સ્કંદ પુરાણ · અધ્યાય 6.192

॥ સૂત ઉવાચ ॥ ॥
અથ શ્રુત્વા મહાનાદં વાદ્યાનાં સમુપસ્થિતમ્ ॥
નારદઃ સમ્મુખઃ પ્રાયાજ્જ્ઞાત્વા ચ જનનીં નિજામ્

પ્રણિપત્ય સ દીનાત્મા ભૂત્વા ચાશ્રુપરિપ્લુતઃ ॥
પ્રાહ ગદ્ગદયા વાચા કણ્ઠે બાષ્પસમાવૃતઃ

આત્મનઃ શાપરક્ષાર્થં તસ્યાઃ કોપવિવૃદ્ધયે ॥
કલિપ્રિયસ્તદા વિપ્રો દેવસ્ત્રીણાં પુરઃ સ્થિતઃ

મેઘગમ્ભીરયા વાચા પ્રસ્ખલંત્યા પદેપદે ॥
મયા ત્વં દેવિ ચાહૂતા પુલસ્ત્યેન તતઃ પરમ્

સ્ત્રીસ્વભાવં સમાશ્રિત્ય દીક્ષાકાલેઽપિ નાગતા

તતો વિધેઃ સમાદેશાચ્છક્રેણાન્યા સમાહૃતા ॥
કાચિદ્ગોપસમુદ્ભૂતા કુમારી દેવ રૂપિણી

ગોવક્ત્રેણ પ્રવેશ્યાથ ગુહ્યમાર્ગેણ તત્ક્ષણાત્ ॥
આકર્ષિતા મહાભાગે સમાનીતાથ તત્ક્ષણાત્

સા વિષ્ણુના વિવાહાર્થં તતશ્ચૈવાનુમોદિતા ॥
ઈશ્વરેણ કૃતં નામ ગાયત્રી ચ તવાનુગમ્

બ્રાહ્મણૈઃ સકલૈઃ પ્રોક્તં બ્રાહ્મણીતિ ભવત્વિયમ્ ॥
અસ્માકં વચનાદ્બ્રહ્મન્કુરુ હસ્તગ્રહં વિભો

દેવૈઃ સર્વૈઃ સ સમ્પ્રોક્તસ્તતસ્તાં ચ વરાનનામ્ ॥
તતઃ પત્ન્યુત્થધર્મેણ યોજયામાસ સત્વરમ્ ॥૬.૧૯૨. ૧૦ ॥
કિં વા તે બહુનોક્તેન પત્નીશાલાં સમાગતા ॥
રશના યોજિતા તસ્યા ગોપ્યાઃ કટ્યાં સુરેશ્વરિ

તદ્દૃષ્ટ્વા ગર્હિતં કર્મ નિષ્ક્રાંતો યજ્ઞમણ્ડપાત્ ॥
અમર્ષ વશમાપન્નો ન શક્તો વીક્ષિતું ચ તામ્

એતજ્જ્ઞાત્વા મહાભાગે યત્ક્ષમં તત્સમાચર ॥
ગચ્છ વા તિષ્ઠ વા તત્ર મણ્ડપે ધર્મવર્જિતે

તચ્છ્રુત્વા સા તદા દેવી સાવિત્રી દ્વિજસત્તમાઃ ॥
પ્રમ્લાનવદના જાતા પદ્મિનીવ હિમાગમે

લતેવ ચ્છિન્નમૂલા સા ચક્રીવ પ્રિયવિચ્યુતા ॥
શુચિશુક્લાગમે કાલે સરસીવ ગતોદકા

પ્રક્ષીણચન્દ્રલેખેવ મૃગીવ મૃગવર્જિતા ॥
સેનેવ હતભૂપાલા સતીવ ગતભર્તૃકા

સંશુષ્કા પુષ્પમાલેવ મૃતવત્સૈવ સૌરભી ॥
વૈમનસ્યં પરં ગત્વા નિશ્ચલત્વમુપસ્થિતામ્ ॥
તાં દૃષ્ટ્વા દેવપત્ન્યસ્તા જગદુર્નારદં તદા

ધિગ્ધિક્કલિપ્રિય ત્વાં ચ રાગે વૈરાગ્યકારકમ્ ॥
ત્વયા કૃતં સર્વમેતદ્વિધેસ્તસ્ય તથાન્તરમ્

