સુશ્રુતસંહિતા · અધ્યાય 1.43.3

બ્રહ્મદક્ષાશ્વિરુદ્રેન્દ્રભૂચન્દ્રાર્કાનલાનિલાઃ ।

ઋષયઃ સૌષધિગ્રામા ભૂતસંઘાશ્ચ પાન્તુ તે ॥

રસાયનમિવર્ષીણાં દેવાનામમૃતં યથા ।

સુધેવોત્તમનાગાનાં ભૈષજ્યમિદમસ્તુ તે ॥ વિશેષેણ શ્લેષ્મજ્વરપ્રતિશ્યાયાન્તર્વિદ્રધિષુ અપ્રવર્તમાને વા દોષે પિપ્પલીવચાગૌરસર્ષપકલ્કોન્મિશ્રૈઃ સલવણૈસ્તુષામ્બુભિઃ પુનઃ પુનઃ પ્રવર્તયેદાસમ્યગ્વાન્તલક્ષણાદિતિ । મદનફલમજ્જચૂર્ણં વા તત્ક્વાથપરિભાવિતં મદનફલકષાયેણ મદનફલમજ્જસિદ્ધસ્ય વા પયસઃ સન્તાનિકાં ક્ષૌદ્રયુક્તાં મદનફલમજ્જસિદ્ધં વા પયઃ મદનફલમજ્જસિદ્ધેન વા પયસા યવાગૂમ્ અધોભાગાસૃક્પિત્તહૃદ્દાહયોઃ મદનફલમજ્જસિદ્ધસ્ય વા પયસો દધિભાવમુપગતસ્ય દધ્યુત્તરં દધિ વા કફપ્રસેકચ્છર્દિમૂર્ચ્છાતમકેષુ મદનફલમજ્જરસં ભલ્લાતકસ્નેહવદાદાય ફાણિતીભૂતં લેહયેત્ આતપપરિશુષ્કં વા તમેવ જીવન્તીકષાયેણ પિત્તે કફસ્થાનગતે મદનફલમજ્જક્વાથં વા પિપ્પલ્યાદિપ્રતીવાપં તચ્ચૂર્ણં વા નિમ્બરૂપિકાકષાયયોરન્યતરેણ સંતર્પણકફજવ્યાધિહરં મદનફલમજ્જચૂર્ણં વા મધુકકાશ્મર્યદ્રાક્ષાકષાયેણ । મદનફલવિધાનમુક્તમ્ ॥