તન્ત્રાલોક · અધ્યાય 23

અથાભિષેકસ્ય વિધિઃ કથ્યતે પારમેશ્વરઃ ॥ 1

યૈષા પુત્રકદીક્ષોક્તા ગુરુસાધકયોરપિ ।
સૈવાધિકારિણી ભોગ્યતત્ત્વયુક્તિમતી ક્રમાત્ ॥ 2

સ્વભ્યસ્તજ્ઞાનિનં સન્તં બુભૂષુમથ ભાવિનમ્ ।
યોગ્યં જ્ઞાત્વા સ્વાધિકારં ગુરુસ્તસ્મૈ સમર્પયેત્ ॥ 3

યો નૈવં વેદ નૈવાસાવભિષિક્તો@પિ દૈશિકઃ ।
સમય્યાદિક્રમેણેતિ શ્રીમત્કામિક ઉચ્યતે ॥ 4

યો ન વેદાધ્વસન્ધાનં ષોઢા બાહ્યાન્તરસ્થિતમ્ ।
સ ગુરુર્મોચયેન્નેતિ સિદ્ધયોગીશ્વરીમતે ॥ 5

સર્વલક્ષણહીનો@પિ જ્ઞાનવાન્ ગુરુરિષ્યતે ।
જ્ઞાનપ્રાધાન્યમેવોક્તમિતિ શ્રીકચભાર્ગવે ॥ 6

પદવાક્યપ્રમાણજ્ઞઃ શિવભક્ત્યેકતત્પરઃ ।
સમસ્તશિવશાસ્ત્રાર્થબોદ્ધા કારુણિકો ગુરુઃ ॥ 7

ન સ્વયંભૂસ્તસ્ય ચોક્તં લક્ષણં પરમેશિના ।
અભક્તો જીવિતધિયા કુર્વન્નીશાનધિષ્ઠિતઃ ॥ 8

પશ્ચાત્મના સ્વયંભૂષ્ણુર્નાધિકારી સ કુત્રચિત્ ।
ભસ્માઙ્કુરો વ્રતિસુતો દુઃશીલાતનયસ્તથા ॥ 9

કુણ્ડો ગોલશ્ચ તે દુષ્ટા ઉક્તં દેવ્યાખ્યયામલે ।
પુનર્ભૂશ્ચાન્યલિઙ્ગો યઃ પુનઃ શૈવે પ્રતિષ્ઠિતઃ ॥ 10

શ્રીપૂર્વશાસ્ત્રે ન ત્વેષ નિયમઃ કો@પિ ચોદિતઃ ।
યથાર્થતત્ત્વસંઘજ્ઞસ્તથા શિષ્યે પ્રકાશકઃ ॥ 11

યઃ પુનઃ સર્વતત્ત્વાનિ વેત્તીત્યાદિ ચ લક્ષણમ્ ।
યોગચારે ચ યદ્યત્ર તન્ત્રે ચોદિતમાચરેત્ ॥ 12

તથૈવ સિદ્ધયે સેયમાજ્ઞેતિ કિલ વર્ણિતમ્ ।
યસ્તુ કર્મિતયાચાર્યસ્તત્ર કાણાદિવર્જનમ્ ॥ 13

યતઃ કારકસામગ્ર્યાત્કર્મણો નાધિકઃ ક્વચિત્ ।
દેવ્યા યામલશાસ્ત્રે ચ કાઞ્ચ્યાદિપરિવર્જનમ્ ॥ 14

તદ્દૃષ્ટદોષાત્ક્રોધાદેઃ સમ્યક્જ્ઞાતર્યસૌ કુતઃ ।
ગુરવસ્તુ સ્વયંભ્વાદિ વર્જ્યં યદ્યામલાદિષુ ॥ 15

કર્મ્યભિપ્રાયતઃ સર્વં તદિતિ વ્યાચચક્ષિરે ।
અતો દેશકુલાચારદેહલક્ષણકલ્પનામ્ ॥ 16

અનાદૃત્યૈવ સંપૂર્ણજ્ઞાનં કુર્યાદ્ગુરુર્ગુરુમ્ ।
પ્રાગ્વત્સંપૂજ્ય હુત્વા ચ શ્રાવયિત્વા ચિકીર્ષિતમ્ ॥ 17

