સ્તવચિન્તામણિ · શ્લોક 21-40

કઃ પન્થા યેન ન પ્રાપ્યઃ કા ચ વાઙ્ નોચ્યસે યયા
કિં ધ્યાનં યેન ન ધ્યેયઃ કિં વા કિં નાસિ યત્ પ્રભો ॥

અર્ચિતો ઽયમ્ અયં ધ્યાત એષ તોષિત ઇત્ય્ અયમ્
રસઃ સ્રોતઃસહસ્રેણ ત્વયિ મે ભવ વર્ધતામ્ ॥

નમો નિઃશેષધીપત્રિ માલાલયમયાત્મને
નાથાય સ્થાણવે તુભ્યં નાગયજ્ઞોપવીતિને ॥

અજ્ઞાનતિમિરસ્યૈકમ્ ઔષધં સંસ્મૃતિસ્ તવ
ભવ તત્તત્પ્રદાનેન પ્રસાદઃ ક્રિયતાં મયિ ॥

નમ ઈશાય નિઃશેષ પુરુષાર્થપ્રસાધકઃ
પ્રણન્તવ્યઃ પ્રણામો ઽપિ યદીય ઇહ ધીમતામ્ ॥

મગ્નૈર્ ભીમે ભવામ્ભોધૌ નિલયે દુઃખયાદસામ્
ભક્તિચિન્તામણિં શાર્વં તતઃ પ્રાપ્ય ન કિં જિતમ્ ॥

નિરાવરણનિર્દ્વન્દ્વ નિશ્ચલજ્ઞાનસમ્પદામ્
જ્ઞેયો ઽસિ કિલ કે ઽપ્ય્ એતે યે ત્વાં જાનન્તિ ધૂર્જટે ॥

નિર્ગુણો ઽપિ ગુણજ્ઞાનાં જ્ઞેય એકો જયત્ય્ અજઃ
નિષ્કામો ઽપિ પ્રકૃત્યા યઃ કામનાનાં પરં ફલમ્ ॥

શ્રીરત્નામૃતલાભાય ક્લિષ્ટં યત્ર ન કૈઃ સુરૈઃ
તત્ ક્ષીરોદદમ્ ઐશ્વર્યં તવૈવ સહજં વિભો ॥

નમો ભક્ત્યા નૃણાં મુક્ત્યૈ ભવતે ભવ તે ઽવતે
સ્મૃત્યા નુત્યા ચ દદતે શમ્ભવે શં ભવે ઽભવે ॥

સર્વજ્ઞઃ સર્વકૃત્ સર્વમ્ અસીતિ જ્ઞાનશાલિનામ્
વેદ્યં કિં કર્મ વા નાથ નાનન્ત્યાય ત્વયાર્પ્યતે ॥

ઇચ્છાયા એવ યસ્યેયત્ ફલં લોકત્રયાત્મકમ્
તસ્ય તે નાથ કાર્યાણાં કો વેત્તિ કિયતી ગતિઃ ॥

બ્રહ્માદયો ઽપિ તદ્ યસ્ય કર્મસોપાનમાલયા
ઉપર્ય્ ઉપરિ ધાવન્તિ લબ્ધું ધામ નમામિ તમ્ ॥

અયં બ્રહ્મા મહેન્દ્રો ઽયં સૂર્યાચન્દ્રમસાવ્ ઇમૌ
ઇતિ શક્તિલતા યસ્ય પુષ્પિતા પાત્વ્ અસૌ ભવઃ ॥

ભ્રમો ન લભ્યતે યસ્ય ભ્રાન્તાન્તઃકરણૈર્ અપિ
દૂરગૈર્ અપિ યસ્યાન્તો દુર્ગમ્ અસ્તં સ્તુમો મૃડમ્ ॥

નમઃ સ્તુતૌ સ્મૃતૌ ધ્યાને દર્શને સ્પર્શને તથા
પ્રાપ્તૌ ચાનન્દવૃન્દાય દયિતાય કપર્દિને ॥

કિં સ્મયેનેતિ મત્વાપિ મનસા પરમેશ્વર
સ્મયેન ત્વન્મયો ઽસ્મીતિ મામિ નાત્મનિ કિં મુદા ॥

ચિન્તયિત્વાપિ કર્તવ્ય કોટીશ્ ચિત્તસ્ય ચાપલાત્
વિશ્રામ્યન્ ભવ ભાવત્ક ચિત્તાનન્દે રમે ભૃશમ્ ॥

સૂક્ષ્મો ઽપિ ચેત્ ત્રિલોકીયં કલામાત્રં કથં તવ
સ્થૂલો ઽથ કિં સુદર્શો ન બ્રહ્માદિભિર્ અપિ પ્રભો ॥

વાચ્ય એષાં ત્વમ્ એવેતિ નાભવિષ્યદ્ ઇદં યદિ
કઃ ક્લેશં દેવ વાગ્જાલેષ્વ્ અકરિષ્યત્ સુધીસ્ તદા ॥