સ્તવચિન્તામણિ · શ્લોક 1-20

સુગિરા ચિત્તહારિણ્યા પશ્યન્ત્યા દૃશ્યમાનયા
જયત્ય્ ઉલ્લાસિતાનન્દ મહિમા પરમેશ્વરઃ ॥

યઃ સ્ફીતઃ શ્રીદયાબોધ પરમાનન્દસમ્પદા
વિદ્યોદ્દ્યોતિતમાહાત્મ્યઃ સ જયત્ય્ અપરાજિતઃ ॥

પ્રસરદ્બિન્દુનાદાય શુદ્ધામૃતમયાત્મને
નમો ઽનન્તપ્રકાશાય શંકરક્ષીરસિન્ધવે ॥

દ્વિષ્મસ્ ત્વાં ત્વાં સ્તુમસ્ તુભ્યં મન્ત્રયામો ઽમ્બિકાપતે
અતિવાલ્લભ્યતઃ સાધુ વિશ્વઙ્ નો ધૃતવાન્ અસિ ॥

સંહૃતસ્પર્શયોગાય સમ્પૂર્ણામૃતસૂતયે
વિયન્માયાસ્વરૂપાય વિભવે શમ્ભવે નમઃ ॥

ભિન્નેષ્વ્ અપિ ન ભિન્નં યચ્ છિન્નેષ્વ્ અછિન્નમ્ એવ ચ
નમામઃ સર્વસામાન્યં રૂપં તત્ પારમેશ્વરમ્ ॥

પ્રણવોર્ધ્વાર્ધમાત્રાતો ઽપ્ય્ અણવે મહતે પુનઃ
બ્રહ્માણ્ડાદ્ અપિ નૈર્ગુણ્ય ગુણાય સ્થાણવે નમઃ ॥

બ્રહ્માણ્ડગર્ભિણીં વ્યોમ વ્યાપિનઃ સર્વતોગતેઃ
પરમેશ્વરહંસસ્ય શક્તિં હંસીમ્ ઇવ સ્તુમઃ ॥

નિરુપાદાનસમ્ભારમ્ અભિત્તાવ્ એવ તન્વતે
જગચ્ચિત્રં નમસ્ તસ્મૈ કલાશ્લાઘ્યાય શૂલિને ॥

માયાજલોદરાત્ સમ્યગ્ ઉદ્ધૃત્ય વિમલીકૃતમ્
શિવજ્ઞાનં સ્વતો દુગ્ધં દેહ્ય્ એહિ હરહંસ નઃ ॥

ષટ્પ્રમાણીપરિચ્છેદ ભેદયોગે ઽપ્ય્ અભેદિને
પરમાર્થૈકભાવાય બલિં યામો ભવાય તે ॥

અપિ પશ્યેમ ગમ્ભીરાં પરેણ જ્યોતિષાભિતઃ
ઉન્મૃષ્ટતમસં રમ્યામ્ અન્તર્ભવ ભવદ્ગુહામ્ ॥

નમસ્ તેભ્યો ઽપિ યે સોમ કલાકલિતશેખરમ્
નાથં સ્વપ્ને ઽપિ પશ્યન્તિ પરમાનન્દદાયિનમ્ ॥

ભગવન્ ભવ ભાવત્કં ભાવં ભાવયિતું રુચિઃ
પુનર્ભવભયોચ્છેદ દક્ષા કસ્મૈ ન રોચતે ॥

યાવજ્જીવં જગન્નાથ કર્તવ્યમ્ ઇદમ્ અસ્તુ નઃ
ત્વત્પ્રસાદાત્ ત્વદેકાગ્ર મનસ્કત્વેન યા સ્થિતિઃ ॥

શાખાસહસ્રવિસ્તીર્ણ વેદાગમમયાત્મને
નમો ઽનન્તફલોત્પાદ કલ્પવૃક્ષાય શમ્ભવે ॥

વાઙ્મનઃકાયકર્માણિ વિનિયોજ્ય ત્વયિ પ્રભો
ત્વન્મયીભૂય નિર્દ્વન્દ્વાઃ કચ્ચિત્ સ્યામાપિ કર્હિચિત્ ॥

જગતાં સર્ગસંહાર તત્તદ્ધિતનિયુક્તિષુ
અનન્યાપેક્ષસામર્થ્ય શાલિનિ શૂલિને નમઃ ॥

વ્યતીતગુણયોગસ્ય મુખ્યધ્યેયસ્ય ધૂર્જટેઃ
નામાપિ ધ્યાયતાં ધ્યાનૈઃ કિમ્ અન્યાલમ્બનૈઃ ફલમ્ ॥

નમો નમઃ શિવાયેતિ મન્ત્રસામર્થ્યમ્ આશ્રિતાઃ
શ્લાઘ્યાસ્ તે શામ્ભવીં ભૂતિમ્ ઉપભોક્તું ય ઉદ્યતાઃ ॥