Skanda Purana · Chapter 5.154

śrīmārkaṇḍeya uvāca -
narmadādakṣiṇe kūle tīrthaṃ kalakaleśvaram /
vikhyātaṃ sarvalokeṣu svayaṃ devena nirmitam

andhakaṃ samare hatvā devadevo maheśvaraḥ /
sahito devagandharvaiḥ kinnaraiśca mahoragaiḥ

śaṅkhatūryaninādaiśca mṛdaṅgapaṇavādibhiḥ /
vīṇāveṇuravaiścānyaiḥ stutibhiḥ puṣkalādibhiḥ

gāyanti sāmāni yajūṃṣi cānye chandāṃsi cānye ṛcamudgiranti /
stotrairanekairapare gṛṇanti maheśvaraṃ tatra mahānubhāvāḥ

pramathānāṃ ninādena kalkalena ca bandinām /
yasmātpratiṣṭhitaṃ liṅgaṃ tasmājjātaṃ tadākhyayā

tatra tīrthe tu yaḥ snātvā vīkṣetkalakaleśvaram /
vājapeyātparaṃ puṇyaṃ sa labhenmānavo bhuvi

tena puṇyena pūtātmā prāṇatyāgāddivaṃ vrajet /
ārūḍhaḥ paramaṃ yānaṃ gīyamāno'psarogaṇaiḥ

upabhujya mahābhogānkālena mahatā tataḥ /
martyaloke mahātmāsau jāyate vimale kule

brāhmaṇaḥ subhago loke vedavedāṅgapāragaḥ /
vyādhiśokavinirmukto jīvecca śaradāṃ śatam

// iti śrīskānde mahāpurāṇa ekāśītisāhasryāṃ saṃhitāyāṃ pañcama āvantyakhaṇḍe revākhaṇḍe kalakaleśvaratīrthaphalamāhātmyavarṇanaṃ nāma catuḥpañcāśadadhikaśatatamo'dhyāyaḥ //