સ્કંદ પુરાણ · અધ્યાય 3.50

॥ શ્રીસૂત ઉવાચ ॥ ॥
અથાતઃ સંપ્રવક્ષ્યામિ સેતુમાધવવૈભવમ્॥
શૃણુધ્વં મુનયો ભક્ત્યા પુણ્યં પાપહરં પરમ્

પુરા પુણ્યનિધિર્નામ રાજા સોમકુલોદ્ભવઃ ॥
મધુરાં પાલયામાસ હાલાસ્યેશ્વરભૂષિતામ્

કદાચિત્સ મહીપાલશ્ચતુરંગબલાન્વિતઃ ॥
સાંઽતઃપુરપરીવારો મધુરાયાં નિજં સુતમ્

સ્થાપયિત્વા રામસેતું પ્રયયૌ સ્નાનકૌતુકી ॥
તત્ર ગત્વા ધનુષ્કોટૌ સ્નાત્વા સંકલ્પપૂર્વકમ્

અન્યેષ્વપિ ચ તીર્થેષુ તત્રત્યેષુ નૃપોત્તમઃ ॥
સસ્નૌ રામેશ્વરં દેવં સિષેવે ચ સભક્તિકમ્ ॥

એવં સ બહુકાલં વૈ તત્રૈવ ન્યવસત્સુખમ્ ॥
રામસેતૌ વસન્પુણ્યે ગન્ધમાદનપર્વતે

વિષ્ણુપ્રીતિકરં યજ્ઞં કદાચિદકરોન્નૃપઃ ॥
યજ્ઞાવસાને રાજાસૌ મુદાવભૃથકૌતુકી

સસ્નૌ રામધનુષ્કોટૌ સદારઃ સપરિચ્છદઃ ॥
સેવિત્વા રામનાથં ચ સ વેશ્મ પ્રયયૌ દ્વિજાઃ

એવં નિવસમાનેઽસ્મિન્રાજ્ઞિ પુણ્યનિધૌ તદા ॥
કદાચિદ્ધરિણા લક્ષ્મીર્વિનોદકલહાકુલા

હરિણા સમયં કૃત્વા નૃપભક્તિં પરીક્ષિતુમ્ ॥
વિષ્ણુના પ્રેષિતા લક્ષ્મીર્વૈકુંઠાત્કમલાલયા

અષ્ટવર્ષવયોરૂપા પ્રયયૌ ગંધમાદને ॥
તત્રાગત્ય ધનુષ્કોટૌ તસ્થૌ સા કમલાલયા

તસ્મિન્નવસરે રાજા યયૌ ગુણનિધિર્દ્વિજાઃ ॥
સ્નાતું રામધનુષ્કોટૌ સદારઃ સહસૈનિકઃ

તત્ર ગત્વા સ રાજાઽયં સ્નાત્વા નિયમપૂર્વકમ્॥
તુલાપુરુષમુખ્યાનિ કૃત્વા દાનાનિ કૃત્સ્નશઃ

પ્રયાતુકામો ભવનં કન્યાં કાંચિદ્દદર્શ સઃ ॥
અતીવરૂપસંપન્નામષ્ટવર્ષાં શુચિસ્મિતામ્॥

દૃષ્ટ્વા નૃપસ્તાં પપ્રચ્છ કન્યાં ચારુવિલોચનામ્ ॥
ચારુસ્મિતાં ચારુદતીં બિંબોષ્ઠીં તનુમધ્યમામ્

॥ પુણ્યનિધિરુવાચ ॥ ॥
કા ત્વં કન્યે સુતા કસ્ય કુતો વા ત્વમિહાગતા ॥
અત્રાગમેન કિં કાર્યં તવ વત્સે શુચિસ્મિતે

