સ્કંદ પુરાણ · શ્લોક 7.4-2

॥ શ્રીપ્રહ્લાદ ઉવાચ ॥
એવં સંપૂજિતસ્તેન હરિણા બ્રાહ્મણોત્તમઃ ॥
ઉવાચ પરિસન્તુષ્ટો વરં બ્રૂહીતિ કેશવમ્

॥ શ્રીકૃષ્ણ ઉવાચ ॥ ॥
યદિ તુષ્ટોઽસિ ભગવન્યદિ દેયો વરો મમ ॥
સ્થાતવ્યમત્ર ભવતા ન ત્યક્તવ્યં કદાચન

॥ દુર્વાસા ઉવાચ ॥ ॥
યદિ તિષ્ઠામ્યહં કૃષ્ણ તથા ત્વમપિ કેશવ ॥
તિષ્ઠસ્વ ષોડશકલો નિત્યં મદ્વચનેન હિ

॥ શ્રીકૃષ્ણ ઉવાચ ॥ ॥
યેઽત્ર પશ્યંતિ ભક્ત્યા ત્વાં માં ચાપિ દ્વિજસત્તમ ॥
કિં દાસ્યસિ ફલં તેષાં ભાવિનાં ભગવન્વદ

॥ દુર્વાસા ઉવાચ ॥ ॥
યઃ સ્નાત્વા સંગમે કૃષ્ણ ગોમત્યાઃ સાગરસ્ય ચ ॥
ત્વાં માં સમર્ચતિ નરઃ સર્વપાપૈઃ સમુચ્યતે

તથાન્યચ્છૃણુ કૃષ્ણાત્ર સ્નાત્વા દાસ્યતિ યદ્ધનમ્ ॥
મમ દત્તસ્ય દેવેશ પ્રાપ્નુયાત્ષોડશોત્તરમ્

॥ શ્રીકૃષ્ણ ઉવાચ ॥
યો નરઃ પૂજયિત્વા ત્વાં પૂજયિષ્યતિ મામિહ ॥
તસ્ય મુક્તિં પ્રદાસ્યામિ યા સુરૈરપિ દુર્લ્લભા

॥ પ્રહ્લાદ ઉવાચ ॥ ॥
પરસ્પરં વરૌ દત્ત્વા કૃષ્ણદુર્વાસસૌ મુદા॥
તતઃ પ્રભૃતિ વિપ્રેન્દ્રાસ્તસ્મિન્સ્થાને હ્યતિષ્ઠતામ્॥
વરદાનમિતિ પ્રોક્તં તત્તીર્થં સર્વકામદમ્

વરદાને નરઃ સ્નાતો ગોસહસ્રફલં લભેત્ ॥
વિષ્ણુદુર્વાસસોર્યત્ર વરદાનમભૂત્પુરા

તદાપ્રભૃતિ વિપ્રેન્દ્રાસ્તિષ્ઠતે દ્વારકાં હરિઃ ॥
દુર્વાસસા ગિરા બદ્ધો ન જહાતિ કદાચન

યત્ર ત્રૈવિક્રમી મૂર્તિર્વહતે યત્ર ગોમતી ॥
નરા મુક્તિં પ્રયાસ્યંતિ ચક્રતીર્થેન સંગતાઃ

કલેવરં પરિત્યક્તં પ્રભાસે હરિણા યદા ॥
કલાભિઃ સહિતં તેજસ્તસ્યાં મૂર્તૌ નિવેશિતમ્

તસ્માત્કલિયુગે વિપ્રા નાન્યત્ર પ્રાપ્યતે હરિઃ ॥
યદિ કાર્ય્યં હિ કૃષ્ણેન તત્ર ગચ્છત મા ચિરમ્

॥ ઋષય ઊચુઃ ॥ ॥
સાધુ ભાગવતશ્રેષ્ઠ સાધુ માર્ગપ્રદર્શક ॥
યત્ત્વયા હિ પરિજ્ઞાતં તન્ન જાનાતિ કશ્ચન

