તોડલતન્ત્ર · અધ્યાય 8

સાર્ધત્રિકોટિનાડીનામ્ આલયં ચ કલેવરમ્
ક્રમેણ શ્રોતુમ્ ઇચ્છામિ તદ્ વદસ્વ મયિ પ્રભો ॥

લોમ્નિ કૂપે સપાદાર્ધ કોટયશ્ચૈવ સુન્દરિ
હસ્તાસ્યે ચ તદા પાદે ઽગ્નિલક્ષનાડયઃ સ્થિતાઃ ॥

ઉદરે ચ તથા પાયૌ પઞ્ચલક્ષાઃ પ્રકીર્તિતાઃ
હૃદાદિસર્વગાત્રેષુ નવલક્ષાઃ પ્રકીર્તિતાઃ ॥

અથ પાર્શ્વે તથા ચર્મે તથૈવ સર્વસંધિષુ
રુદ્રાન્ન્યૂનં સ્થિતં લક્ષં શરીરે નાડયઃ પ્રિયે ॥

ઇડા ચ પિઙ્ગલા ચૈવ સુષુમ્ના ચિત્રિણી તથા
બ્રહ્મનાડી ચ તન્મધ્યે પઞ્ચનાડ્યઃ પ્રકીર્તિતાઃ ॥

કુહૂશ્ ચ શઙ્ખિની ચૈવ ગાન્ધારી હસ્તિજિહ્વિકા
નર્દિની ચ તથા નિદ્રા રુદ્રસંખ્યા વ્યવસ્થિતા ॥

એતા નાડ્યઃ પરેશાનિ સુષુમ્નાયાઃ પ્રજાયતે
વેદાક્ષિવસુરન્ધ્રાસ્તુ બાણસંખ્યજલાન્તકાઃ
કિમાધારે પદ્મમધ્યે સંસ્થિતાઃ પરમેશ્વર ॥

યોગપદ્મસ્ય માહાત્મ્યં મયા વક્તું ન શક્યતે
મૂલાધારે પદ્મમધ્યે લંબીજં ચાતિશોભનમ્ ॥

લંબીજસ્ય બિન્દુમધ્યે પૃથ્વીચક્રં મનોહરમ્
વલયાકારરૂપેણ સમુદ્રાઃ સપ્તકાઃ સ્થિતાઃ ॥

બિન્દુમાનં મહાદેવ કથયસ્વ મયિ પ્રભો
ક્રમેણ યોગપદ્મસ્ય પ્રમાણં વદ શંકર ॥

પરમાણુત્રિભાગૈક ભાગં બિન્દું સુવિસ્તરમ્
તન્મધ્યે સાગરાઃ સર્વે સપ્તદ્વીપા વસુંધરા ॥

અવ્યયં પરમં સૂક્ષ્મં બિન્દુરૂપં પરં શિવમ્
પ્રમાણં ચાસ્ય દેવસ્ય કિં વક્તું શક્યતે મયા ॥

બ્રહ્મલોકં પરેશાનિ નાદોપરિ વિચિન્તયેત્
ડાકિનીસહિતો બ્રહ્મા તથૈવ નિવસેત્ સદા ॥

લકારં પાર્થિવં બીજં શક્તિરૂપં સુરેશ્વરિ
પૃથ્વીચક્રસ્ય મધ્યે તુ સ્વયમ્ભૂલિઙ્ગમ્ અદ્ભુતમ્ ॥

સાર્ધત્રિવલયાકાર કુણ્ડલ્યા વેષ્ટિતં સદા
લિઙ્ગચ્છિદ્રં સ્વવક્ત્રેણ કુણ્ડલ્યાચ્છાદ્ય સંસ્થિતા ॥

તેનૈવ વર્તતે વાયુર્ ઇડાપિઙ્ગલયોઃ સદા
સહસ્રારદર્શનાય સદા જાગ્રત્સ્વરૂપિણી ॥

યદૈવ બ્રહ્મમાર્ગેણ સહસ્રારે સમુત્થિતા
તદૈવ પરમેશાનિ શ્વાસોચ્છ્વાસવિકાશનમ્ ॥

કેસરસ્ય તુ મધ્યે ચ ચતુઃપત્ત્રે સુરેશ્વરિ
અનન્તરૂપિણી દુર્ગા શમ્ભુશ્ ચાનન્તરૂપધૃક્ ॥

નાનાસુખવિલાસેન સદા કામેન વર્તતે
લિઙ્ગચ્છિદ્રં સમાકૃષ્ય સંસ્થિતા કુણ્ડલી કથમ્ ॥

કથયસ્વ સદાનન્દ સર્વજ્ઞસ્ત્વં સુરેશ્વર
લિઙ્ગમધ્યે મહત્તેજો વહ્નિરૂપં ચ સુન્દરિ ॥

યત્ કિંચિદ્ વાયુયોગેન બ્રહ્માણ્ડો દહ્યતે યતઃ
અતઃ સા કુણ્ડલી દેવી મુખેનાચ્છાદ્ય સંસ્થિતા ॥

તેનૈવ પાર્થિવે લિઙ્ગે બિન્દુશક્તિં નિયોજયેત્
બિન્દુશક્તિં સમુત્થાપ્ય લિઙ્ગપૂજા પ્રકીર્તિતા ॥