સ્કંદ પુરાણ · શ્લોક 5.23-3

માર્કણ્ડેય ઉવાચ -
તત્રૈવ સઙ્ગમે રાજન્ભક્ત્યા પરમયા નૃપ ।
પ્રાણાંસ્ત્યજન્તિ યે મર્ત્યાસ્તે યાન્તિ પરમાં ગતિમ્

સંન્યસ્તસર્વસંકલ્પો યસ્તુ પ્રાણાન્પરિત્યજેત્ ।
અમરેશ્વરમાસાદ્ય સ સ્વર્ગે નિયતં વસેત્

શૈલેન્દ્રં યઃ સમાસાદ્ય આત્માનં મુઞ્ચતે નરઃ ।
વિમાનેનાર્કવર્ણેન સ ગચ્છેદમરાવતીમ્

નરં પતન્તમાલોક્ય નગાદમરકણ્ટકાત્ ।
બ્રુવન્ત્યપ્સરસઃ સર્વા મમ ભર્તા ભવેદિતિ

સમં જલં ધર્મવિદો વદન્તિ સારસ્વતં ગાઙ્ગમિતિ પ્રબુદ્ધાઃ ।
તસ્યોપરિષ્ટાત્પ્રવદન્તિ તજ્જ્ઞા રેવાજલં નાત્ર વિચારણાસ્તિ

અનેકવિદ્યાધરકિન્નરાદ્યૈરધ્યાસિતં પુણ્યતમાધિવાસૈઃ ।
રેવાજલં ધારયતો હિ મૂર્ધ્ના સ્થાનં સુરેન્દ્રાધિપતેઃ સમીપે

નર્મદા સર્વદા સેવ્યા બહુનોક્તેન કિં નૃપ ।
યદીચ્છેન્ન પુનર્દ્રષ્ટું ઘોરં સંસારસાગરમ્

ત્રયાણામપિ લોકાનાં મહતી પાવની સ્મૃતા ।
યત્ર તત્ર મૃતસ્યાપિ ધ્રુવં ગાણેશ્વરી ગતિઃ

અનેકયજ્ઞાયતનૈર્વૃતાઙ્ગી ન હ્યત્ર કિંચિદ્યદતીર્થમસ્તિ ।
તસ્યાસ્તુ તીરે ભવતા યદુક્તં તપસ્વિનો વાપ્યતપસ્વિનો વા

મ્રિયન્તિ યે પાપકૃતો મનુષ્યાસ્તે સ્વર્ગમાયાન્તિ યથાઽમરેન્દ્રાઃ

એવં તુ કપિલા ચૈવ વિશલ્યા રાજસત્તમ ।
ઈશ્વરેણ પુરા સૃષ્ટા લોકાનાં હિતકામ્યયા

તત્ર સ્નાત્વા નરો રાજન્સોપવાસો જિતેન્દ્રિયઃ ।
અશ્વમેધસ્ય મહતોઽસંશયં ફલમાપ્નુયાત્

અનાશકં ચ યઃ કુર્યાત્તસ્મિંસ્તીર્થે નરાધિપ ।
સર્વપાપવિનિર્મુક્તો યાતિ વૈ શિવમન્દિરમ્

પૃથિવ્યાં સાગરાન્તાયાં સ્નાનદાનેન યત્ફલમ્ ।
વિશલ્યાસઙ્ગમે સ્નાત્વા સકૃત્તત્ફલમશ્નુતે

એવં પુણ્યા પવિત્રા ચ કથિતા તવ ભૂપતે ।
ભૂયો માં પૃચ્છસિ ચ યત્તચ્ચૈવ કથયામ્યહમ્

॥ ઇતિ શ્રીસ્કાન્દે મહાપુરાણ એકાશીતિસાહસ્ર્યાં સંહિતાયાં પઞ્ચમ આવન્ત્યખણ્ડે રેવાખણ્ડે વિશલ્યાસઙ્ગમમાહાત્મ્યવર્ણનં નામ ત્રયોવિંશોઽધ્યાયઃ ॥