સ્કંદ પુરાણ · અધ્યાય 6.260

॥ ગાલવ ઉવાચ ॥ ॥
ઇતિ તે કથિતં સર્વં શાલગ્રામકથાનકમ્ ॥
મહેશ્વરસ્ય ચોત્પત્તિર્યથા લિંગત્વમાપ સઃ

તસ્માદ્વરં લિંગરૂપં શાલગ્રામગતં હરિમ્ ॥
યેઽર્ચયંતિ નરા ભક્ત્યા ન તેષાં દુઃખયાતનાઃ

ચાતુર્માસ્યે સમાયાતે વિશેષાત્પૂજયેચ્ચ તૌ ॥
અર્ચિતૌ યાવભેદેન સ્વર્ગમોક્ષપ્રદાયકૌ

દેવૌ હરિહરૌ ભક્ત્યા વિપ્રવહ્નિગવાં ગતૌ ॥
યેઽર્ચયંતિ મહાશૂદ્ર તેષાં મોક્ષપ્રદોહરિઃ ॥

વેદોક્તં કારયેત્કર્મ પૂર્તેષ્ટં વેદતત્પરઃ ॥
પંચાયતનપૂજા ચ સત્યવાદો હ્યલોલતા

વિવેકાદિગુણૈર્યુક્તઃ સ શૂદ્રો યાતિ સદ્ગતિમ્॥
બ્રહ્મચર્યં તપો નાન્યદ્દ્વાદશાક્ષરચિંતનાત્ ૧। ૬ ॥
મન્ત્રૈર્વિના ષોડશ સોપચારૈઃ કાર્યા સુપૂજા નરકાદિહંતુઃ ॥
યથા તથા વૈ ગિરિજાપતેશ્ચ કાર્યા મહા શૂદ્ર મહાઘહંત્રી

॥ બ્રહ્મોવાચ ॥ ॥
એવં કથયતોરેષા રજની ક્ષયમાયયૌ ॥
સચ્છૂદ્રો ગાલવશ્ચૈવ શિષ્યૈશ્ચ પરિવારિતઃ

સ તેન પૂજિતો વિપ્રો યયૌ શીઘ્રં નિજાશ્રમમ્

ય ઇમં શ્રુણુયાન્મર્ત્યો વાચયેત્પાઠયેચ્ચ વા ॥
શ્લોકં વા સર્વમપિ ચ તસ્ય પુણ્યક્ષયો ન હિ

ઇતિ શ્રીસ્કાંદે મહાપુરાણ એકાશીતિસાહસ્ર્યાં સંહિતાયાં ષષ્ઠે નાગરખણ્ડે હાટકેશ્વરક્ષેત્રમાહાત્મ્યે શેષશાય્યુપાખ્યાને બ્રહ્મનારદસંવાદે ચાતુર્માસ્ય માહાત્મ્યે પૈજવનોપાખ્યાને ષષ્ટ્યુત્તરદ્વિશતતમોઽધ્યાયઃ