સ્તવચિન્તામણિ · શ્લોક 80-99

મુહુર્ મુહુર્ જગચ્ચિત્રસ્ય્ -આન્યાન્યાં સ્થિતિમ્ ઊહિતુમ્
શક્તિર્ યા તે તયા નાથ કો મનસ્વી ન વિસ્મિતઃ ॥

દુષ્કરં સુકરીકર્તું દુઃખં સુખયિતું તથા
એકવીરા સ્મૃતિર્ યસ્ય તં સ્મરામઃ સ્મરદ્વિષમ્ ॥

જયન્તિ ગીતયો યાસાં સ ગેયઃ પરમેશ્વરઃ
યન્નામ્નાપિ મહાત્માનઃ કીર્યન્તે પુલકાઙ્કુરૈઃ ॥

ભવાન્ ઇવ ભવાન્ એવ ભવેદ્ યદિ પરં ભવ
સ્વશક્તિવ્યૂહસંવ્યૂઢ ત્રૈલોક્યારમ્ભસંહૃતિઃ ॥

મન્ત્રો ઽસિ મન્ત્રણીયો ઽસિ મન્ત્રી ત્વત્તઃ કુતો ઽપરઃ
સ મહ્યં દેહિ તં મન્ત્રં ત્વન્મન્ત્રઃ સ્યાં યથા પ્રભો ॥

ભારૂપઃ સત્યસંકલ્પસ્ ત્વમ્ આત્મા યસ્ય સો ઽપ્ય્ અહમ્
સંસારીતિ કિમ્ ઈશૈષ સ્વપ્નઃ સો ઽપિ કુતસ્ ત્વયિ ॥

તદ્ અભઙ્ગિ તદ્ અગ્રામ્યં તદ્ એકમ્ ઉપપત્તિમત્
ત્વયિ કર્મફલન્યાસ કૃતામ્ ઐશ્વર્યમ્ ઈશ યત્ ॥

ક્ષમઃ કાં નાપદં હન્તું કાં દાતું સમ્પદં ન વા
યો ઽસૌ સ દયિતો ઽસ્માકં દેવદેવો વૃષધ્વજઃ ॥

માયામયમલાન્ધસ્ય દિવ્યસ્ય જ્ઞાનચક્ષુષઃ
નિર્મલીકરણે નાથ ત્વદ્ભક્તિઃ પરમાઞ્જનમ્ ॥

નિર્ભયં યદ્ યદ્ આનન્દ મયમ્ એકં યદ્ અવ્યયમ્
પદં દેહ્ય્ એહિ મે દેવ તૂર્ણં તત્ કિં પ્રતીક્ષસે ॥

અહો નિસર્ગગમ્ભીરો ઘોરઃ સંસારસાગરઃ
અહો તત્તરણોપાયઃ પરઃ કો ઽપિ મહેશ્વરઃ ॥

નમઃ કૃતકૃતાન્તાન્ત તુભ્યં મદનમર્દિને
મસ્તકન્યસ્તગઙ્ગાય યથાયુક્તાર્થકારિણે ॥

ઐશ્વર્યજ્ઞાનવૈરાગ્ય ધર્મેભ્યો ઽપ્ય્ ઉપરિ સ્થિતિમ્
નાથ પ્રાર્થયમાનાનાં ત્વદ્ ઋતે કા પરા ગતિઃ ॥

ત્વય્ય્ અનિચ્છતિ કઃ શમ્ભો શક્તઃ કુબ્જયિતું તૃણમ્
ત્વદિચ્છાનુગૃહીતસ્ તુ વહેદ્ બ્રાહ્મીં ધુરં ન કઃ ॥

હરપ્રણતિમાણિક્ય મુકુટોત્કટમસ્તકાઃ
નમેયુઃ કં પરં કં વા નમયેયુર્ ન ધીધનાઃ ॥

સર્વવિભ્રમનિર્મોક નિષ્કમ્પમ્ અમૃતહ્રદમ્
ભવજ્જ્ઞાનામ્બુધેર્ મધ્યમ્ અધ્યાસીયાપિ ધૂર્જટે ॥

ચિત્રં યચ્ ચિત્રદૃષ્ટો ઽપિ મનોરથગતો ઽપિ વા
પરમાર્થફલં નાથ પરિપૂર્ણં પ્રયચ્છસિ ॥

કો ગુણૈર્ અધિકસ્ ત્વત્તસ્ ત્વત્તઃ કો નિર્ગુણો ઽધિકઃ
ઇતિ નાથ નુમઃ કિં ત્વાં કિં નિન્દામો ન મન્મહે ॥

કીર્તને ઽપ્ય્ અમૃતૌઘસ્ય યત્પ્રસત્તેઃ ફલં તવ
તત્ પાતુમ્ અપિ કો ઽન્યો ઽલં કિમ્ ઉ દાતું જગત્પતે ॥

નિઃશેષપ્રાર્થનીયાર્થ સાર્થસિદ્ધિનિધાનતઃ
ત્વત્તસ્ ત્વદ્ભક્તિમ્ એવાપ્તું પ્રાર્થયે નાથ સર્વથા ॥