॥ ગૌર્યુવાચ ॥ ॥
અયં કલિપ્રિયો દેવિ બ્રૂતે સત્યાનૃતં વચઃ ॥
અનેન કર્મણા પ્રાણાન્બિભર્ત્યેષ સદા મુનિઃ

અહં ત્ર્યક્ષેણ સાવિત્રિ પુરા પ્રોક્તા મુહુર્મુહુઃ ॥
નારદસ્ય મુનેર્વાક્યં ન શ્રદ્ધેયં ત્વયા પ્રિયે ॥
યદિ વાંછસિ સૌખ્યાનિ મમ જાતાનિ પાર્વતિ

તતઃપ્રભૃતિ નૈવાહં શ્રદ્દધેઽસ્ય વચઃ ક્વચિત્ ॥
તસ્માદ્ગચ્છામહે તત્ર યત્ર તિષ્ઠતિ તે પતિઃ

સ્વયં દૃષ્ટ્વૈવ વૃત્તાંતં કર્તવ્યં યત્ક્ષમં તતઃ ॥
નાત્રાસ્ય વચનાદદ્ય સ્થાતવ્યં તત્ર ગમ્યતામ્

॥ સૂત ઉવાચ ॥ ॥
ગૌર્યા સ્તદ્વચનં શ્રુત્વા સાવિત્રી હર્ષવર્જિતા ॥
મખમણ્ડપમુદ્દિશ્ય પ્રસ્ખલન્તી પદેપદે

પ્રજગામ દ્વિજશ્રેષ્ઠાઃ શૂન્યેન મનસા તદા ॥
પ્રતિભાતિ તદા ગીતં તસ્યા મધુરમપ્યહો

કર્ણશૂલં યથાઽઽયાતમસકૃદ્દ્વિજસત્તમાઃ ॥
વન્ધ્યવાદ્યં યથા વાદ્યં મૃદંગાનકપૂર્વકમ્

પ્રેતસંદર્શનં યદ્વન્મર્ત્યં તત્સા મહાસતી ॥
વીક્ષિતું ન ચ શક્રોતિ ગચ્છમાના તદા મખે

શૃંગારં ચ તથાંગારં મન્યતે સા તનુસ્થિતમ્ ॥
વાષ્પપૂર્ણેક્ષણા દીના પ્રજગામ મહાસતી

તતઃ કૃચ્છ્રાત્સમાસાદ્ય સૈવં તં યજ્ઞમંડપમ્ ॥
કૃચ્છ્રાત્કારાગૃહં તદ્વદ્દુષ્પ્રેક્ષ્યં દૃક્પથં ગતમ્

અથ દૃષ્ટ્વા તુ સંપ્રાપ્તાં સાવિત્રીં યજ્ઞમણ્ડપમ્ ॥
તત્ક્ષણાચ્ચ ચતુર્વક્ત્રઃ સંસ્થિતોઽધોમુખો હ્રિયા।

તથા શમ્ભુશ્ચ શક્રશ્ચ વાસુદેવસ્તથૈવ ચ ॥
યે ચાન્યે વિબુધાસ્તત્ર સંસ્થિતા યજ્ઞમંડપે

તે ચ બ્રાહ્મણશાર્દૂલાસ્ત્યક્ત્વા વેદધ્વનિં તતઃ ॥
મૂકીભાવં ગતાઃ સર્વે ભયસંત્રસ્તમાનસાઃ

અથ સંવીક્ષ્ય સાવિત્રી સપત્ન્યા સહિતં પતિમ્ ॥
કોપસંરક્તનયના પરુષં વાક્યમબ્રવીત્

॥ સાવિત્ર્યુવાચ ॥ ॥
કિમેતદ્યુજ્યતે કર્તું તવ વૃદ્ધ તમાકૃતે ॥
ઊઢવાનસિ યત્પત્નીમેતાં ગોપસમુદ્ભવામ્

ઉભયોઃ પક્ષયોર્યસ્યાઃ સ્ત્રીણાં કાંતા યથેપ્સિતાઃ ॥
શૌચાચારપરિત્યક્તા ધર્મકૃત્યપરાઙ્મુખાઃ

યદન્વયે જનાઃ સર્વે પશુધર્મરતોત્સવાઃ ॥
સોદર્યાં ભગિનીં ત્યક્ત્વા જનનીં ચ તથા પરામ્