કિં ફલં ગમને તસ્યાં કિં ફલં કૃષ્ણદર્શને ॥
કાનિ તીર્થાનિ તત્રૈવ કે દેવાસ્તદ્વદસ્વ નઃ

કસ્મિન્માસે તિથૌ કસ્યાં કસ્મિન્પર્વણિ માનવૈઃ ॥
ગન્તવ્યં કાનિ દેયાનિ દાનાનિ દનુજર્ષભ

॥સૂત ઉવાચ ॥ ॥
ઇતિ પૃષ્ટસ્તદા તૈસ્તુ મહાભાગવતોઽસુરઃ ॥
કથયામાસ વિપ્રેભ્યો ભગવદ્ભક્તિસંયુતઃ

॥ પ્રહ્લાદ ઉવાચ ॥ ॥
ભો ભૂમિદેવાઃ શૃણુત પરં ગુહ્યં સનાતનમ્ ॥
યત્કસ્યચિન્ન ચાખ્યાતં તદ્વદામિ સુવિસ્તરાત્

યદા મતિં ચ કુરુતે દ્વારકાગમનં પ્રતિ ॥
તદા નરકનિર્મુક્તા ગાયન્તિ પિતરો દિવિ

યાવત્પદાનિ કૃષ્ણસ્ય માર્ગે ગચ્છતિ માનવઃ ॥
પદેપદેઽશ્વમેધસ્ય યજ્ઞસ્ય લભતે ફલમ્

યાત્રાર્થં દેવદેવસ્ય યઃ પ્રેરયતિ ચાપરાન્ ॥
માનવાન્નાત્ર સન્દેહો લભતે વૈષ્ણવં પદમ્

દ્વારકાં ગચ્છમાનસ્ય યો દદાતિ પ્રતિશ્રયમ્ ॥
તથૈવ મધુરાં વાચં નન્દતે ક્રીડતે હિ સઃ

અધ્વનિ શ્રાંતદેહસ્ય વાહનં યઃ પ્રયચ્છતિ ॥
હંસયુક્તેન સ નરો વિમાનેન દિવં વ્રજેત્

યાત્રાયાં ગચ્છમાનસ્ય મધ્યાહ્ને ક્ષુધિતસ્ય ચ ॥
અન્નં દદાતિ યો ભક્ત્યા શૃણુ તસ્યાપિ યદ્ભવેત્

ગયાશ્રાદ્ધેન યત્પુણ્યં લભતે માનવો ભુવિ ॥
અન્નદાનેન તત્પુણ્યં પિતૄણાં તૃપ્તિરક્ષયા

ઉપાનહૌ તુ યો દદ્યાદ્દ્વારકાં પ્રતિ ગચ્છતામ્॥
કૃષ્ણપ્રસાદાત્સ નરો ગજસ્કન્ધેન ગચ્છતિ ॥

વિઘ્નમાચરતે યસ્તુ દ્વારકાં પ્રતિ ગચ્છતામ્॥
નરકે મજ્જતે મૂઢઃ કલ્પમાત્રં તુ રૌરવે

માર્ગસ્થિતસ્ય યો ધન્યઃ પ્રયચ્છતિ કમણ્ડલુમ્॥
પ્રપાદાનસહસ્રસ્ય ફલમાપ્નોતિ માનવઃ

યાત્રાયાં ગચ્છમાનસ્ય પાદભ્યંગં દદાતિ યઃ॥
પાદપ્રક્ષાલનં ચૈવ સર્વાન્કામાનવાપ્નુયાત્

ગાથાં શૃણોતિ યો વિષ્ણોર્ગીતં ચ ગાયતઃ પથિ ॥
દાનં દદાતિ વિપ્રેન્દ્રાસ્તસ્માદ્ધન્યતરો ન હિ

