સ્કંદ પુરાણ · અધ્યાય 4.72

॥ અગસ્ત્ય ઉવાચ ॥
પાર્વતીહૃદયાનંદ સ્કંદ સર્વજ્ઞનંદન ॥
કાઃ કાસ્તુ શક્તયસ્તા વૈ તાસાં નામાનિ મે વદ

॥
સ્કંદ ઉવાચ ॥ ॥
તાસાં પરમશક્તીનામુમાવયવસંભુવામ્ ॥
આખ્યામ્યાખ્યાં શૃણુ મુને કુંભસંભવ તત્ત્વતઃ

ત્રૈલોક્યવિજયા તારા ક્ષમા ત્રૈલોક્યસુંદરી ॥
ત્રિપુરા ત્રિજગન્માતા ભીમા ત્રિપુરભૈરવી

કામાખ્યા કમલાક્ષી ચ ધૃતિસ્ત્રિપુરતાપની ॥
જયા જયંતી વિજયા જલેશી ચાપરાજિતા ।૪॥
શંખિની ગજવક્ત્રા ચ મહિષઘ્ની રણપ્રિયા ॥
શુભાનંદા કોટરાક્ષી વિદ્યુજ્જિહ્વા શિવારવા

ત્રિનેત્રા ચ ત્રિવક્ત્રા ચ ત્રિપદા સર્વમંગલા ॥
હુંકારહેતિસ્તાલેશી સર્પાસ્યા સર્વસુંદરી

સિદ્ધિર્બુદ્ધિઃ સ્વધા સ્વાહા મહાનિદ્રા શરાશના ॥
પાશપાણિઃ ખરમુખી વજ્રતારા ષડાનના

મયૂરવદના કાકી શુકી ભાસી ગરુત્મતી ॥
પદ્માવતી પદ્મકેશી પદ્માસ્યા પદ્મવાસિની

અક્ષરા ત્ર્યક્ષરા તંતુઃ પ્રણવેશી સ્વરાત્મિકા ॥
ત્રિવર્ગા ગર્વરહિતા અજપા જપહારિણી

જપસિદ્ધિસ્તપઃસિદ્ધિર્યોગસિદ્ધિઃ પરામૃતા ॥
મૈત્રીકૃન્મિત્રનેત્રા ચ રક્ષોઘ્ની દૈત્યતાપની

સ્તંભની મોહનીમાયા બહુમાયા બલોત્કટા ॥
ઉચ્ચાટની મહોલ્કાસ્યા દનુજેંદ્રક્ષયંકરી

ક્ષેમકરી સિદ્ધિકરી છિન્નમસ્તા શુભાનના ॥
શાકંભરી મોક્ષલક્ષ્મીસ્ત્રિવર્ગફલદાયિની

વાર્તાલી જંભલી ક્લિન્ના અશ્વારૂઢા સુરેશ્વરી ॥
જ્વાલામુખી પ્રભૃતયો નવકોટ્યૌ મહાબલાઃ

