સ્કંદ પુરાણ · અધ્યાય 3.44

॥ ઋષય ઊચુઃ ॥ ॥
સર્વવેદાર્થતત્ત્વજ્ઞ પુરાણાર્ણવપારગ ॥
વ્યાસપાદાંબુજદ્વંદ્વનમસ્કારહૃતાશુભ

પુરાણાર્થોપદેશેન સર્વપ્રાણ્યુપકા રક ॥
ત્વયા હ્યનુગૃહીતાઃ સ્મ પુરાણકથનાદ્વયમ્

અધુના સેતુમાહાત્મ્યકથનાત્સુતરાં મુને ॥
વયં કૃતાર્થાઃ સંજાતા વ્યાસશિષ્ય મહામતે ॥

યથા પ્રાતિષ્ઠિપલ્લિંગં રામો દશરથાત્મજઃ ॥
તચ્છ્રોતું વયમિચ્છામસ્ત્વમિદાનીં વદસ્વ નઃ

॥ શ્રીસૂત ઉવાચ ॥ ॥
યદર્થં સ્થાપિતં લિંગં ગન્ધમાદનપર્વતે ॥
રામચન્દ્રેણ વિપ્રેંદ્ર તદિદાનીં બ્રવીમિ વઃ

હૃતભાર્યો વનાદ્રામો રાવણેન બલીયસા ॥
કપિસેનાયુતો ધીરઃ સસૌમિ ત્રિર્મહાબલઃ

મહેંદ્રં ગિરિમાસાદ્ય વ્યલોકયત વારિધિમ્ ॥
તસ્મિન્નપારે જલધૌ કૃત્વા સેતું રઘૂદ્વહઃ

તેન ગત્વા પુરીં લંકાં રાવણેનાભિરક્ષિ તામ્ ॥
અસ્તંગતે સહસ્રાંશૌ પૌર્ણમાસ્યાં નિશામુખે

રામઃ સસૈનિકો વિપ્રાઃ સુવેલગિરિમારુહત્ ॥
તતઃ સૌધસ્થિતં રાત્રૌ દૃષ્ટ્વા લંકેશ્વરં બલી। ॥

સૂર્યપુત્રોઽસ્ય મુકુટં પાતયાસ ભૂતલે ॥
રાક્ષસો ભગ્નમુકુટઃ પ્રવિવેશ ગૃહોદરમ્

ગૃહં પ્રવિષ્ટે લંકેશે રામઃ સુગ્રીવસંયુતઃ ॥
સાનુજઃ સેનયા સાર્દ્ધમવરુહ્ય ગિરેસ્તટાત્

સેનાં ન્યવેશયદ્વીરો રામો લંકાસમીપતઃ ॥
તતો નિવેશમાનાંસ્તાન્વાનરાન્રાવણાનુગાઃ

અભિજગ્મુર્મહાકાયાઃ સાયુધાઃ સહસૈનિકાઃ ॥
પર્વણઃ પૂતનો જૃંભઃ ખરઃ ક્રોધવશો હરિઃ

પ્રારુજશ્ચારુજશ્ચૈવ પ્રહસ્તશ્ચેતરે તથા ॥
તતોઽભિપતતાં તેષામદૃશ્યાનાં દુરાત્મનામ્

અન્તર્ધાનવધં તત્ર ચકાર સ્મ વિભીષણઃ ॥
તે દૃશ્યમાના બલિભિર્હરિભિર્દૂરપાતિભિઃ

નિહતાઃ સર્વતશ્ચૈતે ન્યપતન્વૈ ગતાસવઃ ॥
અમૃષ્યમાણઃ સબલો રાવણો નિર્યયાવથ

વ્યૂહ્ય તાન્વાનરાન્સર્વાન્ન્યવારયત સાયકૈઃ ॥
રાઘવસ્ત્વથ નિર્યાય વ્યૂઢાનીકો દશાનનમ્

