સ્કંદ પુરાણ · અધ્યાય 5.61

॥ સનત્કુમાર ઉવાચ ॥ ॥
અધિમાસં સમાસાદ્ય યોઽન્યત્ર સ્થિતિમાત્મનઃ ॥
કરોતિ સ નરો મૂર્ખો મહાકાલવનાદૃતે

અધિમાસે નરો વ્યાસ તીર્થે પુરુષોત્તમાભિધે ॥
સ્નાત્વા દત્ત્વા ચ દાનાનિ તેષાં લોકાઃ સનાતનાઃ

પુરુષોત્તમં સમભ્યર્ચ્ય રમાલાલિતપાદકમ્ ॥
તથૈવ ચ ઉમાં દેવીં શંકરેણ ચ પૂજયેત્

વાંછિતાર્થશતં પ્રાપ્ય વિષ્ણુલોકે મહીયતે ॥
ભાદ્રપદે સિતે પક્ષે એકાદશ્યાં સમાહિતઃ ॥
ઉપોષ્ય વિધિવદ્વ્યાસ રાત્રૌ જાગરણં ચરેત્

વિષ્ણોશ્ચ પૂજનં કાર્યં જલયાત્રા તથૈવ ચ ॥
પુરુષોત્તમસરે નિત્યં તસ્ય પુણ્યફલં શૃણુ

પુત્રદારધનં સમ્યગાયુરારોગ્યસંપદઃ ॥
ન તેષાં દુર્લભં કિંચિત્ત્રિષુ લોકેષુ વિદ્યતે

તસ્ય પૂર્વતરે ભાગે જટેશ્વરમહેશ્વરઃ ॥
તિષ્ઠતિ તાપસસ્તીરે યત્ર રાજા ભગીરથઃ

તપસ્તપ્ત્વા પરં લેભે પુણ્યં પુણ્યવતાં વરઃ ॥
ગંગાં ભૂતલમાનીય સર્વલોકસુખાય વૈ

તસ્ય તીર્થે નરઃ સ્નાત્વા તિલધેનું પ્રદાપયેત્ ॥
સર્વયજ્ઞફલં પ્રાપ્ય પુત્રવાઞ્જા યતે નરઃ

તસ્યેશાનતરે ભાગે રામો ભાર્ગવસત્તમઃ॥
તપસ્તેપે સુધર્માત્મા આત્મકાયવિશુદ્ધયે

કૌશિકી ચ સરિચ્છ્રેષ્ઠા સર્વતીર્થવરપ્રદા॥
તત્ર સ્નાત્વા નરો જાતિહત્યાદોષવિવર્જિતઃ

રામેશ્વરં સમાલોક્ય ધૂતપાપો ભવેન્નરઃ।૧૨॥
ઇતિ શ્રીસ્કાંદે મહાપુરાણ એકાશીતિસાહસ્ર્યાં સંહિતાયાં પઞ્ચમ આવંત્યખણ્ડેઽવન્તીક્ષેત્રમાહાત્મ્યે પુરુષોત્તમેશ્વરમાહાત્મ્યેઽધિમાસસ્નાનદાનાદિમાહાત્મ્યવર્ણનંનામૈકષષ્ટિતમોઽધ્યાયઃ