તતો@ભિષિઞ્ચેત્તં શિષ્યં ચતુઃષષ્ટ્યા તતઃ સકૃત્ ।
તન્મન્ત્રરસતોયેન પૂર્વોક્તવિધિના ગુરુઃ ॥ 18

વિભવેન સુવિસ્તીર્ણં તતસ્તસ્મૈ વદેત્સ્વકમ્ ।
સર્વં કર્તવ્યસારં યચ્છાસ્ત્રાણાં પરમં રહઃ ॥ 19

અનુગ્રાહ્યાસ્ત્વયા શિષ્યાઃ શિવશક્તિપ્રચોદિતાઃ ।
ઉક્તં જ્ઞાનોત્તરે ચૈતદ્બ્રાહ્મણાઃ ક્ષત્રિયા વિશઃ ॥ 20

નપુંસકાઃ સ્ત્રિયઃ શૂદ્રા યે ચાન્યે@પિ તદર્થિનઃ ।
તે દીક્ષાયાં ન મીમાંસ્યા જ્ઞાનકાલે વિચારયેત્ ॥ 21

જ્ઞાનમૂલો ગુરુઃ પ્રોક્તઃ સપ્તસત્રીં પ્રવર્તયેત્ ।
દીક્ષા વ્યાખ્યા કૃપા મૈત્રી શાસ્ત્રચિન્તા શિવૈકતા ॥ 22

અન્નાદિદાનમિત્યેતત્પાલયેત્સપ્તસત્રકમ્ ।
અભિષેકવિધૌ ચાસ્મૈ કરણીખટિકાદિકમ્ ॥ 23

સર્વોપકરણવ્રાતમર્પણીયં વિપશ્ચિતે ।
સો@ભિષિક્તો ગુરું પશ્ચાદ્દક્ષિણાભિઃ પ્રપૂજયેત્ ॥ 24

જ્ઞાનહીનો ગુરુઃ કર્મી સ્વાધિકારં સમર્પ્ય નો ।
દીક્ષાદ્યધિકૃતિં કુર્યાદ્વિના તસ્યાજ્ઞયા પુનઃ ॥ 25

ઇત્યેવં શ્રાવયેત્સો@પિ નમસ્કૃત્યાભિનન્દયેત્ ।
તતઃ પ્રભૃત્યસૌ પૂર્વો ગુરુસ્ત્યક્તાધિકારકઃ ॥ 26

યથેચ્છં વિચરેદ્વ્યાખ્યાદીક્ષાદૌ યન્ત્રણોજ્ઝિતઃ ।
કુર્વન્ન બાધ્યતે યસ્માદ્દીપાદ્દીપવદીદૃશઃ ॥ 27

સન્તાનો નાધિકારસ્ય ચ્યવો@કુર્વન્ન બાધ્યતે ।
પ્રાક્ ચ કુર્વન્વિહન્યેત સિદ્ધાતન્ત્રે તદુચ્યતે ॥ 28

યથાર્થમુપદેશં તુ કુર્વન્નાચાર્ય ઉચ્યતે ।
ન ચાવજ્ઞા ક્રિયાકાલે સંસારોદ્ધરણં પ્રતિ ॥ 29

ન દીક્ષેત ગુરુઃ શિષ્યં તત્ત્વયુક્તસ્તુ ગર્વતઃ ।
યો@સ્ય સ્યાન્નરકે વાસ ઇહ ચ વ્યાધિતો ભવેત્ ॥ 30

પ્રાપ્તાભિષેકઃ સ ગુરુઃ ષણ્માસાન્મન્ત્રપદ્ધતિમ્ ।
સર્વાં તન્ત્રોદિતાં ધ્યાયેજ્જપેચ્ચાતન્મયત્વતઃ ॥ 31

યદૈવ તન્મયીભૂતસ્તદા વીર્યમુપાગતઃ ।
છિન્દ્યાત્પાશાંસ્તતો યત્નં કુર્યાત્તન્મયતાસ્થિતૌ ॥ 32

હૃચ્ચક્રાદુત્થિતા સૂક્ષ્મા શશિસ્ફટિકસંનિભા ।
લેખાકારા નાદરૂપા પ્રશાન્તા ચક્રપઙ્ક્તિગા ॥ 33

દ્વાદશાન્તે નિરૂઢા સા સૌષુમ્ને ત્રિપથાન્તરે ।
તત્ર હૃચ્ચક્રમાપૂર્ય જપેન્મન્ત્રં જ્વલત્પ્રભમ્ ॥ 34

