સ્કંદ પુરાણ · શ્લોક 7.7-3

॥ સૂત ઉવાચ ॥ ॥
એવં તત્ર તદા દેવી શ્રુત્વા માહાત્મ્યમુત્તમમ્ ॥
હર્ષોત્કંઠિતયા વાચા પુનઃ પપ્રચ્છ શંકરમ્

॥ દેવ્યુવાચ ॥ ॥
દેવદેવ જગન્નાથ ભક્તાનુગ્રહકારક ॥
સમસ્તજ્ઞાનસંપન્ન નમસ્તેઽસ્તુ મહેશ્વર

નમોઽસ્તુ વૈ ત્રિપુરપ્રહર્ત્રે મહાત્મને તારકમર્દનાય ॥
નમોઽસ્તુ તે ક્ષીરસમુદ્ર દાયિને શિશોર્મુનીન્દ્રસ્ય સમાહિતસ્ય

નમોઽસ્તુ તે સર્વજગદ્વિધાત્રે સર્વત્ર સર્વાત્મક સર્વકર્ત્રે ॥
નમો ભવાયાસ્તુ નમોઽભવાય નમોઽસ્તુ તે સર્વગતાય નિત્યમ્

॥ ઈશ્વર ઉવાચ ॥ ॥
કિં દેવિ પૃચ્છસેઽદ્યાપિ સર્વં તે કથિતં મયા ॥
સંદિગ્ધમસ્તિ કિંચિચ્ચેત્પુનઃ પૃચ્છસ્વ ભામિનિ

॥ દેવ્યુવાચ ॥ ॥
સોમેશ્વરેતિ યન્નામ કસ્મિન્કાલે બભૂવ તત્ ॥
કિં નામાગ્રેઽભવલ્લિંગં નામ કિં ભવિતાઽધુના

એવં યસ્ય પ્રભાવો વૈ નોક્તઃ પૂર્વં ત્વયા વિભો ॥
અન્યેષાં તીર્થદેવાનાં માહાત્મ્યં વર્ણિતં ત્વયા ॥
ન ત્વીદૃશં તુ કથિતં શ્રીસોમેશસ્ય યાદૃશમ્

॥ ઈશ્વર ઉવાચ ॥ ॥
પૂર્વમેવાહમેવાસં સ્પર્શલિંગસ્વરૂપવાન્ ॥
ન ચ માં તત્ત્વતો વેદ જનઃ કશ્ચિદિહેશ્વરિ

મહાકલ્પે તુ સઞ્જાતે બ્રહ્મણઃ પ્રતિ સંચરે ॥
નામભાવં ભવેદન્યદ્દેવિ લિંગે પુનઃપુનઃ

અતીતં બ્રહ્મણાં ષટ્કં સપ્તમોઽયં પ્રજાપતિઃ ॥
વર્ત્તતે યોઽધુના દેવિ શતાનન્દ ઇતિ શ્રુતઃ ॥

।
અસ્મિન્બ્રહ્મણિ દેવેશિ સંજાતે હ્યષ્ટવાર્ષિકે ॥
તદા કાલાત્સમારભ્ય સોમેશ ઇતિ વિશ્રુતઃ

અતીતેષુ ચ દેવેશિ બ્રહ્મસુપ્તલયાદનુ ॥
બભૂવુર્યાનિ નામાનિ તાનિ ત્વં શૃણુ પાર્વતિ

આદ્યો વિરંચિનામાસીદ્યદા બ્રહ્મા પિતામહઃ ॥
મૃત્યુઞ્જયસ્તદા નામ સોમનાથસ્ય કીર્તિતમ્ ॥

દ્વિતીયોઽભૂદ્યદા બ્રહ્મા પદ્મભૂરિતિ વિશ્રુતઃ ॥
તદા કાલાગ્નિરુદ્રેતિ નામ પ્રોક્તં શુભેંઽબિકે

તૃતીયોઽભૂદ્યદા બ્રહ્મા સ્વયંભૂરિતિ વિશ્રુતઃ ॥
અમૃતેશેતિ દેવસ્ય તદા નામ પ્રકીર્તિતમ્

ચતુર્થોઽભૂદ્યથા બ્રહ્મા પરમેષ્ઠીતિ વિશ્રુતઃ ॥
અનામયેતિ દેવસ્ય તદા નામ સ્મૃતં શુભે

પંચમોઽભૂદ્યદા બ્રહ્મા સુરજ્યેષ્ઠ ઇતિ સ્મૃતઃ॥
કૃત્તિવાસેતિ દેવસ્ય નામ પ્રોક્તં તદામ્બિકે

