Svacchandatantra · અધ્યાય 15

જપધ્યાનાદિયુક્તસ્ય ચર્યાવ્રતધરસ્ય ચ
છુમ્મકાઃ સમ્પ્રવક્ષ્યામિ સાધકસ્ય વરાનને ॥

ભૈરવસ્તુ સ્મૃતો ધામ સર્વદસ્તુ ગુરુઃ સ્મૃતઃ
સાધકસ્તુ ગિરિર્જ્ઞેયઃ પુત્રકો વિમલઃ સ્મૃતઃ ॥

સમયી કાન્તદેહસ્તુ ભગિન્યો બલદર્પિતાઃ
મદ્યં તુ હર્ષણં જ્ઞેયં મુદિતા તુ સુરા સ્મૃતા ॥

મત્ય્સા જલચરા જ્ઞેયા માંસં ચ બલવર્ધનમ્
જાતં પ્રરૂઢમિત્યાહુર્ મૃતં ચૈવ પરાઙ્મુખમ્ ॥

રક્તં ત્વમૃતમિત્યાહુઃ પદ્મનાલો ઽન્ત્રસઞ્ચયઃ
શુક્રં ચન્દ્રઃ સમાખ્યાતઃ સ્નાયુઃ સૂત્રં પ્રકીર્તિતમ્ ॥

શ્મશાનં ડામરં જ્ઞેયં રાક્ષસસ્તુ ભયઙ્કરઃ
પિશાચો રોમજનનઃ રુહા જ્ઞેયા રજસ્વલા ॥

રાત્રિં વૈ ચ્છાદિકાં વિદ્ધિ પ્રકાશશ્ચ દિનં ભવેત્
નયને ચઞ્ચલે જ્ઞેયે જિહ્વાં સંગ્રાહિકાં વિદુઃ ॥

કરૌ ધનકરૌ જ્ઞેયૌ પાદૌ સહચરૌ વિદુઃ
લિઙ્ગં સન્તોષજનનં ભગઃ પ્રીતિવિવર્ધનઃ ॥

શસ્ત્રં વિભાગજનનં કર્તરી કાર્યસાધિકા
દૂતી સંવાહિકા જ્ઞેયા ધૂપો હ્લાદન ઉચ્યતે ॥

ગન્ધઃ સન્તોષજનનો રાજાનો ધારકાઃ સ્મૃતાઃ
પશુર્વિબોધકો જ્ઞેયશ્ ચરુકઃ સાર્વકામિકઃ ॥

અન્નં સાધનમિત્યુક્તં વસા મણ્ડમિહોચ્યતે
દિશાં મુખં તુ શ્રવણં ત્વક્ ચ સંવેદની સ્મૃતા ॥

ઘ્રાણં સુસ્થિતમિત્યુક્તં મુખં તુ પ્રવિચારકમ્
પશુ પ્રચારો વિજ્ઞેયઃ માતા ધાત્રીતિ કથ્યતે ॥

પિતરં સૃષ્ટિકર્તારં ભ્રાતરં પાલકં વિદુઃ
ભગિની શુભકરી જ્ઞેયા સખી સર્વાર્થસાધિકા ॥

મિત્રં ગુણાનાં જનનં ગુણનાશં રિપું વિદુઃ
છિત્ સ્ફિજૌ કીર્તિતો દેવિ દૃષ્ટિશ્ચક્ષુઃ પ્રકીર્તિતમ્ ॥

દશનાઃ ખણ્ડકા જ્ઞેયા આધાર ઉદરં સ્મૃતમ્
હૃદયં ગુહ્યમિત્યુક્તં કઠિનં ત્વસ્થિ વિદ્ધિ હિ ॥

મેદો વસાં વિજાનીયાત્ મજ્જા પુષ્ટિકરઃ સ્મૃતઃ
વિષ્ઠાં વિદૂષિકાં વિદ્ધિ મૂત્રં સ્નાવ ઇહોચ્યતે ॥

કાલેયકં તુ કુસુમં ધૂમં ધૃતિકરં વિદુઃ
મેલકં ચૈવ સઙ્ઘાતઃ પુત્રઃ સોદ્દ્યોતકઃ સ્મૃતઃ ॥

દુહિતા હ્લાદિકા જ્ઞેયા ક્ષુબ્ધં વૈ ચલિતં વિદુઃ
દૂષકો જાર ઇત્યુક્તઃ પીતં વન્દિતમેવ ચ ॥

ભક્ષિતં પ્રાપ્તમિત્યાહુશ્ છર્દિતં વિકૃતીકૃતમ્
દૂષિતં કર્ષિતં જ્ઞેયં સમ્મતં સમયં વિદુઃ ॥