ચક્ષુર્લોમાદિરન્ધ્રૌઘવહજ્જ્વાલૌર્વસંનિભમ્ ।
યાવચ્છાન્તશિખાકીર્ણં વિશ્વાજ્યપ્રવિલાપકમ્ ॥ 35

તદાજ્યધારાસંતૃપ્તમાનાભિકુહરાન્તરમ્ ।
એવં મન્ત્રા મોક્ષદાઃ સ્યુર્દીપ્તા બુદ્ધાઃ સુનિર્મલાઃ ॥ 36

મૂલકન્દનભોનાભિહૃત્કણ્ઠાલિકતાલુગમ્ ।
અર્ધેન્દુરોધિકાનાદતદન્તવ્યાપિશક્તિગમ્ ॥ 37

સમનોન્મનશુદ્ધાત્મપરચક્રસમાશ્રિતમ્ ।
યત્ર યત્ર જપેચ્ચક્રે સમસ્તવ્યસ્તભેદનાત્ ॥ 38

તત્ર તત્ર મહામન્ત્ર ઇતિ દેવ્યાખ્યયામલે ।
વિદ્યાવ્રતમિદં પ્રોક્તં મન્ત્રવીર્યપ્રસિદ્ધયે ॥ 39

તચ્ચ તાદાત્મ્યમેવેતિ યદુક્તં સ્પન્દશાસને ।
તદાક્રમ્ય બલં મન્ત્રાઃ સર્વજ્ઞબલશાલિનઃ ॥ 40

પ્રવર્તન્તે@ધિકારાય કરણાનીવ દેહિનામ્ ।
કૃતવિદ્યાવ્રતઃ પશ્ચાદ્દીક્ષાવ્યાખ્યાદિ સર્વતઃ ॥ 41

કુર્યાદ્યોગ્યેષુ શિષ્યેષુ નાયોગ્યેષુ કદાચન ।
રહસ્યે યોજયેદ્વિપ્રં પરીક્ષ્ય વિપરીતતઃ ॥ 42

આચારાચ્છક્તિમપ્યેવ નાન્યથેત્યૂર્મિશાસને ।
નિત્યાદ્યલ્પાલ્પકં કુર્યાદ્યદુક્તં બ્રહ્મયામલે ॥ 43

ચીર્ણવિદ્યાવ્રતઃ સર્વં મનસા વા સ્મરેત્પ્રિયે ।
દેહસંબન્ધસંછન્નસાર્વજ્ઞ્યો દમ્ભભાજનમ્ ॥ 44

અવિદન્દીક્ષમાણો@પિ ન દુષ્યેદ્દૈશિકઃ ક્વચિત્ ।
જ્ઞાત્વા ત્વયોગ્યતાં નૈનં દીક્ષેત પ્રત્યવાયિતામ્ ॥ 45

બુદ્ધ્વા જ્ઞાને શાસ્ત્રસિદ્ધિગુરુત્વાદૌ ચ તં પુનઃ ।
ભૂય એવ પરીક્ષેત તત્તદૌચિત્યશાલિનમ્ ॥ 46

તત્ર તત્ર નિયુઞ્જીત નતુ જાતુ વિપર્યયાત્ ।
નનુ તદ્વસ્ત્વયોગ્યસ્ય તત્રેચ્છા જાયતે કુતઃ ॥ 47

તદીશાધિષ્ઠિતેચ્છૈવ યોગ્યતામસ્ય સૂચયેત્ ।
સત્યં કાપિ પ્રબુદ્ધાસાવિચ્છા રૂઢિં ન ગચ્છતિ ॥ 48

વિદ્યુદ્વત્પાપશીલસ્ય યથા પાપાપવર્જને ।
રૂઢ્યરૂઢી તદિચ્છાયા અપિ શંભુપ્રસાદતઃ ॥ 49

અપ્રરૂઢતથેચ્છાકસ્તત એવ ન ભાજનમ્ ।
યઃ સમ્યગ્જ્ઞાનમાદાય ગુરુવિશ્વાસવર્જિતઃ ॥ 50

લોકં વિપ્લાવયેન્નાસ્મિઞ્જ્ઞાતે વિજ્ઞાનમર્પયેત્ ।
અજ્ઞાતે@પિ પુનર્જ્ઞાતે વિજ્ઞાનહરણં ચરેત્ ॥ 51

