સ્તવચિન્તામણિ · શ્લોક 41-59

ક્રમેણ કર્મણા કેન કયા વા પ્રજ્ઞયા પ્રભો
દૃશ્યો ઽસીત્ય્ ઉપદેશેન પ્રસાદઃ ક્રિયતાં મમ ॥

નમો નિરુપકાર્યાય ત્રૈલોક્યૈકોપકારિણે
સર્વસ્ય સ્પૃહણીયાય નિઃસ્પૃહાય કપર્દિને ॥

અહો ક્ષેત્રજ્ઞતા સેયં કાર્યાય મહતે સતામ્
યયાનન્તફલાં ભક્તિં વપન્તિ ત્વય્ય્ અમી પ્રભો ॥

મહતીયમ્ અહો માયા તવ માયિન્ યયાવૃતઃ
ત્વદ્ધ્યાનનિધિલાભે ઽપિ મુગ્ધો લોકઃ શ્લથાયતે ॥

આરમ્ભે ભવ સર્વત્ર કર્મ વા કરણાદિ વા
વિશ્વમ્ અસ્તુ સ્વતન્ત્રસ્ તુ કર્તા તત્રૈકકો ભવાન્ ॥

ત્રિગુણત્રિપરિસ્પન્દ દ્વન્દ્વગ્રસ્તં જગત્ત્રયમ્
ઉદ્ધર્તું ભવતો ઽન્યસ્ય કસ્ય શક્તિઃ કૃપાથવા ॥

દોષો ઽપિદેવ કો દોષસ્ ત્વામ્ આપ્તું યઃ સમાસ્થિતઃ
ગુણો ઽપિ ચ ગુણઃ કો નુ ત્વાં નાપ્તું યઃ સમાસ્થિતઃ ॥

રાગો ઽપ્ય્ અસ્તુ જગન્નાથ મમ ત્વય્ય્ એવ યઃ સ્થિતઃ
લોભાયાપિ નમસ્ તસ્મૈ ત્વલ્લાભાલમ્બનાય મે ॥

અહો મહદ્ ઇદં કર્મ દેવ ત્વદ્ભાવનાત્મકમ્
આબ્રહ્મક્રિમિ યસ્મિન્ નો મુક્તયે ઽધિક્રિયેત કઃ ॥

આરમ્ભઃ સર્વકાર્યાણાં પર્યન્તઃ સર્વકર્મણામ્
તદન્તર્વૃત્તયશ્ ચિત્રાસ્ તવૈવેશો ધિયઃ પથિ ॥

યાવદ્ ઉત્તરમ્ આસ્વાદ સહસ્રગુણવિસ્તરઃ
ત્વદ્ભક્તિરસપીયૂષાન્ નાથ નાન્યત્ર દૃશ્યતે ॥

ઉપસંહૃતકામાય કામાયતિમ્ અતન્વતે
અવતંસિતસોમાય સોમાય સ્વામિને નમઃ ॥

કિમ્ અશક્તઃ કરોમીતિ સર્વત્રાનધ્યવસ્યતઃ
સર્વાનુગ્રાહિકા શક્તિઃ શાંકરી શરણં મમ ॥

ગુણાતીતસ્ય નિર્દિષ્ટ નિઃશેષાતિશયાત્મનઃ
લભ્યતે ભવ કુત્રાંશે પરઃ પ્રતિનિધિસ્ તવ ॥

નિર્દ્વન્દ્વે નિરુપાધૌ ચ ત્વય્ય્ આત્મનિ સતિ પ્રભો
વયં વઞ્ચ્યામહે ઽદ્યાપિ માયયામેયયા તવ ॥

અણિમાદિગુણાવાપ્તિઃ સદૈશ્વર્યં ભવક્ષયઃ
અમી ભવ ભવદ્ભક્તિ કલ્પપાદપપલ્લવાઃ ॥

યા યા દિક્ તત્ર ન ક્વાસિ સર્વઃ કાલો ભવન્મયઃ
ઇતિ લબ્ધો ઽપિ કર્હિ ત્વં લપ્સ્યસે નાથ કથ્યતામ્ ॥

નમઃ પ્રસન્નસદ્વૃત્ત માનસૈકનિવાસિને
ભૂરિભૂતિસિતાઙ્ગાય મહાહંસાય શમ્ભવે ॥

હૃતોદ્ધતતમસ્તાન્તિઃ પ્લુષ્ટાશેષભવેન્ધના
ત્વદ્બોધદીપિકા મે ઽસ્તુ નાથ ત્વદ્ભક્તિદીપિકા ॥

વિસૃષ્ટાનેકસદ્બીજ ગર્ભં ત્રૈલોક્યનાટકમ્
પ્રસ્તાવ્ય હર સંહર્તું ત્વત્તઃ કો ઽન્યઃ કવિઃ ક્ષમઃ ॥