ષષ્ઠશ્ચાભૂદ્યદા બ્રહ્મા હેમગર્ભ ઇતિ શ્રુતઃ॥
તદા ભૈરવનાથેતિ નામ દેવસ્ય કીર્તિતમ્

અયં યો વર્ત્તતે બ્રહ્મા શતાનંદ ઇતિ સ્મૃતઃ ॥
સોમનાથેતિ દેવસ્ય વર્તતે નામ સાંપ્રતમ્

અતઃ પરં ચતુર્વક્ત્રો બ્રહ્મા યો ભવિતા યદા ॥
પ્રાણનાથેતિ દેવસ્ય તદા નામ ભવિષ્યતિ

અતીતા યે વિધાતારો ભવિષ્યંતિ ચ યેઽધુના॥
તાવત્તદ્વર્ત્તતે નામ યાવદન્યોષ્ટવાર્ષિકઃ ॥
સંધ્યાસંધ્યાંશભેદેન વિષ્ણ્વનંતસનાતનાઃ

એવં નામાનિ દેવસ્ય સંક્ષેપાત્કીર્તિતાનિ મે ॥
વિસ્તરાત્કથિતું નૈવ શક્યંતે કાલગૌરવાત્

॥ દેવ્યુવાચ ॥ ॥
આશ્ચર્યં દેવદેવેશ યત્ત્વયા કથિતં પ્રભો ॥
પૂર્વોક્તાનિ ચ નામાનિ ન સ્મરંતિ ચ મે કથમ્

એતદ્વિસ્તરતો બ્રૂહિ કારણં ચ જગત્પતે ॥
સર્વભૂતહિતાર્થાય મમાનુગ્રહકામ્યયા

॥ ઈશ્વર ઉવાચ ॥ ॥
કલ્પેકલ્પે મહાદેવિ અવતારં કરોષિ યત્ ॥
તેન તે સ્મરણં નાસ્તિ પ્રભાવાત્પ્રકૃતેઃ પ્રિયે

તત્ત્વાવરણમધ્યે તુ તત્રાદ્યા ત્વં પ્રતિષ્ઠિતા ॥
સાઽવતીર્યાંડમધ્યે તુ મયા સાર્દ્ધં વરાનને

અનુગ્રહાર્થં લોકાનાં પ્રાદુર્ભૂતા પુનઃપુનઃ ॥
આદ્યે કલ્પે જગન્માતા જગદ્યોનિર્દ્વિતીયકે

તૃતીયે શાંભવીનામ ચતુર્થે વિશ્વરૂપિણી ॥
પઞ્ચમે નંદિનીનામ ષષ્ઠે ચૈવ ગણાંબિકા

વિભૂતિઃ સપ્તમે કલ્પે સુભૂતિશ્ચાષ્ટમે તદા ॥
આનન્દા નવમે કલ્પે દશમે વામલોચના

એકાદશે વરારોહા દ્વાદશે ચ સુમઙ્ગલા ॥
કલ્પે ત્રયોદશે ચૈવ મહામાયા હ્યુદાહૃતા

તતશ્ચતુર્દશે કલ્પેઽનન્તાનામ પ્રકીર્તિતા ॥
ભૂતમાતા પંચદશે ષોડશે ચોત્તમા સ્મૃતા

તતઃ સપ્તદશે કલ્પે પિતૃકલ્પે તુ વિશ્રુતા ॥
દક્ષસ્ય દુહિતા જાતા સતીનામ્ની મહાપ્રભા

અપમાનાત્તુ દક્ષસ્ય સ્વાં તનૂમત્યજત્પુનઃ ॥
ઉમાં કલાં તુ ચન્દ્રસ્ય પુરાપૂર્ય ચ સંસ્થિતા

તતઃ પ્રવૃત્તે વારાહે કલ્પે ત્વં સુરસુન્દરિ ॥
પુનર્હિમવતારાધ્ય દુહિતા ત્વમતઃ કૃતા

તતો દેવ્યદ્ભુતં તપ્ત્વા તપઃ પરમદુશ્ચરમ્ ॥
ભર્ત્તારં માં પુનઃ પ્રાપ્ય પાર્વતીતિ નિગદ્યસે