।
તસ્યાઃ કુલે પ્રસેવંતે સર્વાં નારીં જનાઃ પરામ્ ॥
યથા હિ પશવોઽશ્નંતિ તૃણાનિ જલપાનગાઃ

વિણ્મૂત્રં કેવલં ચક્રુર્ભારોદ્વહનમેવ ચ ॥૯
તદ્વદસ્યાઃ કુલં સર્વં તક્રમશ્રાતિ કેવલમ્

કૃત્વા મૂત્રપુરીષં ચ જન્મભોગવિવર્જિતમ્ ॥
નાન્યજ્જાનાતિ કર્તવ્યં ધર્મં સ્વોદરસં શ્રયાત્

અન્ત્યજા અપિ નો કર્મ યત્કુર્વન્તિ વિગર્હિતમ્ ॥
આભીરાસ્તચ્ચ કુર્વંતિ તત્કિમેતત્ત્વયા કૃતમ્

અવશ્યં યદિ તે કાર્યં ભાર્યયા પરયા મખે ॥
ત્વયા વા બ્રાહ્મણી કાપિ પ્રખ્યાતા ભુવનત્રયે

નોઢા વિધે વૃથા મુણ્ડ નૂનં ધૂર્તોઽસિ મે મતઃ ॥
યત્ત્વયા શૌચસંત્યક્તા કન્યાભાવપ્રદૂષિતા

પ્રભુક્તા બહુભિઃ પૂર્વં તથા ગોપકુમારિકા॥
એષા પ્રાપ્તા સુપાપાઢ્યા વેશ્યાજનશતાધિકા

અન્ત્યજાતા તથા કન્યા ક્ષતયોનિઃ પ્રજાયતે॥
તથા ગોપકુમારી ચ કાચિત્તાદૃક્પ્રજાયતે

માતૃકં પૈતૃકં વંશં શ્વાશુરં ચ પ્રપાતયેત્।
તસ્માદેતેન કૃત્યેન ગર્હિતેન ધરાતલે

ન ત્વં પ્રાપ્સ્યસિ તાં પૂજાં તથા ન્યે વિબુધોત્તમાઃ॥
અનેન કર્મણા ચૈવ યદિ મે સ્તિ ઋતં ક્વચિત્

પૂજાં યે ચ કરિષ્યંતિ ભવિષ્યંતિ ચ નિર્ધનાઃ॥
કથં ન લજ્જિતોસિ ત્વમેતત્કુર્વન્વિગર્હિતમ્

પુત્રાણામથ પૌત્રાણામન્યેષાં ચ દિવૌકસામ્॥
અયોગ્યં ચૈવ વિપ્રાણાં યદેતત્કૃતવાનસિ

અથ વા નૈષ દોષસ્તે ન કામવશગા નરાઃ॥
લજ્જંતિ ચ વિજાનંતિ કૃત્યાકૃત્યં શુભાશુભમ્

અકૃત્યં મન્યતે કૃત્યં મિત્રં શત્રું ચ મન્યતે॥
શત્રું ચ મન્યતે મિત્રં જનઃ કામવશં ગતઃ

દ્યૂતકારે યથા સત્યં યથા ચૌરં ચ સૌહૃદમ્॥
યથા નૃપસ્ય નો મિત્રં તથા લજ્જા ન કામિનામ્

અપિ સ્યાચ્છીતલો વહ્નિશ્ચંદ્રમા દહનાત્મકઃ।
ક્ષારાબ્દિરપિ મિષ્ટઃ સ્યાન્ન કામી લજ્જતે ધ્રુવમ્

ન મે સ્યાદ્દુખમેતદ્ધિ યત્સાપત્ન્યમુપસ્થિતમ્॥
સહસ્રમપિ નારીણાં પુરુષાણાં યથા ભવેત્

કુલીનાનાં ચ શુદ્ધાનાં સ્વજાત્યાનાં વિશેષતઃ॥
ત્વં કુરુષ્વ પરાણાં ચ યદિ કામવશં ગતઃ

એતત્પુનર્મહદ્દુઃખં યદાભીરી વિગર્હિતા॥
વેશ્યેવ નષ્ટચારિત્રા ત્વયોઢા બહુભર્તૃકા

તસ્માદહં પ્રયાસ્યામિ યત્ર નામ ન તે વિધે ॥
શ્રૂયતે કામલુબ્ધસ્ય હ્રિયા પરિહૃતસ્ય ચ

અહં વિડંબિતા યસ્માદત્રાનીય ત્વયા વિધે ॥
પુરતો દેવપત્નીનાં દેવાનાં ચ દ્વિજન્મનામ્ ॥
તસ્માત્પૂજાં ન તે કશ્ચિત્સાંપ્રતં પ્રકરિષ્યતિ