મહલ્લો રક્ષકો જ્ઞેયશ્ છગલસ્તુ કનિષ્ઠકઃ
વિનયો દેહકર્મ સ્યાત્ સાધનં તુ જપઃ સ્મૃતઃ ॥

હોમિતં સિદ્ધિજનનં વિભાગો રોચકઃ સ્મૃતઃ
કદમ્બં વૃન્દમિત્યાહુર્ વિરલો ઽશ્લિષ્ટ ઉચ્યતે ॥

વિમલઃ શિષ્ય ઇત્યુક્ત ઇચ્છા ચાજ્ઞા પ્રકીર્તિતા
દેવતાદર્શનં યત્તત્ લબ્ધં શસ્ત્રહતં વિદુઃ ॥

નિશાચરો બિડાલઃ સ્યાત્ નખિનશ્ચ વિદારકાઃ
આનીતં સારિતં જ્ઞેયં રક્ષિતં પિહિતં તથા ॥

શિખાં સંસ્પૃશતે યા તુ સા તુ શક્તિં વિનિર્દિશેત્
શિરઃ પ્રદર્શયેદ્યા તુ સા ચ બિન્દું વિનિર્દિશેત્ ॥

લલાટં દર્શયેદ્યા તુ ઈશ્વરં સા વિનિર્દિશેત્
તાલુકં દર્શયેદ્યા તુ તયા રુદ્રઃ પ્રકીર્તિતઃ ॥

જિહ્વાં પ્રદર્શયેદ્યા તુ વિદ્યાં સાથ વિનિર્દિશેત્
સપ્ત કોટયસ્તુ મન્ત્રાણાં તસ્યા જ્ઞેયાસ્તુ સુવ્રતે ॥

ઘણ્ટિકાં દર્શયેદ્યા તુ તસ્યાનન્તઃ પ્રદર્શિતઃ
કણ્ઠં તુ સંસ્પૃશેયા સા કાલતત્ત્વં વિનિર્દિશેત્ ॥

હૃત્પદ્મં દર્શયેદ્યા તુ પુરુષં સા વિનિર્દિશેત્
નાભિં પ્રદર્શયેદ્યા તુ પ્રકૃતિં સા વિનિર્દિશેત્ ॥

તસ્યાધસ્તાદ્ બુદ્ધિતત્ત્વં યદિ સ્યાદ્દર્શનં પ્રિયે
યદા ગુહ્યં સ્પૃશેદ્દેવિ અહંકારો ઽધિદૈવતમ્ ॥

કટિં સન્દર્શયેદ્યા તુ વ્યોમ તત્રાધિધૈવતમ્
ઊરુકૌ દર્શયેદ્દેવિ પવનં સા વિનિર્દિશેત્ ॥

જાનુની દર્શયેદ્યા તુ તયા તેજઃ પ્રકીર્તિતમ્
જઙ્ઘે પ્રદર્શયેદ્યા તુ વરુણં સા વિનિર્દિશેત્ ॥

શરીરં દર્શયેદ્દેવિ સર્વવેદમયં પ્રિયે
પૂજાગ્નિજપયુક્તસ્ય ધ્યાનયુક્તસ્ય મન્ત્રિણઃ ॥

સમયાચારયુક્તસ્ય કાલાંશકવિદઃ પ્રિયે
ક્રિયોપેતસ્ય દેવેશિ યોગિન્યસ્તુ વરપ્રદાઃ ॥

દર્શયન્તિ મહાધ્વાનં નાનાભોગસમન્વિતમ્
ગિરિરાજસ્ય દેવેશિ યં ગત્વા ફલમશ્નુતે ॥

ભૈરવેણ સમાજ્ઞપ્તાઃ શક્તયસ્તુ વરાનને
અન્યાશ્ચ સિદ્ધીર્વિવિધા અધમા મધ્યમોત્તમાઃ ॥

અન્યતન્ત્રસમુત્થાશ્ચ સાધયન્તિ ન સંશયઃ
એવં સંક્ષેપતઃ પ્રોક્તં મેલકં તુ વરાનને ॥

સતતાભ્યાસયોગેન દદતે ચરુકં સ્વકમ્
યસ્ય સમ્પ્રાશનાદ્દેવિ વીરેશસદૃશો ભવેત્ ॥

તસ્માદ્ ધ્યાનાર્ચને હોમં જપમ્ ચ વરવર્ણિનિ
કુર્વન્તિ ભાવિતાત્માનસ્ તતઃ સિદ્ધ્યન્તિ મન્ત્રિણઃ ॥