બલાનિ બલિનાં તાભિર્દાનવાનાં સ્વલીલયા ॥
સંક્ષિપ્તા નિજગંતીવ પ્રલયાનલહેતેભિઃ

તાવત્સ દુર્ગો દૈત્યેંદ્રઃ પયોદાંતરતો બલી ॥
ચકાર કરકાવૃષ્ટિં વાત્યા વેગવતીં બહુ

તતો ભગવતી દેવી શોષણાસ્ત્ર પ્રયોગતઃ ॥
વૃષ્ટિં નિવારયામાસ સવર્ષોપલમયી ક્ષણાત્

યોષિન્મનોરથવતી ષંઢં પ્રાપ્ય યથાઽફલા ॥
સા દૈત્યકરકાવૃષ્ટિર્દેવીં પ્રાપ્ય તથાભવત્

અથ દૈતેયરાજેન બાહુસંકર્ષકોપતઃ ॥
ઉત્પાટ્ય શૈલશિખરં પરિક્ષિપ્તં નભોંગણાત્

અદ્રેઃ શૃંગં સુવિસ્તીર્ણમાપતત્પરિવીક્ષ્ય સા ॥
શતકોટિપ્રહારેણ કોટિશઃ સકલં વ્યધાત્

આંદોલ્ય મૌલિમસકૃત્કુંડલાભ્યાં વિરાજિતમ્॥
ગજીભૂયાશુ દુદ્રાવ તાં દેવીં સમરેઽસુરઃ

શૈલાકારં તમાયાંતં દૃષ્ટ્વા ભગવતી ગજમ્ ॥
બદ્ધ્વા પાશેન જવતઃ ખઙ્ગેન કરમચ્છિનત્

તતોત્યંતં સ ચીત્કૃત્ય દેવ્યાકૃત્તકરઃકરી ॥
અકિંચિત્કરતાં પ્રાપ્ય માહિષં વપુરાદદે

અચલાં સચલાં સર્વાં સ ચક્રે સુરઘાતતઃ ॥
શિલોચ્ચયાંશ્ચ બહુશઃ શૃંગાભ્યાં સોક્ષિપદ્બલી

નિઃશ્વાસવાતનિહતાઃ પેતુરુર્વ્યાં મહાદ્રુમાઃ ॥
ઉદ્વેલિતાઃ સમભવન્સપ્તાપિ જલરાશયઃ

મહામહિષરૂપેણ તેન ત્રૈલોક્યમંડપઃ ॥
આંદોલિતોતિ બલિના યુગાંતે વાત્યયા યથા

બ્રહ્માંડમપ્યકાંડેન તદ્ભયેન સમાકુલમ્ ॥
દૃષ્ટ્વા ભગવતી ક્રુદ્ધા ત્રિશૂલેન જઘાન તમ્

ત્રિશૂલઘાતવિભ્રાંતઃ પતિત્વા પુનરુત્થિતઃ ॥
તં ત્યક્ત્વા માહિષં વેષમભૂદ્બાહુસહસ્રભૃત્

સ દુર્ગો નિતરાં દુર્ગો વિબભૌ સમરાજિરે॥
આયુધાનાં સહસ્રાણિ બિભ્રત્કાલાંતકોપમઃ

અથ તૂર્ણં સ દૈત્યેંદ્રસ્તાં દેવીં રણકોવિદામ્ ॥
મહાબલઃ પ્રગૃહ્યાશુ નીતવાનાન્ગગનાંગણમ્ ॥

તતો નભોંગણાદ્દૂરાત્ક્ષિપ્ત્વા સ જગદંબિકામ્ ॥
ક્ષણાત્કલંબજાલેન ચ્છાદયામાસ વેગવાન્

અથાંતરિક્ષગા દેવી તસ્ય માર્ગણમધ્યગા ॥
વિદ્યુન્માલેવ વિબભૌ મહાભ્રપટલીધૃતા

તં વિધૂય શરત્રાતં નિજેષુ નિકરૈરલમ્ ॥
મહેષુણાથ વિવ્યાધ સા તં દૈત્યજનેશ્વરમ્

હૃદિ વિદ્ધસ્તયા દેવ્યા સ ચ તેન મહેષુણા ॥
વ્યાઘૂર્ણમાનનયનઃ ક્ષિતિમાપાતિ વિહ્વલઃ

મહારુધિરધારાભિઃ સ્રવંતીં ચ પ્રવર્તયન્ ॥
તસ્મિન્નિપતિતે દુર્ગે મહાદુર્ગપરાક્રમે॥

દેવદુંદુભયો નેદુઃ પ્રહૃષ્ટાનિ જગંતિ ચ ॥
સૂર્યાચંદ્રમસૌ સાગ્ની તેજો નિજમવાપતુઃ

પુષ્પવૃષ્ટિં પ્રકુર્વંતઃ પ્રાપ્તા દેવા મહર્ષિભિઃ ॥
તુષ્ટુવુશ્ચ મહાદેવીં મહાસ્તુતિભિરાદરાત્

