સુશ્રુતસંહિતા · અધ્યાય 6.14

અથાતો ભેદ્યરોગપ્રતિષેધં વ્યાખ્યાસ્યામઃ॥

યથોવાચ ભગવાન્ ધન્વન્તરિઃ॥

સ્વેદયિત્વા બિસગ્રન્થિં છિદ્રાણ્યસ્ય નિરાશયમ્।
પક્વં ભિત્ત્વા તુ શસ્ત્રેણ સિન્ધવેનાવચૂર્ણયેત્॥

કાસીસમાગધીપુષ્પનેપાલ્યેલાયુતેન તુ।
તતઃ ક્ષૌદ્રઘૃતં દત્ત્વા સમ્યગ્બન્ધમથાચરેત્॥

રોચનાક્ષારતુત્થાનિ પિપ્પલ્યઃ ક્ષૌદ્રમેવ ચ।
પ્રતિસારણમેકૈકં ભિન્ને લગણ ઇષ્યતે॥

મહત્યપિ ચ યુઞ્જીત ક્ષારાગ્ની વિધિકોવિદઃ।
સ્વિન્નાં ભિન્નાં વિનિષ્પીડ્ય ભિષગઞ્જનનામિકામ્॥

શિલૈલાનતસિન્ધૂત્થૈઃ સક્ષૌદ્રૈઃ પ્રતિસારયેત્।
રસાઞ્જનમધુભ્યાં તુ ભિત્ત્વા વા શસ્ત્રકર્મવિત્॥

પ્રતિસાર્યાઞ્જનૈર્યુઞ્જ્યાદુષ્ણૈર્દીપશિખોદ્ભવૈઃ।
સમ્યક્સ્વિન્ને કૃમિગ્રન્થૌ ભિન્ને સ્યાત્ પ્રતિસારણમ્॥

ત્રિફલાતુત્થકાસીસસૈન્ધવૈશ્ચ રસક્રિયા।
ભિત્ત્વોપનાહં કફજં પિપ્પલીમધુસૈન્ધવૈઃ॥

લેખયેન્મણ્ડલાગ્રેણ સમન્તાત્ પ્રચ્છયેદપિ।
સંસ્નેહ્ય પત્રભઙ્ગૈશ્ચ સ્વેદયિત્વા યથાસુખમ્॥

સર્વેષ્વેતેષુ વિહિતં વિધાનં સ્નેહપૂર્વકમ્।
સંપક્વે પ્રયતો ભૂત્વા કુર્વીત વ્રણરોપણમ્॥