એવં નૃપસ્તાં પપ્રચ્છ કન્યામુત્પલલોચ નામ્॥
એવં પૃષ્ટા તદા કન્યા નૃપં તમવદદ્વિજાઃ

ન મે માતા પિતા નાસ્તિ ન ચ મે બાંધવાસ્તથા ॥
અનાથાહં મહારાજ ભવિષ્યામિ ચ તે સુતા

ત્વદ્ગૃહેઽહં નિવત્સ્યામિ તાત ત્વાં પશ્યતીસદા ॥
હઠાત્કૃષ્યતિ યો વા માં ગ્રહીષ્યતિ કરેણ તમ્

યદિ શાસિષ્યસે ભૂપ તદાહં તવ મંદિરે ॥
વત્સ્યામિ તે સુતા ભૂત્વા પિતર્ગુણનિધે ચિરમ્

એવમુક્તસ્તદા પ્રાહ કન્યાં ગુણનિધિર્નૃપઃ ॥
અહં સર્વં કરિષ્યામિ ત્વદુક્તં કન્યકે શુભે

મમાપિ દુહિતા નાસ્તિ પુત્રોઽસ્ત્યેકઃ કુલોદ્વહઃ ॥
તવ યસ્મિન્રુચિર્ભદ્રે ત્વાં તસ્મૈ પ્રદદામ્યહમ્

આગચ્છ મદ્ગૃહં કન્યે મમ ચાંતઃપુરે વસ ॥
મદ્ભાર્યાયાઃ સુતા ભૂત્વા યથાકામમનિંદિતે

ઇત્યુક્તા સા નૃપેણાથ કન્યા કમલલોચના ॥।
તથા સ્ત્વિતિ નૃપં પ્રોચ્ય તેન સાકં યયૌ ગૃહમ્

રાજા સ્વભાર્યાહસ્તે તાં પ્રદદૌ કન્યકાં શુભામ્ ॥
અબ્રવીચ્ચ સ્વકાં ભાર્યાં રાજા વિન્ધ્યાવલિં તદા

આવયોઃ કન્યકા ચેયં રાજ્ઞિ વિંધ્યાવલે શુભે ॥
રક્ષેમાં સર્વથા ત્વં વૈ પુરુષાંતરતઃ પ્રિયે

ઇતીરિતા નૃપેણાસૌ ભાર્યા વિંધ્યા વલિસ્તદા ॥
ઓમિત્યુક્ત્વાથ તાં કન્યાં પુત્રીં જગ્રાહ પાણિના

પોષિતા પાલિતા રાજ્ઞા સુતવત્કન્યકા ચ સા ॥
ન્યવાત્સીત્સુસુખં રાજ્ઞો ભવને લાલિતા સદા

અથ વિષ્ણુર્જગન્નાથો લક્ષ્મીમન્વેષ્ટુમાદરાત્ ॥
આરૂઢવિનતાનન્દો વૈકુંઠાન્નિર્યયૌ દ્વિજાઃ

વિનિર્ગત્ય સ વૈકુંઠા દ્વિલંઘિતવિયત્પથઃ ॥
બભ્રામ ચ બહૂન્દેશાલ્લઁક્ષ્મીં તત્ર ન દૃષ્ટવાન્

રામસેતુમથાગચ્છદ્ગંધમાદનપર્વતે ॥
અન્વિષ્ય સર્વતો રામસેતું બભ્રામ ચેંદિ રામ્

એતસ્મિન્નેવ કાલે સા પુષ્પાવચયકૌતુકાત્ ॥
સખીભિઃ કન્યકાયાસીદ્ભવનોદ્યાનપાદપાન્

પુષ્પાણ્યવચિનોતિ સ્મ સખીભિઃ સહ કાનને ॥
તત્રાગત્ય તતો વિષ્ણુર્વિપ્રરૂપધરો દ્વિજાઃ

ગંગાંભો વિદધત્સ્કંધે વહઞ્છત્રં કરંણ ચ ॥
ગંગાસ્નાયિદ્વિજસ્યેવ રચયન્વેષમાત્મનઃ

ધારયન્દક્ષિણે પાણૌ કુશાગ્રંથિપવિત્રકમ્ ॥
ભસ્મોદ્ધૂલિતસર્વાંગસ્ત્રિપુણ્ડ્રાવલિશોભિતઃ