॥
દેવા ઊચુઃ ॥ ॥
નમો દેવિ જગદ્ધાત્રિ જગત્રયમહારણે ॥
મહેશ્વર મહાશક્તે દૈત્યદ્રુમકુઠારકે

ત્રૈલોક્યવ્યાપિનિ શિવે શંખચક્રગદાધરિ ॥
સ્વશાર્ઙ્ગવ્યગ્રહસ્તાગ્રે નમો વિષ્ણુસ્વરૂપિણિ

હંસયાને નમસ્તુભ્યં સર્વસૃષ્ટિવિધાયિનિ॥
પ્રાચાં વાચાં જન્મભૂમે ચતુરાનનરૂપિણિ

ત્વમૈંદ્રી ત્વં ચ કૌબેરી વાયવી ત્વં ત્વમંબુપા ॥
ત્વં યામી નૈરૃતી ત્વં ચ ત્વમૈશી ત્વં ચ પાવકી

શશાંકકૌમુદી ત્વં ચ સૌરી શક્તિસ્ત્વમેવ ચ ॥
સર્વદેવમયી શક્તિસ્ત્વમેવ પરમેશ્વરી

ત્વં ગૌરી ત્વં ચ સાવિત્રી ત્વં ગાયત્રી સરસ્વતી ॥
પ્રકૃતિસ્ત્વં મતિસ્ત્વં ચ ત્વમહંકૃતિરૂપિણી ॥

ચેતઃ સ્વરૂપિણી ત્વં વૈ ત્વં સર્વેંદ્રિયરૂપિણી ॥
પંચતન્માત્રરૂપા ત્વં મહાભૂતાત્મિકેંબિકે

શબ્દાદિ રૂપિણી ત્વં વૈ કરણાનુગ્રહા ત્વમુ ॥
બ્રહ્માંડકર્ત્રી ત્વં દેવિ બ્રહ્માંડાંતસ્ત્વમેવ હિ

ત્વં પરાસિ મહાદેવિ ત્વં ચ દેવિ પરાપરા ॥
પરાપરાણાં પરમા પરમાત્મસ્વરૂપિણી

સર્વરૂપા ત્વમીશાનિ ત્વમરૂપાસિ સર્વગે ॥
ત્વં ચિચ્છક્તિર્મહામાયે ત્વં સ્વાહા ત્વં સ્વધામૃતે

વષડ્વૌષટ્સ્વરૂપાસિ ત્વમેવ પ્રણવાત્મિકા ॥
સર્વમંત્રમયી ત્વં વૈ બ્રહ્માદ્યાસ્ત્વત્સમુદ્ભવાઃ

ચતુર્વર્ગાત્મિકા ત્વં વૈ ચતુર્વર્ગફલોદયે ॥
ત્વત્તઃ સર્વમિદં વિશ્વં ત્વયિ સર્વં જગન્નિધે

યદ્દૃશ્યં યદદૃશ્યં ચ સ્થૂલસૂક્ષ્મસ્વરૂપતઃ ॥
તત્ર ત્વં શક્તિરૂપેણ કિંચિન્ન ત્વદૃતે ક્વચિત્

માતસ્ત્વયાદ્ય વિનિહત્ય મહાસુરેંદ્રં દુર્ગં નિસર્ગવિબુધાર્પિતદૈત્યસૈન્યમ્ ॥
ત્રાતાઃ સ્મ દેવિ સતતં નમતાં શરણ્યે ત્વત્તોઽપરઃ ક ઇહ યં શરણં વ્રજામઃ

લોકે ત એવ ધનધાન્યસમૃદ્ધિભાજસ્તે પુત્રપૌત્રસુકલત્ર સુમિત્રવંતઃ ॥
તેષાં યશઃ પ્રસરચંદ્રકરાવદાતં વિશ્વં ભવેદ્ભવસિ યેષુ સુદૃક્ત્વમીશે ॥