પુનઃપુનર્યદા જ્ઞાતો વિશ્વાસપરિવર્જિતઃ ।
તદા તમગ્રતો ધ્યાયેત્સ્ફુરન્તં ચન્દ્રસૂર્યવત્ ॥ 52

તતો નિજહૃદમ્ભોજબોધામ્બરતલોદિતામ્ ।
સ્વર્ભાનુમલિનાં ધ્યાયેદ્વામાં શક્તિં વિમોહનીમ્ ॥ 53

વામાચારક્રમેણૈનાં નિઃસૃતાં સાધ્યગામિનીમ્ ।
ચિન્તયિત્વા તયા ગ્રસ્તપ્રકાશં તં વિચિન્તયેત્ ॥ 54

અનેન ક્રમયોગેન મૂઢબુદ્ધેર્દુરાત્મનઃ ।
વિજ્ઞાનમન્ત્રવિદ્યાદ્યાઃ પ્રકુર્વન્ત્યપકારિતામ્ ॥ 55

નનુ વિજ્ઞાનમાત્મસ્થં કથં હર્તું ક્ષમં ભવેત્ ।
અતો વિજ્ઞાનહરણં કથં શ્રીપૂર્વ ઉચ્યતે ॥ 56

ઉચ્યતે નાસ્ય શિષ્યસ્ય વિજ્ઞાનં રૂઢિમાગતમ્ ।
તથાત્વે હરણં કસ્માત્પૂર્ણયોગ્યત્વશાલિનઃ ॥ 57

કિંત્વેષ વામયા શક્ત્યા મૂઢો ગાઢં વિભોઃ કૃતઃ ।
સ્વભાવાદેવ તેનાસ્ય વિદ્યાદ્યમપકારકમ્ ॥ 58

ગુરુઃ પુનઃ શિવાભિન્નઃ સન્યઃ પઞ્ચવિધાં કૃતિમ્ ।
કુર્યાદ્યદિ તતઃ પૂર્ણમધિકારિત્વમસ્ય તત્ ॥ 59

અતો યથા શુદ્ધતત્ત્વસૃષ્ટિસ્થિત્યોર્મલાત્યયે ।
યોજનાનુગ્રહે કાર્યચતુષ્કે@ધિકૃતો ગુરુઃ ॥ 60

શિવાભેદેન તત્કુર્યાત્તદ્વત્પઞ્ચમમપ્યયમ્ ।
તિરોભાવાભિધં કૃત્યં તથાસૌ શિવતાત્મકઃ ॥ 61

અત એવ શિવે શાસ્ત્રે જ્ઞાને ચાશ્વાસભાજનમ્ ।
ગુરોર્મૂઢતયા કોપધામાપિ ન તિરોહિતઃ ॥ 62

ગુરુર્હિ કુપિતો યસ્ય સ તિરોહિત ઉચ્યતે ।
સંસારી સતુ દેવો હિ ગુરુર્ન ચ મૃષાવિદઃ ॥ 63

તત એવ ચ શાસ્ત્રાદિદૂષકો યદ્યપિ ક્રુધા ।
ન દહ્યતે@સૌ ગુરુણા તથાપ્યેષ તિરોહિતઃ ॥ 64

અસ્મદ્ગુર્વાગમસ્ત્વેષ તિરોભૂતે સ્વયં શિશૌ ।
ન કુપ્યેન્ન શપેદ્ધીમાન્ સ હ્યનુગ્રાહકઃ સદા ॥ 65

ઈશેચ્છાચોદિતઃ પાશં યદિ કણ્ઠે નિપીડયેત્ ।
કિમાચાર્યેણ તત્રાસ્ય કાર્યા સ્યાત્સહકારિતા ॥ 66

શિવાભિન્નો@પિ હિ ગુરુરનુગ્રહમયીં વિભોઃ ।
મુખ્યાં શક્તિમુપાસીનો@નુગૃહ્ણીયાત્સ સર્વથા ॥ 67

સ્વાતન્ત્ર્યમાત્રજ્ઞપ્ત્યૈ તુ કથિતં શાસ્ત્ર ઈદૃશમ્ ।
ન કાર્યં પતતાં હસ્તાલમ્બઃ સહ્યો ન પાતનમ્ ॥ 68

