Svacchandatantra · અધ્યાય 8

અંશકં ષડ્વિધં દેવિ કથયામ્યનુપૂર્વશઃ
ભાવાંશકઃ સ્વભાવાંશઃ પુષ્પપાતાંશ એવ ચ ॥

મન્ત્રાંશકઃ સ્મૃતશ્ચાન્યસ્ ત્વ્ અંશકાપાદનં દ્વિધા
દેવાનુસ્મરણં ભાવઃ સહજં તં વિજાનત ॥

સ્વભાવશ્ચ ભવેચ્ચેષ્ટા કથયામ્યનુપૂર્વશઃ
બ્રહ્માંશો વેદભક્તસ્તુ રુદ્રાંશં ચ નિબોધ મે ॥

રુદ્રભક્તઃ સુશીલશ્ચ શિવશાસ્ત્રરતઃ સદા
વિષ્ણ્વંશો વિષ્ણુભક્તશ્ચ ચન્દ્રાંશઃ પ્રિયદર્શનઃ ॥

સર્વદેવરતઃ શાન્તો યક્ષાંશો ધનસંગ્રહી
લુબ્ધો ગર્વિતમૃષ્ટાશી વાતાંશશ્ચપલઃ સ્મૃતઃ ॥

સર્પવિસ્રમ્ભગામી સ્યાન્ નાગાંશો દીર્ઘશાય્યથ
દીર્ઘરોષઃ પૂતિવક્ત્રો ગુરુક્ષીરરુચિઃ સદા ॥

ગાન્ધર્વો ગાયનો નિત્યં શિવભક્તો વરાનને
વિદ્યાધરાંશકઃ પ્રાણી દૈત્યાંશો દ્વેષણઃ સ્મૃતઃ ॥

કામાંશો રૂપવાંશ્ચૈવ સુભગો ગણિકાપ્રિયઃ
રક્ષોંશઃ ક્રૂરનિસ્ત્રિંશો દેવદ્વેષી દ્વિજેષુ ચ ॥

પિશાચાંશશ્છલાન્વેષી વાસરે ભીરુકાતરઃ
અગ્ન્યંશઃ પરુષસ્તીવ્ર ઉષ્ણાદઃ પિઙ્ગલસ્તથા ॥

સવિત્રંશશ્ચ તેજસ્વી પૂર્તધર્મરતઃ સદા
ઇષ્ટાનિ કુરુતે નિત્યં દયાલુઃ શિવભાવિતઃ ॥

સ્વસિદ્ધેઃ ફલદાઃ સર્વે સ્વધ્યાનજપહોમતઃ
ભૈરવાઙ્ગસમાલબ્ધાઃ સર્વે દેવા વરાનને ॥

ભૈરવાસ્તુ સ્મૃતાઃ સર્વે સર્વસિદ્ધિફલપ્રદાઃ
સ્વભાવાંશઃ સમાખ્યાતઃ સાધકાનાં હિતાય વૈ ॥

પુષ્પપાતવશાન્નામ કર્તવ્યં સુરસુન્દરિ
સ મન્ત્રઃ સિદ્ધ્યતે તસ્ય તમેવારાધયેદ્યદિ ॥

અંશકાપાદનં દેવિ કથયામિ સમાસતઃ
વૈહાયસં ધ્વજ ચૈવ હોમયેદ્યસ્તુ સાધકઃ ॥

સ મન્ત્રઃ સિદ્ધ્યતે તસ્ય અર્યન્તો ઽપિ હિ સુવ્રતે
અનંશકો ઽપિ યો મન્ત્રો જ્ઞાતચિહ્નૈર્વરાનને ॥

તદા યાગં પુરા કૃત્વા અગ્નૌ હોમં તુ કારયેત્
શિષ્યસ્ય પૂર્વવત્કર્મ કૃત્વા તુ વિધિપૂર્વકમ્ ॥

પૂર્ણાહુતિપ્રયોગેણ યોજયેચ્છાશ્વતે પદે
પરતત્ત્વમભિધ્યાયન્ સાધયેન્મનસેપ્સિતમ્ ॥

મન્ત્રાંશં ગણયિત્વા તુ ગૃહ્ણીયાત્સુવિચારિતમ્
હીનમધ્યસમુત્કૃષ્ટં કથયામિ સમાસતઃ ॥

હીનં શત્રું વિજાનીયાન્ મધ્યમં સાધ્યરૂપિણમ્
સિદ્ધં ચૈવ સુસિદ્ધં ચ ઉત્તમં પરિકીર્તિતમ્ ॥

