચ

આત્મેન્દ્રિયમનોઽર્થસન્નિકર્ષાદ્ યન્ નિષ્પદ્યતે તદ્ અન્યત્

પ્રવૃત્તિનિવૃત્તી ચ પ્રત્યગાત્મનિ દૃષ્ટે પરત્ર લિઙ્ગમ્