તોડલતન્ત્ર · અધ્યાય 9

ત્રિપુરાયા મહામન્ત્રં નિત્યાતન્ત્રે શ્રુતં મયા
ઇદાનીં શ્રોતુમ્ ઇચ્છામિ નવાર્ણસ્ય ચ વાસનામ્ ॥

ભૂમિશ્ ચન્દ્રઃ શિવો માયા શક્તિઃ કૃશાનુસાદનૌ
અર્ધચન્દ્રશ્ચ બિન્દુશ્ચ નવાર્ણો મેરુરુચ્યતે ॥

ભૂમિબીજજપાદેવ ભૂપતિર્ જાયતે ઽચિરાત્
ચન્દ્રબીજજપાદેવ મહાસૌન્દર્યમાપ્નુયાત્ ॥

શિવબીજજપાદ્ એવ શિવવદ્વિહરેત્ ક્ષિતૌ
એકત્રોચ્ચારણાત્ સત્યં ચતુર્વર્ગફલપ્રદમ્ ॥

યત્ત્વયા કથિતં નાથ યોગજ્ઞાનાદિકં લયમ્
યાવત્ કામાદિ સંદીપ્યો ભાવયોગો ન લભ્યતે ॥

ઊર્ધ્વરેતા મહાયોગી તદધઃ શક્તિયોગતઃ
બ્રૂહિ મે જગતાંનાથ કથં દીર્ઘાયુષં ભવેત્ ॥

શૃણુ દેવિ પ્રવક્ષ્યામિ યેન દીર્ઘાયુષં ભવેત્
શ્રુત્વા ગોપય યત્નેન ન પ્રકાશ્યં કદાચન ॥

પૂજયેત્ કાલિકાં દેવીં તારિણીં વાથ સુન્દરીમ્
ષોડશેનોપચારેણ પઞ્ચતત્ત્વેન પાર્વતિ ॥

દિનત્રયં પૂજયિત્વા ષટ્ચક્રં ચિન્તયેદથ
તતસ્તુ પરમેશાનિ માલામન્ત્રં સમભ્યસેત્ ॥

ષોડશી વા મહાપૂર્વા પત્ત્રે ચાભ્યાસમાચરેત્
ચતુષ્પત્ત્રે ચાષ્ટવારં ષટ્પત્ત્રે દ્વાદશં જપેત્ ॥

દશપત્ત્રે વિંશતિં ચ દ્વાદશે વેદનેત્રકમ્
ષોડશે દશસંખ્યં તુ ચતુર્વારં શ્રુવોઽષ્ટકમ્ ॥

કુમ્ભકેન જપેન્મન્ત્રં માલાષટ્કે સુરેશ્વરિ
એવં ક્રમેણ દેવેશિ સ્થિરમાયુર્યદા ભવેત્ ॥

પ્રજપેદક્ષમાલાયાં યેન મૃત્યુંજયો ભવેત્
મૂલચક્રાચ્છિરોઽન્તા ચ સુષુમ્ના પરિકીર્તિતા
તદ્ગર્ભસ્થા ચ યા શક્તિઃ સા દેવી કુણ્ડરૂપિકા ॥

સદા કુણ્ડલિની દેવી પઞ્ચાશદ્વર્ણભૂષિતા
માલારૂપા કથં દેવ ઇતિ મે સંશયો હૃદિ ॥

સહસ્રારે મહાપદ્મે બીજકોશે શિવાલયે
હંસેન વાયુયોગેન પૂરકેણ સમાનયેત્ ॥

સહસ્રારં તુ સમ્પ્રાપ્ય શિવં દૃષ્ટ્વા તુ કામિની
માલાકારેણ તલ્લિઙ્ગં સંવેષ્ટ્ય કુણ્ડલી સદા ॥

અકારાદિલકારાન્તા ક્ષકારં વક્ત્રસંયુતમ્
ચરમાર્ણં સરન્ધ્રં ચ નિજપુચ્છેન કામિની ॥

ભેદયિત્વા સ્વપુચ્છેન નાગપાશં તદૂર્ધ્વકે
એતત્કારણં સંવ્યાપ્ય સંસ્થિતા કુણ્ડલી યદા ॥

તદૈવ પ્રજપેન્મન્ત્રમ્ અમરત્વં સ વિન્દતિ
રેચનાત્ કામિની દેવી પ્રવિશન્તી સ્વકેતનમ્ ॥

ન તત્ર પ્રજપેન્મન્ત્રં જપાન્મૃત્યુમવાપ્નુયાત્
રેચકે છિન્નમાલાયાં સત્યં હિ સુરવન્દિતે ॥

છિન્ને સૂત્રે ભવેન્મૃત્યુઃ પુરૈવ કથિતં મયા
ઇતિ તે કથિતં કાન્તે યતો મૃત્યુંજયો ભવેત્ ॥

અથવા નિજનાસાગ્રે દૃષ્ટિમારોપ્ય યત્નતઃ
વાયું સંધાર્ય યત્નેન એકોચ્ચારેણ ચોચ્ચરેત્ ॥

માલામન્ત્રં ષોડશીં વા તથા ચાષ્ટાદશાક્ષરીમ્
સહસ્રં પ્રજપેન્મન્ત્રં પ્રત્યહં યદિ પાર્વતિ ॥

