સુહૃલ્લેખ · શ્લોક 61-80

પ્રતિરૂપદેશવાસઃ સત્પુરુષસમાશ્રયઃ શુભપ્રણિધાનં ચ ।
સ્વકીયપૂર્વકુશલં હ્યેતચ્ચક્રચતુષ્કં હિ વિદ્યતે ત્વયિ

કલ્યાણમિત્રસેવા બ્રહ્મચર્યપૂર્તયે દેશિતા મુનિના ।
સેવ્યઃ સદા સુપુરુષઃ શમઃ પ્રાપ્તો યતો જિનમપેક્ષ્ય બહુભિઃ

મિથ્યાદૃક્ પ્રત્યન્તે નરકપ્રેતતિર્યક્ષૂત્પદ્યમાનઃ ।
મ્લેચ્છો જડશ્ચ સત્ત્વો યો હ્યુત્પન્નો બુદ્ધવિરહિતે

દીર્ઘાયુષિ દેવકુલે જનિલબ્ધશ્ચાષ્ટાક્ષણા ઇમે દોષાઃ ।
એભી રહિતો ભૂત્વા ક્ષણં લબ્ધ્વા જન્મનિવૃત્તૌ પ્રયતેત

ઇષ્ટવિઘાતવ્યાધિમૃત્યુજરાદિદુઃખાવહઃ સંસારઃ ।
વિરજ્ય તતઃ શૃણુ તાવદ્ દોષાનેતસ્યાવગચ્છન્ નરદેવ

મિત્રત્વેન ચ શત્રુઃ પુત્રત્વેન પિતામ્બા ચ ભાર્યાત્વેન ।
પરિવર્ત્યોત્પદ્યન્તે તસ્માન્ન નિયતં કિમપીહ સંસારે

ચતુઃસમુદ્રજલાદપિ જનૈરધિકં જનન્યાઃ સ્તન્યં પીતમ્ ।
પૃથગ્જનાનનુસૃત્ય હિ પુનસ્તતો ઽપ્યધિકઞ્ચ પાસ્યન્તિ લોકાઃ

આત્મનશ્ચાસ્થિપુઞ્જં મેરુસમં તતો ઽધિકમુચ્ચૈર્જાયેત ।
ભૂમિમૃદા બદરાણાં ગુલિકાભિર્ન ગણના સમ્ભવામ્બાનામ્

લોકપૂજ્યો ઽપિ શક્રઃ પતતિ ચ પુનઃ કર્મવશાદ્ધિ સંસારે ।
તદ્વચ્ચ ચક્રવર્તી રાજાપિ પુનર્ભવતિ હિ દાસો લોકે

સ્વર્ગે ઽપ્સરસાં સૌખ્યં કુચતટિસ્પર્શજં ચૈવ ચિરમનુભૂય ।
નરકે દુઃસહદુઃખં પેષણછેદનભેદનયન્ત્રૈર્ભુઙ્ક્તે

સુખદે સુમેરુશિખરે ચિરમનુભવંશ્ચરંશ્ચરણસ્પર્શસુખમ્ ।
ચઞ્ચલકુક્કુલકુણપૈર્ગાઢં દુઃખં ચિન્તયેત્ સદા મનસા

દેવાઙ્ગનાસેવિતે નન્દને રમ્યે ચોપવને ચ વિહૃત્ય ।
અસિપત્રવને તેષાં હસ્તપાદકર્ણનાસાશ્ચ છિદ્યન્તે

સુવદનદેવસુતાભિઃ સ્વર્ણોત્પલૈર્યુતાયાં મન્દાકિન્યામ્ ।
સ્નાત્વા પુનશ્ચ નરકે ક્ષારોષ્ણોદકવૈતરણ્યાં હિ પતન્તિ

દેવેષુ કામસુખં ચ કામવીતરાગસુખં બ્રહ્મલોકેષુ ।
પ્રાપ્યાવીચૌ સતતં લભ્યતે ઽગ્નેરિન્ધનીભૂય ચ દુઃખમ્

પદમવાપ્ય સુર્યેન્દ્વોઃ સ્વકાયપ્રભયા પ્રદીપ્ય હિ સંસારમ્ ।
તમસિ ચ ઘને પ્રવિષ્ટઃ પ્રસારિતમપિ ચ સ્વીયકરં ન પશ્યતિ

એવં મૃત્યું જ્ઞાત્વા ગ્રાહ્યસ્ત્રિવિધપુણ્યમયદીપાલોકઃ ।
અન્યથા રવીન્દુભ્યામમર્દનીયે ઽન્ધતમસિ પ્રવેષ્ટવ્યમ્

દુષ્ટાચરણે લગ્નાઃ સત્ત્વાઃ સંજીવકાલસૂત્રતપનેષુ ।
રૌરવાવીચ્યાદૌ હિ સંઘાતે ચાપિ નરકે સદા દુઃખમ્

નિષ્પીડ્યન્તે તિલવત્ કેચનાન્યે ચૂર્ણવત્ પેષ્યન્તે ચ ।
છિદ્યન્તે શાણેનાન્યે દીર્યન્તે તથા તીક્ષ્ણપરશુનાપિ

આસ્યે ઽન્યેષાં તદ્વત્ પાત્યતે જ્વલિતં તાવલ્લૌહદ્રવમ્ ।
આરોપ્યન્તે કેચન સકણ્ટકે તપ્તાયસે સદા શૂલે

શ્વભિઃ કેચન ક્રૂરૈર્લૌહદન્તૈર્વિદીર્યન્તે ગર્જદ્ભિઃ ।
ઉત્થાય કરૌ વિવશા લુઞ્ચ્યન્તે તીક્ષ્ણનખતુણ્ડૈશ્ચ કાકૈઃ