અદ્ય પ્રભૃતિ યઃ પૂજાં મંત્રપૂજાં કરિષ્યતિ ॥
તવ મર્ત્યો ધરાપૃષ્ઠે યથાન્યેષાં દિવૌકસામ્

ભવિષ્યતિ ચ તદ્વંશો દરિદ્રો દુઃખસંયુતઃ ॥
બ્રાહ્મણઃ ક્ષત્રિયો વાપિ વૈશ્યઃ શૂદ્રોપિ ચાલયે

એષાઽભીરસુતા યસ્માન્મમ સ્થાને વિગર્હિતા ॥
ભવિષ્યતિ ન સંતાનસ્તસ્માદ્વાક્યાન્મમૈવ હિ

ન પૂજાં લપ્સ્યતે લોકે યથાન્યા દેવયોષિતઃ

કરિષ્યતિ ચ યા નારી પૂજા યસ્યા અપિ ક્વચિત્ ॥
સા ભવિષ્યતિ દુઃખાઢ્યા વંધ્યા દૌર્ભાગ્યસંયુતા

પાપિષ્ઠા નષ્ટચારિત્રા યથૈષા પંચભર્તૃકા ॥
વિખ્યાતિં યાસ્યતે લોકે યથા ચાસૌ તથૈવ સા

એતસ્યા અન્વયઃ પાપો ભવિષ્યતિ નિશાચર ॥
સત્યશૌચપરિત્યક્તાઃ શિષ્ટસંગવિવર્જિતાઃ

અનિકેતા ભવિષ્યંતિ વંશેઽસ્યા ગોપ્રજીવિનઃ ॥
એવં શપ્ત્વા વિધિં સાધ્વી ગાયત્રીં ચ તતઃ પરમ્

તતો દેવગણાન્સર્વાઞ્છશાપ ચ તદા સતી ॥
ભોભોઃ શક્ર ત્વયાનીતા યદેષા પંચભર્તૃકા

તદાપ્નુહિ ફલં સમ્યક્છુભં કૃત્વા ગુરોરિદમ્ ॥
ત્વં શત્રુભિર્જિતો યુદ્ધે બંધનં સમવાપ્સ્યસિ

કારાગારે ચિરં કાલં સંગમિષ્યત્યસંશયમ્ ॥
વાસુદેવ ત્વયા યસ્માદેષા વૈ પંચભર્તૃકા

અનુમોદિતા વિધેઃ પૂર્વં તસ્માચ્છપ્સ્યામ્યસંશયમ્ ॥
ત્વં ચાપિ પરભૃત્યત્વં સંપ્રાપ્સ્યસિ સુદુર્મતે

સમીપસ્થોઽપિ રુદ્ર ત્વં કર્મૈતદ્યદુપેક્ષસે ॥
નિષેધયસિ નો મૂઢ તસ્માચ્શૃણુ વચો મમ

જીવમાનસ્ય કાંતસ્ય મયા તદ્વિરહોદ્ભવમ્ ॥
સંસેવિતં મૃતાયાં તે દયિતાયાં ભવિષ્યતિ

યત્ર યજ્ઞે પ્રવિષ્ટેયં ગર્હિતા પંચભર્તૃકા ॥
ભવાનપિ હવિર્વહ્ને યત્ત્વં ગૃહ્ણાસિ લૌલ્યતઃ

તથાન્યેષુ ચ યજ્ઞેષુ સમ્યક્છંકાવિવર્જિતઃ ॥
તસ્માદ્દુષ્ટસમાચાર સર્વભક્ષો ભવિષ્યસિ

સ્વધયા સ્વાહયા સાર્ધં સદા દુઃખસમન્વિતઃ ॥
નૈવાપ્સ્યસિ પરં સૌખ્યં સર્વકાલં યથા પુરા