મન્ત્રાક્ષરં તુ વિશ્લેષ્ય માત્રાબિન્દુસમન્વિતમ્
આત્મનામાક્ષરં તદ્વદ્ અધોભાગે ઽસ્ય યોજયેત્ ॥

આત્મવર્ણાત્સમારભ્ય યાવન્મન્ત્રાર્ણમાગતમ્
યસ્મિન્સ નિપતેદ્દેવિ તમાયં પરિકલ્પયેત્ ॥

રેખાઙ્ગુલિગતં તં તુ કથયામિ સમાસતઃ
પર્વણિ પ્રથમે સિદ્ધઃ સાધ્યશ્ચૈવ દ્વિતીયકે ॥

તૃતીયે તુ સુસિદ્ધઃ સ્યાદ્ અરિર્જ્ઞેયશ્ચતુર્થકે
અરિસાધ્યૌ પરિત્યજ્ય દાતવ્યશ્ચુમ્બકેન તુ ॥

સિદ્ધરૂપઃ સુસિદ્ધશ્ચ ભુક્તિમુક્તિફલપ્રદઃ
યસ્ત્વંશકવિશુદ્ધઃ સ્યાદ્ ભૈરવો ઽત્ર વરાનને ॥

તં મધ્યમસ્થં સંપૂજ્ય તત્સ્થાને મધ્યમં ન્યસેત્
યતઃ સર્વગતો દેવઃ સર્વેષ્વન્તર્ગતઃ સ્મૃતઃ ॥

તત્સિદ્ધિમુક્તિદાતાસૌ ન વર્ણાઃ પરમાર્થતઃ
કથિતં સરહસ્યં તે ગુહ્યાદ્ગુહ્યતરં પરમ્ ॥

અતસ્તન્ત્રાવતારાર્થં કથયામિ સમાસતઃ
અદૃષ્ટવિગ્રહાયાતં શિવાત્પરમકારણાત્ ॥

ધ્વનિરૂપં સુસૂક્ષ્મં તુ સુશુદ્ધં સુપ્રભાન્વિતમ્
તદેવાપરરૂપેણ શિવેન પરમાત્મના ॥

મન્ત્રસિંહાસનસ્થેન પઞ્ચમન્ત્રમહાત્મના
પુરુષાર્થં વિચાર્યાશુ સાધનાનિ પૃથક્ પૃથક્ ॥

લૌકિકાદિશિવાન્તાનિ પરાપરવિભૂતયે
તદનુગ્રહયોગ્યાનાં સ્વે સ્વે વિષયગોચરે ॥

અનુષ્ટુપ્છન્દસા બદ્ધં કોટ્યર્બુદસહસ્રધા
ગુરુશિષ્યપદે સ્થિત્વા સ્વયં દેવઃ સદાશિવઃ ॥

પૂર્વોત્તરપદૈર્વાક્યૈસ્ તન્ત્રમાધારભેદતઃ
તજ્જ્ઞાનમીશ્વરે ઽદાત્તદ્ ઈશ્વરેણ શિવેચ્છયા ॥

વિદ્યાયાઃ કથિતં પૂર્વં વિદ્યેશેભ્યસ્તથાદરાત્
માયાનિયતિપર્યન્તૈસ્ તસ્માદ્રુદ્રૈરવાપિ તત્ ॥

શ્રીકણ્ઠેનેશ્વરાત્પ્રાપ્તં જ્ઞાનં પરમદુર્લભમ્
તેનાપિ તદધઃ પ્રોક્તં રુદ્રાણામીશ્વરેચ્છયા ॥

પ્રધાનાચ્છતરુદ્રાન્તં દીક્ષયિત્વા વિધાનતઃ
મમાપિ ચ પુરા દીક્ષા તથા ચૈવાભિષેચનમ્ ॥

શ્રીકણ્ઠેન પુરા દત્તં તન્ત્રં સર્વાર્થસાધકમ્
મયાપિ તવ દેવેશિ સાધિકારં સમર્પિતમ્ ॥

ત્વમપિ સ્કન્દરુદ્રેભ્યો દદસ્વ વિધિપૂર્વકમ્
બ્રહ્મવિષ્વિન્દ્રદેવાનાં વસુમાતૃદિવાકૃતામ્ ॥

લોકે સંગૃહ્ય નાગાનાં યક્ષાણાં પરમેશ્વરિ
કથયસ્વ ઋષીણાં ચ ઋષિભ્યો મનુજેષ્વપિ ॥

એવં તન્ત્રવરં દિવ્યં સિદ્ધરત્નકરણ્ડકમ્
ત્વયા ગુપ્તતરં કાર્યં ન દેયં યસ્ય કસ્યચિત્ ॥