પ્રજપઞ્છિવનામાનિ ધૃતરુદ્રાક્ષ માલિકઃ ॥
સોત્તરીયઃ શુચિર્વિપ્રાઃ સમાયાતો જનાર્દનઃ

તમાગતં દ્વિજં દૃષ્ટ્વા સ્તબ્ધાઽતિષ્ઠત કન્યકા ॥
અપશ્યદષ્ટવર્ષાં તાં વલ્લભાં પુષ્પ હારિણીમ્

દૃષ્ટ્વા સ ત્વરયા વિપ્રઃ કન્યાં મધુરભાષિણીમ્ ॥
હઠાત્કૃત્ય કરેણાસૌ જગ્રાહ ગરુડધ્વજઃ

તદા ચુક્રોશ સા કન્યા સખીભિઃ સહ કાનને ॥
તમાક્રોશં સમાકર્ણ્ય રાજા સ તુ સમાગતઃ

પ્રયયૌ ભવનોદ્યાનં વૃતઃ કતિપયૈર્ભટૈઃ ॥
ગત્વા પપ્રચ્છ તાં કન્યાં તત્સખીરપિ ભૂપતિઃ

કિમર્થમધુના ક્રુષ્ટં સખીભિઃ સહ કન્યકે ॥
ત્વયા તુ ભવનોદ્યાને તત્ર કારણમુચ્યતામ્

કેન ત્વં પરિભૂતાસિ હઠાત્કૃષ્ય સુતે મમ ॥
ઇતિ પૃષ્ટા તમાચષ્ટ કન્યા ગુણનિધિં નૃપમ્ ॥
બાષ્પપૂર્ણાનના ખિન્ના રુષિતા ભૃશકાતરા

॥ કન્યોવાચ ॥ ॥
અયં વિપ્રો હઠાત્કૃત્ય જગૃહે પાંડ્યનાથ મામ્

તાતાત્ર વૃક્ષમૂલેઽસૌ સ તિષ્ઠત્યકુતોભયઃ ॥
તદાકર્ણ્ય વચસ્તસ્યા રાજા ગુણનિધિઃ સુધીઃ

જગ્રાહ તરસા વિપ્રમવિદ્વાંસ્તદ્બલં હઠાત્ ॥
રામનાથાલયં નીત્વા નિગૃહ્ય ચ હઠાત્તદા

બદ્ધ્વા નિગડપાશાભ્યા માનયન્મંડપં ચ તમ્ ॥
આત્મપુત્રીં સમાશ્વાસ્ય શુદ્ધાંતમનયન્નૃપઃ

સ્વયં ચ પ્રયયૌ રમ્યં ભવનં નૃપપુંગવઃ ॥
તતો રાત્રૌ સ્વપન્રાજા સ્વપ્ને વિપ્રં દદર્શ તમ્

શંખચક્રગદાપદ્મવનમાલાવિભૂષિતમ્ ॥
કૌસ્તુભાલંકૃતોરસ્કં પીતાંબરધરં હરિમ્

કાલમેઘચ્છવિં કાંતં ગરુડોપરિ સંસ્થિતમ્ ॥
ચારુસ્મિતં ચારુદંતં લસન્મકરકુણ્ડલમ્

વિષ્વક્સેનપ્રભૃતિભિઃ કિંકરૈરુપસેવિતમ્ ॥
શેષપર્યંકશયનં નારદાદિ મુનિસ્તુતમ્

દદર્શ ચ સ્વકાં કન્યાં વિકાસિકમલસ્થિતામ્ ॥
ધૃતપંકજહસ્તાં તાં નીલકુઞ્ચિતમૂર્ધજામ્

વિષ્ણુવક્ષસ્થલ્રાવાસાં સમુન્નતપયોધરામ્ ॥
દિગ્ગજૈરભિષિક્તાંગીં શ્યામાં પીતાંબરાવૃતામ્

