સ્કંદ પુરાણ · અધ્યાય 6.191

॥ ઋષય ઊચુઃ ॥ ॥
સૂતપુત્ર ત્વયા પ્રોક્તં સાવિત્રી નાગતા ચ યત્ ॥
કૌટિલ્યેન સમાયુક્તૈરાહૂતા વચનૈસ્તથા ॥
પુલસ્ત્યેન પુનશ્ચૈવ પ્રસક્તા ગૃહકર્મણિ

તતસ્તુ બ્રહ્મણા કોપાદ્ગાયત્રી ચ સમાહૃતા ॥
દેવૈર્વિપ્રેશ્ચે સાઽતીવ શંસિતા ભાર્યતાં ગતા

સાવિત્રી ચ કથં જાતા તાં જ્ઞાત્વા યજ્ઞમણ્ડપે ॥
પત્નીશાલાં પ્રવિષ્ટાં ચ સર્વં નો વિસ્તરાદ્વદ

॥ સૂત ઉવાચ ॥ ॥
સાવિત્રી વશગં કાંતં જ્ઞાત્વા વિશ્વાસમાગતા ॥
સ્થિરા ભૂત્વા તદા સર્વા દેવપત્નીઃ સમાનયત્

ગૌરી લક્ષ્મીઃ શચી મેધા તથા ચૈવાપ્યરુન્ધતી ॥
સ્વધા સ્વાહા તથા કીતિર્બુદ્ધિઃ પુષ્ટિઃ ક્ષમા ધૃતિઃ ॥
તથા ચાન્યાશ્ચ બહવો હ્યપ્સરોભિઃ સમન્વિતાઃ

ઘૃતાચી મેનકા રંભા ઉર્વશી ચ તિલોત્તમા ॥
અપ્સરાણાં ગણાઃ સર્વે સમાજગ્મુર્દ્વિજોત્તમાઃ

સા તાભિઃ સહિતા દેવીપૂર્ણહસ્તાભિરેવ ચ ॥
સંપ્રહૃષ્ટમનોભિશ્ચ પ્રસ્થિતા મણ્ડપં પ્રતિ

વાદ્યમાનેષુ વાદ્યેષુ ગીતધ્વનિયુતેષુ ચ ॥
ગન્ધર્વાણાં પ્રમુખ્યાનાં કિન્નરાણાં વિશેષતઃ

પ્રસ્થિતા સા મહાભાગા યાવત્તદ્યજ્ઞમણ્ડપમ્ ॥
તાવત્તસ્યાસ્તદા ચક્ષુઃ પ્રાસ્ફુરદ્દક્ષિણં મુહુઃ

અપસવ્યં મૃગાશ્ચક્રુસ્તથાન્યેઽપિ ખગાદયઃ ॥
વિપર્યસ્તેન સંયાતિ શબ્દાન્કુર્વંતિ ચાસકૃત્

દક્ષિણાનિ તથાઽઙ્ગાનિ સ્ફુરમાણાનિ વૈ મુહુઃ॥
તસ્યા મનસિ સંક્ષોભં જનયતિ નિરર્ગલમ્

તાશ્ચ દેવસ્ત્રિયઃ સર્વા નૃત્યંતિ ચ હસંતિ ચ ॥
ગાયંતિ ચ યથોત્સાહં તસ્યાઃ પાર્શ્વે વ્યવસ્થિતાઃ

ન જાનંતિ ચ સંક્ષોભં તથા શકુનજં હૃદિ ॥
અન્યોન્યસ્પર્દ્ધયા સર્વા ગીતનૃત્યપરાયણાઃ

અહંપૂર્વમહંપૂર્વં પ્રવિશામિ મહામખે ॥
ઇત્યૌત્સુક્યસમોપેતાસ્તા ગચ્છંતિ તદા પથિ

ઇતિ શ્રીસ્કાન્દે મહાપુરાણ એકાશીતિસાહસ્ર્યાં સંહિતાયાં ષષ્ઠે નાગર ખણ્ડે હાટકેશ્વરક્ષેત્રમાહાત્મ્યે સાવિત્ર્યા યજ્ઞાગમનકાલિકોત્પાતાદ્યપશકુનોદ્ભવવર્ણનંનામૈકનવત્યુત્તરશતતમોઽધ્યાયઃ