સ્કંદ પુરાણ · અધ્યાય 6.150

॥ સૂત ઉવાચ ॥ ॥
શુક્રસ્તસ્ય વચઃ શ્રુત્વા ચિત્તે કૃત્વા દયાં તતઃ ॥
હાટકેશ્વરજં ક્ષેત્રં ગત્વા સિદ્ધિપ્રદાયકમ્ ॥

ચકાર વિધિવદ્ધોમં સ્વમાંસેન હુતાશને ॥
મંત્રૈરાથર્વણૈ રૌદ્રૈઃ કુણ્ડં કૃત્વા ત્રિકોણકમ્

એવં સંજુહ્વતસ્તસ્ય તેન વૈ વિધિના તદા ॥
યથા રુદ્રેણ સંતુષ્ટા દેવી કેલીશ્વરી તદા

તં પ્રોવાચ સમેત્યાશુ શુક્રં દૈત્યપુરોહિતમ્ ॥
મા ત્વં ભાર્ગવશાર્દૂલ કુરુ માંસપરિક્ષયમ્

ભાવિતાઽહં ત્રિનેત્રેણ તત્કિં બ્રૂહિ કરોમિ તે

॥ શુક્ર ઉવાચ ॥ ॥
યથા રુદ્રસ્ય સાહાય્યં ત્વયાત્ર વિહિતં શુભે ॥
અંધકસ્યાઽપિ કર્તવ્યં તથૈવૈષ વરો મમ

યે કેચિદ્દાનવા યુદ્ધે ભક્ષિતાશ્ચ વિનાશિતાઃ ॥
અસ્ય સૈન્યસ્ય તે સર્વે પુનર્જીવંતુ સત્વરમ્

॥ દેવ્યુવાચ ॥ ॥
જીવયિષ્યામિ તાન્સર્વાન્દાનવાન્નિહતાન્રણે ॥
નવસંભક્ષિતાન્વિપ્ર પ્રવિષ્ટાન્યોગિનીમુખે

એવમુક્ત્વા દદૌ તસ્મૈ સા દેવી હર્ષિતાનના ॥
નામ્નાઽમૃતવતીં વિદ્યાં યયા જીવંતિ તે મૃતાઃ

તતઃ શુક્રઃ પ્રહૃષ્ટાત્મા ગત્વાંધકમુવાચ હ ॥
સિદ્ધા કેલીશ્વરી દેવી યથા શમ્ભોસ્તથા મમ

તયા દત્તા શુભા વિદ્યા મમ દૈત્યા મૃતાશ્ચ યે ॥
તાન્સર્વાંસ્તત્પ્રભાવેન યોજયિષ્યામિ જીવિતે

ત્વયાઽસ્યાઃ સતતં ભક્તિઃ કાર્યા દાનવ સત્તમ ॥
અષ્ટમ્યાં ચ વિશેષેણ ચતુર્દશ્યાં ચ સર્વદા

એષા સા પરમા શક્તિર્યયા વ્યાપ્તમિદં જગત્॥
કેવલં ભક્તિસાધ્યા સા ન દણ્ડેન કથંચન

એવમુક્તસ્તુ શુક્રેણ સ તદા દાનવાધિપઃ ॥
તાં દેવીં પૂજયામાસ ભાવભક્તિસમન્વિતઃ

સ્તુત્વા ચ વિવિધૈઃ સ્તોત્રૈસ્તતઃ પ્રોવાચ સાદરમ્ ॥
તથાન્યા માતરઃ સર્વા યથાજ્યેષ્ઠં યથાક્રમમ્

અજ્ઞાનાદ્યન્મયા દેવિ કૃતઃ કોપસ્તવોપરિ ॥
મર્ષણીયસ્તથા સોઽદ્ય દીનસ્ય પ્રણતસ્ય ચ

॥ શ્રીદેવ્યુવાચ ॥ ॥
પરિતુષ્ટાઽસ્મિ તે વત્સ પ્રભાવાદ્ભાર્ગવસ્ય ચ ॥
વરં વરય તસ્માત્ત્વં ન વૃથા દર્શનં મમ