ત્વદ્ભક્તિચેતસિ જનેન વિપત્તિલેશઃ ક્લેશઃ ક્વ વાનુભવતી નતિકૃત્સુ પુંસુ ॥
ત્વન્નામસંસૃતિજુષાં સકલાયુષાં ક્વ ભૂયઃ પુનર્જનિરિહ ત્રિપુરારિપત્નિ

ચિત્રં યદત્ર સમરે સ હિ દુર્ગદૈત્યસ્ત્વદ્દૃષ્ટિપાતમધિગમ્ય સુધાનિધાનમ્॥
મૃત્યોર્વશત્વમગમદ્વિદિતં ભવાનિ દુષ્ટોપિ તે દૃશિગતઃ કુગતિં ન યાતિ

ત્વચ્છસ્ત્રવહ્નિશલભત્વમિતા અપીહ દૈત્યાઃ પતંગરુચિમાપ્ય દિવં વ્રજંતિ ॥
સંતઃ ખલેષ્વપિ ન દુષ્ટધિયો યતઃ સ્યુઃ સાધુષ્વિવ પ્રણયિનઃ સ્વપથં દિશંતિ

પ્રાચ્યાં મૃડાનિ પરિપાહિ સદા નતાન્નો યામ્યામવ પ્રતિપદં વિપદો ભવાનિ ॥
પ્રત્યગ્દિશિ ત્રિપુરતાપન પત્નિ રક્ષ ત્વં પાહ્યુદીચિ નિજભક્તજનાન્મહેશિ

બ્રહ્માણિ રક્ષ સતતં નતમૌલિદેશં ત્વં વૈષ્ણવિ પ્રતિકુલં પરિપાલયાધઃ ॥
રુદ્રાગ્નિ નૈરૃતિ સદાગતિ દિક્ષુ પાંતુ મૃત્યુંજયા ત્રિનયના ત્રિપુરા ત્રિશક્ત્યઃ

પાતુ ત્રિશૂલમમલે તવ મૌલિજાન્નો ભાલસ્થલં શશિકલા મૃદુમાભ્રુવૌ ચ ॥
નેત્રે ત્રિલોચનવધૂર્ગિરિજા ચ નાસામોષ્ઠં જયા ચ વિજયાત્વધરપ્રદેશમ્

શ્રોત્રદ્વયં શ્રુતિરવા દશનાવલિં શ્રીશ્ચંડી કપોલયુગલં રસનાં ચ વાણી ॥
પાયાત્સદૈવ ચિબુકં જયમંગલા નઃ કાત્યાયની વદનમંડલમેવ સર્વમ્

કંઠપ્રદેશમવતાદિહ નીલકંઠી ભૂદારશક્તિરનિશં ચ કૃકાટિકાયામ્ ॥
કૌર્મ્યં સદેશમનિશં ભુજદંડમૈંદ્રી પદ્મા ચ પાણિફલકં નતિકારિણાં નઃ

હસ્તાંગુલીઃ કમલજા વિરજા નખાંશ્ચ કક્ષાંતરં તરણિમંડલગા તમોઘ્ની ॥
વક્ષઃસ્થલં સ્થલચરી હૃદયં ધરિત્રી કુશિદ્વયં ત્વવતુ નઃ ક્ષણદાચરઘ્ની

અવ્યાત્સદા દરદરીં જગદીશ્વરી નો નાભિં નભોગતિરજાત્વથ પૃષ્ઠદેશમ્ ॥
પાયાત્કટિં ચ વિકટા પરમાસ્ફિચૌ નો ગુહ્યં ગુહારણિરપાનમપાય હંત્રી

ઊરુદ્વયં ચ વિપુલા લલિતા ચ જાનૂ જંઘે જવાઽવતુ કઠોરતરાત્ર ગુલ્ફૌ॥
પાદૌ રસાતલચરાંગુલિદેશમુગ્રા ચાંદ્રી નખાન્ત્પદતલં તલવાસિની ચ

ગૃહં રક્ષતુ નો લક્ષ્મીઃ ક્ષેત્રં ક્ષેમકરી સદા ॥
પાતુ પુત્રાન્પ્રિયકરી પાયાદાયુઃ સનાતની

