તન્ત્રાલોક · અધ્યાય 18

અથ સંક્ષિપ્તદીક્ષેયં શિવતાપત્તિદોચ્યતે ।
ન રજો નાધિવાસો@ત્ર ન ભૂક્ષેત્રપરિગ્રહઃ ।
યત્ર તત્ર પ્રદેશે તુ પૂજયિત્વા ગુરુઃ શિવમ્ ॥ 1

અધ્વાનં મનસા ધ્યાત્વા દીક્ષયેત્તત્ત્વપારગઃ ।
જનનાદિવિહીનાં તુ યેન યેનાધ્વના ગુરુઃ ॥ 2

કુર્યાત્સ એકતત્ત્વાન્તાં શિવભાવૈકભાવિતઃ ।
પરામન્ત્રસ્તતો@સ્યેતિ તત્ત્વં સંશોધયામ્યથ ॥ 3

સ્વાહેતિ પ્રતિતત્ત્વં સ્યાચ્છુદ્ધે પૂર્ણાહુતિં ક્ષિપેત્ ।
એવં મન્ત્રાન્તરૈઃ કુર્યાત્સમસ્તૈરથવોક્તવત્ ॥ 4

પરાસંપુટિતં નામ સ્વાહાન્તં પ્રથમાન્તકમ્ ।
શતં સહસ્રં સાષ્ટં વા તેન શક્ત્યૈવ હોમયેત્ ॥ 5

તતઃ પૂર્ણેતિ સંશોધ્યહીનમુત્તમમીદૃશમ્ ।
દીક્ષાકર્મોદિતં તત્ર તત્ર શાસ્ત્રે મહેશિના ॥ 6

પ્રત્યેકં માતૃકાયુગ્મવર્ણૈસ્તત્ત્વાનિ શોધયેત્ ।
યદિ વા પિણ્ડમન્ત્રેણ સર્વમન્ત્રેષ્વયં વિધિઃ ॥ 7

યથા યથા ચ સ્વભ્યસ્તજ્ઞાનસ્તન્મયતાત્મકઃ ।
ગુરુસ્તથા તથા કુર્યાત્ સંક્ષિપ્તં કર્મ નાન્યથા ॥ 8

શ્રીબ્રહ્મયામલે ચોક્તં સંક્ષિપ્તે@પિ હિ ભાવયેત્ ।
વ્યાપ્તિં સર્વાધ્વસામાન્યાં કિંતુ યાગે ન વિસ્તરઃ ॥ 9

અતન્મયીભૂતમિતિ વિક્ષિપ્તં કર્મ સન્દધત્ ।
ક્રમાત્તાદાત્મ્યમેતીતિ વિક્ષિપ્તં વિધિમાચરેત્ ॥ 10

સંક્ષિપ્તો વિધિરુક્તો@યં કૃપયા યઃ શિવોદિતઃ ।
દીક્ષોત્તરે કૈરણે ચ તત્ર તત્રાપિ શાસને ॥ 11