એતે ચ બ્રાહ્મણાઃ સર્વે લોભોપહતચેતસઃ ॥
હોમં પ્રકુર્વતે યે ચ મખે ચાપિ વિગર્હિતે। ૭૪ ॥
વિત્તલોભેન યત્રૈષા નિવિષ્ટા પઞ્ચભર્તૃકા ॥
તથા ચ વચનં પ્રોક્તં બ્રાહ્મણીયં ભવિષ્યતિ

દરિદ્રોપહતાસ્તસ્માદ્વૃષલીપતયસ્તથા ॥
વેદવિક્રયકર્તારો ભવિષ્યથ ન સંશયઃ

ભોભો વિત્તપતે વિત્તં દદાસિ મખવિપ્લવે ॥
તસ્માદ્યત્તેઽખિલં વિત્તમભોગ્યં સંભવિષ્યતિ

તથા દેવગણાઃ સર્વે સાહાય્યં યે સમાશ્રિતાઃ ॥
અત્ર કુર્વંતિ દોષાઢ્યે યજ્ઞે વૈ પાંચભર્તૃકે

સંતાનેન પરિત્યક્તાસ્તે ભવિષ્યંતિ સાંપ્રતમ્॥
દાનવૈશ્ચ પરાભૂતા દુઃખં પ્રાપ્સ્યતિ કેવલમ્

એતસ્યાઃ પાર્શ્વતશ્ચાન્યાશ્ચતસ્રો યા વ્યવસ્થિતાઃ ॥
આભીરીતિ સપ ત્નીતિ પ્રોક્તા ધ્યાનપ્રહર્ષિતાઃ

મમ દ્વેષપરા નિત્યં શિવદૂતીપુરસ્સરાઃ ॥
તાસાં પરસ્પરં સંગઃ કદાચિચ્ચ ભવિષ્યતિ

નાન્યેનાત્ર નરેણાપિ દૃષ્ટિમાત્રમપિ ક્ષિતૌ ॥
પર્વતાગ્રેષુ દુર્ગેષુ ચાગમ્યેષુ ચ દેહિનામ્ ॥
વાસઃ સંપત્સ્યતે નિત્યં સર્વભોગવિવર્જિતઃ

॥ સૂત ઉવાચ ॥ ॥
એવમુક્ત્વાઽથ સાવિત્રીકોપોપહતચેતસા ॥
વિસૃજ્ય દેવપત્નીસ્તાઃ સર્વા યાઃ પાર્શ્વતઃ સ્થિતાઃ

ઉદઙ્મુખી પ્રતસ્થે ચ વાર્યમાણાપિ સર્વતઃ ॥
સર્વાભિર્દેવપત્નીભિર્લક્ષ્મીપૂર્વાભિરેવચ

તત્ર યાસ્યામિ નો યત્ર નામાપિ કિલ વૈ યતઃ ॥
શ્રૂયતે કામુકસ્યાસ્ય તત્ર યાસ્યામ્યહં દ્રુતમ્

એકશ્ચરણયોર્ન્યસ્તો વામઃ પર્વતરોધસિ ॥
દ્વિતીયેન સમારૂઢા તસ્યાગસ્ય તથોપરિ

અદ્યાપિ તત્પદં વામં તસ્યાસ્તત્ર પ્રદૃશ્યતે ॥
સર્વપાપહરં પુણ્યં સ્થિતં પર્વતરોધસિ

અપિ પાપસમાચારો યસ્તં પૂજયતે નરઃ ॥
સર્વપાતકનિર્મુક્તઃ સ યાતિ પરમં પદમ્

યો યં કામમભિ ધ્યાય તમર્ચયતિ માનવઃ ॥
અવશ્યં સમવાપ્નોતિ યદ્યપિ સ્યાત્સુદુર્લભમ્

॥ સૂત ઉવાચ ॥ ॥
એવં તત્ર સ્થિતા દેવી સાવિત્રી પર્વતા શ્રયા ॥
અપમાનં મહત્પ્રાપ્ય સકાશાત્સ્વપતેસ્તદા

યસ્તામર્ચયતે સમ્યક્પૌર્ણમાસ્યાં વિશેષતઃ ॥
સર્વાન્કામાનવાપ્નોતિ સ મનોવાંછિતાં સ્તદા

