સ્મરદીપિકા · શ્લોક 81-100

ઇત્થં ચ મન્મથોત્પન્ને કેલિં કુર્યાત્ તથૈવ ચ ।
સ્તનયોર્ યુગયોશ્ ચૈવ સનાભિકભગસ્થલે

જઘનોરુનિતમ્બેષુ કામુકો મુહુર્ અર્પયેત્

ભુજયોઃ સ્તનયોશ્ ચૈવ ભગે નાભૌ તથૈવ ચ ।
ષટ્સુ સ્થાનેષુ વિધિના મર્દનં પરિકીર્તિતમ્

કક્ષાકણ્ઠકપોલેષુ નાભૌ શ્રોણ્યાં પયોધરે ।
કર્ણમૂલે તથા સ્કન્ધે ચુમ્બનં દ્વાદશસ્થલે

ગણ્ડૌષ્ઠં ચ તથા વક્ત્રં કક્ષા નાભિર્ ભગસ્ તથા ।
કુચૌ ચ બાહુમૂલં ચ દ્વાદશૈતાનિ ચુમ્બનમ્

ગણ્ડૌ નેત્રે તથા વક્ત્રં કક્ષા નાભિર્ ભગસ્ તથા ।
કુચૌ ચ બાહુમૂલં ચ સ્થાનાન્ય્ એતાનિ ચુમ્બને

અધરૌષ્ઠે ચ સમ્પીડ્ય નાયકો નાયિકાધરમ્ ।
પૂર્ણચન્દ્રનિભં પેયાન્ નાર્યાશ્ ચ સરસં મુખમ્

પયોધરૌષ્ઠજિહ્વાયા દ્વયોર્ એવ કુચાગ્રયોઃ ।
પઞ્ચસ્થાનસ્ય વૈ પાનં કુર્યાત્ કૃશવિચક્ષણઃ

ઓષ્ઠેન ચૌષ્ઠગ્રહણપૂર્વકં કેશકર્ષણમ્ ।
શિરઃપ્રદેશે કૃત્વા તામ્ ઉપવિષ્ટાં ચ કારયેત્

યથા કોકિલશબ્દઃ સ્યાદ્ યથા પારાવતધ્વનિઃ ।
યથા હંસમયૂરાદેઃ કલરાવં તથા ચરેત્

મુષ્ટામુષ્ટિનિતમ્બે ચ કુર્યાચ્ ચૈવ પરસ્પરમ્ ।
ઉપહસ્તેનાબલાયાસ્ તાડયેજ્ જઘનદ્વયે

ભગગર્ભસ્ય મધ્યે તુ નાડિકા ધ્વજરૂપિણી ।
પૂર્ણા કામજલૈર્ નિત્યં વામસ્થા મૃદુપીવરા ।
મર્દિતા ચાઙ્ગુલીભ્યાં તુ જનયેત્ કામજં જલમ્

તત્ર એકવિંશતિપ્રકારઃ ।
તેષાં નામાનિ કાકપદઃ વિપરીતકઃ નાગરિકઃ રતિપાશઃ કેયૂરઃ પ્રિયતોષણં સમપદઃ એકપદઃ ઊર્ધ્વસંપુટઃ સંપુટકઃ મન્મથપ્રિયઃ રતિસુન્દરઃ ઉરુપીડનઃ સ્મરચક્રં નાગપાશકઃ ગગનકઃ વંશદારકઃ કનકક્ષયઃ નાગરઃ કુલિશનામકઃ કામસુન્દર ઇતિ ।
યથાક્રમં તેષાં લક્ષણાન્ય્ અપ્ય્ આહ ।
સ્ત્રીપાદૌ સ્કન્ધયુગ્મસ્થૌ ક્ષિપ્ત્વા ધ્વજં ભગં લઘુ ।
કામયેત્ કામુકો નારીં બન્ધઃ કાકપદો હિ સઃ

પાદમ્ એકં કરે ધૃત્વા દ્વિતીયં સ્કન્ધસંસ્થિતમ્ ।
નારીં કામયતે કામી બન્ધઃ સ્યાદ્ વિપરીતકઃ

ઊરુમૂલોપરિ ન્યસ્ય યોષિદૂરું નરો યદિ ।
ગ્રીવાં ધૃત્વા કરાભ્યાં તુ બન્ધો નાગરિકો મતઃ

પીડયેદ્ ઊરુયુગ્મેન કામુકં યદિ કામિની ।
રતિપાશસ્ તદા ખ્યાતઃ કામિનીનાં મનોહરઃ

સ્ત્રીણાં જઙ્ઘાન્તરાવિષ્ટો ગાઢાલિઙ્ગ્ય ચ સુન્દરીમ્ ।
રમતે વિહ્વલઃ કામી બન્ધઃ કેયૂરસંજ્ઞકઃ

નરીપાદૌ સ્વહસ્તેન હૃદયે ધારયેદ્ યદિ ।
સ્તનાર્પિતકરઃ કામી કામયેત્ પ્રિયતોષણમ્

યોષિત્પાદૌ હૃદિ ન્યસ્ય કરાભ્યાં ધારયેત્ કુચૌ ।
યથેષ્ટં તાડયેદ્ યોનૌ બન્ધઃ સમપદઃ સ્મૃતઃ

પાદમ્ એકં કરે ધૃત્વા દ્વિતીયં સ્કન્ધસંસ્થિતમ્ ।
સ્તનાર્પિતકરઃ કામી બન્ધસ્ ત્વ્ એકપદો હિ સઃ