કૈલાસશિખરાવાસં શ્વેતાભ્રમિવ નિર્મલમ્ ॥
પ્રાસાદં કૃષ્ણદેવસ્ય યઃ પશ્યતિ નરોત્તમઃ

દૂરાદ્ધેમમયં દૃષ્ટ્વા કલશં ધ્વજસંયુતમ્॥
વાહનં સંપરિત્યજ્ય લુઠતે ધરણીં ગતઃ

પઞ્ચસૂનાકૃતં પાપં તથાઽધર્મકૃતં ચ યત્ ॥
કૃમિકીટપતંગાશ્ચ નિહતાઃ પથિ ગચ્છતા ॥
પરાન્નં પરપાનીયમસ્પૃશ્ય સ્પર્શસંગમમ્ ॥
તત્સર્વં નાશમાપ્નોતિ ભગવત્કેતુદર્શનાત્

પઠેન્નામસહસ્રં તુ સ્તવરાજમથાપિ વા ॥
ગજેન્દ્રમોક્ષણં ચૈવ પથિ ગચ્છઞ્છનૈઃ શનૈઃ

ગાયમાનો ભગવતઃ પ્રાદુર્ભાવાનનેકધા ॥
નૃત્યદ્ભિર્હર્ષસંયુક્તૈર્હૃષ્યમાણઃ પુનઃપુનઃ ॥
સ્વયં નૃત્યન્હર્ષયુક્તો ભક્તો ગચ્છેદ્ધરેઃ પુરમ્

વિષ્ણોઃ ક્રીડાકરં સ્થાનં ભુક્તિમુક્તિપ્રદાયકમ્ ॥
યસ્મિન્દૃષ્ટે કલૌ નૄણાં મુક્તિરેવોપજાયતે

॥ પ્રહ્લાદ ઉવાચ ॥ ॥
પૂર્વં હિ દેવરાજેન બૃહસ્પતિરુદારધીઃ ॥
પ્રણમ્ય પરયા ભક્ત્યા પૃષ્ટશ્ચ સ મહામતિઃ

॥ ઇન્દ્ર ઉવાચ ॥ ॥
દ્વારકાયાશ્ચ માહાત્મ્યં કથયસ્વ પ્રસાદતઃ ॥
ચતુર્યુગં યથાભાગૈર્ધર્મવૃદ્ધિં જનો લભેત્

એતચ્છ્રુત્વા મહેન્દ્રસ્ય વચનં મુનિસત્તમાઃ ॥
બૃહસ્પતિરુવાચૈનં મહેન્દ્રં દેવ સંવૃતમ્

॥ બૃહસ્પતિરુવાચ ॥ ॥
કૃતં ત્રેતા દ્વાપરં ચ કલિશ્ચ સુરસત્તમ ॥
ચતુર્યુગમિદં પ્રોક્તં તત્ત્વતો મુનિસત્તમૈઃ

કૃતે ધર્મશ્ચતુષ્પાદો વેદાદિફલમેવ ચ ॥
તીર્થં દાનં તપો વિદ્યા ધ્યાનમાયુરરોગતા

પાદહીનં સર્વમેતદ્યુગં ત્રેતાભિધં પ્રભો ॥
પાદદ્વયં દ્વાપરે તુ સર્વસ્યૈતસ્ય વાસવ

પાદેનૈકેન તત્સર્વં વિભાગે પ્રથમે કલૌ ॥
ઊર્ધ્વં વિનાશઃ સર્વસ્ય ભવિષ્યતિ ન સંશયઃ

મન્ત્રાસ્તીર્થાનિ યજ્ઞાશ્ચ તપો દૈવાદિકં તથા ॥
પ્રગચ્છંતિ સમુચ્છેદં વેદાઃ શાસ્ત્રાણિ ચૈવ હિ

મ્લેચ્છપ્રાયાશ્ચ ભૂપાલા ભવિષ્યન્ત્યમરાધિપ॥
લોકઃ કરિષ્યતે નિન્દાં સાધૂનાં વ્રતચારિણામ્

