સ્મરદીપિકા · શ્લોક 162-181

અધ્વક્લાન્તા ઋતુસ્નાતા પ્રથમજ્વરિતા તથા ।
મધુપાનપ્રસન્ના ચ નર્તિતા વિરહી તથા

ષણ્માસગર્ભિણી માસપ્રસૂતા નવરઙ્ગિણી ।
એતા વહન્તિ સુતરાં સ્ત્રિયો ન સુરતોત્સવમ્

આલિઙ્ગનવિહીનં તુ યો વેત્તિ સુરતોત્સવમ્ ।
પશોર્ ઇવ ભવેત્ તસ્ય સિદ્ધિઃ સ્વાર્થૈકસિદ્ધયે

આલિઙ્ગચુમ્બને દંશો ભગસ્તનવિમર્દનમ્ ।
નખદાનં ચ ઘાતશ્ ચ ગ્રહણં કુચકેશયોઃ

કરોતિ ચિન્મયં હાસ્યં જિહ્વાકણ્ઠાધરગ્રહઃ ।
એતદ્ દશપ્રભેદં હિ ક્ષરણસ્ય પ્રકીર્તિતમ્

નારીણાં મોહનં તાવદ્ યાવન્ નોત્કણ્ઠિતા પ્રિયા ।
અન્યથા તત્સુખોચ્છિતિર્ અશીતાર્કકરાદ્ ઇવ

શીત્કારં ચાથ હુંકારં હસિતં ચ ત્રપાક્ષયઃ ।
પ્રસ્વિન્નવદનં ચૈવ વિકારો ઽથ ભગસ્ય ચ

બુદ્ધ્વા ચૈતાનિ લિઙ્ગાનિ યોષિતાં સુરતે બુધઃ ।
તયા તુલ્યસુખં વાઞ્છન્ન્ અનુરાગં સમાચરેત્

પુષ્પં માલ્યં સુવર્ણં ચ રાજતં તરુણીસુખમ્ ।
તરુણીરહિતે કાન્તે વ્યર્થં દેશવિચેષ્ટિતમ્

દૈવાદ્ યદિ કદાચિદ્ ધિ વિચ્છેદઃ ક્રમશસ્ તદા ।
દશમીં મન્મથાવસ્થાં પ્રાપ્નોત્ય્ એવ ન સંશયઃ

અભિલાષશ્ ચિન્તનં ચાનુસ્મૃતિર્ ગુણકીર્તનમ્ ।
ઉન્માદો વિપ્રલાપશ્ ચ ઉદ્વેગો વ્યાધિર્ અષ્ટમઃ

જરતા મરણં ચેતિ દશાવસ્થા મનોભુવઃ ।
પ્રમદાનાં નરાણાં ચ સ્મરોન્મથિતચેતસામ્

લક્ષયિત્વેઙ્ગિતં સ્ત્રીણાં હૃદિ વિજ્ઞઃ પ્રવર્તતે ।
સત્યં વલ્લભતાં યાતિ સુમધ્યાનાં ચ યોષિતામ્

વિજ્ઞઃ સાધ્યાં યત્નસાધ્યાં વચસા ચૈવ સાધયેત્ ।
સાધનં કઠિનં સ્ત્રીણાં દુર્નિરૂપ્યા ભવન્તિ તાઃ

પ્રાકાશીં બાહુમૂલસ્ય કક્ષોદરકુચસ્ય ચ ।
બાલાલિઙ્ગનમોક્ષં ચ કવરીમોચનં તથા

સ્વીયાઙ્ગાવયવસ્યૈવ નિરન્તરવિલોકનમ્ ।
અશ્રુપાતો ઽઙ્ગુલીમર્દશ્લેષ્મોત્સર્ગં મુહુર્મુહુઃ

કાન્તસ્ય રૂપસૌભાગ્યસંક્રીડાગુણસમ્પદામ્ ।
સંકીર્તનં મહોલ્લાસઃ સ્વાઙ્ગભદ્રાવમર્દનમ્

શ્રુતિવર્ત્માઙ્ગુલિક્ષેપઃ સસ્મિતે વદનેક્ષણે ।
એતાન્ય્ અફલસાધ્યાનિ લિઙ્ગાનિ ચ સમુન્નયેત્

વ્રીડયાલંકૃતા કાન્તા ઊષ્માર્તા લોભવર્જિતા ।
સાધ્યા લિઙ્ગર્થવીર્યસ્ તા અસાધ્યા સા પ્રકીર્તિતા

યત્નસાધ્યા સાધુવક્ત્રી ધનહીના પ્રવાસિની ।
સાધ્યેઙ્ગિતવિપર્યસ્તા યત્નસાધ્યા કુટુમ્બિની