કૈલાસનિલયશ્ચાહં ત્વયા સાર્દ્ધં વરાનને ॥
ક્રીડામિ તવ દેવેશિ યાવત્કલ્પાવસાનકમ્

ઇદં ચતુર્ગુણં પ્રાપ્ય દ્વાપરે વિષ્ણુના સહ ॥
મહિષસ્ય વધાર્થાય ઉત્પન્ના કૃષ્ણપિંગલા

કાત્યાયનીતિ દુર્ગેતિ વિવિધૈર્નામપર્યયૈઃ ॥
નવકોટિપ્રભેદેન જાતાસિ વસુધાતલે

યાનિ તે કલ્પનામાનિ પૂર્વમુક્તાનિ સુન્દરિ ॥
તાનિ ત્રયોદશાકલ્પાદુદક્તાત્કથિતાનિ મે

અતીતાનિ ભવિષ્યાણિ વર્ત્તમાનાનિ સુન્દરિ ॥
એવં જ્ઞેયાનિ સર્વાણિ બ્રહ્મકલ્પાવધિ પ્રિયે ॥

॥ દેવ્યુવાચ ॥ ॥
સોમનાથેતિ યન્નામ ત્વયા પૂર્વમુદાહૃતમ્ ॥
તત્કથં નિશ્ચલં નામ મન્યતે ત્રિપુરાંતક

અસંખ્યત્વાચ્ચ ચંદ્રાણાં જન્મનામપ્રભેદતઃ ॥
મન્વન્તરે તુ સંજાતે યુગાનામેકસપ્તતૌ

ચંદ્રસૂર્યાદયો દેવાઃ સંહ્રિયંતે પુનઃપુનઃ ॥
સપ્તર્ષયઃ સુરાઃ શક્રો મનુસ્તત્સૂનવો નૃપાઃ

એકકાલં ચ સૃજ્યંતે સંહ્રિયંતે ચ પૂર્વવત્ ॥
એતન્મે સંશયં દેવ યથાવદ્વક્તુમર્હસિ

॥ ઈશ્વર ઉવાચ ॥ ॥
સાધુ પૃષ્ટં ત્વયા દેવિ રહસ્યં પાપનાશનમ્ ॥
યન્ન કસ્યચિદાખ્યાતં તત્તે વક્ષ્યામ્યશેષતઃ

અયં યો વર્ત્તતે બ્રહ્મા શતાનન્દ ઇતિ શ્રુતઃ॥
તસ્ય ચૈવાષ્ટમે વર્ષે મનુર્યઃ પ્રથમો ભવેત્

તસ્મિન્મન્વન્તરે દેવિ યશ્ચાદૌ રોહિણીપતિઃ ॥
સમુદ્રગર્ભાત્સંજાતઃ સલક્ષ્મીકૌસ્તુભાદિભિઃ

તેન ચારાધિતં લિંગં કાલભૈરવનામતઃ ॥
મહતા તપસા પૂર્વં યુગાનિ ચ ચતુર્દ્દશે

તસ્યાદ્ભુતં તપો દૃષ્ટ્વા તુષ્ટોઽહં તસ્ય સુન્દરિ ॥
વરં વૃણીષ્વેતિ મયા સ ચ પ્રોક્તો નિશાકરઃ

સહોવાચ તદા દેવિ ભક્ત્યા સંસ્તુત્ય માં શુભે

॥ ચંદ્ર ઉવાચ ॥ ॥
યદિ પ્રસન્નો દેવેશ વરાર્હો યદિ વાઽપ્યહમ્ ॥
સોમનાથેતિ તં નામ ભૂયાદ્બ્રહ્માવધિ પ્રભો

યે કેચિદ્ભવિતારોઽન્યે મન્વન્તે શીતરશ્મયઃ ॥
તેષાં ભવતુ દેવેશ દેવોઽયં કુલદેવતા ॥

આરાધયંતુ તે સર્વે ક્ષેત્રેઽસ્મિન્સંસ્થિતા વિભો ॥
સ્વકીયાયુઃપ્રમાણેન બ્રહ્મણઃ પ્રલયાદનુ

સોમનાથેતિ તે નામ બ્રહ્માંડે સચરાચરે ॥
ખ્યાતિં પ્રયાતુ દેવેશ તેજોલિંગ નમોઽસ્તુ તે

॥ ઈશ્વર ઉવાચ ॥ ॥
એવમસ્ત્વિત્યહં પ્રોચ્ય પુનર્લિંગે લયં ગતઃ ॥
એતત્તે કારણં દેવિ પ્રોક્તં સર્વમશેષતઃ

