Stotraratna · શ્લોક 21-40

નમો નમો વાઙ્મનસાતિભૂમયે નમો નમો વાઙ્મનસૈકભૂમયે ।
નમો નમો ઽનન્તમહાવિભૂતયે નમો નમો ઽનન્તદયૈકસન્ધિવે ॥

ન ધર્મનિષ્ઠો ઽસ્મિ, ન ચાત્મવેદી, ન ભક્તિમાંસ્ ત્વચ્ચરણારવિન્દે ।
અકિઞ્ચનો ઽનન્યગતિઃ શરણ્ય ! ત્વત્પાદમૂલં શરણં પ્રપદ્યે ॥

ન નિન્દિતં કર્મ તદ્ અસ્તિ લોકે સહસ્રશો યન્ ન મયા વ્યધાયિ ।
સો ઽહં વિપાકાવસરે મુકુન્દ ! ક્રન્દામિ સમ્પ્રત્ય્ અગતિસ્ તવાગ્રે ॥

નિમજ્જતો ઽનન્ત ! ભવાર્ણવાન્તશ્ ચિરાય મે કૂલમ્ ઇવાસિ લબ્ધઃ ।
ત્વયાપિ લબ્ધં ભગવન્ન્ ઇદાનીમ્ અનુત્તમં પાત્રમ્ ઇદં દયાયાઃ ॥

અભૂતપૂર્વં મમ ભાવિ કિં વા સર્વં સહે મે સહજં હિ દુઃખમ્ ।
કિં તુ ત્વદગ્રે શરણાગતાનાં પરાભવો નાથ ! ન તે ઽનુરૂપઃ ॥

નિરાસકસ્યાપિ ન તાવદ્ ઉત્સહે મહેશ ! હાતું તવ પાદપઙ્કજમ્ ।
રુષા નિરસ્તો ઽપિ શિશુઃ સ્તનન્ધયો ન જાતુ માતુશ્ ચરણૌ જિહાસતિ ॥

તવામૃતસ્યન્દિનિ પાદકઙ્કજે નિવેશિતાત્મા કથમ્ અન્યદ્ ઇચ્છતિ ।
સ્થિતે ઽરવિન્દે મકરન્દનિર્ભરે મધુવ્રતો નેક્ષુરકં હિ વીક્ષતે ॥

ત્વદઙ્ઘ્રિમ્ ઉદ્દિશ્ય કદાપિ કેનચિદ્ યથા તથા વાપિ સકૃત્ કુતો ઽઞ્જલિઃ ।
તદૈવ મુષ્ણાત્ય્ અશુભાબ્ય્ અશેષતઃ શુભાનિ પુષ્ણાતિ ન જાતુ હીયતે ॥

ઉદીર્ણસંસારદવાશુશુક્ષણિં ક્ષણેન નિર્વાપ્ય પરાં ચ નિર્વૃતિમ્ ।
પ્રયચ્છતિ ત્વચ્ચરણારુણામ્બુજદ્વયાનુરાગામૃતસિન્ધુશીકરઃ ॥

વિલાસવિક્રાન્તપરાવરાલયં નમસ્યદાર્તિક્ષપણે કૃતક્ષણમ્ ।
ધનં મદીયં તવ પાદપઙ્કજં કદા નુ સાક્ષાત્કરવાણિ ચક્ષુષા ? ॥

કદા પુનઃ શઙ્ખરથાઙ્ગકલ્પકધ્વજારવિન્દાઙ્કુશવજ્રલાઞ્છનમ્ ।
ત્રિવિક્રમ ! ત્વચ્ચરણામ્બુજદ્વયં મદીયમૂર્ધાનમ્ અલઙ્કરિષ્યતિ ॥

વિરાજમાનોજ્જ્વલપીતવાસસં સ્મિતાતસીસૂનસમામલચ્છવિમ્ ।
નિમગ્નનાભિં તનુમધ્યમુન્નતં વિશાલવક્ષસ્સ્થલશોભિલક્ષણમ્ ॥

ચકાસતં જ્યાકિણકર્કશૈઃ શુભૈશ્ ચતુર્ભિર્ આજાનુવિલમ્ભિર્ ભુહૈઃ ।
પ્રિયાવતંસોત્પલકર્ણભૂષણશ્લથાલકાબન્ધવિમર્દશંસિભિઃ ॥

ઉદગ્રપીનાંસવિલમ્બિકુણ્ડલાલકાવલીબન્ધુરકન્બુકન્ધરમ્ ।
મુખશ્રિયા ન્યક્કૃતપૂર્ણનિર્મલામૃતાંશુબિમ્બામ્બુરુહોજ્જ્વલશ્રિયમ્ ॥

પ્રબુદ્ધમુગ્ધામ્બુજચારુલોચનં સવિભ્રમભ્રૂલતમ્ ઉજ્જ્વલાધરમ્ ।
શુચિસ્મિતં કોમલગણ્ડમ્ ઉન્નસં લલાટપર્યન્તવિલમ્બિતાલકમ્ ॥

સ્ફુરત્કિરીટાઙ્ગદહારકણ્ઢિકામણીન્દ્રકાઞ્ચીગુણનૂપુરાદિભિઃ ।
રથાઙ્ગશઙ્ખાસિગદાધનુર્વરૈર્ લસત્તુલસ્યા વનમાલયોજ્જ્વલમ્ ॥

ચકર્થ યસ્યા ભવનં ભુજાન્તરં તવ પ્રિયં ધામ યદીયજન્મભૂઃ ।
જગત્સમસ્તં યદપાઙ્ગસંશ્રયં યદર્થમ્ અમ્ભોધિર્ અમન્થ્ય્ અબન્ધિ ચ ॥

સ્વવૈશ્વરૂપ્યેણ સદાનુભૂતયાપ્ય્ અપૂર્વવદ્વિસ્મયમાદધાનયા ।
ગુણેન રૂપેણ વિલાસચેષ્ટિતૈસ્ સદા તવૈવોચિતયા તવ શ્રિયા ॥

તયા સહાસીનમ્ અનન્તભોગિનિ પ્રકૃષ્ટવિજ્ઞાનબલૈકધામનિ ।
ફણામણિવ્રાતમયૂખમણ્ડલપ્રકાશમાનોદરદિવ્યધામનિ ॥

નિવાસશય્યાસનપાદુકાંશુકોપધાનવર્ષાતપવારણાદિભિઃ ।
શરીરભેદૈસ્ તવ શેષતાં ગતૈર્ યથોચિતં શ્ષ ઇતીરિતે જનૈઃ ॥