Svacchandatantra · અધ્યાય 14

મુદ્રાણં લક્ષણં વક્ષ્યે અસ્મિંસ્તન્ત્રે યથાસ્થિતમ્
ઉત્તાનમઞ્જલિં કૃત્વા કપાલં પરિકીર્તિતમ્ ॥

તિર્યક્કૃત્વા કરં વામં કનિષ્ઠાદ્યઙ્ગુલિત્રયમ્
અઙ્ગુષ્ઠેનાક્રમેદ્દેવિ ઋજ્વીં કૃત્વા પ્રદેશિનીમ્ ॥

પરાઙ્મુખં કરં કૃત્વા સ્કન્ધદેશે નિવેશયેત્
ખટ્વાઙ્ગં કીર્તિતં હ્યેતત્ ખડ્ગમુદ્રાં નિબોધ મે ॥

અઙ્ગુષ્ઠેનાક્રમેદ્દેવિ સકનિષ્ઠામનામિકામ્
મધ્યમાં તર્જનીં ચોર્ધ્વં ખડ્ગમુદ્રા પ્રકીર્તિતા ॥

મુષ્ટિં બદ્ધ્વા કનિષ્ઠાં ચ પ્રસાર્યેત વરાનને
આત્મનઃ સમ્મુખં કૃત્વા સ્ફરસ્તે કથિતો મયા ॥

મુષ્ટિં બદ્ધ્વા તુ દેવેશિ તર્જન્યૂર્ધ્વં તુ કુઞ્ચયેત્
અઙ્કુશઃ કથિતો હ્યેષ પાશમુદ્રાં નિબોધ મે ॥

તર્જનીં વર્તુલાં કૃત્વા મૂલે ઽઙ્ગુષ્ઠસ્ય યોજયેત્
પાશસ્તુ કથિતો હ્યેષ દુષ્ટજાલનિબન્ધકઃ ॥

મુષ્ટિં બદ્ધ્વા વરારોહે સમ્પ્રસાર્ય પ્રદેશિનીમ્
નારાચસ્તુ સમાખ્યાતઃ સમાસાત્તવ ભૈરવિ ॥

મુષ્ટિં બદ્ધ્વા પ્રસાર્યેત તર્જન્યઙ્ગુષ્ઠકં પ્રિયે
અગ્રે નિકુઞ્ચયેત્ કિઞ્ચિત્ પિનાકં પરિકીર્તિતમ્ ॥

અગ્રપ્રસારિતો હસ્તઃ શ્લિષ્ટશાખો વરાનને
પરાઙ્મુખં તુ તં કૃત્વા ત્વ્ અભયઃ પરિકીર્તિતઃ ॥

વામં ભુજં પ્રસાર્યૈવ જાનૂપરિ નિવેશયેત્
પ્રસૃતં દર્શયેદ્દેવિ વરઃ સર્વાર્થસાધકઃ ॥

ઘણ્ટાકારં કરં વામં કૃત્વા ચૈવ ત્વધોમુખમ્
દક્ષહસ્તસ્ય તર્જન્યા ઘૃષેદ્ ઘણ્ટા પ્રકીર્તિતા ॥

કનિષ્ઠિકાં સમાક્રામેદ્ અઙ્ગુષ્ઠેન સમાહિતઃ
પ્રસાર્ય ચાઙ્ગુલીસ્તિસ્રસ્ ત્રિશૂલં પરિકીર્તિતમ્ ॥

દણ્ડો વૈ મુષ્ટિબન્ધેન વજ્રમુદ્રં નિબોધ મે
વામહસ્તમધઃ કૃત્વા ઉત્તાનં તુ સમાહિતઃ ॥

દક્ષં ચાધોમુખં કૃત્વા ત્વ્ અઙ્ગુષ્ઠં ચ કનિષ્ઠિકામ્
ઉભયોરપિ સઙ્ઘૃષ્ય વજ્રમુદ્રાં પ્રદર્શયેત્ ॥

ડમરું મુષ્ટિબન્ધેન દક્ષહસ્તસ્ય સુવ્રતે
સુષિરેણ સમાયુક્તં દર્શયેત્તુ વરાનને ॥

મુદ્ગરં તુ પ્રવક્ષ્યામિ હસ્તૌ દ્વૌ સમ્પ્રસારયેત્
મુદ્ગરઃ કથિતો હ્યેષ વલ્લકીં ચ નિબોધ મે ॥

હસ્તૌ પ્રસારયેદ્દેવિ ઉત્તાનૌ તુ સમાહિતઃ
અનામે કુઞ્ચયિત્વા તુ વીણામુદ્રા પ્રકીર્તિતા ॥

પ્રસારયેદઙ્ગુલીસ્તુ કનિષ્ઠાનામમધ્યમાઃ
અઙ્ગુષ્ઠેનાક્રમેદાદ્યાં પરશુઃ સમુદાહૃતાઃ ॥

એતા મુદ્રા મહાદેવિ ભૈરવસ્ય પ્રદર્શયેત્
આવાહને નિરોધે ચ તથા ચૈવ વિસર્જને ॥

કપાલં ચૈવ ખટ્વાઙ્ગમ્ અનુક્તેષુ પ્રદર્શયેત્
કપાલં ધવલં જ્ઞેયં ખટ્વાઙ્ગં ચ તથૈવ હિ ॥

ત્રિશૂલં ચૈવ નારાચં ખડ્ગો નીલોત્પલપ્રભઃ
સ્ફરં રક્તં પિનાકં ચ કૃષ્ણં સમ્પરિકીર્તિતમ્ ॥

ઘણ્ટા હેમપ્રભા જ્ઞેયાઙ્ કુશો મરકતપ્રભઃ
પાશો ભિન્નાઞ્જનનિભઃ સ્ફટિકાભો ઽભયઃ સ્મૃતઃ ॥

વરશ્ચિત્તપ્રસાદેન ધ્યાતવ્યો વરવર્ણિનિ
ડમરું હેમસઙ્કાશં વીણાં ચૈતત્સમપ્રભામ્ ॥

દણ્ડં રક્તં વિજાનીયાદ્ વજ્રં પીતં વિચિન્તયેત્
રાજાવર્તનિભો દેવિ મુદ્ગરઃ પરશુસ્તથા ॥

મુદ્રાપીઠં સમાખ્યાતં ચતુર્વર્ગફલોદયમ્
પ્રણવાસનમારૂઢા ઓંકારાદ્યા વરાનને ॥

સ્વનામકૃતવિન્યાસા નમસ્કારાવસાનિકાઃ
સાધયન્તિ મહાદેવિ ફલાનિ વિવિધાનિ તુ ॥

નિર્વિઘ્નકરણં ખ્યાતં મુદ્રાણાં લક્ષણં પ્રિયે
વેદિતવ્યં પ્રયત્નેન સાધિતવ્યં મહાત્મના ॥