॥ પ્રહ્લાદ ઉવાચ ॥ ॥
શ્રુત્વા બૃહસ્પતેર્વાક્યમેતત્તીર્થસ્ય ભો દ્વિજાઃ ॥
પ્રકંપિતાઃ સુરાઃ સર્વે મ્લેચ્છ સંસર્ગજાદ્ભયાત્

બૃહસ્પતિં સુરગુરું પપ્રચ્છુર્વિનયાન્વિતાઃ ॥
મ્લેચ્છસંસર્ગજો દોષો ગંગયાપિ ન પૂયતે

કથયસ્વ પ્રસાદેન સ્થાનં કલિવિવર્જિતમ્ ॥
યત્ર ગત્વા નિવત્સ્યામો યાસ્યામો નિર્વૃતિં પરામ્

યેન દુઃખવિનિર્મુક્તા ભવિષ્યામો ગતવ્યથાઃ ॥
કૃપયા સુમુખો ભૂત્વા બ્રૂહિ તીર્થં હિતાય નઃ

॥ પ્રહ્લાદ ઉવાચ ॥ ॥
એતચ્છ્રુત્વા સુરેન્દ્રસ્ય વાક્યમંગિરસાં વરઃ ॥
ચિરં ધ્યાત્વા જગાદેદં વાક્યં દેવપુરોહિતઃ ॥

॥ બૃહસ્પતિરુવાચ ॥ ॥
પઞ્ચક્રોશપ્રમાણં હિ તીર્થં તીર્થવરોત્તમમ્॥
દ્વારકાનામ વિખ્યાતં કલિદોષવિવર્જિતમ્॥

વિષ્ણુના નિર્મિતં સ્થાનં લોકસ્ય ગતિદાયકમ્ ॥
મુક્તિદં કલિકાલે તુ જ્ઞાનહીનજનસ્ય ચ

ઊષરં કર્મણાં ક્ષેત્રં પુણ્યં પાપવિનાશનમ્॥
ન પ્રરોહંતિ પાપાનિ પુનર્નષ્ટાનિ તત્ર વૈ

તિસ્રઃ કોટયોઽર્ધકોટી ચ તીર્થાનીહ મહીતલે

એવં તીર્થયુતા તત્ર દ્વારકા મુક્તિદાયકા ॥
સેવનીયા પ્રયત્નેન પ્રાપ્ય માનુષ્યમુત્તમમ્

॥ પ્રહ્લાદ ઉવાચ ॥ ॥
બૃહસ્પતેર્વચઃ શ્રુત્વા શતક્રતુરથાઽબ્રવીત્ ॥
વાચસ્પતે મમ ઇહિ દ્વારવત્યા મહોદયમ્॥
ગમને કિં ફલં પ્રોક્તં કૃષ્ણદેવસ્ય દર્શને

અન્યાનિ તત્ર તીર્થાનિ મુખ્યાનિ વદ મે ગુરો ॥
યથાભિષેકે ગોમત્યાઃ ફલં યદપિ સંગમે

। ॥
॥ બૃહસ્પતિરુવાચ ॥ ॥
શ્રૂયતાં તાત વક્ષ્યામિ માહાત્મ્યં દ્વારકોદ્ભવમ્ ॥
મનુષ્યરૂપો ભગવાન્યત્ર ક્રીડતિ કેશવઃ

નારાયણઃ સ ઈશાનો ધ્યેયશ્ચાદૌ જગન્મયઃ ॥
સ એવ દેવતામુખ્યઃ પુરીં દ્વારવતીં સ્થિતઃ

એકૈકસ્મિન્પદે દત્તે પુરીં દ્વારવતીં પ્રતિ ॥
પુણ્યં ક્રતુસહસ્રેણ કલૌ ભવતિ દેહિનામ્

કલૌ કૃષ્ણપુરીં રમ્યાં યે ગચ્છંતિ નરોત્તમાઃ ॥
કુલકોટિશતૈર્યુક્તાસ્તે ગચ્છન્તિ હરેઃ પદમ્