જિત્વા મૃત્યું જરાં રોગં દીર્ઘકાલં સ જીવતિ
એતદન્યં મહાયોગં ભોગાર્થી નહિ લભ્યતે ॥

અથવા પરમેશાનિ ડામરોક્તવિધાનતઃ
યજેત્ કાત્યાયનીં દેવીં ભૂતપૂર્વાં પ્રયત્નતઃ ॥

તદા પઞ્ચસહસ્રાબ્દં નિશ્ચિતં તુ સ જીવતિ
ઇતિ તે કથિતં સર્વં દેહરક્ષણકારણમ્ ॥

ન ભોગી ભોગમાપ્નોતિ યોગી યોગો ન લભ્યતે
એતત્તત્ત્વેન દેવેશિ ભોગો યોગાયતે ધ્રુવમ્ ॥

યન્માલાયાં જપેનૈવ કિં ફલં લભતે નરઃ
પૃથક્ પૃથઙ્ મહાદેવ પત્ત્રમાલાફલં વદ ॥

ભૂમિકામી જપેન્ મન્ત્રં મૂલાધારે ચતુષ્ટયે
સ્વાધિષ્ઠાને જપાદેવ મહેન્દ્રો જાયતેઽચિરાત્ ॥

મણિપૂરે જપાદેવ ભવેત્ સ્વર્ગસ્ય ભાજનમ્
અનાહતે મહાપદ્મે જપાદ્ બ્રહ્મપુરં વ્રજેત્ ॥

વિશુદ્ધાખ્યે જપાદેવ વિષ્ણુલોકે વસેદ્ ધ્રુવમ્
આજ્ઞાચક્રે ચ જપ્તવ્યે શ્વેતદ્વીપે વસેત્ સદા ॥

યન્માલા પરમેશાનિ બાહ્યમાલા પ્રકીર્તિતા
અન્તર્માલા મહામાલા પઞ્ચાશદ્વર્ણરૂપિણી ॥

માહાત્મ્યં તસ્ય દેવેશિ કિં વક્તું શક્યતે મયા
સહસ્રારે સ્થિરીભૂય યદિ ચાષ્ટશતં જપેત્ ॥

તત્ફલાત્ કોટિભાગૈકં ભાગં ચાન્યેન વિદ્યતે
પૃથિવ્યામવ્યયો દેહો ભવત્યેવ ન સંશયઃ ॥

યન્માલાયાં જપેન્મન્ત્રમ્ અભ્યાસાર્થં હિ પાર્વતિ
ઇતિ તે કથિતં દેવિ ચિરજીવી યથા ભવેત્ ॥

ઇદાનીં પરમેશાનિ ભૂતકાત્યાયનીં શૃણુ
વેદાદ્યં શબ્દબીજં ચ મહામાયાં તતઃ પરમ્ ॥

અસ્ત્રયુગ્મં વહ્નિજાયા મનુઃ સપ્તાક્ષરઃ પરઃ
શ્રીશિવોઽસ્ય ઋષિઃ પ્રોક્તો વિરાટ્ છન્દ ઉદાહૃતમ્ ॥

ભૂતકાત્યાયની દેવી ધર્માર્થકામદા સદા
પ્રણવેન ષડઙ્ગં ચ પ્રાણાયામં ચ સુન્દરિ ॥

ધ્યાનમસ્યાઃ પ્રવક્ષ્યામિ શૃણુ સુન્દરિ સાદરમ્
ગૌરવર્ણાં મુક્તકેશીં સર્વાભરણભૂષિતામ્ ॥

પટ્ટવસ્ત્રપરીધાનાં સદા ઘૂર્ણિતલોચનામ્
વામપાણૌ રક્તપૂર્ણ ખર્પરં દક્ષિણે કરે ॥

મદ્યપૂર્ણસ્વર્ણપાત્રાં ગ્રીવાયાં હારભૂષિતામ્
શરચ્ચન્દ્રસમાભાસાં પાદાઙ્ગુલિવિરાજિતામ્ ॥

એવં તાં વરદાં નિત્યાં ભાવયેત્ સિદ્ધિહેતવે
સામાન્યાર્ઘ્યં તતો દેવિ સ્વવામે વિન્યસેત્તતઃ ॥

જીવન્યાસાદિકં કૃત્વા પૂજયેત્ પરમેશ્વરીમ્
ષોડશેનોપચારેણ પઞ્ચતત્ત્વેન સુન્દરિ ॥

યજેત્તાં બહુયત્નેન ગૃહમધ્યે દિનત્રયમ્
તતો જપેન્મહામન્ત્રં ગજાન્તકસહસ્રકમ્ ॥

તતશ્ચ પૂજયેદ્ દેવીં શૂન્યાગારે દિનત્રયમ્
પ્રત્યહં પ્રજપેન્મન્ત્રં ગજાન્તકસહસ્રકમ્ ॥

એવ કૃતે મહેશાનિ યદિ સિદ્ધિર્ન જાયતે
તતશ્ચ પ્રજપેન્મન્ત્રં પિતૃભૂમૌ દિનત્રયમ્ ॥

તતઃ સિદ્ધિર્ભવેદ્ દેવિ સત્યં સત્યં હિ સુપ્રિયે
તદ્વાક્યં પ્રાર્થનાવાક્યં ડામરાખ્યે મયોદિતમ્ ॥