તોડલતન્ત્ર · અધ્યાય 10

કાકીચઞ્ચું મહામુદ્રાં કથયસ્વ દયાનિધે
યેન રૂપેણ દેવેશ દેહાસનપરો ભવેત્ ॥

અનાકુલેન દેવેશિ જિહ્વાં પરમયત્નતઃ
તાલુમૂલે ન્યસેત્ પશ્ચાત્ તતો વાયું પિબેત્ શનૈઃ ॥

દન્તૈર્દન્તાન્ સમાપીડ્ય કાકીચઞ્ચું સમભ્યસેત્
બહુયોન્યુક્તવિધિના સર્વકર્માણિ સાધયેત્ ॥

અથાતઃ સમ્પ્રવક્ષ્યામિ સ્વલ્પયોનિં શૃણુ પ્રિયે
ગુદછિદ્રે દક્ષગુલ્ફં સંધૌ લિઙ્ગં વિનિક્ષિપેત્ ॥

નાભિરન્ધ્રેઽથવા ગુલ્ફં ધારયેદ્ વામહસ્તકે
બહુયોન્યુક્તવિધિના ચાન્યત્ સર્વં સમાપયેત્ ॥

મુદ્રા ચૈતન્યતન્ત્રે ચ માહાત્મ્યં કથિતં મયા
યથા હેમગિરિર્દેવિ યથા વેગવતી નદી ॥

ચન્દ્રાદિકં યથા દેવિ ચિરજીવી તથા ભવેત્
દશાવતારં દેવેશ બ્રૂહિ મે જગતાં ગુરો ॥

ઇદાનીં શ્રોતુમિચ્છામિ કથયસ્વ સુવિસ્તરાત્
કા વા દેવી કથંભૂતા વદ મે પરમેશ્વર ॥

તારા દેવી નીલરૂપા વગલા કૂર્મમૂર્તિકા
ધૂમાવતી વરાહં સ્યાત્ છિન્નમસ્તા નૃસિંહિકા ॥

ભુવનેશ્વરી વામનઃ સ્યાન્માતંગી રામમૂર્તિકા
ત્રિપુરા જામદગ્ન્યઃ સ્યાદ્ બલભદ્રસ્તુ ભૈરવી ॥

મહાલક્ષ્મીર્ ભવેત્ બુદ્ધો દુર્ગા સ્યાત્ કલ્કિરૂપિણી
સ્વયં ભગવતી કાલી કૃષ્ણમૂર્તિઃ સમુદ્ભવા ॥

ઇતિ તે કથિતં દેવ્ય્ અવતારં દશમમેવ હિ
એતાસાં પૂજનાદ્ દેવિ મહાદેવસમો ભવેત્
આસાં ધ્યાનાદિકં સર્વં કથિતં મે પુરા તવ ॥