યશઃ પાતુ મહાદેવી ધર્મં પાતુ ધનુર્ધરી ॥
કુલદેવી કુલં પાતુ સદ્ગતિં સદ્ગતિપ્રદા

રણે રાજકુલે દ્યૂતે સંગ્રામે શત્રુસંકટે ॥
ગૃહે વને જલાદૌ ચ શર્વાણી સર્વતોઽવતુ

ઇતિ સ્તુત્વા જગદ્ધાત્રીં પ્રણેમુશ્ચ પુનઃપુનઃ ॥
સર્વે સવાસવા દેવાઃ સર્ષિગંધર્વચારણાઃ

તતસ્તુષ્ટા જગન્માતા તાનાહ સુરસત્તમાન્ ॥
સ્વાધિકારાન્સુરાઃ સર્વે શાસતુ પ્રાગ્યથાયથા

તુષ્ટાહમનયા સ્તુત્યા નિતરાં તુ યથાર્થયા ॥
વરમન્યં પ્રદાસ્યામિ તચ્છૃણુધ્વં સુરોત્તમાઃ

॥
દુર્ગોવાચ ॥ ॥
યઃ સ્તોષ્યતિ તુ માં ભક્ત્યા નરઃ સ્તુત્યાનયા શુચિઃ ॥
તસ્યાહં નાશયિષ્યામિ વિપદં ચ પદે પદે

એતત્સ્તોત્રસ્ય કવચં પરિધાસ્યતિ યો નરઃ ॥
તસ્ય ક્વચિદ્ભયં નાસ્તિ વજ્રપંજરગસ્ય હિ

અદ્યપ્રભૃતિ મે નામ દુર્ગેતિ ખ્યાતિમેષ્યતિ ॥
દુર્ગદૈત્યસ્ય સમરે પાતનાદતિ દુર્ગમાત્

યે માં દુર્ગાં શરણગા ન તેષાં દુર્ગતિઃ ક્વચિત્ ॥
દુર્ગાસ્તુતિરિયં પુણ્યા વજ્રપંજરસંજ્ઞિકા

અનયા કવચં કૃત્વા મા બિભેતુ યમાદપિ ॥
ભૂતપ્રેતપિશાચાશ્ચ શાકિનીડાકિની ગણાઃ

ઝોટિંગા રાક્ષસાઃ ક્રૂરા વિષ સર્પાગ્નિ દસ્યવઃ ॥
વેતાલાશ્ચાપિ કંકાલ ગ્રહા બાલગ્રહા અપિ

વાતપિત્તાદિ જનિતાસ્તથા ચ વિષમજ્વરાઃ ॥
દૂરાદેવ પલાયંતે શ્રુત્વા સ્તુતિમિમાં શુભામ્

વજ્રપંજર નામૈતત્સ્તોત્રં દુર્ગાપ્રશંસનમ્ ॥
એતત્સ્તોત્રકૃતત્રાણે વજ્રાદપિ ભયં નહિ

અષ્ટજપ્તેન ચાનેન યોભિમંત્ર્ય જલં પિબેત્ ॥
તસ્યોદરગતાપીડા ક્વાપિ નો સંભવિષ્યતિ

ગર્ભપીડા તુ નો જાતુ ભવિષ્યત્યભિમંત્રણાત્ ॥
બાલાનાં પરમા શાંતિરેતત્સ્તોત્રાંબુપાનતઃ

યત્ર સાન્નિધ્યમેતસ્ય સ્તવસ્યેહ ભવિષ્યતિ ॥
એતાસ્તુ શક્તયઃ સર્વા સર્વત્ર સહિતા મયા

રક્ષાં પરિકરિષ્યંતિ મદ્ભક્તાનાં મમાજ્ઞયા ॥
ઇતિ દત્ત્વા વરાન્દેવી દેવેભ્યો તર્હિ તા તદા