યે ધ્યાયંતિ મનોવૃત્ત્યા ગમનં દ્વારકાં પ્રતિ ॥
તેષાં વિલીયતે પાપં પૂર્વજન્માયુતૈઃ કૃતમ્

કૃષ્ણસ્ય દર્શને બુદ્ધિર્જાયતે યસ્ય દેહિનઃ ॥
વક્ત્રાવલોકનાત્તસ્ય પાપં યાતિ સહસ્રધા

યે ગતા દ્વારકાયાં ચ યે મૃતાઃ કૃષ્ણસન્નિધૌ ॥
ન તેષાં પુનરાવૃત્તિર્યાવદાભૂતસંપ્લવમ્

સુલભા મથુરા કાશી હ્યવન્તી ચ તથા સુરાઃ ॥
અયોધ્યા સુલભા લોકે દુર્લભા દ્વારકા કલૌ

ગત્વા કૃષ્ણપુરીં રમ્યાં ષણ્માસાત્કૃષ્ણસંનિધૌ॥
જીવન્મુક્તાસ્તુ તે જ્ઞેયાઃ સત્યમેતત્સુરોત્તમ

કૃષ્ણક્રીડાકરં સ્થાનં વાઞ્છન્તિ મનસા પ્રિયે ॥
તેષાં હૃદિ સ્થિતં પાપં ક્ષાલયેત્પ્રેતનાયકઃ

અત્યુગ્રાણ્યપિ પાપાનિ તાવત્તિષ્ઠન્તિ વિગ્રહે ॥
યાવન્ન ગચ્છતિ નરઃ કલૌ દ્વારવતીં પ્રતિ

પુણ્યસંખ્યા ચ તીર્થાનાં બ્રહ્મણા વિહિતા પુરા ॥
દાનાધ્યયન સંજ્ઞાનાં મુક્ત્વા દ્વારવતીં કલૌ

ચક્રતીર્થે તુ યો ગચ્છેત્પ્રસંગેનાપિ માનવઃ ॥
કુલૈકવિંશતિયુતઃ સ ગચ્છેત્પરમં પદમ્

લોભેનાઽપ્યપરાધેન દમ્ભેન કપટેન વા ॥
ચક્રતીર્થં ચ યો ગચ્છેન્ન પુનર્વિશતે ભવમ્

પ્રયાગે હ્યસ્થિપાતેન યત્ફલં પરિકીર્તિતમ્ ॥
તદેવ શતસાહસ્રં ચક્રતીર્થાસ્થિપાતનાત્

પૃથિવ્યાં ચૈવ તત્તીર્થં પરમં પરિકીર્તિતમ્ ॥
ચક્રતીર્થમિતિ ખ્યાતં બ્રહ્મહત્યાવિનાશનમ્

યે યે કુલે ભવિષ્યંતિ તત્પૂર્વં માનવાઃ ક્ષિતૌ ॥
સર્વે વિષ્ણુપુરં યાંતિ ચક્રતીર્થાસ્થિપાતનાત્

કિં જાતૈર્બહુભિઃ પુત્રૈર્ગણનાપૂરકાત્મકૈઃ ॥
વરમેકો ભવેત્પુત્રશ્ચક્રતીર્થં તુ યો વ્રજેત્

તપસા કિં પ્રતપ્તેન દાનેનાધ્યયનેન કિમ્ ॥
સર્વાવસ્થોઽપિ મુચ્યેત ગતઃ કૃષ્ણપુરીં યદિ

કલિકાલ કૃતૈર્દોષૈરત્યુગ્રૈરપિ માનવઃ ॥
કલૌ કૃષ્ણમુખં દૃષ્ટ્વા લિપ્યતે ન કદાચન

દાનં ચાધ્યયનં શૌચં કારણં ન હિ પુત્રક ॥
હીનવર્ણોઽપિ પાપાત્મા ગતઃ કૃષ્ણપુરીં યદિ

વારાણસ્યાં કુરુક્ષેત્રે નર્મદાયાં ચ યત્ફલમ્ ॥
તત્ફલં નિમિષાર્ધેન દ્વારવત્યાં દિનેદિને