સ્વર્ણપંકજસંક્લૃપ્તમાલાલંકૃતમૂર્ધજામ્ ॥
દિવ્યાભરણશોભાઢ્યાં ચારુહા રવિભૂષિતામ્

અનર્ઘરત્નસંક્લૃપ્તનાસાભરણશોભિતામ્ ॥
સુવર્ણનિષ્કાભરણાં કાંચીનૂપુરરાજિતામ્

મહાલક્ષ્મીં દદર્શાસૌ રાજા રાત્રૌ સ્વકાં સુતામ્ ॥
એવં દૃષ્ટ્વા નૃપઃ સ્વપ્ને વિપ્રં તં સ્વસુતામપિ

ઉત્થિતઃ સહસા તલ્પાત્કન્યાગૃહમવાપ ચ ॥
તથૈવ દૃષ્ટવાન્કન્યાં યથા સ્વપ્ને દદર્શ તામ્

અથોદિતે સવિતરિ કન્યામાદાય ભૂમિપઃ ॥
રામનાથાલયં પ્રાપ બ્રાહ્મણં ન્યસ્તવાન્યતઃ

સ મંડપવરે વિપ્રં દદર્શ હરિરૂપિણમ્ ॥
યથા દદર્શ સ્વપ્ને તં વનમાલાદિચિહ્નિતમ્ ॥
વિષ્ણું વિજ્ઞાય તુષ્ટાવ નૃપતિર્હરિમીશ્વરમ્

॥ પુણ્યનિધિરુવાચ ॥ ॥
નમસ્તે કમલાકાંત પ્રસીદ ગરુડધ્વજ

શાર્ઙ્ગપાણે નમસ્તુભ્યમપરાધં ક્ષમસ્વ મે ॥
નમસ્તે પુણ્ડરીકાક્ષ ચક્રપાણે શ્રિયઃપતે

કૌસ્તુભાલંકૃતાંકાય નમઃ શ્રીવત્સલક્ષ્મણે ॥
નમસ્તે બ્રહ્મપુત્રાય દૈત્યસંઘવિદારિણે

અશેષભુવનાવાસનાભિપંકજશાલિને ॥
મધુકૈટભસંહર્ત્રે રાવણાંતકરાય તે

પ્રહ્રાદરક્ષિણે તુભ્યં ધરિત્રીપતયે નમઃ ॥
નિર્ગુણાયાપ્રમેયાય વિષ્ણવે બુદ્ધિસાક્ષિણે

નમસ્તે શ્રીનિવાસાય જગ દ્ધાત્રે પરાત્મને॥
નારાયણાય દેવાય કૃષ્ણાય મધુવિદ્વિષે

નમઃ પંકજનાભાય નમઃ પંકજચક્ષુષે॥
નમઃ પંકજહસ્તાયાઃ પતયે પંકજાંઘ્રયે

ભૂયોભૂયો જગન્નાથ નમઃ પંકજમાલિને ॥
દયામૂર્ત્તે નમસ્તુભ્યમપરાધં ક્ષમસ્વ મે

મયા નિગડપાશાભ્યાં યઃ કૃતો મધુસૂદન ॥
અનયસ્ત્વત્સ્વરૂપમવિદિત્વા કૃતઃ પ્રભો

અતો મદપરાધોઽયં ક્ષંતવ્યો મધુસૂદન ॥
એવં સ્તુત્વા મહાવિષ્ણું રાજા પુણ્યનિધિર્દ્વિજાઃ