નિઃસન્દિગ્ધં તુ સંક્ષેપાત્પુરા પૃષ્ટં યતસ્ત્વયા ॥
ઉદ્દેશમાત્રં કથિતં શ્રીસોમેશગુણાન્પ્રતિ ॥
સમુદ્રસ્યેવ રત્નાનામચિન્ત્યસ્તસ્ય વિસ્તરઃ

મોહનં તદભક્તાનાં ભક્તાનાં બુદ્ધિવર્દ્ધનમ્ ॥
મૂઢાસ્તે નૈવ પશ્યંતિ સ્વરૂપં મમ મોહિતાઃ

॥ દેવ્યુવાચ ॥ ॥
ઈદૃશં યસ્ય માહાત્મ્યં તેજોલિંગસ્ય શંકર ॥
કુત્ર તિષ્ઠતિ તલ્લિંગં ક્ષેત્રે તસ્મિન્સુરેશ્વર

॥ ઈશ્વર ઉવાચ ॥ ॥
શૃણુ દેવિ પ્રયત્નેન શ્રુત્વા ચૈવાવધારય ॥
પ્રભાસં પરમં દેવિ ક્ષેત્રમેતન્મમ પ્રિયમ્

દેવાનામપિ સંસ્થાનં તચ્ચ દ્વાદશયોજનમ્ ॥
પંચયોજનમાનેન પીઠં તત્ર પ્રકીર્ત્તિતમ્

તન્મધ્યે મદ્ગૃહં દેવિ તચ્ચ ગવ્યૂતિમાત્રકમ્ ॥
સમુદ્રસ્યોત્તરે દેવિ દેવિકામુખસંજ્ઞિતમ્

વજ્રિણ્યાઃ પૂર્વતશ્ચૈવ યાવન્ન્યંકુમતી નદી ॥
ચતુષ્ટયં ચ વિસ્તારાદાયામાત્પંચયોજનમ્

ક્ષેત્રપીઠમિતિ પ્રોક્તમતો ગર્ભગૃહં શૃણુ ॥
સમુદ્રાત્કૌરવી યાવદ્દક્ષિણોત્તરમાનતઃ ॥
પૂર્વપશ્ચિમતો જ્ઞેયં ગોમુખાદાઽઽશ્વમેધકમ્

એતન્મમ ગૃહં દેવિ ન ત્યજામિ કદાચન ॥
તસ્ય મધ્યે સ્થિતં લિંગં યત્ર તત્તે પ્રકીર્તિતમ્

વારુણીં દિશમાશ્રિત્ય સાગરસ્ય ચ સન્નિધૌ ॥
કૃતસ્મરસ્યાપરતો ધન્વન્તરશતત્રયે

લિંગં મહાપ્રભાવં તું સ્વયંભૂતં વ્યવસ્થિતમ્ ॥
તત્ર સંનિહિતો દેવઃ શંકરઃ પરમેશ્વરઃ

એતસ્મિન્નન્તરે દેવિ સોમેશસ્ય સમીપતઃ ॥
ચતુર્દ્દશે વિભાગે તુ ધનુષાં ચ શતદ્વયમ્ ॥

સમંતાન્મંડલાકારા કર્ણિકા સા મમ પ્રિયા ॥
તસ્યાં યે પ્રાણિનઃ સર્વે મૃતાઃ કાલેન પાર્વતિ

કૃમિકીટપતંગાદ્યા જીવા ઉત્તમ મધ્યમાઃ ॥
નિર્દ્ધૂતકલ્મષાઃ સર્વે યાંતિ લોકં મમાપિ તે

ઉત્તરં દક્ષિણં ચાપિ અયનં ન વિચારયેત્ ॥
સર્વસ્તેષાં શુભઃ કાલો યે મૃતાઃ ક્ષેત્રમધ્યતઃ

આદિનાથેન શર્વેણ સર્વપ્રાણિહિતાય વૈ ॥
આદ્યતત્ત્વાન્યથાનીય ક્ષેત્રમેતન્મહાપ્રભમ્ ॥
પ્રભાસિતં મહાદેવિ યત્ર સિદ્ધ્યંતિ માનવાઃ

હન્યમાનોઽપિ યો વિદ્વાન્વસેદ્વિઘ્નશતૈરપિ ॥
કૃતપ્રતિજ્ઞો દેવેશિ યાવજ્જીવં સુરેશ્વરિ

સ ગચ્છેત્પરમં સ્થાનં યત્ર ગત્વા ન શોચતિ॥
તસ્ય ક્ષેત્રસ્ય માહાત્મ્યાત્સ્થાણોશ્ચાદ્ભુતકર્મણઃ