યા નારી કુરુતે ભક્ત્યા દીપદાનં તદગ્રતઃ ॥
રક્તતંતુભિરાજ્યેન શ્રૂયતાં તસ્ય યત્ફલમ્

યાવન્તસ્તંતવસ્તસ્ય દહ્યંતે દીપ સંભવાઃ ॥
મુહૂર્તાનિ ચ યાવંતિ ઘૃતદીપશ્ચ તિષ્ઠતિ ॥
તાવજ્જન્મસહસ્રાણિ સા સ્યાત્સૌભાગ્યભાંગિની

પુત્રપૌત્રસમોપેતા ધનિની શીલ મંડના। ॥
ન દુર્ભગા ન વન્ધ્યા ચ ન ચ કાણા વિરૂપિકા

યા નૃત્યં કુરુતે નારી વિધવાપિ તદગ્રતઃ ॥
ગીતં વા કુરુતે તત્ર તસ્યાઃ શૃણુત યત્ફલમ્

યથાયથા નૃત્યમાના સ્વગાત્રં વિધુનોતિ ચ ॥
તથાતથા ધુનોત્યેવ યત્પાપં પ્રકૃતં પુરા

યાવન્તો જન્તવો ગીતં તસ્યાઃ શૃણ્વંતિ તત્ર ચ ॥
તાવંતિ દિવિ વર્ષાણિ સહસ્રાણિ વસેચ્ચ સા

સાવિત્રીં યા સમુદ્દિશ્ય ફલદાનં કરોતિ સા ॥
ફલસંખ્યાપ્રમાણાનિ યુગાનિ દિવિ મોદતે

મિષ્ટાન્નં યચ્છતે યશ્ચ નારીણાં ચ વિશેષતઃ ॥
તસ્યા દક્ષિણમૂર્તૌ ચ ભર્ત્રાઢ્યાનાં દ્વિજોત્તમાઃ ॥
સ ચ સિક્થપ્રમાણાનિ યુગા નિ દિવિ મોદતે

યઃ શ્રાદ્ધં કુરુતે તત્ર સમ્યક્છ્રદ્ધાસમન્વિતઃ ॥
રસેનૈકેન સસ્યેન તથૈકેન દ્વિજોત્તમાઃ ॥
તસ્યાપિ જાયતે પુણ્યં ગયાશ્રાદ્ધેન યદ્ભવેત્

યઃ કરોતિ દ્વિજસ્તસ્યા દક્ષિણાં દિશમાશ્રિતઃ ॥
સન્ધ્યોપાસનમેકં તુ સ્વપત્ન્યા ક્ષિપિતૈર્જલૈઃ

સાયંતને ચ સંપ્રાપ્તે કાલે બ્રાહ્મણસત્તમાઃ॥
તેન સ્યાદ્વંદિતા સંધ્યા સમ્યગ્દ્વાદશવાર્ષિકી

યો જપેદ્બ્રાહ્મણસ્તસ્યાઃ સાવિત્રીં પુરતઃ સ્થિતઃ ॥
તસ્ય યત્સ્યાત્ફલં વિપ્રાઃ શ્રૂયતાં તદ્વદામિ વઃ

દશભિર્જ્જન્મજનિતં શતેન ચ પુરા કૃતમ્ ॥
ત્રિયુગે તુ સહસ્રેણ તસ્ય નશ્યતિ પાતકમ્

તસ્માત્સર્વપ્રયત્નેન ચમત્કારપુરં પ્રતિ ॥
ગત્વા તાં પૂજયેદ્દેવીં સ્તોતવ્યા ચ વિશેષતઃ

સાવિત્ર્યા ઇદમાખ્યાનં યઃ પઠેચ્છૃણુયાચ્ચ વા ॥
સર્વપાપવિનિર્મુક્તઃ સુખભાગત્ર જાયતે

એતદ્વઃ સર્વમાખ્યાતં યત્પૃષ્ટોઽહં દ્વિજોત્તમાઃ ॥
સાવિત્ર્યાઃ કૃત્સ્નં માહાત્મ્યં કિં ભૂયઃ પ્રવદામ્યહમ્

ઇતિ શ્રીસ્કાંદે મહાપુરાણ એકાશીતિસાહસ્ર્યાં સંહિતાયાં ષષ્ઠે નાગરખણ્ડે હાટકેશ્વરક્ષેત્રમાહાત્મ્યે સાવિત્રીમાહાત્મ્યવર્ણનંનામ દ્વિનવત્યુત્તરશતતમોઽધ્યાયઃ