લક્ષ્મીં તુષ્ટાવ જનનીં સર્વેષાં પ્રાણિનાં મુદા ॥
નમો દેવિ જગદ્ધાત્રિ વિષ્ણુવક્ષસ્થલાલયે

નમોબ્ધિસંભવે તુભ્યં મહાલક્ષ્મિ હરિપ્રિયે ॥
સિદ્ધ્યૈ પુષ્ટ્યૈ સ્વધાયૈ ચ સ્વાહાયૈ સતતં નમઃ

સંધ્યાયૈ ચ પ્રભાયૈ ચ ધાત્ર્યૈ ભૂત્યૈ નમોનમઃ ॥
શ્રદ્ધાયૈ ચૈવ મેધાયૈ સરસ્વત્યૈ નમોનમઃ

યજ્ઞવિદ્યે મહાવિદ્યે ગુહ્યવિદ્યેતિશોભને ॥
આત્મવિદ્યે ચ દેવેશિ મુક્તિદે સર્વદેહિનામ્

ત્રયીરૂપે જગન્માતર્જગદ્રક્ષાવિધાયિનિ ॥
રક્ષ માં ત્વં કૃપાદૃષ્ટ્યા સૃષ્ટિસ્થિત્યંતકારિણિ

ભૂયોભૂયો નમસ્તુભ્યં બ્રહ્મમાત્રે મહેશ્વરિ ॥
ઇતિ સ્તુત્વા મહાલક્ષ્મીં પ્રાર્થયામાસ માધવમ્

યદજ્ઞાનાન્મયા વિષ્ણો ત્વયિ દોષઃ કૃતોઽધુના ॥
પાદે નિગડબંધેન સ દ્રોહઃ ક્ષમ્યતાં ત્વયા

લોકાસ્તે શિશવઃ સર્વે ત્વં પિતા જગતાં હરે॥
સુતાઽપરાધઃ પિતૃભિઃ ક્ષંતવ્યો મધુસૂદન

અપરાધિનાં ચ દૈત્યાનાં સ્વરૂપમપિ દત્તવાન્ ॥
ભવાન્વિષ્ણો મમાપીમમપરાધં ક્ષમસ્વ વૈ ॥

જિઘાંસયાપિ ભગવન્નાગતાં પૂતનાં પુરા ॥
અનયસ્ત્વત્પદાંભોજં તન્માં રક્ષ કૃપાનિધે ॥
લક્ષ્મીકાંત કૃપાદૃષ્ટિં મયિ પાતય કેશવ

॥
॥ શ્રીસૂત ઉવાચ ॥ ॥
ઇતિ સંપ્રાર્થિતો વિષ્ણુ રાજ્ઞા તેન દ્વિજોત્તમાઃ ॥
પ્રાહ ગંભીરયા વાચા નૃપં પુણ્યનિધિં તતઃ

॥ વિષ્ણુરુવાચ ॥ ॥
રાજન્ન ભીસ્ત્વયા કાર્યા મદ્બંધનનિમિત્તજા

ભક્તવશ્યત્વમધુના તવ પ્રતિહિતં મયા ॥
મમ પ્રીતિકરં યજ્ઞમકરોદ્યદ્ભવાનિહ ॥

અતસ્ત્વં મમ ભક્તોસિ રાજન્પુણ્યનિધેઽધુના ॥
તેનાહં તવ વશ્યોઽસ્મિ ભક્તિપાશેન યંત્રિતઃ

ભક્તાપરાધં સતતં ક્ષમામ્યહમરિં દમ ॥
ત્વદ્ભક્તિં જ્ઞાતુકામેન મયા સંપ્રેરિતા ત્વિયમ્

લક્ષ્મીર્મમ પ્રિયા રાજંસ્ત્વયાસંરક્ષિતાઽધુના ॥
તેનાહં તવ તુષ્ટોઽસ્મિ મત્સ્વરૂપા ત્વિયં સદા