કૃત્વા પાપસહસ્રાણિ પશ્ચાત્સન્તાપમેતિ વૈ ॥
પ્રભાસે તુ વિયુજ્યેત ન સોંઽતકપુરીં વ્રજેત્ ॥

જ્ઞાત્વા કલિયુગં ઘોરં હાહાભૂતમચેતનમ્ ॥
નિયુક્તસ્તત્ર દેવેશિ રક્ષાર્થં વિઘ્નનાયકઃ

યે તુ બ્રાહ્મણવિદ્વિષ્ટાઃ શિવભક્તિવિતંડકાઃ ॥
બ્રહ્મઘ્નાશ્ચ કૃતઘ્નાશ્ચ તથા નૈષ્કૃતિકાશ્ચ યે

લોકદ્વિષ્ટા ગુરુદ્વિષ્ટાસ્તીર્થાયતનકણ્ટકાઃ ॥
સર્વપાપરતાશ્ચૈવ યે ચાન્યે તુ વિકુત્સિતાઃ

રક્ષણાર્થં હ વૈ તેષાં નિયુક્તો વિઘ્નનાયકઃ ॥
કાલાગ્નિરુદ્રપાર્શ્વે તુ રુદ્રતુલ્યપરાક્રમઃ

ક્ષેત્રં રક્ષતિ દેવેશિ પાપિષ્ઠાનાં નિયામકઃ ॥
મ્રિયંતે યદિ બ્રહ્મઘ્નાસ્તથા પાતકિનો નરાઃ

ક્ષેત્રે ચાસ્મિન્વરારોહે તેષાં દેવિ ગતિં શૃણુ ॥
દશવર્ષસહસ્રાણિ દિવ્યાનિ કમલેક્ષણે

દાસી પુત્રાશ્ચ જાયન્તે તદંતે બ્રહ્મરાક્ષસાઃ ॥
તતઃ પાપક્ષયે દેવિ પુનર્યાંતિ વિયોનિતામ્

તસ્માત્સર્વપ્રયત્નેન પાપં તત્ર ન કારયેત્ ॥
અન્યત્રાઽઽવર્તિતં પાપં ક્ષેત્રે ચાસ્મિન્વિનશ્યતિ

અસ્મિન્પુનઃ કૃતં પાપં પૈશાચનરકાવહમ્ ॥
ભક્તાનુકંપી ભગવાંસ્તિર્યગ્યોનિગતેષ્વપિ

દદાતિ પરમં સ્થાનં ન તુ બ્રહ્મદ્વિષાં પ્રિયે॥
યે ચ ધ્યાનં સમાસાદ્ય યુક્તાત્માનઃ સમાહિતાઃ

સંનિયમ્યેન્દ્રિયગ્રામં જપંતિ શતરુદ્રિયમ્॥
પ્રભાસે તુ સ્થિતા દેવિ તે કૃતાર્થા ન સંશયઃ

યદિ ગચ્છેન્નરઃ કશ્ચિત્પ્રભાસં ક્ષેત્રમુત્તમમ્ ॥
તમુપાયં પ્રકુર્વીત નિર્ગચ્છેન્ન પુનર્યથા

એતદ્ગોપ્યં વરારોહે ન દેયં યસ્ય કસ્યચિત્॥
ગોપનીયમિદં શાસ્ત્રં યથા પ્રાણાઃ સ્વકાઃ પ્રિયે

યેનેદં વિહિતં શાસ્ત્રં પ્રભાસક્ષેત્રદીપકમ્॥
સ શિવશ્ચૈવ વિજ્ઞેયો માનુષીં પ્રકૃતિં સ્થિતઃ

તસ્યવિગ્રહસંસ્થોઽહં સદા તિષ્ઠામિ પાર્વતિ॥
વંદિતઃ પૂજિતો ધ્યાતો યથાહં નાત્ર સંશયઃ

કલૌ ચ દુર્લ્લભં દેવિ પ્રભાસક્ષેત્રમુત્તમમ્ ॥
ઇદાનીં તવ સ્નેહેન વિશેષં કથયામિ વૈ ॥
સત્યંસત્યં પુનઃ સત્યં ત્રિઃસત્યં સુરસુન્દરિ ॥

યાનિ લિંગાનિ ભૂર્લોકે સોમેશસ્તેષુ મે પ્રિયઃ ॥
અસ્મિઁલ્લિંગે ગુણા યે તુ તે દેવિ વિદિતા મમ

