Svacchandatantra · અધ્યાય 13

સારં યદસ્ય તન્ત્રસ્ય યાગં તુ પરમેશ્વર
તમાખ્યાહિ સમાસેન સાધકાનાં હિતાય વૈ ॥

મૂલબીજાક્ષરં મન્ત્ર નાયકં પરમીશ્વરમ્
પ્રણવાસનમારૂઢમ્ અઙ્ગવક્ત્રૈઃ સમન્વિતમ્ ॥

પૂર્વોક્તદ્રવ્યસંઘાતૈઃ પૂજયેત્ પરમેશ્વરમ્
સ એવ હોમવિન્યાસઃ દીક્ષા સૈવ પ્રકીર્તિતઃ ॥

દશલક્ષં જપેદ્યસ્તુ એકચિત્તઃ સમાહિતઃ
સમુદ્રગસરિત્તીરે સહાયૈઃ પરિવર્જિતઃ ॥

હોમયેન્નરમાંસસ્ય લક્ષમેકં સગુગ્ગુલમ્
જિતેન્દ્રિયૈકચિત્તસ્તુ બ્રહ્મચર્યે વ્યવસ્થિતઃ ॥

અસાધ્યં સાધયેદ્દેવિ નાત્ર કાર્યા વિચારણા
યાનિ કાનીહ કર્માણિ ચતુષ્પીઠસ્થિતાનિ ચ ॥

અધમાન્યથ મધ્યાનિ હ્ય્ ઉત્તમાનિ વરાનને
તાનિ સિદ્ધ્યન્તિ દેવેશિ ભૈરવસ્ય વચો યથા ॥

અથાતઃ સમ્પ્રવક્ષ્યામિ કારિકાકોશમુત્તમમ્
યં જ્ઞાત્વા દેવદેવેશિ વિચરન્તીહ સાધકાઃ ॥

અભિમુખખડ્ગનિ પાતિતશૂરશિરઃ શોષિતં સમાદાય ।
રક્તાલક્તકલિખિતં સાધ્યતનૌ મન્ત્રયુક્તમભિધાનમ્ ॥

પ્રેતાનલે સુતપ્તં વિધાય નિશિ યત્કૃતે શતં જપતિ ।
અસુરેન્દ્રચક્રવર્તિનમસુરેન્દ્રગુરું વા તમાનયત્યનિલવેગાત્ ॥

પ્રેતાલક્તકલિખિતં નરશિરસિ પ્રેતવહ્નિસન્તપ્તમ્ ।
યમલોકાદપ્યચિરાદાનયતિ બલેન પૂર્વવત્ સાધ્યમ્ ॥

મૃતનાર્યા વામપદાદુદ્બદ્ધાયાસ્તુ પાંસુલીં સમાદાય ।
રુધિરાલક્તકરોચનયા સાધ્યતનું મન્ત્રસંયુક્તામ્ ॥

ખદિરાનલે સુતપ્તાં રાત્ર્યર્ધે સમ્મુખો જપશતેન ।
આનયતિ શચીમહલ્યામથવા દિવસસ્ય શતભાગાત્ ॥

ઉદ્બદ્ધસ્ત્રીતનુવામાઙ્ઘ્રેઃ પાંસુલીં સમાદાય ।
પ્રેતાલક્તકનિજરુધિરરોચનાભિર્વિલિખ્ય સાધ્યતનુમ્ ॥

પ્રેતાનલે સુતપ્તાં શતાભિજપ્તાં સ્વનામમન્ત્રયુતામ્ ।
કૃત્વા યક્ષસુરાસુરપન્નગનારીઃ સમાનયત્યાશુ ॥

નિજવામકરે ઽલક્તકરોચનયા સાધ્યનામ પરિલિખિતમ્ ।
મન્ત્રવિદર્ભિતમેતજ્જપશતયુક્તં સુતાપિતં રાત્રૌ ॥

ખદિરાનલે વિધૂમે ઽસુરગુરુમપ્યાનયત્યનિલવેગાત્ ।
સાધ્યમભિધાનલિખિતં ભૂમિતલે ગૈરિકેણ રક્તેન ॥

ગન્ધોદ્વર્તિતવામહસ્તેન તુ તત્ત્વબીજયુક્તેન ।
આક્રમ્ય ભૂમિલિખિતં સાધ્યાભિમુખો ઽર્ધરાત્રકાલે તુ ॥

ક્ષિતિપતિમપિ સામાત્યં ચાનયતિ નિમેષશતભાગાત્ ।
નૃકપાલમધ્યલિખિતં રોચનયા રક્તમિશ્રયા સાધ્યમ્ ॥

નામ ચ તસ્ય લલાટે મન્ત્રેણ વિદર્ભિતં સમાલિખ્ય ।
ગન્ધોદકેન લિપ્તં નૃકપાલં વૈ દ્વિતીયમાદાય ॥

કૃત્વા કપાલસમ્પુટમથ મૃતસૂત્રેણ વેષ્ટયેત્ સમ્યક્ ।
ખદિરાઙ્ગારસુતપ્તં સિક્થકલિપ્તં તુ તત્પુનઃ કૃત્વા ॥

યાવત્ સિક્થકમેતત્ કપાલલગ્નં વિલીયતે તાવત્ ।
સુરપતિમપ્યાકર્ષતિ જપશતયોગાન્નિમેષમાત્રેણ ॥

ભિત્તૌ ગૈરિકલિખિતં મન્ત્રાર્ણવિદર્ભિતં તદભિધાનમ્ ।
સાધ્યાભિમુખો રાત્રૌ વામકરાક્રાન્તમથ જપન્ ક્રુદ્ધઃ ॥