અસ્યાં યો ભક્તિમાંલ્લોકે સ મદ્ભક્તોઽભિધીયતે ॥
અસ્યાં યો વિમુખો રાજન્સ મદ્દ્વેષી સ્મૃતઃ સદા

ત્વમિમાં ભક્તિસં યુક્તો યસ્માત્પૂજિતવાનસિ ॥
મત્પૂજાપિ કૃતા તસ્માન્મદભિન્ના ત્વિયં યતઃ

અતસ્ત્વયા નાપરાધઃ કૃતો મયિ નરેશ્વર ॥
કિં તુ પૂજૈવ વિહિતા તાં ત્વયાર્ચયતા મમ

ત્વયા મદ્ભાર્યયા સાકં સંકેતોઽકારિ યત્પુરા ॥
તત્સંકેતાભિગુત્યર્થં માં યદ્બંધિતવાનસિ

તેન પ્રીતોસ્મિ તે રાજઁલ્લક્ષ્મીઃ સંરક્ષિતાઽધુના ॥
મત્સ્વરૂપા ચ સા લક્ષ્મીર્જગન્માતા ત્રયીમયી

તદ્રક્ષાં કુર્વતા ભૂપ ત્વયા યદ્બંધનં મમ ॥
તત્પ્રિયં મમ રાજેંદ્ર મા ભયં ક્રિયતાં ત્વયા

ઇયં લક્ષ્મીસ્તવ સુતા સત્યમેવ ન સંશયઃ ॥
ઇતીરિતેઽથ હરિણા લક્ષ્મીઃ પ્રોવાચ ભૂપતિમ્ ॥

॥ લક્ષ્મીરુવાચ ॥ ॥
રાજન્પ્રીતાસ્મિ તે ચાહં રક્ષિતા યદ્ગૃહે ત્વયા ॥
ત્વદ્ભક્તિશોધનાર્થં વા અહં વિષ્ણુરુભાવપિ

વિનોદ કલહવ્યાજાદાગતાવિહ ભૂપતે ॥
તવ યોગેન ભક્ત્યા ચ તુષ્ટાવાવાં પરંતપ

આવયોઃ કૃપયા રાજન્સુખં તે ભવતાત્સદા ॥
સર્વભૂમંડલૈશ્વર્યં સદા તે ભવતુ ધ્રુવમ્

આવયોઃ પાદયુગલે ભક્તિર્ભવતુ તે ધ્રુવા ॥
દેહાંતે મમ સાયુજ્યં પુનરાવૃત્તિવર્જિતમ્

નિત્યં ભવતુ તે રાજન્મા ભૂત્તે પાપધીસ્તથા ॥
સદા ધર્મે ભવ ધીર્વિષ્ણુભક્તિયુતા તવ

એવમુક્ત્વા નૃપં લક્ષ્મીર્વિષ્ણોર્વક્ષસ્થલં યયૌ ॥
અથ વિષ્ણુરુવાચેદં રાજાનં દ્વિજ પુંગવાઃ

યથા ત્વયાત્ર બદ્ધોહં નિગડેન નૃપોતમ ॥
તદ્રૂપેણૈવ વત્સ્યામિ સેતુમાધવસંજ્ઞિતઃ

મયૈવ કારિતઃ સેતુસ્તદ્રક્ષાર્થમહં નૃપ ॥
ભૂતરાક્ષસસંઘેભ્યો ભયાનામુપશાંતયે

બ્રહ્માપિ સેતુરક્ષાર્થં વસત્યત્રદિવાનિશમ્॥
શંકરો રામનાથાખ્યો નિત્યં સેતૌ વસત્યથ

ઇંદ્રાદિલોકપાલાશ્ચ વસંત્યત્રમુદાન્વિતાઃ ॥
અતોઽહમત્રવત્સ્યામિ સેતુમાધવસંજ્ઞયા

સેતુસંરક્ષણાર્થં વૈ સર્વોપદ્રવશાંતયે ॥
સર્વેષામિષ્ટસિદ્ધ્યર્થં સર્વપાપોપશાંતયે

ત્વયા નિગડબદ્ધં માં સેવતે યેઽત્ર માનવાઃ ॥
તે યાંતિ મમ સાયુજ્યં સર્વાભીષ્ટં તથા નૃપ

