સુશ્રુતસંહિતા · અધ્યાય 6.4

અથાતઃ શુક્લગતરોગવિજ્ઞાનીયમધ્યાયં વ્યાખ્યાસ્યામઃ॥

અથોવાચ ભગવાન્ ધન્વન્તરિઃ॥

પ્રસ્તારિશુક્લક્ષતજાધિમાંસસ્રાય્વર્મસંજ્ઞાઃ ખલુ પઞ્ચ રોગાઃ।
સ્યુઃ શુક્તિકા ચાર્જુનપિષ્ટકૌ ચ જાલં સિરાણાં પિડકાશ્ચ યાઃ સ્યુઃ॥

રોગા બલાસગ્રથિતેન સાર્ધમેકાદશાક્ષ્ણોઃ ખલુ શુક્લભાગે।
પ્રસ્તારિ પ્રથિતમિહાર્મ શુક્લભાગે વિસ્તીર્ણં તનુ રુધિરપ્રભં સનીલમ્॥

શુક્લાખ્યં મૃદુ કથયન્તિ શુક્લભાગે સશ્વેતં સમમિહ વર્ધતે ચિરેણ।
યન્માંસં પ્રચયમુપૈતિ શુક્લભાગે પદ્માભં તદુપદિશન્તિ લોહિતાર્મ॥

વિસ્તીર્ણં મૃદુ બહલં યકૃત્પ્રકાશં શ્યાવં વા તદધિકમાંસજાર્મ વિદ્યાત્।
શુક્લે યત્ પિશિતમુપૈતિ વૃદ્ધિમેતત્ સ્નાય્વર્મેત્યભિપઠિતં ખરં પ્રપાણ્ડુ॥

શ્યાવાઃ સ્યુઃ પિશિતનિભાશ્ચ બિન્દવો યે શુક્ત્યાભાઃ સિતનયને સ શુક્તિસંજ્ઞઃ।
એકો યઃ શશરુધિરોપમસ્તુ બિન્દુઃ શુક્લસ્થો ભવતિ તમર્જુનં વદન્તિ॥

ઉત્સન્નઃ સલિલનિભોઽથ પિષ્ટશુક્લો બિન્દુર્યો ભવતિ સ પિષ્ટકઃ સુવૃત્તઃ।
જાલાભઃ કઠિનસિરો મહાન્ સરક્તઃ સન્તાનઃ સ્મૃત ઇહ જાલસંજ્ઞિતસ્તુ॥

શુક્લસ્થાઃ સિતપિડકાઃ સિરાવૃતા યાસ્તા વિદ્યાદસિતસમીપજાઃ સિરાજાઃ।
કાંસ્યાભો ભવતિ સિતેઽમ્બુબિન્દુતુલ્યઃ સ જ્ઞેયોઽમૃદુરરુજો બલાસકાખ્યઃ॥