સ્કંદ પુરાણ · અધ્યાય 5.154

શ્રીમાર્કણ્ડેય ઉવાચ -
નર્મદાદક્ષિણે કૂલે તીર્થં કલકલેશ્વરમ્ ।
વિખ્યાતં સર્વલોકેષુ સ્વયં દેવેન નિર્મિતમ્

અન્ધકં સમરે હત્વા દેવદેવો મહેશ્વરઃ ।
સહિતો દેવગન્ધર્વૈઃ કિન્નરૈશ્ચ મહોરગૈઃ

શઙ્ખતૂર્યનિનાદૈશ્ચ મૃદઙ્ગપણવાદિભિઃ ।
વીણાવેણુરવૈશ્ચાન્યૈઃ સ્તુતિભિઃ પુષ્કલાદિભિઃ

ગાયન્તિ સામાનિ યજૂંષિ ચાન્યે છન્દાંસિ ચાન્યે ઋચમુદ્ગિરન્તિ ।
સ્તોત્રૈરનેકૈરપરે ગૃણન્તિ મહેશ્વરં તત્ર મહાનુભાવાઃ

પ્રમથાનાં નિનાદેન કલ્કલેન ચ બન્દિનામ્ ।
યસ્માત્પ્રતિષ્ઠિતં લિઙ્ગં તસ્માજ્જાતં તદાખ્યયા

તત્ર તીર્થે તુ યઃ સ્નાત્વા વીક્ષેત્કલકલેશ્વરમ્ ।
વાજપેયાત્પરં પુણ્યં સ લભેન્માનવો ભુવિ

તેન પુણ્યેન પૂતાત્મા પ્રાણત્યાગાદ્દિવં વ્રજેત્ ।
આરૂઢઃ પરમં યાનં ગીયમાનોઽપ્સરોગણૈઃ

ઉપભુજ્ય મહાભોગાન્કાલેન મહતા તતઃ ।
મર્ત્યલોકે મહાત્માસૌ જાયતે વિમલે કુલે

બ્રાહ્મણઃ સુભગો લોકે વેદવેદાઙ્ગપારગઃ ।
વ્યાધિશોકવિનિર્મુક્તો જીવેચ્ચ શરદાં શતમ્

॥ ઇતિ શ્રીસ્કાન્દે મહાપુરાણ એકાશીતિસાહસ્ર્યાં સંહિતાયાં પઞ્ચમ આવન્ત્યખણ્ડે રેવાખણ્ડે કલકલેશ્વરતીર્થફલમાહાત્મ્યવર્ણનં નામ ચતુઃપઞ્ચાશદધિકશતતમોઽધ્યાયઃ ॥