સ્તવચિન્તામણિ · શ્લોક 60-79

નમઃ સદસતાં કર્તુમ્ અસત્ત્વં સત્ત્વમ્ એવ વા
સ્વતન્ત્રાયાસ્વતન્ત્રાય વ્યયૈશ્વર્યૈકશાલિને ॥

ત્રૈલોક્યે ઽપ્ય્ અત્ર યો યાવાન્ આનન્દઃ કશ્ચિદ્ ઈક્ષ્યતે
સ બિન્દુર્ યસ્ય તં વન્દે દેવમ્ આનન્દસાગરમ્ ॥

અહો બ્રહ્માદયો ધન્યા યે વિમુક્તાન્યસંકથમ્
નમો નમઃ શિવાયેતિ જપન્ત્ય્ આહ્લાદવિહ્વલાઃ ॥

નિષ્કામાયાપિ કામાનામ્ અનન્તાનાં વિધાયિને
અનાદિત્વે ઽપિ વિશ્વસ્ય ભોક્ત્રે ભવ નમો ઽસ્તુ તે ॥

સ્તુમસ્ ત્રિભુવનારમ્ભ મૂલપ્રકૃતિમ્ ઈશ્વરમ્
લિપ્સેરન્ નોપકારં કે યતઃ સમ્પૂર્ણધર્મણઃ ॥

મહત્સ્વ્ અપ્ય્ અર્થકૃચ્છ્રેષુ મોહૌઘમલિનીકૃતાઃ
સ્મૃતે યસ્મિન્ પ્રસીદન્તિ મતયસ્ તં શિવં સ્તુમઃ ॥

પ્રભો ભવત એવેહ પ્રભુશક્તિર્ અભઙ્ગુરા
યદિચ્છયા પ્રતાયેતે ત્રૈલોક્યસ્ય લયોદયૌ ॥

કુકર્માપિ યમ્ ઉદ્દિશ્ય દેવં સ્યાત્ સુકૃતં પરમ્
સુકૃતસ્યાપિ સૌકૃત્યં યતો ઽન્યત્ર ન સો ઽસિ ભોઃ ॥

એષ મુષ્ટ્યા ગૃહીતો ઽસિ દૃષ્ટ એષ ક્વ યાસિ નઃ
ઇતિ ભક્તિરસાધ્માતા ધન્યા ધાવન્તિ ધૂર્જટિમ્ ॥

સ્તુમસ્ ત્વામ્ ઋગ્યજુઃસામ્નાં શુક્રતઃ પરતઃ પરમ્
યસ્ય વેદાત્મિકાજ્ઞેયમ્ અહો ગમ્ભીરસુન્દરી ॥

વિધિર્ આદિસ્ તથાન્તો ઽસિ વિશ્વસ્ય પરમેશ્વર
ધર્મગ્રામઃ પ્રવૃત્તો યસ્ ત્વત્તો ન સ કુતો ભવેત્ ॥

નમસ્ તે ભવસમ્ભ્રાન્ત ભ્રાન્તિમ્ ઉદ્ભાવ્ય ભિન્દતે
જ્ઞાનાનન્દં ચ નિર્દ્વન્દ્વં દેવ વૃત્વા વિવૃણ્વતે ॥

યસ્યાઃ પ્રાપ્યેત પર્યન્ત વિશેષઃ કૈર્ મનોરથૈઃ
માયામ્ એકનિમેષેણ મુષ્ણંસ્ તાં પાતુ નઃ શિવઃ ॥

વૈરાગ્યસ્ય ગતિં ગુર્વીં જ્ઞાનસ્ય પરમાં શ્રિયમ્
નૈઃસ્પૃહ્યસ્ય પરાં કોટિં બિભ્રતાં ત્વં પ્રભો પ્રભુઃ ॥

બ્રહ્મણો ઽપિ ભવાન્ બ્રહ્મ કસ્ય નેશસ્ ત્વમ્ ઈશિતુઃ
જગત્કલ્યાણકલ્યાણં કિયત્ ત્વમ્ ઇતિ વેત્તિ કઃ ॥

કિમ્ અન્યૈર્ બન્ધુભિઃ કિં ચ સુહૃદ્ભિઃ સ્વામિભિસ્ તથા
સર્વસ્થાને મમેશ ત્વં ય ઉદ્ધર્તા ભવાર્ણવાત્ ॥

જયન્તિ મોહમાયાદિ મલસંક્ષાલનક્ષમાઃ
શૈવયોગબલાકૃષ્ટા દિવ્યપીયૂષવિપ્રુષઃ ॥

ગાયત્ર્યા ગીયતે યસ્ય ધિયાં તેજઃ પ્રચોદકમ્
ચોદયેદ્ અપિ કચ્ચિન્ નઃ સ ધિયઃ સત્પથે પ્રભુઃ ॥

અષ્ટમૂર્તે કિમ્ એકસ્યામ્ અપિ મૂર્તૌ ન નઃ સ્થિતિમ્
શાશ્વતીં કુરુષે યદ્ વા તુષ્ટઃ સર્વં કરિષ્યસિ ॥

વસ્તુતત્ત્વં પદાર્થાનાં પ્રાયેણાર્થક્રિયાકરમ્
ભવતસ્ ત્વ્ ઈશ નામાપિ મોક્ષપર્યન્તસિદ્ધિદમ્ ॥