અત એવ સ્વતન્ત્રત્વાદિચ્છાયાઃ પુનરુન્મુખમ્ ।
પ્રાયશ્ચિત્તૈર્વિશોધ્યૈનં દીક્ષેત કૃપયા ગુરુઃ ॥ 69

ઊર્ધ્વદૃષ્ટૌ પ્રપન્નઃ સન્નનાશ્વસ્તસ્તતઃ પરમ્ ।
અધઃશાસ્ત્રં પ્રપદ્યાપિ ન શ્રેયઃપાત્રતામિયાત્ ॥ 70

અધોદૃષ્ટૌ પ્રપન્નસ્તુ તદનાશ્વસ્તમાનસઃ ।
ઊર્ધ્વશાસનભાક્ પાપં તચ્ચોજ્ઝેચ્ચ શિવીભવેત્ ॥ 71

રાજ્ઞે દ્રુહ્યન્નમાત્યાઙ્ગભૂતો@પિ હિ વિહન્યતે ।
વિપર્યયસ્તુ નેત્યેવમૂર્ધ્વાં દૃષ્ટિં સમાશ્રયેત્ ॥ 72

શ્રીપૂર્વશાસ્ત્રે તેનોક્તં યાવત્તેનૈવ નોદ્ધૃતઃ ।
અત્ર હ્યર્થો@યમેતાવત્પૂર્વોક્તજ્ઞાનવૃંહિતઃ ॥ 73

ગુરુસ્તાવત્સ એવાત્ર તચ્છબ્દેનાવમૃશ્યતે ।
તાદૃક્સ્વભ્યસ્તવિજ્ઞાનભાજોર્ધ્વપદશાલિના ॥ 74

અનુદ્ધૃતસ્ય ન શ્રેય એતદન્યગુરૂદ્ધૃતેઃ ।
અત એવામ્બુજન્માર્કદૃષ્ટાન્તો@ત્ર નિરૂપિતઃ ॥ 75

ત્રિજગજ્જ્યોતિષો હ્યન્યત્તેજો@ન્યચ્ચ નિશાકૃતઃ ।
જ્ઞાનમન્યત્ત્રિકગુરોરન્યત્ત્વધરવર્તિનામ્ ॥ 76

અત એવ પુરાભૂતગુર્વભાવો યદા તદા ।
તદન્યં લક્ષણોપેતમાશ્રયેત્પુનરુન્મુખઃ ॥ 77

સતિ તસ્મિંસ્તૂન્મુખઃ સન્કસ્માજ્જહ્યાદ્યદિ સ્ફુટમ્ ।
સ્યાદન્યતરગો દોષો યો@ધિકારાપઘાતકઃ ॥ 78

દોષશ્ચેહ ન લોકસ્થો દોષત્વેન નિરૂપ્યતે ।
અજ્ઞાનખ્યાપનાયુક્તખ્યાપનાત્મા ત્વસૌ મતઃ ॥ 79

શિષ્યસ્યાપિ તથાભૂતજ્ઞાનાનાશ્વસ્તરૂપતા ।
મુખ્યો દોષસ્તદન્યે હિ દોષાસ્તત્પ્રભવા યતઃ ॥ 80

ન ધ્વસ્તવ્યાધિકઃ કો હિ ભિષજં બહુ મન્યતે ।
અસૂયુર્નૂનમધ્વસ્તવ્યાધિઃ સ્વસ્થાયતે બલાત્ ॥ 81

એવં જ્ઞાનસમાશ્વસ્તઃ કિં કિં ન ગુરવે ચરેત્ ।
નો ચેન્નૂનમવિશ્વસ્તો વિશ્વસ્ત ઇવ તિષ્ઠતિ ॥ 82

અજ્ઞાનાદય એવૈતે દોષા ન લૌકિકા ગુરોઃ ।
ઇતિ ખ્યાપયિતું પ્રોક્તં માલિનીવિજયોત્તરે ॥ 83

ન તસ્યાન્વેષયેદ્વૃત્તં શુભં વા યદિ વાશુભમ્ ।
સ એવ તદ્વિજાનાતિ યુક્તં ચાયુક્તમેવ વા ॥ 84

અકાર્યેષુ યદા સક્તઃ પ્રાણદ્રવ્યાપહારિષુ ।
તદા નિવારણીયો@સૌ પ્રણતેન વિપશ્ચિતા ॥ 85

