સ્કંદ પુરાણ · અધ્યાય 6.160

॥ સૂત ઉવાચ ॥ ॥
અન્યસ્મિન્નહનિ પ્રાપ્તે રહસ્યુક્તઃ સ ભાર્યયા ॥
રાત્રૌ પ્રસુપ્તઃ પાર્શ્વે ચ પાદૌ સંસ્પૃશ્ય તત્ક્ષણાત્

ત્વં તાવન્મમ ભર્ત્તાસિ યાવજ્જીવમસંશયમ્ ॥
તદ્વદસ્વ વિભોઽસ્માકં ત્વદર્થં સ મયોજ્ઝિતઃ

ઇન્દ્રજાલમિદં કિં તે કિં વા મંત્રપ્રસાધનમ્ ॥
દેવાનાં વા પ્રસાદોઽયં યત્ત્વં ચૈતાદૃશઃ સ્થિતઃ

મયા ત્વં હિ તદા જ્ઞાતઃ પ્રથમેઽપિ દિને સ્થિતે ॥
યદા સંભૂષિતા વસ્ત્રૈસ્તથા વસ્તુવિભૂષણૈઃ

યદ્યહં તવ વાર્તાં ચ સર્વાં કપટસંભવામ્ ॥
કથયામિ દ્વિતીયસ્ય તત્તે પાદૌ સ્પૃશામ્યહમ્

॥ સૂત ઉવાચ ॥ ॥
એવમુક્તો વિહસ્યોચ્ચૈઃ સ તદા બ્રાહ્મણોત્તમાઃ ॥
તામાલિંગ્ય તતઃ પ્રાહ વચનં મધુરાક્ષરમ્

સાધુ પ્રિયે ત્વયા જ્ઞાતં સર્વં મમ વિચેષ્ટિતમ્ ॥
અહં સ વિપ્રઃ સુભગે મણિભદ્રેણ યઃ પુરા

વિડંબિતો મુખં પશ્યંસ્ત્વદીયં ચંદ્રસન્નિભમ્ ॥
ચમત્કારપુરં ગત્વા મયા ચારાધિતો રવિઃ ॥
તેન તુષ્ટેન મે દત્તં તદ્રૂપં જ્ઞાનમેવ ચ

॥
॥ માહિકોવાચ ॥ ॥
ત્વદીયદર્શનેનાહં કામદેવવશં ગતા

તસ્માદારાધયિષ્યામિ તં ગત્વા દિનનાયકમ્ ॥
યેન તે તાદૃશં ભૂયઃ પ્રતુષ્ટો વિદધાતિ સઃ

કિં મે ચૈતેન રૂપેણ તારુણ્યેનાપિ ચ પ્રભો ॥
યત્તે તથાવિધં રૂપં સંભજામિ દિવાનિશમ્

॥ સૂત ઉવાચ ॥ ॥
તચ્છ્રુત્વા ગુટિકાં પુષ્પ સમાદાય મુખાન્તતઃ ॥
દધાર તાદૃશં રૂપં યાદૃગ્દૃષ્ટં પુરા તયા

તતઃ સા હર્ષિતા માહી પુલકેન સમન્વિતા ॥
તમાલિંગ્યાભજદ્ગાઢં વાક્યમેતદુવાચ હ

અદ્ય મે સફલં જન્મ યૌવનં રૂપમેવ ચ ॥
યત્ત્વં હૃદ્વાંછિતઃ કાંતઃ પ્રલબ્ધો મદનોપમઃ

એતાવંતિ દિનાન્યેવ ન મયા કામજં સુખમ્ ॥
અપિ સ્વલ્પતરં લબ્ધં કથંચિદ્વૃદ્ધસેવયા

ભજસ્વ સ્વેચ્છયા વિપ્ર દાસી તેઽહં વ્યવસ્થિતા

॥ પુષ્પ ઉવાચ ॥ ॥
પ્રવિશામિ કિમંગેષુ ભવન્તીં કિં મિલામ્યહમ્ ॥
પ્રિયે ચિરેણ લબ્ધાસિ ન જાને કર વાણિ કિમ્

એવમુક્ત્વા તતસ્તૌ ચ મૈથુનાય કૃતક્ષણૌ ॥
પ્રવૃત્તૌ બ્રાહ્મણશ્રેષ્ઠાઃ કામદેવવશંગતૌ

અથ રાત્ર્યાં વ્યતીતાયામુદિતે સૂર્યમણ્ડલે ॥
વક્ત્રે તાં ગુટિકાં કૃત્વા સ પુષ્પસ્તાદૃશોઽભવત્

એવં તસ્ય સ્થિતસ્યાત્ર મહાન્કાલો વ્યજાયત ॥
પુત્રાઃ પૌત્રાસ્તથા જાતાઃ કન્યકાશ્ચ તથૈવ ચ

સ વૃદ્ધત્વં યદા પ્રાપ્તો જરાવિપ્લવતાં ગતઃ ॥
તદા સ ચિન્તયામાસ મયા પાપં મહત્કૃતમ્

મણિભદ્રો વરાકોઽસૌ મિથ્યાચારેણ ઘાતિતઃ ॥
તસ્ય ભાર્યા હૃતા ચૈવ પ્રસૂતિં ચ નિયોજિતા

હાટકેશ્વરજં ક્ષેત્રં તસ્માદ્ગત્વા કરોમ્ય હમ્ ॥
પુરશ્ચરણસંજ્ઞં ચ યેન શુદ્ધિઃ પ્રજાયતે

એવં સ નિશ્ચયં કૃત્વા પુષ્પશ્ચિત્તે નિજે તદા ॥
અસંખ્યં વિત્તમાદાય ચમત્કારપુરંગતઃ ॥

પુત્રેભ્યોઽપિ યથાસંખ્યં દત્ત્વા ચૈવ પૃથક્પૃથક્ ॥
પ્રાસાદં કારયામાસ તસ્ય સૂર્યસ્ય શોભનમ્

યસ્મિન્સિદ્ધિં ગતઃ સોઽત્ર યાજ્ઞવલ્ક્યપ્રતિષ્ઠિતે ॥
તતો મધ્યમમાહૂય પ્રણિપત્યાભિવાદ્ય ચ ॥
સોઽબ્રવીદ્બ્રાહ્મણાનાં મે ચાતુશ્ચરણમાનય

યેનાહમગ્રતો ભૂત્વા પ્રાયશ્ચિત્તં વિશુદ્ધયે ॥
પુરશ્ચરણસંજ્ઞં તુ પ્રાર્થયામિ યથાવિધિ

ઇતિ સ્કાન્દે મહાપુરાણ એકાશીતિસાહસ્ર્યાં સંહિતાયાં ષષ્ઠે નાગરખંડે હાટ કેશ્વરક્ષેત્રમાહાત્મ્યે પુષ્પસ્ય પાપક્ષાલનાર્થં હાટકેશ્વરક્ષેત્રગમનપુરશ્ચરણાર્થબ્રાહ્મણામન્ત્રણવર્ણનંનામ ષષ્ટ્યધિકશતતમોઽધ્યાયઃ