પ્રત્યયુધ્યત વેગેન દ્વંદ્વયુદ્ધમભૂત્તદા ॥
યુયુધે લક્ષ્મણેનાથ ઇંદ્રજિદ્રાવણાત્મજઃ

વિરૂપાક્ષેણ સુગ્રીવસ્તારેયેણાપિ ખર્વટઃ ॥
પૌંડ્રેણ ચ નલસ્તત્ર પુટેશઃ પનસેન ચ

અન્યેપિ કપયો વીરા રાક્ષસૈર્દ્વંદ્વમેત્ય તુ ॥
ચક્રુર્યુદ્ધં સુતુમુલં ભીરૂણાં ભયવર્દ્ધનમ્

અથ રક્ષાંસિ ભિન્નાનિ વાનરૈર્ભીમવિક્રમૈઃ ॥
પ્રદુદ્રુવૂ રણાદાશુ લંકાં રાવણપાલિતામ્

ભગ્નેષુ સર્વસૈન્યેષુ રાવણપ્રેરિતેન વૈ ॥
પુત્રેણેંદ્રજિતા યુદ્ધે નાગાસ્ત્રૈરતિદારુણૈઃ

વિદ્ધૌ દાશરથી વિપ્રા ઉભૌ તૌ રામલક્ષ્મણૌ ॥
મોચિતૌ વૈનતેયેન ગરુડેન મહાત્મના

તત્ર પ્રહસ્તસ્તરસા સમભ્યેત્ય વિભીષણમ્ ॥
ગદયા તાડયામાસ વિનદ્ય રણકર્કશઃ

સ તયાભિહતો ધીમાન્ગદયા ભામિવેગયા ॥
નાકંપત મહાબાહુર્હિમવાનિવ સુસ્થિતઃ

તતઃ પ્રગૃહ્ય વિપુલામષ્ટઘંટાં વિભીષણઃ ॥
અભિમંત્ર્ય મહાશક્તિં ચિક્ષે પાસ્ય શિરઃ પ્રતિ

પતંત્યા સ તયા વેગાદ્રાક્ષસોઽશનિના યથા।
હૃતોત્તમાંગો દદૃશે વાતરુગ્ણ ઇવ દ્રુમઃ

તં દૃષ્ટ્વા નિહતં સંખ્યે પ્રહસ્તં ક્ષણદાચરમ્॥
અભિદુદ્રાવ ધૂમ્રાક્ષો વેગેન મહતા કપીન્

કપિસૈન્યં સમાલોક્ય વિદ્રુતં પવનાત્મજઃ॥
ધૂમ્રાક્ષમાજઘાનાશુ શરેણ રણમૂર્ધનિ

ધૂમ્રાક્ષં નિહતં દૃષ્ટ્વા હતશેષા નિશાચરાઃ ॥
સર્વં રાજ્ઞે યથાવૃત્તં રાવણાય ન્યવેદયન્

તતઃ શયાનં લંકેશઃ કુમ્ભકર્ણમબોધયત્ ॥
પ્રબુદ્ધં પ્રેષયામાસ યુદ્ધાય સ ચ રાવણઃ

આગતં કુમ્ભકર્ણં તં બ્રહ્માસ્ત્રેણ તુ લક્ષ્મણઃ ॥
જઘાન સમરે ક્રુદ્ધો ગતાસુર્ન્યપતચ્ચ સઃ

દૂષણસ્યાનુજૌ તત્ર વત્રવેગપ્રમાથિનૌ ॥
હનુમન્નીલનિહતૌ રાવણપ્રતિમૌ રણે

વજ્રદંષ્ટ્રં સમવધીદ્વિશ્વકર્મસુતો નલઃ ॥
અકંપનં ચ ન્યહનત્કુમુદો વાનરર્ષભઃ

ષષ્ઠ્યાં પરાજિતો રાજા પ્રાવિશચ્ચ પુરીં તતઃ ॥
અતિકાયો લક્ષ્મણેન હતશ્ચ ત્રિશિરાસ્તથા