વિશેષણમકાર્યાણામુક્તાભિપ્રાયમેવ યત્ ।
તેનાતિવાર્યમાણો@પિ યદ્યસૌ ન નિવર્તતે ॥ 86

તદાન્યત્ર ક્વચિદ્ગત્વા શિવમેવાનુચિન્તયેત્ ।
ન હ્યસ્ય સ ગુરુત્વે સ્યાદ્દોષો યેનોષરે કૃષિમ્ ॥ 87

કુર્યાદ્વ્રજેન્નિશાયાં વા સ ત્વર્થપ્રાણહારકઃ ।
તદીયાપ્રિયભીરુસ્તુ પરં તાદૃશમાચરેત્ ॥ 88

યતસ્તદપ્રિયં નૈષ શૃણુયાદિતિ ભાષિતમ્ ।
શ્રીમાતઙ્ગે તદુક્તં ચ નાધીતં ભૂમભીતિતઃ ॥ 89

યચ્ચૈતદુક્તમેતાવત્કર્તવ્યમિતિ તદ્ધ્રુવમ્ ।
તીવ્રશક્તિગૃહીતાનાં સ્વયમેવ હૃદિ સ્ફુરેત્ ॥ 90

ઉપદેશસ્ત્વયં મન્દમધ્યશક્તેર્નિજાં ક્રમાત્ ।
શક્તિં જ્વલયિતું પ્રોક્તઃ સા હ્યેવં જાજ્વલીત્યલમ્ ॥ 91

દૃઢાનુરાગસુભગસંરમ્ભાભોગભાગિનઃ ।
સ્વોલ્લાસિ સ્મરસર્વસ્યં દાર્ઢ્યાયાન્યત્ર દૃશ્યતે ॥ 92

નન્વેષ કસ્માદ્દૃષ્ટાન્તઃ કિમેતેનાશુભં કૃતમ્ ।
ચિત્સ્પન્દઃ સર્વગો ભિન્નાદુપાધેઃ સ તથા તથા ॥ 93

ભવેત્કો@પિ તિરોભૂતઃ પુનરુન્મુખિતો@પિ સન્ ।
વિનાપિ દૈશિકાત્પ્રાગ્વત્સ્વયમેવ વિમુચ્યતે ॥ 94

પ્રકારસ્ત્વેષ નાત્રોક્તઃ શક્તિપાતબલાદ્ગતઃ ।
અસંભાવ્યતયા ચાત્ર દૃઢકોપપ્રસાદવત્ ॥ 95

ઇત્યેષ યો ગુરોઃ પ્રોક્તો વિધિસ્તં પાલયેદ્ગુરુઃ ।
અન્યથા ન શિવં યાયાચ્છ્રીમત્સારે ચ વર્ણિતમ્ ॥ 96

અન્યાયં યે પ્રકુર્વન્તિ શાસ્ત્રાર્થં વર્જયન્ત્યલમ્ ।
તે@ર્ધનારીશપુરગા ગુરવઃ સમયચ્યુતાઃ ॥ 97

અન્યત્રાપ્યધિકારં ચ નેયાદ્વિદ્યેશતાં વ્રજેત્ ।
અન્યત્ર સમયત્યાગાત્ક્રવ્યાદત્વં શતં સમાઃ ॥ 98

ઇયત્તત્રત્યતાત્પર્યં સિદ્ધાન્તગુરુરુન્નયઃ ।
ભવેત્પિશાચવિદ્યેશઃ શુદ્ધ એવ તુ તાન્ત્રિકઃ ॥ 99

ષડર્ધદૈશિકશ્ચાર્ધનારીશભુવનસ્થિતિઃ ।
એષા કર્મપ્રધાનાનાં ગુરૂણાં ગતિરુચ્યતે ॥ 100

જ્ઞાનિનાં ચૈષ નો બન્ધ ઇતિ સર્વત્ર વર્ણિતમ્ ।
સાધકસ્યાભિષેકે@પિ સર્વો@યં કથ્યતે વિધિઃ ॥ 101

અધિકારાર્પણં નાત્ર નચ વિદ્યાવ્રતં કિલ ।
સાધ્યમન્ત્રાર્પણં ત્વત્ર સ્વોપયોગિક્રિયાક્રમે ॥ 102

સમસ્તે@પ્યુપદેશઃ સ્યાન્નિજોપકરણાર્પણમ્ ।
અભિષેકવિધિર્નિરૂપિતઃ પરમેશેન યથા નિરૂપિતઃ ॥ 103