ધન્યાનામપિ ધન્યાસ્તે દેવાનામપિ દેવતાઃ ॥
કૃષ્ણોપરિ મતિર્યેષાં હીયતે ન કદાચન

શ્રવણદ્વાદશીયોગે ગોમત્યુદધિસંગમે ॥
સ્નાત્વા કૃષ્ણસુતં દૃષ્ટ્વા લિપ્યતે નૈવ સ ક્વચિત્

યસ્ય કસ્યાપિ માસસ્ય દ્વાદશી પ્રાપ્ય માનવઃ ॥
કૃષ્ણક્રીડાપુરીં દૃષ્ટ્વા મુક્તઃ સંસારગહ્વરાત્

યેષાં કૃષ્ણાલયે પ્રાણા ગતાઃ સુરપતે કલૌ ॥
સ્વર્ગાન્ન તેષામાવૃત્તિઃ કલ્પકોટિશતૈરપિ

વિજ્ઞેયા માનુષા વત્સ ગર્ભસ્થાસ્તે મહીતલે ॥
દ્વારવત્યાં ન યૈર્દેવો દૃષ્ટઃ કંસનિષૂદનઃ

દુર્લભો દ્વારકાવાસો દુર્લભં કૃષ્ણદર્શનમ્ ॥
દુર્લભં ગોમતીસ્નાનં દુર્લભો રુક્મિણીપતિઃ

તપઃ પરં કૃતયુગે ત્રેતાયાં જ્ઞાનમુચ્યતે ॥
દ્વાપરે તુ પરો યજ્ઞઃ કલૌ કેશવકીર્તનમ્

હેમભારસહસ્રૈસ્તુ દત્તૈર્યત્ફલમાપ્યતે ॥
દૃષ્ટ્વા તત્કોટિ ગુણિતં હરેઃ સર્વપ્રદં મુખમ્

દ્વારકાયાં ચ યદ્દત્તં શંખોદ્ધારે તથૈવ ચ ॥
પિંડારકે મહાતીર્થે દત્તં ચૈવાક્ષયં ભવેત્

ગોમહિષ્યાદિ યદ્દત્તં સુવર્ણવસનાનિ ચ ॥
વૃષો ભૂમિગ્રહો રૂપ્યં કન્યાદાનં તથૈવ ચ

યચ્ચાન્યદપિ દેવેન્દ્ર ત્રિષુ સ્થાનેષુ યચ્છતિ ॥
તન્મુક્તિકારકં પ્રોક્તં પિતૄણામાત્મનસ્તથા

ઊષરં હિ યતો લોકે ક્ષેત્રમેતત્પ્રકીર્તિતમ્ ॥
અતો મુક્તિકરં સર્વં દાનં ચોક્તં મહર્ષિભિઃ

યત્કિંચિત્કુરુતે તત્ર દાનં ક્રીડાવગાહનમ્ ॥
તદનન્તફલં પ્રાહ ભગવાન્મધુસૂદનઃ

પ્રેતત્વં નૈવ તસ્યાસ્તિ ન યામ્યા નારકી વ્યથા ॥
યેન દ્વારવતીં ગત્વા કૃતં કૃષ્ણાઽવલોકનમ્

વારિમાત્રેણ ગોમત્યાં પિણ્ડદાને કૃતે કલૌ ॥
પિતૄણાં જાયતે તૃપ્તિર્યાવદાભૂતસંપ્લવમ્

નિત્યં કૃષ્ણપુરીં રમ્યાં યે સ્મરન્તિ ગૃહસ્થિતાઃ ॥
નમસ્યાઃ સર્વલોકાનાં દેવાનાં ચ સુરોત્તમ