ક્રોઙ્કારાઙ્કુશયોગાદાનયતિ સુરાસુરાન્ ક્ષિપ્રમ્ ।
રણશસ્ત્રઘાતપતિતં નરપિશિતં ત્રિમધુસંયુતં જુહુયાત્ ॥

વિપરીતચક્રમુદ્રાં બદ્ધ્વા સાધ્યં તુ નિક્ષિપેન્મધ્યે ।
સમ્પીડિતકરસમ્પુટવિહ્વલવક્ત્રં કરાન્તરે ધ્યાત્વા ॥

આનયતિ મહાપુરુષં ક્ષિતિપતિમપિ દિવસશતભાગાત્ ।
શિતશસ્ત્રપાતરહિતધ્વજનરશીર્ષં પ્રગૃહ્ય લક્ષમયુતમ્ ॥

તત્ર ત્રિરૂપગદિતં ધામ લિખિત્વાભિપૂજયેદ્યસ્તુ ।
તસ્ય હરિપવનકમલજધનદયમેન્દ્રાઃ સસિદ્ધગન્ધર્વાઃ ॥

વિવિધવરસિદ્ધિજાતં વિદધતિ વિચિત્રાસ્તથાપરાઃ સિદ્ધીઃ ।
વ્યક્તાવ્યક્તં તથા વ્યક્તમવ્યક્તં તુ ત્રિરૂપકમ્ ॥

ધામચારાધયેત્ સમ્યક્ તત્ર યસ્તુ વિચક્ષણઃ
જાયતે ત્રિવિધા સિદ્ધિર્ ગિરિરાજતનૂદ્ભવે ॥

સુનિશ્ચિતમતેઃ સમ્યગ્ ગિરિરાજસ્ય તસ્ય વૈ
રક્તચન્દનધૂલિં તુ રાજિકાં લવણં તથા ॥

પાદધૂલિં તુ સાધ્યસ્ય એકીકૃત્ય તુ પેષયેત્
જપન્ સ્વચ્છન્દદેવં તુ નિર્મથ્નંશ્ચ કરદ્વયમ્ ॥

ચિતાગ્નૌ જુહુયાચ્ચૂર્ણં ચાણ્ડાલાગ્નાવથાપિ વા
સાધ્યસ્યાભિમુખો ભૂત્વા પ્રયોગમિમમાચરેત્ ॥

શતમેકં જપેદ્યાવત્ તાવદાકર્ષયેન્નૃપમ્
વશમાયાતિ ભૂનાથ આત્મના ચ ધનેન ચ ॥

સિદ્ધ એષ પ્રયોગસ્તુ નાન્યથા તે વદામ્યહમ્
તામેવ ધૂલિં સંગૃહ્ય લોહચૂર્ણવિમિશ્રિતામ્ ॥

શ્મશાનચીરકે બદ્ધ્વા સપ્તજપ્તાં ચતુષ્પથે
નિખન્યાષ્ટાઙ્ગુલં ભૂમૌ રિપુનામસમન્વિતામ્ ॥

નિક્ષિપેદ્યસ્ય નામ્ના તાં સ ક્ષણાત્ સ્તમ્ભિતો ભવેત્
તામેવ ધૂલિં સંગૃહ્ય પઞ્ચકોન્મત્તસંયુતામ્ ॥

બદ્ધ્વા તાં પ્રેતવસ્ત્રેણ રિપુનામસમન્વિતામ્
શતજપ્તાં તુ તાં કૃત્વા શ્મશાને નિખનેદ્ દ્રુતમ્ ॥

ભવત્યુન્મત્તકઃ સાધ્ય ઉદ્ધૃતાયાં તુ મુચ્યતે
ઉદ્ધૃતં વસ્ત્રમાદાય ક્ષીરેણ પરિશોધયેત્ ॥

પ્રત્યાનયનમેતદ્ધિ સિદ્ધમેવ ન સંશયઃ
અથ રક્તાશ્વમારસ્ય કુસુમાનિ સમાહરેત્ ॥

શતમષ્ટોત્તરં તેષાં શતજપ્તં તુ કારયેત્
સકૃજ્જપ્તેન પુષ્પેણ લિઙ્ગમૂર્ધનિ તાડયેત્ ॥

એવં દિને દિને કુર્યાદ્ દશાહં સુસમાહિતઃ
તતસ્ત્વેકાદશૈતાનિ સંગૃહ્ય કુસુમાનિ તુ ॥

મહાનદીં તતો ગત્વા તત્રૈકૈકં પ્રવાહયેત્
આનુપૂર્વ્યેણ સર્વાણિ સકૃજ્જપ્ત્વા તુ મન્ત્રવિત્ ॥

યત્તેષાં પશ્ચિમં પુષ્પં પ્રતિસ્રોતઃ પ્રયાતિ હિ
તદ્ગૃહીત્વામ્બુસમ્મિશ્રં દન્તૈરસ્પૃષ્ટમાપિબેત્ ॥

તતો ઽશ્વમારકુસુમં રક્તં વૈ શતમન્ત્રિતમ્
તર્જન્યગ્રે તુ તત્કૃત્વા અઙ્ગુષ્ઠેનાક્રમેદ્ બુધઃ ॥

ભ્રામયેત્ સવ્યતઃ પુષ્પં યસ્ય નામ્ના તુ મન્ત્રવિત્
સ્વચ્છન્દં જપમાનસ્તુ તમાકર્ષયતે દ્રુતમ્
અપસવ્યં ભ્રામયિત્વા પુનસ્તસ્ય વિસર્જનમ્ ॥