સ્કંદ પુરાણ · અધ્યાય 7.92

॥ ઈશ્વર ઉવાચ॥ ॥
તતો ગચ્છેન્મહાદેવિ અઘોરેશ્વરમુત્તમમ્॥
ષષ્ઠં લિંગં સમાખ્યાતં તદ્વક્ત્રં ભૈરવં સ્મૃતમ્

ત્ર્યંબકેશ્વરવાયવ્યે ધનુષાં પંચકે સ્થિતમ્॥
સર્વકામપ્રદં પુણ્યં કલિકલ્મષનાશનમ્॥૨।.
યસ્તં પૂજયતે ભક્ત્યા સ્નાનપૂજાદિભિઃ ક્રમાત્॥
મેરુદાનસ્ય કૃત્સ્નસ્ય સ લભેન્મનુજઃ ફલમ્

દક્ષિણામૂર્તિમાસ્થાય યત્કિંચિત્તત્ર દીયતે॥
અઘોરેશ્વરદેવસ્ય તત્સર્વં ચાક્ષયં ભવેત્

યઃ શ્રાદ્ધં કુરુતે તત્ર અઘોરેશ્વરદક્ષિણે॥
આકલ્પં તૃપ્તિમાયાંતિ પિતરસ્તસ્ય તર્પિતાઃ

કિં શ્રાદ્ધેન ગયાતીર્થે વાજિમેધેન કિં પ્રિયે ॥
તત્ર શ્રાદ્ધેન તત્સર્વં ફલમભ્યધિકં લભેત્

ત્રુટિમાત્રમપિ સ્વર્ણં યાત્રાયાં યઃ પ્રયચ્છતિ ॥
સ સર્વં ફલમાપ્નોતિ મહાદાનસ્ય ભૂરિશઃ

બ્રહ્મકૂર્ચં ચરેદ્યસ્તુ સોમાષ્ટમ્યાં વિધાનતઃ ॥
અઘોરેશ્વરસાંનિધ્યે અઘોરેણાભિમંત્રિતમ્ ॥
ષડબ્દસ્ય મહત્તેન પ્રાયશ્ચિત્તં કૃતં ભવેત્

ઇતિ સંક્ષેપતઃ પ્રોક્તમઘોરેશમહોદયમ્ ॥
માહાત્મ્યં સર્વપાપઘ્નં શ્રુતં સર્વાર્થસાધકમ્

ઇતિ શ્રીસ્કાન્દે મહાપુરાણ એકાશીતિસાહસ્ર્યાં સંહિતાયાં સપ્તમે પ્રભાસખણ્ડે પ્રથમે પ્રભાસક્ષેત્રમાહાત્મ્ય એકાદશ રુદ્રમાહાત્મ્યેઽઘોરેશ્વરમાહાત્મ્યવર્ણનંનામ દ્વિનવતિતમોઽધ્યાયઃ