સુગ્રીવેણ હતૌ યુદ્ધે દેવાંત કનરાંતકૌ ॥
હનૂમતા હતૌ યુદ્ધે કુમ્ભકર્ણસુતાવુભૌ

વિભીષણેન નિહતો મકરાક્ષઃ ખરાત્મજઃ ॥
તત ઇન્દ્રજિતં પુત્રં ચોદયામાસ રાવણઃ

ઇન્દ્રજિન્મોહયિત્વા તૌ ભ્રાતરૌ રામલક્ષમણૌ॥
ઘોરૈઃ શરૈરંગદેન હતવાહો દિવિ સ્થિતઃ

કુમુદાંગદસુગ્રીવનલજાંબવદાદિભિઃ॥
સહિતા વાનરાઃ સર્વે ન્યપતંસ્તેન ઘાતિતાઃ

એવં નિહત્ય સમરે સસૈન્યૌ રામલક્ષ્મણૌ॥
અંતર્દધે તદા વ્યોમ્નિ મેઘનાદો મહાબલઃ

તતો વિભીષણો રામમિક્ષ્વાકુકુલભૂષણમ્ ॥
ઉવાચ પ્રાંજલિર્વાક્યં પ્રણમ્ય ચ પુનઃપુનઃ

અયમંભો ગૃહીત્વા તુ રાજરાજસ્ય શાસનાત્ ॥
ગુહ્યકોઽભ્યાગતો રામ ત્વત્સકાશમરિંદમ

ઇદમંભઃ કુબેરસ્તે મહારાજ પ્રયચ્છતિ ॥
અંતર્હિતાનાં ભૂતાનાં દર્શનાર્થં પરં તપ

અનેન સ્પૃષ્ટનયનો ભૂતાન્યંતર્હિતાન્યપિ ॥
ભવાન્દ્રક્ષ્યતિ યસ્મૈ વા ભવાનેતત્પ્રદાસ્યતિ

સોઽપિ દ્રક્ષ્યતિ ભૂતાનિ વિયત્ત્યંતર્હિતાનિ વૈ ॥
તથેતિ રામસ્તદ્વારિ પ્રતિગૃહ્યાથ સત્કૃતમ્