મમ લક્ષ્મ્યાસ્તવ તથા ચરિતં યે પઠંતિ વૈ॥
ન તે યાસ્યંતિ દારિદ્ર્યં કિં ત્વૈશ્વર્યં વ્રજંતિ તે

ત્વત્કૃતં યદિદં સ્તોત્રં મમ લક્ષ્મ્યા વિશાંપતે ॥
યે પઠંતિ ચ શૃણ્વંતિ લિખંતિ ચ મુદાન્વિતાઃ

ન તેષાં પુનરાવૃત્તિર્મમ લોકાત્કદાચન ॥
ઇત્યુક્ત્વા સ હરિસ્તત્ર નૃપં પુણ્યનિધિં તદા

તત્રૈવ પૂર્ણરૂપેણ સંનિ ધત્તે સ્મ સર્વદા ॥
નૃપઃ પુણ્યનિધિર્વિપ્રાઃ સેતુમાધવરૂપિણમ્

વિષ્ણું પ્રણમ્ય ભક્ત્યા તુ મહાપૂજાં વિધાય ચ ॥
સેવિત્વા રામનાથં ચ સ્વમેવ ભવનં યયૌ

યાવજ્જીવમસૌ તત્ર સેતૌ ન્યવસદુત્તમે ॥
મધુરાયાં નિજં પુત્રં સ્થાપયામાસ પાલકમ્

તત્રૈવ નિવસન્રાજા દેહાંતે મુક્તિમાપ્તવાન્ ॥
વિંધ્યાવલિશ્ચ તત્પત્ની તમેવાનુમમાર સા ॥
પતિવ્રતા પતિપ્રાણા પ્રયયૌ સાપિ સદ્ગતિમ્

।
॥ શ્રીસૂત ઉવાચ ॥ ॥
યેત્ર ભક્તિયુતા નિત્યં સેવંતે સેતુમાધવમ્

ન તેષાં પુનરાવૃત્તિઃ કૈલાસાજ્જાતુ જાયતે ॥
સેતુમાધવસેવા યે ન કુર્વંત્યત્ર માનવાઃ ॥

ન તેષાં રામનાથસ્ય સેવા ફલવતી ભવેત્ ॥
ગૃહીત્વા સૈકતં સેતોર્ગંગાયાં નિક્ષિપેદ્યદિ

વિભજ્ય માધવપુરે વૈકુંઠે સ વસેન્નરઃ ॥
ગંગાં જિગમિષુર્વિપ્રાઃ સેતુમાધવસન્નિધૌ

સંકલ્પ્ય ગંગાં નિર્ગચ્છેત્સા યાત્રા સફલા ભવેત્॥
આનીય ગંગાસલિલં રામેશમભિ ષિચ્ય ચ

સેતૌ નિક્ષિપ્ય તદ્ભારં બ્રહ્મ પ્રાપ્નોત્યસંશયઃ ॥
ઇતિ વઃ કથિતં વિપ્રાઃ સેતુમાધવવૈભવમ્

એતત્પઠન્વા શૃણ્વન્વા વૈકુંઠે લભતે ગતિમ્

ઇતિ શ્રીસ્કાંદે મહાપુરાણ એકાશીતિસાહસ્ર્યાં સંહિતાયાં તૃતીય બ્રહ્મખણ્ડે સેતુમાહાત્મ્યે સેતુમાધવપ્રશંસાયાં પુણ્ય નિધિચરિતકથનંનામ પંચાશત્તમોઽધ્યાયઃ