અહમેવ વિજાનામિ નાન્યો વેદ કથંચન ॥
અન્યેષુ ચૈવ લિંગેષુ અહં પૂજ્યઃ સુરાસુરૈઃ

લિંગં ચેમં પુનર્દેવિ પૂજયામો વયં સ્વયમ્

યસ્મિન્કાલે ન વૈ બ્રહ્મા ન ભૂમિર્ન દિવાકરઃ ॥
સર્વં ચૈવ જગન્નાથ તસ્મિન્કાલે યશસ્વિનિ

ઇમં લિંગં પરં ચૈવ બ્રહ્મણઃ પ્રલયે તદા ॥
ભાવિનીં વૃત્તિમાસ્થાય ઇદં સ્થાનં તુ રક્ષતિ

દશકોટ્યસ્તુ લિંગાનાં ગંગાદ્વારાદ્વરાનને ॥
આગત્ય તાનિ મધ્યાહ્ને લિંગેઽસ્મિન્યાંતિ સંલયમ્

પૃથિવ્યાં યાનિ તીર્થાનિ ગગનસ્થાનિ યાનિ તુ ॥
સ્નાનાર્થમસ્ય લિંગસ્ય સમાગચ્છંતિ સર્વદા

ધન્યાસ્તુ ખલુ તે મર્ત્ત્યાઃ પ્રભાસે સંવ્યવસ્થિતાઃ ॥
સોમેશ્વરં યે દ્રક્ષ્યંતિ સંસારભયમોચનમ્

દેવિ સોમેશ્વરં લિંગં યે સ્મરિષ્યંતિ ભાવિતાઃ ॥
સર્વપાપક્ષયસ્તેષાં ભવિષ્યતિ ન સંશયઃ

એતત્સ્મૃતં પ્રિયતમં મમ દેવિ નિત્યં ક્ષેત્રં પવિત્રમૃષિસિદ્ધગણાભિરમ્યમ્ ॥
અસ્મિન્મૃતાઃ સકલજીવમૃતોઽપિ દેવિ સ્વર્ગાત્પરં સમુપયાંતિ ન સંશયોઽત્ર

યં દેવા ન વિજાનંતિ બ્રહ્મવિષ્ણુપુરોગમાઃ ॥
ન સાંખ્યેન ન યોગેન નૈવ પાશુપતેન ચ

કૈવલ્યં નિષ્કલં યત્ત- દસ્મિઁલ્લિંગે તુ લભ્યતે ॥
તાવદ્ભ્રમંતિ સંસારે દેવાદ્યાસ્તુ યશસ્વિનિ

યાવત્સોમેશ્વરં દેવં ન વિંદંતિ ત્રિલોચનમ્ ॥
ક્ષેત્રં પ્રભાસમિત્યુક્તં ક્ષેત્રજ્ઞોઽહં ન સંશયઃ

એતં તવોક્તં નનુ બોધનાય સોમેશ્વરસ્યૈવ મહાપ્રભાવમ્ ॥
યે વૈ પઠિષ્યંતિ નરા નિતાંતં યાસ્યંતિ તે તત્પદમિંદુમૌલેઃ ॥

સોમેશ્વરં દેવવરં મનુષ્યા યે ભક્તિમંતઃ શરણં પ્રપન્નાઃ ॥
તે ઘોરરૂપે ચ ભયાવહે ચ સંસારચક્રે ન પુનર્ભ્રમંતિ

યે દક્ષિણા મૂર્ત્તિમુપાશ્રિતાઃ સ્યુર્જપંતિ નિત્યં શતરુદ્રિયં દ્વિજાઃ ॥
તેઽસ્મિન્ભવે નૈવ પુનર્ભવંતિ સંસારપારં પરમં ગતા વૈ

ઉદ્દેશમાત્રં કથિતો મયા તે શ્રીસોમનાથસ્ય કૃતૈકદેશઃ ॥
અબ્દૈરનેકૈર્બહુભિર્યુગૈર્વા ન શક્યમેકેન મુખેન વક્તુમ્

ઇતિ શ્રીસ્કાન્દે મહાપુરાણ એકાશીતિ સાહસ્ર્યાં સંહિતાયાં સપ્તમે પ્રભાસખણ્ડે પ્રથમે પ્રભાસક્ષેત્રમાહાત્મ્યે શ્રીસોમનાથપ્રાદુર્ભાવવર્ણનંનામ સપ્તમોઽધ્યાયઃ