ચકાર નેત્રયોઃ શૌચં લક્ષ્મણશ્ચ મહાબલઃ ।
સુગ્રીવજાંબવન્તૌ ચ હનુમાનંગદસ્તથા

મૈંદદ્વિવિદનીલાશ્ચ યે ચાન્યે વાનરાસ્તથા ॥
તે સર્વે રામદત્તેન વારિણા શુદ્ધચક્ષુષઃ

આકાશેંતર્હિતં વીરમપશ્યન્રાવણા ત્મજમ્ ॥
તતસ્તમભિદુદ્રાવ સૌમિત્રિર્દૃષ્ટિગોચરમ્

તતો જઘાન સંકુદ્ધો લક્ષ્મણઃ કૃતલક્ષણઃ ॥
કુવેરપ્રેષિતજલૈઃ પવિત્રીકૃતલોચનઃ ॥

તતઃ સમભવદ્યુદ્ધં લક્ષ્મણેંદ્રજિતોર્મહત્ ॥
અતીવ ચિત્રમાશ્ચર્યં શક્રપ્રહ્લાદયોરિવ

તતસ્તૃતીયદિવસે યત્નેન મહતા દ્વિજાઃ ॥
ઇંદ્રજિન્નિહતો યુદ્ધે લક્ષ્મણેન બલીયસા

તતો મૂલબલં સર્વં હતં રામેણ ધીમતા ॥
અથ ક્રુદ્ધો દશગ્રીવઃ પ્રિયપુત્રે નિપાતિતે

નિર્યયૌ રથમાસ્થાય નગરાદ્બહુસૈનિકઃ ॥
રાવણો જાનકીં હન્તુમુદ્યુક્તો વિંધ્યવારિતઃ

તતો હર્યશ્વયુક્તેન રથેનાદિત્યવર્ચસા ॥
ઉપતસ્થે રણે રામં માતલિઃ શક્રસારથિઃ

ઐન્દ્રં રથં સમારુહ્ય રામો ધર્મભૃતાં વરઃ ॥
શિરાંસિ રાક્ષસેન્દ્રસ્ય બ્રહ્માસ્ત્રેણાવધીદ્રણે

તતો હતદશગ્રીવં રામં દશરથાત્મજમ્ ॥
આશીર્ભિર્જયયુક્તાભિર્દેવાઃ સર્ષિપુરોગમાઃ

તુષ્ટુવુઃ પરિસંતુષ્ટાઃ સિદ્ધવિદ્યાધરાસ્તથા ॥
રામં કમલપત્રાક્ષં પુષ્પ વર્ષેરવાકિરન્

રામસ્તૈઃ સુરસંઘાતૈઃ સહિતઃ સૈનિકૈર્વૃતઃ ॥
સીતાસૌમિત્રિસહિતઃ સમારુહ્ય ચ પુષ્પકમ્

તથાભિષિચ્ય રાજાનં લંકાયાં ચ વિભીષણમ્ ॥
કપિસેનાવૃતો રામો ગન્ધમાદનમન્વગાત્

પરિશોધ્ય ચ વૈદેહીં ગંધમાદનપર્વતે ॥
રામં કમલપત્રાક્ષં સ્થિતવાનર સંવૃતમ્

હતલંકેશ્વરં વીરં સાનુજં સવિભીષણમ્ ॥
સભાર્યં દેવવૃંદૈશ્ચ સેવિતં મુનિપુંગવૈઃ

મુનયોઽભ્યાગતા દ્રષ્ટું દંડકારણ્ય વાસિનઃ ॥
અગસ્ત્યં તે પુરસ્કૃત્ય તુષ્ટુવુર્મૈથિલીપતિમ્

॥ મુનય ઊચુઃ ॥ ॥
નમસ્તે રામચંદ્રાય લોકાનુગ્રહકારિણે ॥
અરાવણં જગત્કર્તુમવતીર્ણાય ભૂતલે