॥ અન્ધક ઉવાચ ॥ ॥
અનેનૈવ તુ રૂપેણ યે ત્વાં ધ્યાયંતિ દેહિનઃ ॥
પૂજયંતિ ચ સદ્ભક્ત્યા સંસ્થાપ્ય પ્રતિમાં તવ ॥
તેષાં સિદ્ધિઃ પ્રદાતવ્યા ત્વયા હૃદયવાંછિતા

દેવ્યુવાચ ॥ ॥
યો મામનેન રૂપેણ સ્થાપયિષ્યતિ માનવઃ ॥
તસ્ય મોક્ષં પ્રદાસ્યામિ પાપસ્યાપિ ન સંશયઃ

યોઽષ્ટમ્યાં ચ ચતુર્દશ્યાં મમ પૂજાં કરિષ્યતિ ॥
તસ્મૈ સ્વર્ગં પ્રદાસ્યામિ પાપસ્યાપિ દનૂત્તમ

કેવલં દર્શનં યશ્ચ ધ્યાનં વા મે કરિષ્યતિ ॥
તસ્ય રાજ્યં પ્રદાસ્યામિ ભોગાન્માનુષસંભવાન્ । ૨૧ ॥
એવમુક્ત્વાઽથ સા દેવી તતશ્ચાદર્શનં ગતા ॥
તૈશ્ચ માતૃગણૈઃ સાર્ધં પશ્યતસ્તસ્ય તત્ક્ષણાત્ । ૨૨ ॥
શક્રોઽપિ દાનવાન્સર્વાંસ્તયા સંસિદ્ધયા તતઃ ॥
મૃતાન્સંજીવયામાસ દૈતેયાન્નવભક્ષિતાન્

તૈઃ સમેત્ય સ દૈત્યેન્દ્રઃ પ્રહૃષ્ટેનાંતરાત્મના ॥
તાં પુરીં પ્રાપ્ય શક્રસ્ય રાજ્યં ચક્રે દિવાનિશમ્

તાં દેવીં ધ્યાયમાનસ્તુ પૂજયાનો દિવાનિશમ્ ॥
અષ્ટમ્યાં ચ ચતુર્દશ્યાં વિશેષેણ મહાબલઃ ॥ ૨૫
અથ તસ્યાઃ પ્રભાવં તં જ્ઞાત્વા વ્યાસસમુદ્ભવઃ ॥
સ્થાનેઽત્ર સ્થાપયામાસ સંસિદ્ધિં પ પરાં ગતઃ

॥ સૂત ઉવાચ । ॥
એવં કેલીશ્વર દેવી સંજાતા પરમેશ્વરી ॥
તસ્માત્સ્થાપ્યા ચ પૂજ્યા ચ ધ્યેયા ચૈવ વિશેષતઃ

એવં દેવ્યા નરો યશ્ચ પઠતે વા શૃણોતિ વા ॥
વાચ્યમાનં સ મુચ્યેત વ્યસનેન ગરીયસા

ભ્રષ્ટરાજ્યોઽથવા રાજા યઃ શૃણોત્યષ્ટમીદિને ॥
સ રાજ્યં લભતે ભૂયો નિખિલં હતકંટકમ્

યુદ્ધકાલે ચ સંપ્રાપ્તે યશ્ચૈતચ્છૃણુયાન્નરઃ ॥
સ હત્વા શત્રુસંઘાતં વિજયં ચ સમાપ્નુયાત્

ઇતિ શ્રીસ્કાંદે મહાપુરાણ એકાશીતિસાહસ્ર્યાં સંહિતાયાં ષષ્ઠે નાગરખણ્ડે હાટકેશ્વરક્ષેત્રમાહાત્મ્યે કેલીશ્વરીમાહાત્મ્યવર્ણનંનામ પઞ્ચાશદુત્તરશતતમોઽધ્યાયઃ ॥ ૧૫૦ । ॥ ।