તેપિ સ્વર્ગૌકસઃ સર્વે સ્વંસ્વં સ્વર્ગં યયુર્મુદા ॥ ॥
સ્કંદ ઉવાચ ॥
ઇત્થં દુર્ગાભવન્નામ તયા દેવ્યા મહામુને ॥
કાશ્યાં સેવ્યા યથા સા ચ તચ્છૃણુષ્વ વદામિ તે

અષ્ટમ્યાં ચ ચતુર્દશ્યાં ભૌમવારે વિશેષતઃ ॥
સંપૂજ્યા સતતં કાશ્યાં દુર્ગા દુર્ગતિનાશિની

નવરાત્રં પ્રયત્નેન પ્રત્યહં સા સમર્ચિતા ॥
નાશયિષ્યતિ વિઘ્નૌઘાન્સુમતિં ચ પ્રદાસ્યતિ

મહાપૂજોપહારૈશ્ચ મહાબલિનિવેદનૈઃ ॥
દાસ્યત્યભીષ્ટદા સિદ્ધિં દુર્ગા કાશ્યાં ન સંશયઃ

પ્રતિસંવત્સરં તસ્યાઃ કાર્યા યાત્રા પ્રયત્નતઃ ॥
શારદં નવરાત્રં ચ સકુટુંબૈઃ શુભાર્થિભિઃ

યો ન સાંવત્સરીં યાત્રાં દુર્ગાયાઃ કુરુતે કુધીઃ ॥
કાશ્યાં વિઘ્ન સહસ્રાણિ તસ્ય સ્યુશ્ચ પદેપદે

દુર્ગાકુંડે નરઃ સ્નાત્વા સર્વદુર્ગાર્તિહારિણીમ્ ॥
દુર્ગાં સંપૂજ્ય વિધિવન્નવજન્માઘમુત્સૃજેત્

સા દુર્ગાશક્તિભિઃ સાર્ધં કાશીં રક્ષતિ સર્વતઃ ॥
તાઃ પ્રયત્નેન સંપૂજ્યા કાલરાત્રિમુખા નરૈઃ

રક્ષંતિ ક્ષેત્રમેતદ્વૈ તથાન્યા નવશક્તયઃ ॥
ઉપસર્ગસહસ્રેભ્યસ્તા વૈદિગ્દેવતાક્રમાત્

શતનેત્રા સહસ્રાસ્યા તથાયુતભુજાપરા ॥
અશ્વારૂઢા ગજાસ્યા ચ ત્વરિતા શવવાહિની

વિશ્વા સૌભાગ્યગૌરી ચ સૃષ્ટાઃ પ્રાચ્યાદિમધ્યતઃ ॥
એતા યત્નેન સંપૂજ્યાઃ ક્ષેત્રરક્ષણદેવતાઃ

તથૈવ ભૈરવાશ્ચાષ્ટૌ દિક્ષ્વષ્ટાસુ પ્રતિષ્ઠિતાઃ ॥
રક્ષંતિ સતતં કાશીં નિર્વાણશ્રીનિકેતનમ્

રુરુશ્ચંડોસિતાંગશ્ચ કપાલી ક્રોધનસ્તથા ॥
ઉન્મત્તભૈરવસ્તદ્વત્ક્રમાત્સંહારભીષણૌ

ચતુઃષષ્ટિસ્તુ વેતાલા મહાભીષણમૂર્તયઃ ॥
રુંડમુંડસ્રજઃ સર્વે કર્ત્રીખર્પરપાણયઃ

શ્વવાહના રક્તમુખા મહાદંષ્ટ્રા મહાભુજાઃ ॥
નગ્ના વિમુક્તકેશાશ્ચ પ્રમત્તા રુધિરાસવૈઃ

નાનારૂપધરાઃ સર્વે નાનાશસ્ત્રાસ્ત્ર પાણયઃ ॥
તદાકારૈશ્ચ તદ્ભૃત્યૈઃ કોટિશઃ પરિવારિતાઃ