તાટિકાદેહસંહર્ત્રે ગાધિજાધ્વરરક્ષિણે ॥
નમસ્તે જિતમારીચ સુવાહુપ્રાણહારિણે

અહલ્યામુક્તિસંદાયિપાદપંકજરેણવે ॥
નમસ્તે હરકોદણ્ડલીલાભઞ્જનકારિણે

નમસ્તે મૈથિલીપાણિગ્રહણોત્સવશાલિને ॥
નમસ્તે રેણુકાપુત્રપરાજયવિધાયિને

સહલક્ષ્મણસીતાભ્યાં કૈકેય્યાસ્તુ વરદ્વયાત્ ॥
સત્યં પિતૃવચઃ કર્તું નમો વનમુપે યુષે

ભરતપ્રાર્થનાદત્તપાદુકાયુગુલાય તે ॥
નમસ્તે શરભંગસ્ય સ્વર્ગપ્રાપ્ત્યૈકહેતવે

નમો વિરાધસંહર્ત્રે ગૃધરાજસ ખાય તે ॥
માયામૃગમહાક્રૂરમારીચાંગવિદારિણે

સીતાપહારિલોકેશયુદ્ધત્યક્તકલેવરમ્ ॥
જટાયુષં તુ સંદહ્ય તત્કૈવલ્યપ્રદાયિને ॥

નમઃ કબંધસંહર્ત્રે શવરીપૂજિતાંઘ્રયે ॥
પ્રાપ્તસુગ્રીવસખ્યાય કૃતવાલિવધાય તે

નમઃ કૃતવતે સેતું સમુદ્રે વરુણાલયે ॥
સર્વરાક્ષસસંહર્ત્રે રાવણપ્રાણહારિણે

સંસારાંબુધિસંતારપોતપાદાંબુજાય તે ॥
નમો ભક્તાર્તિસંહર્ત્રે સચ્ચિદાનંદરૂપિણે

નમસ્તે રામ ભદ્રાય જગતામૃદ્ધિહેતવે ॥
રામાદિપુણ્યનામાનિ જપતાં પાપહારિણે

નમસ્તે સર્વલોકાનાં સૃષ્ટિસ્થિત્યંતકારિણે ॥
નમસ્તે કરુણામૂર્તે ભક્તરક્ષણદીક્ષિત

સસીતાય નમસ્તુભ્યં વિભીષણસુખપ્રદ ॥
લંકેશ્વરવધાદ્રામ પાલિતં હિ જગત્ત્વયા

રક્ષરક્ષ જગન્નાથ પાહ્ય સ્માઞ્જાનકીપતે ॥
સ્તુત્વૈવં મુનયઃ સર્વે તૂષ્ણીં તસ્થુર્દ્વિજોત્તમાઃ

॥ શ્રીસૂત ઉવાચ ॥ ॥
ય ઇદં રામચન્દ્રસ્ય સ્તોત્રં મુનિભિરીરિતમ્ ॥
ત્રિસંધ્યં પઠતે ભક્ત્યા ભુક્તિં મુક્તિં ચ વિંદતિ

પ્રયાણકાલે પઠતો ન્ ભીતિરુપજાયતે ॥
એતત્સ્તોત્રસ્ય પઠનાદ્ભૂતવેતાલકાદયઃ ॥

નશ્યંતિ રોગા નશ્યંતિ નશ્યતે પાપસંચયઃ ॥
પુત્રકામો લભેત્પુત્રં કન્યા વિંદતિ સત્પતિમ્

મોક્ષકામો લભેન્મોક્ષં ધનકામો ધનં લભેત્॥
સર્વાન્કામાનવાપ્નોતિ પઠન્ભક્ત્યા ત્વિમં સ્તવમ્

તતો રામો મુનીન્પ્રાહ પ્રણમ્ય ચ કૃતાંજલિઃ ॥
અહં વિશુદ્ધયે પ્રાપ્યઃ સકલૈરપિ માનવૈઃ

મદ્દૃષ્ટિગોચરો જન્તુર્નિત્યમોક્ષસ્ય ભાજનમ્ ॥
તથાપિ મુનયો નિત્યં ભક્તિયુક્તેન ચેતસા

સ્વાત્મલાભેન સંતુષ્ટાન્સાધૂન્ભૂતસુહૃત્તમાન્ ॥
નિરહંકારિણઃ શાંતાન્નમસ્યામ્યૂર્ધ્વરેતસઃ

યસ્માદ્બ્રહ્મણ્યદેવોઽહમતો વિપ્રાન્ભજે સદા ॥
યુષ્માન્પૃચ્છામ્યહં કિંચિત્તદ્વદધ્વં વિચાર્ય તુ

રાવણસ્ય વધાદ્વિપ્રા યત્પાપં મમ વર્તતે ॥
તસ્ય મે નિષ્કૃતિં બ્રૂત પૌલસ્ત્યવધજસ્ય હિ ॥
યત્કૃત્વા તેન પાપે ન મુચ્યેઽહં મુનિપુંગવાઃ