બ્રહ્મજ્ઞાનં ગયાશ્રાદ્ધં મરણં ગોગ્રહેષુ ચ ॥
વાસઃ પુંસાં દ્વારકાયાં મુક્તિરેષા ચતુર્વિધા

બ્રહ્મજ્ઞાનેન મુચ્યન્તે પ્રયાગે મરણેન વા ॥
અથવા સ્નાનમાત્રેણ ગોમત્યાં કૃષ્ણસંનિધૌ

કૃતાર્થઃ કૃતપુણ્યોઽહં બ્રવીત્યેવં મહોદધિઃ ॥
પવિત્રિતં ચ મદ્ગાત્રં ગોમતીવારિસંપ્લવાત્

અત્યુગ્રાણ્યપિ પાપાનિ તાવત્તિષ્ઠંતિ વિગ્રહે ॥
યાવત્સ્નાનં ન ગોમત્યાં વારિણા પાપહારિણા

ચક્રતીર્થે નરઃ સ્નાત્વા ગોમત્યાં રુક્મિણીહ્રદે ॥
દૃષ્ટ્વા કૃષ્ણમુખં રમ્યં કુલાનાં તારયેચ્છતમ્

કૃષ્ણં ચ યે દ્વારવતીં મનુષ્યાઃ સ્મરંતિ નિત્યં હરિભક્તિયુક્તાઃ ॥
વિધૂતપાપાઃ કિલ સંભવાંતે ગચ્છંતિ લોકં પરમં મુરારેઃ

અધૌતપાદઃ પ્રથમં નમસ્કુર્યાદ્ગણેશ્વરમ્ ॥
સર્વવિઘ્રવિનાશશ્ચ જાયતે નાત્ર સંશયઃ

નીલોત્પલદલશ્યામં કૃષ્ણં દેવકિનન્દનમ્ ॥
દણ્ડવત્પ્રણમેત્પ્રીત્યા પ્રણમેદગ્રજં પુનઃ

બાલ્યે ચ યત્કૃતં પાપં કૌમારે યૌવને તથા ॥
દર્શનાત્કૃષ્ણદેવસ્ય તન્નશ્યેન્નાત્ર સંશયઃ

વાણ્યાઽથ મનસા યચ્ચ કર્મણા સમુપાર્જિતમ્ ॥
પાપં જન્મસહસ્રેણ તન્નશ્યેન્નાત્ર સંશયઃ

હેમભારસહસ્રૈસ્તુ દત્તૈર્યત્ફલમાપ્યતે ॥
તત્ફલં કોટિગુણિતં કૃષ્ણવક્ત્રાવલોકનાત્

નમસ્કૃત્ય ચ દેવેશં પુણ્ડરીકાક્ષમચ્યુતમ્ ॥
દુર્વાસસં મહેશાનં દ્વારકાપરિરક્ષકમ્

પ્રણમ્ય પરયા ભક્ત્યા વૈનતેયસમન્વિતમ્ ।ઽ।
દ્વારમાગત્ય ચ પુનઃ સ્વર્ગદ્વારોપમં શુભમ્

વિશ્રમ્ય ચ મુહૂર્ત્તાર્દ્ધં સુહૃદ્ભિર્બાન્ધવૈર્વૃતઃ ॥
તત્રાશ્રિતાન્સમાહૂય બ્રાહ્મણાન્મન્ત્રકોવિદાન્ ॥
પૂજાદ્રવ્યં સમાનીય તતસ્તીર્થં વ્રજેદ્બુધઃ

ઇતિ શ્રીસ્કાન્દે મહાપુરાણ એકાશીતિસાહસ્ર્યાં સંહિતાયાં સપ્તમે પ્રભાસખણ્ડે ચતુર્થે દ્વારકામાહાત્મ્યે દ્વારકાયાત્રાવિધિવર્ણનંનામ ચતુર્થોઽધ્યાયઃ