વિદ્યુજ્જિહ્વો લલજ્જિહ્વઃ ક્રૂરાસ્યઃ ક્રૂરલોચનઃ॥
ઉગ્રો વિકટદંષ્ટ્રશ્ચ વક્રાસ્યો વક્રનાસિકઃ

જંભકો જૃંભણમુખો જ્વાલાનેત્રો વૃકોદરઃ ॥
ગર્તનેત્રો મહાનેત્રસ્તુચ્છનેત્રોંઽત્રમણ્ડનઃ

જ્વલત્કેશઃ કંબુશિરાઃ ખર્વગ્રીવો મહાહનુઃ ॥
મહાનાસો લંબકર્ણઃ કર્ણપ્રાવરણોનસઃ

ઇત્યાદયો મુને ક્ષેત્રં દુર્વૃત્તરુધિરપ્રિયાઃ ॥
ત્રાસયંતો દુરાચારાન્રક્ષંતિ પરિતઃ સદા

ત્રૈલોક્યવિજયાદ્યાશ્ચ જ્વાલામુખ્યંતગાશ્ચ યાઃ ॥
શક્તયોઽત્ર મયા ખ્યાતા મુને કલશસંભવ

તાઃ કાશીં પરિરક્ષંતિ ચતુર્દિક્ષૂદ્યતાયુધાઃ ॥
તાઃ સમર્ચ્યાઃ પ્રયત્નેન મહાવિઘ્ન પ્રશાંતયે

ભૈરવા રુરુમુખ્યાશ્ચ મહાભયનિવારકાઃ ॥
સંપૂજ્યાઃ સર્વદા કાશ્યાં સર્વસંપત્તિહેતવઃ

વિદ્યુજ્જિહ્વપ્રભૃતયો વેતાલા ઉગ્રરૂપિણઃ ॥
અત્યુગ્રાનપિ વિઘ્નૌઘાન્હરિષ્યંત્યર્ચિતા ઇહ

તથા ભૂતાવલી ચાત્ર નાનાભીષણરૂપિણી ॥
ઉદાયુધાઽવતિ પુરીં શતકોટિમિતા મુને

નિર્વાણલક્ષ્મીક્ષેત્રસ્ય પાલયિત્રી પદેપદે ॥
એતા વૈ દેવતાઃ પૂજ્યાઃ કાશ્યાં નિર્વાણકાંક્ષિભિઃ

શ્રુત્વાધ્યાયમિમં પુણ્યં નરો દુર્ગજયાભિધમ્ ॥
નાનાશક્તિસમાયુક્તં દુર્ગમાશુ તરિષ્યતિ

ય એતે ભૈરવાઃ પ્રોક્તા યે વેતાલા ઉદાહૃતાઃ ॥
તેષાં નામાનિ ચાકર્ણ્ય નરો વિપ્રૈર્ન દૂયતે

અદૃષ્ટા અપિ તે ભૂતા એતદાખ્યાનપાઠકમ્ ॥
રક્ષિષ્યંતિ પ્રયત્નેન સહ શ્રોતૃજનેન ચ

તસ્માત્સર્વપ્રયત્નેન કાશીભક્તિપરૈર્નરૈઃ ॥
શ્રોતવ્યમિદમાખ્યાનં મહાવિઘ્નનિવારણમ્ ॥

ગૃહેપિ યસ્ય લિખિતમેતત્સ્થાસ્યતિ પૂજિતમ્ ।
તસ્યાપદાં સહસ્રાણિ નાશયિષ્યંતિ દેવતાઃ

કાશ્યાં યસ્યાસ્તિ વૈ પ્રેમ તેન કૃત્વાઽઽદરં ગુરુમ્ ॥
શ્રોતવ્યમિદમાખ્યાનં વજ્રપંજરસન્નિભમ્

॥
ઇતિ શ્રીસ્કાંદે મહાપુરાણ એકાશીતિસાહસ્ર્યાં સંહિતાયાં ચતુર્થે કાશીખંડ ઉત્તરાર્ધે દુર્ગાવિજયો નામ દ્વિસપ્તતિતમોઽધ્યાયઃ