॥ મુનય ઊચુઃ ॥ ॥
સત્યવ્રત જગન્નાથ જગદ્રક્ષાધુરંધર

સર્વલોકોપકારાર્થં કુરુ રામ શિવાર્ચનમ્ ॥
ગન્ધમાદનશૃંગેઽસ્મિન્મહાપુણ્યે વિમુક્તિદે

શિવલિંગપ્રતિષ્ઠાં ત્વં લોકસંગ્રહકામ્યયા ॥
કુરુ રામ દશગ્રીવવધદોષાપનુત્તયે ॥

લિંગસ્થાપનજં પુણ્યં ચતુર્વક્ત્રોઽપિ ભાષિતુમ્॥
ન શક્નોતિ તતો વક્તું કિં પુનર્મનુજેશ્વર

।
યત્ત્વયા સ્થાપ્યતે લિગં ગન્ધમાદનપર્વતે ॥
અસ્ય સંદર્શનં પુંસાં કાશીલિંગાવલોકનાત્

અધિકં કોટિગુણિતં ફલવત્સ્યાન્ન સંશયઃ ॥
તવ નામ્ના ત્વિદં લિંગં લોકે ખ્યાતિં સમશ્નુતામ્

નાશકં પુણ્યપાપાખ્યકાષ્ઠાનાં દહનોપમમ્ ॥
ઇદં રામેશ્વરં લિંગં ખ્યાતં લોકે ભવિષ્યતિ

મા વિલંબં કુરુષ્વાતો લિંગસ્થાપનકર્મણિ ॥
રામચંદ્ર મહાભાગ કરુણાપૂર્ણવિગ્રહ

॥ શ્રીસૂત ઉવાચ ॥ ॥
ઇતિ શ્રુત્વા વચો રામો મુનીનાં તં મુનીશ્વરાઃ ॥
પુણ્યકાલં વિચાર્યાથ દ્વિમુહૂર્તં જગત્પતિઃ

કૈલાસં પ્રેષયામાસ હનુમન્તં શિવાલયમ્ ॥
શિવલિંગં સમાનેતું સ્થાપનાર્થં રઘૂદ્વહઃ

॥ રામ ઉવાચ ॥ ॥
હનૂમન્નંજનીસૂનો વાયુપુત્ર મહાબલ ॥
કૈલાસં ત્વરિતો ગત્વા લિંગમાનય મા ચિરમ્

ઇત્યાજ્ઞપ્તસ્સ રામેણ ભુજાવાસ્ફાલ્ય વીર્યવાન્ ॥
મુહૂર્તદ્વિતયં જ્ઞાત્વા પુણ્યકાલં કપીશ્વરઃ

પશ્યતાં સર્વદેવાનામૃષીણાં ચ મહાત્મનામ્ ॥
ઉત્પપાત મહાવેગશ્ચાલયન્ગંધમાદનમ્

લંઘયન્સ વિયન્માર્ગં કૈલાસં પર્વતં યયૌ ॥
ન દદર્શ મહાદેવં લિંગરૂપધરં કપિઃ

કૈલાસે પર્વતે તસ્મિન્પુણ્યે શંકરપાલિતે ॥
આંજનેયસ્તપસ્તેપે લિંગપ્રાપ્ત્યર્થમાદરાત્

પ્રાગગ્રેષુ સમાસીનઃ કુશેષુ મુનિપુંગવાઃ ॥
ઊર્ધ્વબાહુર્નિરાલમ્બો નિરુચ્છ્વાસો જિતેંદ્રિયઃ

પ્રસાદયન્મહાદેવં લિંગં લેભે સ મારુતિઃ ॥
એતસ્મિન્નંતરે વિપ્રા મુનિભિસ્તત્ત્વદર્શિભિઃ

અનાગતં હનૂમંતં કાલં સ્વલ્પાવશેષિતમ્ ॥
જ્ઞાત્વા પ્રકથિતં તત્ર રામં પ્રતિ મહામતિમ્

રામરામ મહાબાહો કાલો હ્યત્યેતિ સાંપ્રતમ્ ॥
જાનક્યા યત્કૃતં લિંગં સૈકતં લીલયા વિભો

તલ્લિંગં સ્થાપયસ્વાદ્ય મહાલિંગમનુત્તમમ્ ॥
શ્રુત્વૈતદ્વચનં રામો જાનક્યા સહ સત્વરમ્

મુનિભિઃ સહિતઃ પ્રીત્યા કૃતકૌતુકમંગલઃ ॥
જ્યેષ્ઠે માસે સિતે પક્ષે દશમ્યાં બુધહસ્તયોઃ

ગરાનંદે વ્યતીપાતે કન્યા ચન્દ્રે વૃષે રવૌ ॥
દશયોગે મહાપુણ્યે ગન્ધમાદનપર્વતે

સેતુમધ્યે મહાદેવં લિંગરૂપધરં હરમ્ ॥
ઈશાનં કૃત્તિવસનં ગંગાચંદ્રકલાધરમ્

રામો વૈ સ્થાપયામાસ શિવલિંગમનુત્તમમ્ ॥
લિંગસ્થં પૂજયામાસ રાઘવઃ સાંબમીશ્વરમ્

લિંગસ્થઃ સ મહાદેવઃ પાર્વત્યા સહ શંકરઃ ॥
પ્રત્યક્ષમેવ ભગવાન્દત્તવાન્વરમુત્તમમ્

સર્વલોકશરણ્યાય રાઘવાય મહાત્મને ॥
ત્વયાત્ર સ્થાપિતં લિંગં યે પશ્યંતિ રઘૂદ્વહ

મહાપાતકયુક્તાશ્ચ તેષાં પાપં પ્રણશ્યતિ ॥
સર્વાણ્યપિ હિ પાપાનિ ધનુષ્કોટૌ નિમજ્જનાત્

દર્શનાદ્રામલિંગસ્ય પાતકાનિ મહાંત્યપિ ॥
વિલયં યાંતિ રાજેંદ્ર રામચન્દ્ર ન સંશયઃ

પ્રાદાદેવં હિ રામાય વરં દેવોંઽબિકાપતિઃ ॥
તદગ્રે નંદિકેશં ચ સ્થાપયામાસ રાઘવઃ ॥

ઈશ્વરસ્યાભિષેકાર્થં ધનુષ્કોટ્યાથ રાઘવઃ ॥
એકં કૂપં ધરાં ભિત્ત્વા જનયામાસ વૈ દ્વિજાઃ

તસ્માજ્જલમુપાદાય સ્નાપયામાસ શંકરમ્ ॥
કોટિતીર્થમિતિ પ્રોક્તં તત્તીર્થં પુણ્યમુત્તમમ્

ઉક્તં તદ્વૈભવં પૂર્વમસ્માભિર્મુનિપુંગવાઃ ॥
દેવાશ્ચ મુનયો નાગા ગન્ધર્વાપ્સ રસાં ગણાઃ ॥
સર્વેપિ વાનરા લિંગમેકૈકં ચક્રુરાદરાત્

॥ શ્રીસૂત ઉવાચ ॥ ॥
એવં વઃ કથિતં વિપ્રા યથા રામેણ ધીમત

॥
સ્થાપિતં શિવલિંગં વૈ ભુક્તિમુક્તિપ્રદાયકમ્ ॥
ઇમાં લિંગપ્રતિષ્ઠાં યઃ શૃણોતિ પઠતેઽથવા

સ રામેશ્વરલિંગસ્ય સેવાફલમવાપ્નુયાત્ ॥॥
સાયુજ્યં ચ સમાપ્નોતિ રામનાથસ્ય વૈભવાત્

ઇતિ શ્રીસ્કાંદે મહાપુરાણ એકાશીતિસાહસ્ર્યાં સંહિતાયાં તૃતીયે બ્રહ્મખણ્ડે સેતુમાહાત્મ્યે રામનાથલિંગપ્રતિષ્ઠાવિધિવર્ણનંનામ ચતુશ્ચત્વારિંશોઽધ્યાયઃ